Shivapurana 7.2.20: viṃśo'dhyāyaḥ | viśeṣādisaṃskṛtiḥ
Śivapurāṇa (complete text) 7.2.20
- Language
- Sanskrit
Contents
- 7.2.20.30 — 4 parts
viṃśo'dhyāyaḥ | viśeṣādisaṃskṛtiḥ
7.2.20.1
upamanyuruvāca |
athaivaṃ saṃskṛtaṃ śiṣyaṃ kṛtapāśupatavratam |
ācāryatve'bhiṣiñceta tadyogatvena cānyathā ||
7.2.20.2
maṇḍalaṃ pūrvavatkṛttvā sampūjya parameśvaram |
sthāpayatpañcakalaśāndikṣu madhye ca pūrvavat ||
7.2.20.3
nivṛttiṃ purato nyasya pratiṣṭhāṃ paścime ghaṭe |
vidyāṃ dakṣiṇataḥ śāntimuttare madhyataḥ parām ||
7.2.20.4
kṛtvā rakṣādikaṃ tatra baddhvā mudrāṃ ca dhainavīm |
abhimantrya ghaṭānhutvā pūrṇāntaṃ ca yathā purā ||
7.2.20.5
praveśya maṇḍale śiṣyamanuṣṇīṣaṃ ca deśikaḥ |
tarpaṇādyaṃ tu mantrāṇāṃ kuryātpūrvāvasānakam ||
7.2.20.6
tataḥ sampūjya deveśamanujñāpya ca pūrvavat |
abhiṣekāya taṃ śiṣyamāsanaṃ tvadhirohayet ||
7.2.20.7
sakalīkṛtya taṃ paścātkalāpañcakarūpiṇam |
nyastamantratanuṃ baddhvā śivaṃ śiṣyaṃ samarpayet ||
7.2.20.8
tato nivṛttikumbhādighaṭānuddhṛtya vai kramāt |
madhyamāntācchivenaiva śiṣyaṃ tamabhiṣecayat ||
7.2.20.9
śivahastaṃ samarpyātha śiśoḥ śirasi deśikaḥ |
śivabhāvasamāpannaḥ śivācāryaṃ tamādiśet ||
7.2.20.10
athālaṅkṛtya taṃ devamārādhya śivamaṇḍale |
śatamaṣṭottaraṃ hutvā dadyātpūrṇāhutiṃ tataḥ ||
7.2.20.11
punaḥ sampūjya deveśaṃ praṇamya bhuvi daṇḍavat |
śirasyañjalimādhāya śivaṃ vijñāpayedguruḥ ||
7.2.20.12
bhagavaṃstvatprasādena deśiko'yaṃ mayā kṛtaḥ |
anugṛhya tvayā deva divyājñāsmai pradīyatām ||
7.2.20.13
evaṃ vijñāpya śiṣyeṇa saha bhūyaḥ praṇamya ca |
śivaṃ śivāgamaṃ divyaṃ pūjayet śivavadguruḥ ||
7.2.20.14
punaḥ śivamanujñāpya śivajñānasya pustakam |
ubhābhyāmatha pāṇibhyāṃ dadyācchiṣyāya deśikaḥ ||
7.2.20.15
sa tāṃ mūrdhni samādhāya vidyāṃ vidyāsanopari |
adhiropya yathānyāyamabhivandya samarcayet ||
7.2.20.16
atha tasmai gururdadyādrājopakaraṇānyapi |
ācāryapadavīṃ prāpto rājyaṃ cāpi yato'rhati ||
7.2.20.17
athānuśāsanaṃ kuryātpūrvairācaritaṃ yathā |
yathā ca śivaśāstroktaṃ yathā lokeṣu pūjyate ||
7.2.20.18
śiṣyān parīkṣya yatnena śivaśāstroktalakṣaṇaiḥ |
saṃskṛtya ca śivajñānaṃ tebhyo dadyācca deśikaḥ ||
7.2.20.19
evaṃ sarvamanāyāsaṃ śaucaṃ kṣāntiṃ dayāṃ tathā |
aspṛhāmapyasūyāṃ ca yatnena ca vibhāvayet ||
7.2.20.20
itthamādiśya taṃ śiṣyaṃ śivamudvāsya maṇḍalāt |
śivakumbhānalādīṃśca sadasyānapi pūjayet ||
7.2.20.21
yugapadvātha saṃskārān kurvīta sagaṇo guruḥ |
tatra trayaṃ dvayaṃ vāpi prayogasyopadiśyate ||
7.2.20.22
tadādāveva kalaśānkalpayedadhvaśuddhivat |
kṛtvā samayasaṃskāramabhiṣekaṃ vinā'khilam ||
7.2.20.23
samabhyarcya śivaṃ bhūyaḥ kṛtvā cādhvaviśodhanam |
tasmin parisamāpte tu punardevaṃ prapūjayet ||
7.2.20.24
hutvā mantraṃ tu santarpya sandīpyāśāsya ceśvaram |
samarpya mantraṃ śiṣyasya pāṇau śeṣaṃ samāpayet ||
7.2.20.25
athavā mantrasaṃskāramanucintyākhilaṃ kramāt |
adhvaśuddhiṃ guruḥ kuryādabhiṣekāvasānikam ||
7.2.20.26
tatra yaḥ śāntyatītādikalāsu vihito vidhiḥ |
sa sarvo'pi vidhātavyastattvatrayaviśodhane ||
7.2.20.27
śivavidyātmatattvākhyaṃ tattvatrayamudāhṛtam |
śaktau śivastato vidyāttasyāstvātmā samudbabhau ||
7.2.20.28
śivena śāntyatītādhvā vyāptastadaparaḥ paraḥ |
vidyayā pariśiṣṭo'dhvā hyātmanā nikhilaḥ kramāt ||
7.2.20.29
durlabhaṃ śāmbhavaṃ matvā mantramūlaṃ manīṣiṇaḥ |
śāktaṃ śaṃsīta saṃskāraṃ śivaśāstrārthapāragāḥ ||
7.2.20.30
iti te sarvamākhyātaṃ saṃskārākhyasya karmaṇaḥ |
cāturvidhyamidaṃ kṛṣṇa kiṃ bhūyaḥ śrotumicchasi ||
7.2.20.30.c1
iti śrīśivamahāpurāṇe saptamyāṃ vāyavīyasaṃhitāyāmuttarakhaṇḍe viśeṣādisaṃskṛtirnāma viṃśo'dhyāyaḥ ||
7.2.20.30.p2
śrīgaṇeśāya namaḥ ||
7.2.20.30.p3
śrīgaurīśaṅkarābhyāṃ namaḥ ||
7.2.20.30.p4
śrīśivamahāpurāṇam ||
Other recensions (1)
- Śivapurāṇa — Vyāsa, Sanskrit