Pramāṇa · Search · About · API

Shivapurana 7.2.14: caturdaśo'dhyāyaḥ | pañcākṣaramahimavarṇanam

Śivapurāṇa (complete text) 7.2.14

Language
Sanskrit

Contents

caturdaśo'dhyāyaḥ | pañcākṣaramahimavarṇanam

7.2.14.1

īśvara uvāca |
ājñāhīnaṃ kriyāhīnaṃ śraddhāhīnaṃ varānane |
ājñārthaṃ dakṣiṇāhīnaṃ sadā japtaṃ ca niṣphalam ||

7.2.14.2

ājñāsiddhaṃ kriyāsiddhaṃ śraddhāsiddhaṃ mamātmakam |
evaṃ ceddakṣiṇāyuktaṃ mantrasiddhirmahatphalam ||

7.2.14.3

upagamya guruṃ vipramācāryaṃ tattvavedinam |
jāpinaṃ sadguṇopetaṃ dhyānayogaparāyaṇam ||

7.2.14.4

toṣayettaṃ prayatnena bhāvaśuddhisamanvitaḥ |
vācā ca manasā caiva kāyena draviṇena ca ||

7.2.14.5

ācāryaṃ pūjayedvipraḥ sarvadātiprayatnataḥ |
hastyaśvaratharatnāni kṣetrāṇi ca gṛhāṇi ca ||

7.2.14.6

bhūṣaṇāni ca vāsāṃsi dhānyāni ca dhanāni ca |
etāni gurave dadyādbhaktyā ca vibhave sati ||

7.2.14.7

vittaśāṭhyaṃ na kurvīta yadīcchetsiddhimātmanaḥ |
paścānnivedya svātmānaṃ gurave saparicchadam ||

7.2.14.8

evaṃ sampūjya vidhivadyathāśakti tvavañcayan |
ādadīta gurormantraṃ jñānaṃ caiva krameṇa tu ||

7.2.14.9

evaṃ tuṣṭo guruḥ śiṣyaṃ pūjakaṃ vatsaroṣitam |
śuśrūṣumanahaṅkāraṃ snātaṃ śucimupoṣitam ||

7.2.14.10

snāpayitvā viśuddhyarthaṃ pūrṇakumbhaghṛtena vai |
jalena mantraśuddhena puṇyadravyayutena ca ||

7.2.14.11

alaṅkṛtya suveṣaṃ ca gandhasragvastrabhūṣaṇaiḥ |
puṇyāhaṃ vācayitvā ca brāhmaṇānabhipūjya ca ||

7.2.14.12

samudratīre nadyāṃ ca goṣṭhe devālaye'pi vā |
śucau deśe gṛhe vāpi kāle siddhikare tithau ||

7.2.14.13

nakṣatre śubhayoge ca sarvadoṣavivarjite |
anugṛhya tato dadyājjñānaṃ mama yathāvidhi ||

7.2.14.14

svareṇoccārayetsamyagekānte'tiprasannadhīḥ |
uccāryoccārayitvā tamāvayormantramuttamam ||

7.2.14.15

śivaṃ cāstu śubhaṃ cāstu śobhano'stu priyo'stviti |
evaṃ dadyād gururmantramājñāṃ caiva tataḥ param ||

7.2.14.16

evaṃ labdhvā gurormantramājñāṃ caiva samāhitaḥ |
saṅkalpya ca japennityaṃ puraścaraṇapūrvakam ||

7.2.14.17

yāvajjīvaṃ japennityamaṣṭottarasahasrakam |
ananyastatparo bhūtvā sa yāti paramāṃ gatim ||

7.2.14.18

japedakṣaralakṣaṃ vai caturguṇitamādarāt |
naktāśī saṃyamī yaḥ sa pauraścaraṇikaḥ smṛtaḥ ||

7.2.14.19

yaḥ puraścaraṇaṃ kṛtvā nityajāpī bhavetpunaḥ |
tasya nāsti samo loke sa siddhaḥ siddhido bhavet ||

7.2.14.20

snānaṃ kṛtvā śucau deśe baddhvā ruciramāsanam |
tvayā māṃ hṛdi sañcintya sañcintya svaguruṃ tataḥ ||

7.2.14.21

udaṅmukhaḥ prāṅmukho vā maunī caikāgramānasaḥ |
viśodhya pañcatattvāni dahanaplāvanādibhiḥ ||

7.2.14.22

mantranyāsādikaṃ kṛtvā saphalīkṛtavigrahaḥ |
āvayorvigrahau dhyāyanprāṇāpānau niyamya ca ||

7.2.14.23

vidyāsthānaṃ svakaṃ rūpaṃ ṛṣiṃ chando'dhidaivatam |
bījaṃ śaktiṃ tathā vākyaṃ smṛtvā pañcākṣarīṃ japet ||

7.2.14.24

uttamaṃ mānasaṃ jāpyamupāṃśuṃ caiva madhyamam |
adhamaṃ vācikaṃ prāhurāgamārthaviśāradāḥ ||

7.2.14.25

uttamaṃ rudradaivatyaṃ madhyamaṃ viṣṇudaivatam |
adhamaṃ brahmadaivatyamityāhuranupūrvaśaḥ ||

7.2.14.26

yaduccanīcasvaritaiḥ spaṣṭāspaṣṭapadākṣaraiḥ |
mantramuccārayedvācā vāciko'yaṃ japaḥ smṛtaḥ ||

7.2.14.27

jihvāmātraparispandādīṣaduccārito'pi vā |
aparairaśrutaḥ kiñcicchruto vopāṃśurucyate ||

7.2.14.28

dhiyā yadakṣaraśreṇyā varṇādvarṇaṃ padātpadam |
śabdārthacintanaṃ bhūyaḥ kathyate mānaso japaḥ ||

7.2.14.29

vācikastveka eva syādupāṃśuḥ śatamucyate |
sāhasraṃ mānasaḥ proktaḥ sagarbhastu śatādhikaḥ ||

7.2.14.30

prāṇāyāmasamāyuktaḥ sagarbho japa ucyate |
ādyantayoragarbho'pi prāṇāyāmaḥ praśasyate ||

7.2.14.31

catvāriṃśatsamāvṛttīḥ prāṇānāyamya saṃsmaret |
mantraṃ mantrārthaviddhīmānaśaktaḥ śaktito japet ||

7.2.14.32

pañcakaṃ trikamekaṃ vā prāṇāyāmaṃ samācaret |
agarbhaṃ vā sagarbhaṃ vā sagarbhastatra śasyate ||

7.2.14.33

sagarbhādapi sāhasraṃ sadhyāno japa ucyate |
eṣu pañcavidheṣvekaḥ karttavyaḥ śaktito japaḥ ||

7.2.14.34

aṅgulyā japasaṅkhyānamekamevamudāhṛtam |
rekhayāṣṭaguṇaṃ vidyātputrajīvairdaśādhikam ||

7.2.14.35

śataṃ syācchaṅkhamaṇibhiḥ pravālaistu sahasrakam |
sphaṭikairdaśasāhasraṃ mauktikairlakṣamucyate ||

7.2.14.36

padmākṣairdaśalakṣaṃ tu sauvarṇaiḥ koṭirucyate |
kuśagranthyā ca rudrākṣairanantaguṇitaṃ bhavet ||

7.2.14.37

triṃśadakṣaiḥ kṛtā mālā dhanadā japakarmaṇi |
saptaviṃśatisaṅkhyātairakṣaiḥ puṣṭipradā bhavet ||

7.2.14.38

pañcaviṃśatisaṅkhyātaiḥ kṛtā muktiṃ prayacchati |
akṣaistu pañcadaśabhirabhicāraphalapradā ||

7.2.14.39

aṅguṣṭhaṃ mokṣadaṃ vidyāttarjjanīṃ śatrunāśinīm |
madhyamāṃ dhanadāṃ śāntiṃ karotyeṣā hyanāmikā ||

7.2.14.40

aṣṭottaraśataṃ mālā tatra syāduttamottamā |
śatasaṅkhyottamā mālā pañcāśadbhistu madhyamā ||

7.2.14.41

catuḥpañcāśadakṣaistu hṛcchreṣṭhā hi prakīrtitā |
ityevaṃ mālayā kuryājjapaṃ kasmai na darśayet ||

7.2.14.42

kaniṣṭhā kṣariṇī proktā japakarmaṇi śobhanā |
aṅguṣṭhena japejjapyamanyairaṅgulibhiḥ saha ||

7.2.14.43

aṅguṣṭhena vinā japyaṃ kṛtaṃ tadaphalaṃ yataḥ |
gṛhe japaṃ samaṃ vidyād goṣṭhe śataguṇaṃ viduḥ ||

7.2.14.44

puṇyāraṇye tathārāme sahasraguṇamucyate |
ayutaṃ parvate puṇye nadyāṃ lakṣamudāhṛtam ||

7.2.14.45

koṭiṃ devālaye prāhuranantaṃ mama sannidhau |
sūryasyāgnergurorindordīpasya ca jalasya ca ||

7.2.14.46

viprāṇāṃ ca gavāṃ caiva sannidhau śasyate japaḥ |
tatpūrvābhimukhaṃ vaśyaṃ dakṣiṇaṃ cābhicārikam ||

7.2.14.47

paścimaṃ dhanadaṃ vidyādauttaraṃ śāntidaṃ bhavet |
sūryyāgnivipradevānāṃ gurūṇāmapi sannidhau ||

7.2.14.48

anyeṣāṃ ca prasaktānāṃ mantraṃ na vimukho japet |
uṣṇīṣī kañcukī nagno muktakeśo galāvṛtaḥ ||

7.2.14.49

apavitrakaro'śuddho vilapanna japet kvacit |
krodhaṃ madaṃ kṣutaṃ trīṇi niṣṭhīvanavijṛmbhaṇe ||

7.2.14.50

darśanaṃ ca śvanīcānāṃ varjayejjapakarmaṇi |
ācametsambhave teṣāṃ smaredvā māṃ tvayā saha ||

7.2.14.51

jyotīṃṣi ca prapaśyedvā kuryād vā prāṇasaṃyamam |
anāsanaḥ śayāno vā gacchannutthita eva vā ||

7.2.14.52

rathyāyāmaśive sthāne na japettimirāntare |
prasāryya na japetpādau kukkuṭāsana eva vā ||

7.2.14.53

yānaśayyādhirūḍho vā cintāvyākulito'thavā |
śaktaścetsarvamevaitadaśaktaḥ śaktito japet ||

7.2.14.54

kimatra bahunoktena samāsena vacaḥ śṛṇu |
sadācāro japan śuddhaṃ dhyāyanbhadraṃ samaśnute ||

7.2.14.55

ācāraḥ paramo dharma ācāraḥ paramaṃ dhanam |
ācāraḥ paramā vidyā ācāraḥ paramā gatiḥ ||

7.2.14.56

ācārahīnaḥ puruṣo loke bhavati ninditaḥ |
paratra ca sukhī na syāttasmādācāravānbhavet ||

7.2.14.57

yasya yadvihitaṃ karma vede śāstre ca vaidikaiḥ |
tasya tena samācāraḥ sadācāro na cetaraḥ ||

7.2.14.58

sadbhirācaritatvācca sadācāraḥ sa ucyate |
sadācārasya tasyāhurāstikyaṃ mūlakāraṇam ||

7.2.14.59

āstikaścetpramādādyaiḥ sadācārādavicyutaḥ |
na duṣyati naro nityaṃ tasmādāstikatāṃ vrajet ||

7.2.14.60

yathehāsti sukhaṃ duḥkhaṃ sukṛtairduṣkṛtairapi |
tathā paratra cāstīti matirāstikyamucyate ||

7.2.14.61

rahasyamanyadvakṣyāmi gopanīyamidaṃ priye |
na vācyaṃ yasya kasyāpi nāstikasyātha vā paśoḥ ||

7.2.14.62

sadācāravihīnasya patitasyāntyajasya ca |
pañcākṣarātparaṃ nāsti paritrāṇaṃ kalau yuge ||

7.2.14.63

gacchatastiṣṭhato vāpi svecchayā karma kurvataḥ |
aśucervā śucervāpi mantro'yaṃ na ca niṣphalaḥ ||

7.2.14.64

anācāravatāṃ puṃsāmaviśuddhaṣaḍadhvanām |
anādiṣṭo'pi guruṇā mantro'yaṃ na ca niṣphalaḥ ||

7.2.14.65

antyajasyāpi mūrkhasya mūḍhasya patitasya ca |
nirmaryādasya nīcasya mantro'yaṃ na ca niṣphalaḥ ||

7.2.14.66

sarvāvasthāṃ gatasyāpi mayi bhaktimataḥ param |
sidhyatyeva na sandeho nāparasya tu kasyacit ||

7.2.14.67

na lagnatithinakṣatravārayogādayaḥ priye |
asyātyantamavekṣyāḥ syurnaiṣa saptaḥ sadoditaḥ ||

7.2.14.68

na kadācinna kasyāpi ripureṣa mahāmanuḥ |
susiddho vāpi siddho vā sādhyo vāpi bhaviṣyati ||

7.2.14.69

siddhena guruṇādiṣṭaḥ susiddha iti kathyate |
asiddhenāpi vā dattaḥ siddhasādhyastu kevalaḥ ||

7.2.14.70

asādhitaḥ sādhito vā sidhyatvena na saṃśayaḥ |
śraddhātiśayayuktasya mayi mantre tathā gurau ||

7.2.14.71

tasmānmantrāntarāṃstyaktvā sāpāyānadhikārataḥ |
āśrayetparamāṃ vidyāṃ sākṣātpañcākṣarīṃ budhaḥ ||

7.2.14.72

mantrāntareṣu siddheṣu mantra eṣa na sidhyati |
siddhe tvasminmahāmantre te ca siddhā bhavantyuta ||

7.2.14.73

yathā deveṣvalabdho'smi labdheṣvapi maheśvari |
mayi labdhe tu te labdhā mantreṣveṣu samo vidhiḥ ||

7.2.14.74

ye doṣāḥ sarvamantrāṇāṃ na te'smin sambhavantyapi |
asya mantrasya jātyādīnanapekṣya pravartanāt ||

7.2.14.75

tathāpi naiva kṣudreṣu phaleṣu pratiyogiṣu |
sahasā viniyuñjīta tasmādeṣa mahābalaḥ ||

7.2.14.76

upamanyuruvāca |
evaṃ sākṣānmahādevyai mahādevena śūlinā |
hitāya jagatāmuktaḥ pañcākṣaravidhiryathā ||

7.2.14.77

ya idaṃ kīrtayedbhaktyā śṛṇuyādvā samāhitaḥ |
sarvapāpavinirmuktaḥ prayāti paramāṃ gatim ||

7.2.14.77.c1

iti śrīśivamahāpurāṇe saptamyāṃ vāyavīyasaṃhitāyāmuttarakhaṇḍe pañcākṣaramahimavarṇanaṃ nāma caturdaśo'dhyāyaḥ ||

7.2.14.77.p2

śrīgaṇeśāya namaḥ ||

7.2.14.77.p3

śrīgaurīśaṅkarābhyāṃ namaḥ ||

7.2.14.77.p4

śrīśivamahāpurāṇam ||

Other recensions (1)

Linked texts (2)