Shivapurana 7.2.18: aṣṭādaśo'dhyāyaḥ | ṣaḍadhvaśuddhyādikathanam
Śivapurāṇa (complete text) 7.2.18
- Language
- Sanskrit
Contents
- 7.2.18.63 — 4 parts
aṣṭādaśo'dhyāyaḥ | ṣaḍadhvaśuddhyādikathanam
7.2.18.1
upamanyuruvāca |
tataḥ snānādikaṃ sarvaṃ samāpyācāryacoditaḥ |
gacchedbaddhāñjalirdhyāyan śivamaṇḍalapārśvataḥ ||
7.2.18.2
atha pūjāṃ vinā sarvaṃ kṛtvā pūrvadine yathā |
netrabandhanaparyantaṃ darśayet maṇḍalaṃ guruḥ ||
7.2.18.3
baddhanetreṇa śiṣyeṇa puṣpāvakiraṇe kṛte |
yatrāpatanti puṣpāṇi tasya nāmā'sya sandiśet ||
7.2.18.4
taṃ copanīya nirmālyamaṇḍale'sminyathā purā |
pūjayeddevamīśānaṃ juhuyācca śivānale ||
7.2.18.5
śiṣyeṇa yadi duḥsvapno dṛṣṭastaddoṣaśāntaye |
śatamarddhaṃ tadarddhaṃ vā juhuyānmūlavidyayā ||
7.2.18.6
tataḥ sūtraṃ śikhābaddhaṃ lambayitvā yathā purā |
ādhārapūjāprabhṛti yannivṛttikalāśrayam ||
7.2.18.7
vāgīśvarīpūjanāntaṃ kuryāddhomapuraḥsaram |
atha praṇamya vāgīśaṃ nivṛttervyāpikāṃ satīm ||
7.2.18.8
maṇḍale devamabhyarcya hutvā caivāhutitrayam |
prāpayecca śiśoḥ prāptiṃ yugapatsarvayoniṣu ||
7.2.18.9
sūtradehe'tha śiṣyasya tāḍanaprokṣaṇādikam |
kṛtvātmānaṃ samādāya dvādaśānte nivedya ca ||
7.2.18.10
tato'pyādāya mūlena mudrayā śāstradṛṣṭayā |
yojayenmanasācāryo yugapatsarvayoniṣu ||
7.2.18.11
devānāṃ jātayaścāṣṭau tiraścāṃ pañca jātayaḥ |
jātyaikayā ca mānuṣyā yonayaśca caturdaśa ||
7.2.18.12
tāsu sarvāsu yugapatpraveśāya śiśorddhiyā |
vāgīśānyāṃ yathānyāyaṃ śiṣyātmānaṃ niveśayet ||
7.2.18.13
garbhaniṣpattaye devaṃ sampūjya praṇipatya ca |
hutvā caiva yathānyāyaṃ niṣpannaṃ tadanusmaret ||
7.2.18.14
niṣpannasyaivamutpattimanuvṛttiṃ ca karmaṇā |
ārjavaṃ bhoganiṣpattiḥ kuryāt prītiṃ parāṃ tathā ||
7.2.18.15
niṣkṛtyarthaṃ ca jātyāyurbhogasaṃskārasiddhaye |
hutvāhutitrayaṃ devaṃ prārthayeddeśikottamaḥ ||
7.2.18.16
bhoktṛtvaviṣayāsaṅgamalaṃ tatkāyaśodhanam |
kṛtvaivameva śiṣyasya chindyātpāśatrayaṃ tataḥ ||
7.2.18.17
nikṛtyā paribaddhasya pāśasyātyantabhedataḥ |
kṛtvā śiṣyasya caitanyaṃ svacchaṃ manyeta kevalam ||
7.2.18.18
hutvā pūrṇāhutiṃ vahnau brahmāṇaṃ pūjayettataḥ |
hutvāhutitrayaṃ tasmai śivājñāmanusandiśet ||
7.2.18.19
pitāmaha tvayā nāsya yātuḥ śaivaṃ paraṃ padam |
pratibandho vidhātavyaḥ śaivājñaiṣā garīyasī ||
7.2.18.20
ityādiśya tamabhyarcya visṛja ca vidhānataḥ |
samabhyarcya mahādevaṃ juhuyādāhutitrayam ||
7.2.18.21
nivṛttyā śuddhamuddhṛtya śiṣyātmānaṃ yathā purā |
niveśyātmani sūtre ca vāgīśaṃ pūjayettataḥ ||
7.2.18.22
hutvāhutitrayaṃ tasmai praṇamya ca visṛjya tām |
kuryānnivṛttaḥ sandhānaṃ pratiṣṭhāṃ kalayā saha ||
7.2.18.23
sandhāne yugapatpūjāṃ kṛtvā hutvāhutitrayam |
śiṣyātmanaḥ pratiṣṭhāyāṃ praveśaṃ tvatha bhāvayet ||
7.2.18.24
tataḥ pratiṣṭhāmāvāhya kṛtvāśeṣaṃ puroditam |
tadvyāptiṃ vyāpikāṃ tasya vāgīśānīṃ ca bhāvayet ||
7.2.18.25
pūrṇendumaṇḍalaprakhyāṃ kṛtvā śeṣaṃ ca pūrvavat |
viṣṇave saṃviśedājñāṃ śivasya paramātmanaḥ ||
7.2.18.26
viṣṇorvisarjanādyaṃ ca kṛtvā śeṣaṃ ca vidyayā |
pratiṣṭhāmanusandhāya tasyāṃ cāpi yathā purā ||
7.2.18.27
kṛtvānucintya tadvyāptiṃ vāgīśāṃ ca yathākramam |
dīptāgnau pūrṇahomāntaṃ kṛtvā śeṣaṃ ca pūrvavat ||
7.2.18.28
nīlarudramupasthāpya tasmai pūjādikaṃ tathā |
kṛtvā karma śivājñāṃ ca dadyātpūrvoktavartmanā ||
7.2.18.29
tapastamapi codvāsya kṛtvā tasyātha śāntaye |
vidyākalāṃ samādhāya tadvyāptiṃ cāvalokayet ||
7.2.18.30
svātmano vyāpikāṃ tadvadvāgīśīṃ ca yathā purā |
bālārkasadṛśākārāṃ bhāsayantīṃ diśo daśa ||
7.2.18.31
tataḥ śeṣaṃ yathāpūrvaṃ kṛtvā devaṃ maheśvaram |
āvāhyārādhya hutvāsmai śivājñāṃ manasā diśet ||
7.2.18.32
maheśvaraṃ tathotsṛjya kṛtvānyāṃ ca kalāmimām |
śāntyatītāṃ kalāṃ nītvā tadvyāptimavalokayet ||
7.2.18.33
svātmano vyāpikāṃ tadvadvāgīśīṃ ca vicintayet |
nabhomaṇḍalasaṅkāśāṃ pūrṇāntaṃ cāpi pūrvavat ||
7.2.18.34
kṛtvā śeṣavidhānena samabhyarcya sadāśivam |
tasmai samādiśedājñāṃ śambhoramitakarmaṇaḥ ||
7.2.18.35
tatrāpi ca yathāpūrvaṃ śivaṃ śirasi pūrvavat |
samabhyarcya ca vāgīśaṃ praṇamya ca visarjayet ||
7.2.18.36
tataḥ śivena samprokṣya śiṣyaṃ śirasi pūrvavat |
vilayaṃ śāntyatītāyāḥ śaktitattve'tha cintayet ||
7.2.18.37
ṣaḍadhvanaḥ pare pāre sarvādhvavyāpinīṃ parām |
koṭisūryapratīkāśāṃ śaivīṃ śaktiṃ ca cintayet ||
7.2.18.38
tadagre śiṣyamānīya śuddhasphaṭikanirmalam |
prakṣālya karttarīṃ paścāt śivaśāstroktamārgataḥ ||
7.2.18.39
kuryāttasya śikhācchedaṃ saha sūtreṇa deśikaḥ |
tatastāṃ gomaye nyasya śivāgnau juhuyācchikhām ||
7.2.18.40
vauṣaḍantena mūlena punaḥ prakṣālya kartarīm |
haste śiṣyasya caitanyaṃ taddehe vinivartayet ||
7.2.18.41
tataḥ snātaṃ samācāntaṃ kṛtasvastyayanaṃ śiśum |
praveśya maṇḍalābhyāsaṃ praṇipatya ca daṇḍavat ||
7.2.18.42
pūjāṃ kṛtvā yathānyāyaṃ kriyāvaikalyaśuddhaye |
vācakenaiva mantreṇa juhuyādāhutitrayam ||
7.2.18.43
upāṃśūccārayogena juhuyādāhutitrayam |
punaḥ sampūjya deveśaṃ mantravaikalyaśuddhaye ||
7.2.18.44
mānasoccārayogena juhuyādāhutitrayam |
tatra śambhuṃ samārādhya maṇḍalasthaṃ sahāmbayā |
hutvāhutitrayaṃ paścātprārthayetprāñjalirguruḥ ||
7.2.18.45
bhagavaṃstvatprasādena śuddhirasya ṣaḍadhvanaḥ |
kṛtā tasmātparaṃ dhāma gamayainaṃ tavāvyayam ||
7.2.18.46
iti vijñāpya devāya nāḍīsandhānapūrvakam |
pūrṇāntaṃ pūrvavatkṛtvā tato bhūtāni śodhayet ||
7.2.18.47
sthirāsthire tataḥ śuddhyai śītoṣṇe ca tataḥ pade |
dhyāyedvyāptyaikatākāre bhūtaśodhanakarmaṇi ||
7.2.18.48
bhūtānāṃ granthivicchedaṃ kṛtvā tyaktvā sahādhipaiḥ |
bhūtāni sthitiyogena yo japetparame śive ||
7.2.18.49
viśodhyāsyaṃ tanuṃ dagdhvā plāvayitvā sudhākaṇaiḥ |
sthāpyātmānaṃ tataḥ kuryādviśuddhādhvamayaṃ vapuḥ ||
7.2.18.50
tatrādau śāntyatītāṃ tu vyāpikāṃ svādhvanaḥ kalām |
śuddhāmeva śiśormūrdhni nyasecchāntimukhe tathā ||
7.2.18.51
vidyāṃ galādinābhyantaṃ pratiṣṭhāṃ tadadhaḥ kramāt |
jānvantaṃ tadadho nyasyennivṛttiṃ cānucintayet ||
7.2.18.52
svabījaiḥ sūtramantraṃ ca nyasyāṅgaistaṃ śivātmakam |
buddhvā taṃ hṛdayāmbhoje devamāvāhya pūjayet ||
7.2.18.53
āśāsya nityasānnidhyaṃ śivasvātmyaṃ śiśau guruḥ |
śivatejomayasyāsya śiśorāpādayedguṇān ||
7.2.18.54
aṇimādīnprasīdeti pradadyādāhutitrayam |
tathaiva tu guṇāneva punarasyopapādayet ||
7.2.18.55
sarvajñatāṃ tathā tṛptiṃ bodhaṃ cādyantavarjitam |
aluptaśaktiṃ svātantryamanantāṃ śaktimeva ca ||
7.2.18.56
tato devamanujñāpya sadyādikalaśaistu tam |
abhiṣiñceta deveśaṃ dhyāyanhṛdi yathākramam ||
7.2.18.57
athopaveśya taṃ śiṣyaṃ śivamabhyarcya pūrvavat |
labdhānujñaḥ śivācchaivīṃ vidyāmasmai samādiśet ||
7.2.18.58
oṅkārapūrvikāṃ tatra sampuṭāṃ tu namo'ntagām |
śivaśaktiyutāñcaiva śaktividyāṃ ca tādṛśīm ||
7.2.18.59
ṛṣiṃ chandaśca devaṃ ca śivatāṃ śivayostathā |
pūjāṃ sāvaraṇāṃ śambhorāsanāni ca sandiśet ||
7.2.18.60
punaḥ sampūjya deveśaṃ yanmayā samanuṣṭhitam |
sukṛtaṃ kuru tatsarvamiti vijñāpayet śivam ||
7.2.18.61
sahaśiṣyo gururdevaṃ daṇḍavatkṣitimaṇḍale |
praṇamyodvāsayettasmāt maṇḍalātpāvakādapi ||
7.2.18.62
tataḥ sadasikāḥ sarve pūjyāḥ pūjārhakāḥ kramāt ||
7.2.18.63
sevyā vittānusāreṇa sadasyāśca sahartvijaḥ |
vittaśāṭhyaṃ na kurvīta yadīcchet śivamātmanaḥ ||
7.2.18.63.c1
iti śrīśivamahāpurāṇe saptamyāṃ vāyavīyasaṃhitāyāmuttarakhaṇḍe ṣaḍadhvaśuddhyādikathanaṃ nāmāṣṭādaśo'dhyāyaḥ ||
7.2.18.63.p2
śrīgaṇeśāya namaḥ ||
7.2.18.63.p3
śrīgaurīśaṅkarābhyāṃ namaḥ ||
7.2.18.63.p4
śrīśivamahāpurāṇam ||
Other recensions (1)
- Śivapurāṇa — Vyāsa, Sanskrit