Shivapurana 7.2.19: ekonaviṃśo'dhyāyaḥ | sādhakasaṃskāramantramāhātmyam
Śivapurāṇa (complete text) 7.2.19
- Language
- Sanskrit
Contents
- 7.2.19.27 — 4 parts
ekonaviṃśo'dhyāyaḥ | sādhakasaṃskāramantramāhātmyam
7.2.19.1
upamanyuruvāca |
ataḥ paraṃ pravakṣyāmi sādhakaṃ nāma nāmataḥ |
saṃskāramantramāhātmyaṃ kathane sūcitaṃ mayā ||
7.2.19.2
sampūjya maṇḍale devaṃ sthāpya kumbhe ca pūrvavat |
hutvā śiṣyamanuṣṇīṣaṃ prāpayedbhuvi maṇḍale ||
7.2.19.3
pūrṇāntaṃ pūrvavatkṛtvā hutvā''hutiśataṃ tathā |
santarpya mūlamantreṇa kalaśairdeśikottamaḥ ||
7.2.19.4
sandīpya ca yathāpūrvaṃ kṛtvā pūrvoditaṃ kramāt |
abhiṣicya yathāpūrvaṃ pradadyānmantramuttamam ||
7.2.19.5
tatra vidyopadeśāntaṃ kṛtvā vistaraśaḥ kramāt |
puṣpāmbunā śiśoḥ pāṇau vidyāṃ śaivīṃ samarpayet ||
7.2.19.6
tavaihikāmuṣmikayoḥ sarvasiddhiphalapradaḥ |
bhavatyeva mahāmantraḥ prasādātparameṣṭhinaḥ ||
7.2.19.7
ityutvā devamabhyarcya labdhānujñaḥ śivādguruḥ |
sādhanaṃ śivayogaṃ ca sādhakāya samādiśet ||
7.2.19.8
tacchrutvā gurusandeśaṃ kramaśo mantrasādhakaḥ |
purato viniyogasya mantrasādhanamācaret ||
7.2.19.9
sādhanaṃ mūlamantrasya puraścaraṇamucyate |
purataścaraṇīyatvādviniyogākhyakarmaṇaḥ ||
7.2.19.10
nātyantaṃ karaṇīyaṃ tu mumukṣormantrasādhanam |
kṛtaṃ tu tadihānyatra tasyāpi śubhadaṃ bhavet ||
7.2.19.11
śubhe'hani śubhe deśe kāle vā doṣavarjite |
śukladantanakhaḥ snātaḥ kṛtapūrvāhnikakriyaḥ ||
7.2.19.12
alaṅkṛtya yathā labdhairgandhamālyavibhūṣaṇaiḥ |
soṣṇīṣaḥ sottarāsaṅgaḥ sarvaśuklasamāhitaḥ ||
7.2.19.13
devālaye gṛhe'nyasmin deśe vā sumanohare |
sukhenābhyastapūrveṇa tvāsanena kṛtāsanaḥ ||
7.2.19.14
tanuṃ kṛtvātmanaḥ śaivīṃ śivaśāstroktavartmanā |
sampūjya devadeveśaṃ nakulīśvaramīśvaram ||
7.2.19.15
nivedya pāyasaṃ tasmai samāpyārādhanaṃ kramāt |
praṇipatya ca taṃ devaṃ prāptānujñāśca tanmukhāt ||
7.2.19.16
koṭivāraṃ tadarddhaṃ vā tadarddhaṃ vā japet śivam |
lakṣaviṃśatikaṃ vāpi daśalakṣamathāpi vā ||
7.2.19.17
tataśca pāyasākṣāralavaṇaikamitāśanaḥ |
ahiṃsakaḥ kṣamī śānto dāntaścaiva sadā bhavet ||
7.2.19.18
alābhe pāyasasyāśnanphalamūlādikāni vā |
vihitāni śivenaiva viśiṣṭānyuttarottaram ||
7.2.19.19
caruṃ bhakṣyamatho saktukaṇānyāvakameva ca |
śākaṃ payo dadhi ghṛtaṃ mūlaṃ phalamathodakam ||
7.2.19.20
abhimantrya ca mantreṇa bhakṣyabhojyādikāni ca |
sādhane'smin viśeṣeṇa nityaṃ bhuñjīta vāgyataḥ ||
7.2.19.21
mantrāṣṭaśatapūtena jalena śucinā vratī |
snāyānnadīnadotthena prokṣayedvātha śaktitaḥ ||
7.2.19.22
tarpayecca tathā nityaṃ juhuyācca śivānale |
saptabhiḥ pañcabhirdravyaistribhirvātha ghṛtena vā ||
7.2.19.23
itthaṃ bhaktyā śivaṃ śaivo yaḥ sādhayati sādhakaḥ |
tasyehāmutra duṣprāpaṃ na kiñcidapi vidyate ||
7.2.19.24
athavāharaharmantraṃ japedekāgramānasaḥ |
anaśnanneva sāhasraṃ vinā mantrasya sādhanam ||
7.2.19.25
na tasya durlabhaṃ kiñcinna tasyāstyaśubhaṃ kvacit |
iha vidyāṃ śriyaṃ saukhyaṃ labdhvā muktiṃ ca vindati ||
7.2.19.26
sādhane viniyoge ca nitye naimittike tathā |
japejjalairbhasmanā ca snātvā mantreṇa ca kramāt ||
7.2.19.27
śucirbaddhaśikhaḥ sūtrī sapavitrakarastathā |
dhṛtatripuṇḍrarudrākṣo vidyāṃ pañcākṣarīṃ japet ||
7.2.19.27.c1
iti śrīśivamahāpurāṇe saptamyāṃ vāyavīyasaṃhitāyāmuttarakhaṇḍe sādhakasaṃskāramantramāhātmyaṃ nāmaikonaviṃśo'dhyāyaḥ ||
7.2.19.27.p2
śrīgaṇeśāya namaḥ ||
7.2.19.27.p3
śrīgaurīśaṅkarābhyāṃ namaḥ ||
7.2.19.27.p4
śrīśivamahāpurāṇam ||
Other recensions (1)
- Śivapurāṇa — Vyāsa, Sanskrit
Linked texts (1)
- Netratantra — Sanskrit