Shivapurana 7.2.21: ekaviṃśo'dhyāyaḥ | nityanaimittikakarmavarṇanam
Śivapurāṇa (complete text) 7.2.21
- Language
- Sanskrit
Contents
- 7.2.21.43 — 4 parts
ekaviṃśo'dhyāyaḥ | nityanaimittikakarmavarṇanam
7.2.21.1
kṛṣṇa uvāca |
bhagavan śrotumicchāmi śivāśramaniṣeviṇām |
śivaśāstroditaṃ karma nityanaimittikaṃ tathā ||
7.2.21.2
upamanyuruvāca |
prātarutthāya śayanāddhyātvā devaṃ sahāmbayā |
vicārya kāryaṃ nirgacched gṛhādabhyudite'ruṇe ||
7.2.21.3
abādhe vijane deśe kuryādāvaśyakaṃ tataḥ |
kṛtvā śaucaṃ vidhānena dantadhāvanamācaret ||
7.2.21.4
alābhe dantakāṣṭhānāmaṣṭamyādidineṣu ca |
apāṃ dvādaśagaṇḍūṣaiḥ kuryādāsyaviśodhanam ||
7.2.21.5
ācamya vidhivatpaścādvāruṇaṃ snānamācaret |
nadyāṃ vā devakhāte vā hrade vātha gṛhe'pi vā ||
7.2.21.6
snānadravyāṇi tattīre sthāpayitvā bahirmalam |
vyāpohya mṛdamālipya snātvā gomayamālipet ||
7.2.21.7
snātvā punaḥ punarvastraṃ tyaktvā vātha viśodhya ca |
susnāto nṛpavadbhūyaḥ śuddhaṃ vāso vasīta ca ||
7.2.21.8
malasnānaṃ sugandhādyaiḥ snānaṃ dantaviśodhanam |
na kuryād brahmacārī ca tapasvī vidhavā tathā ||
7.2.21.9
sopavītaḥ śikhāṃ baddhvā praviśya ca jalāntaram |
avagāhya samācānto jale nyasyet trimaṇḍalam ||
7.2.21.10
toye magnaḥ punarmantraṃ japecchaktyā śivaṃ smaret |
utthāyācamya tenaiva svātmānamabhiṣecayet ||
7.2.21.11
gośṛṅgeṇa sadarbheṇa pālāśena dalena vā |
pādmena vātha pāṇibhyāṃ pañcakṛtvastrireva vā ||
7.2.21.12
udyānādau gṛhe caiva varddhanyā kalaśena vā |
avagāhanakāle'dbhirmantritairabhiṣecayet ||
7.2.21.13
atha cedvāruṇaṃ kartumaśaktaḥ śuddhavāsasā |
ārdreṇa śodhayeddehamāpādatalamastakam ||
7.2.21.14
āgneyaṃ vātha vā māntraṃ kuryāt snānaṃ śivena vā |
śivacintāparaṃ snānaṃ yuktasyātmīyamucyate ||
7.2.21.15
svasūtroktavidhānena mantrācamanapūrvakam |
ācared brahmayajñāntaṃ kṛtvā devāditarpaṇam ||
7.2.21.16
maṇḍalasthaṃ mahādevaṃ dhyātvābhyarcya yathāvidhi |
dadyādarghyaṃ tatastasmai śivāyādityarūpiṇe ||
7.2.21.17
athavaitatsvasūtroktaṃ kṛtvā hastau viśodhayet |
karanyāsaṃ tataḥ kṛtvā sakalīkṛtavigrahaḥ ||
7.2.21.18
vāmahastagatāmbhobhirgandhasiddhārthakānvitaiḥ |
kuśapuñjena vā'bhyukṣya mūlamantrasamanvitaiḥ ||
7.2.21.19
āpohiṣṭhādibhirmantraiḥ śeṣamāghrāya vai jalam |
vāmanāsāpuṭenaiva devaṃ sambhāvayetsitam ||
7.2.21.20
arghamādāya dehasthaṃ savyanāsāpuṭena ca |
kṛṣṇavarṇena bāhyasthaṃ bhāvayecca śilāgatam ||
7.2.21.21
tarpayedatha devebhya ṛṣibhyaśca viśeṣataḥ |
bhūtebhyaśca pitṛbhyaśca dadyādarghyaṃ yathāvidhi ||
7.2.21.22
raktacandanatoyena hastamātreṇa maṇḍalam |
suvṛttaṃ kalpayedbhūmau raktacūrṇādyalaṅkṛtam ||
7.2.21.23
tatra sampūjayedbhānuṃ svakīyāvaraṇaiḥ saha |
khakholkāyeti mantreṇa sāṅgataḥ sukhasiddhaye ||
7.2.21.24
punaśca maṇḍalaṃ kṛtvā tadaṅgaiḥ paripūjya ca |
tatra sthāpya hemapātraṃ māgadhaprasthasammitam ||
7.2.21.25
pūrayet gandhatoyena raktacandanayoginā |
raktapuṣpaistilaiścaiva kuśākṣatasamanvitaiḥ ||
7.2.21.26
dūrvāpāmārgagavyaiśca kevalena jalena vā |
jānubhyāṃ dharaṇīṃ gatvā natvā devaṃ ca maṇḍale ||
7.2.21.27
kṛtvā śirasi tatpātraṃ dadyādarghyaṃ śivāya tat |
athavāñjalinā toyaṃ sadarbhaṃ mūlavidyayā ||
7.2.21.28
utkṣipedambarasthāya śivāyādityamūrtaye |
kṛtvā punaḥ karanyāsaṃ karaśodhanapūrvakam ||
7.2.21.29
buddhveśānādi sadyāntaṃ pañcabrahmamayaṃ śivam |
gṛhītvā bhasitaṃ mantrairvimṛjyāṅgāni saṃspṛśet ||
7.2.21.30
āpādāntaiḥ śirovaktrahṛdguhyacaraṇān kramāt |
tato mūlena sarvāṅgamālabhya vasanāntaram ||
7.2.21.31
paridhāya dvirācamya prokṣyaikādaśamantritaiḥ |
jalairācchādya vāso'yad dvirācamya śivaṃ smaret ||
7.2.21.32
punarnyastakaro mantrī tripuṇḍraṃ bhasmanā likhet |
avakramāya taṃ vyaktaṃ lalāṭe gandhavāriṇā ||
7.2.21.33
vṛttaṃ vā caturasraṃ vā bindumarddhendumeva vā |
lalāṭe yādṛśaṃ puṇḍraṃ likhitaṃ bhasmanā punaḥ ||
7.2.21.34
tādṛśaṃ bhujayormūrdhni stanayorantare likhet |
sarvāṅgoddhūlanaṃ caiva na samānaṃ tripuṇḍrakaiḥ ||
7.2.21.35
tasmāt tripuṇḍramevaikaṃ likheduddhūlanaṃ vinā |
rudrākṣāndhārayenmūrdhni kaṇṭhe śrote kare tathā ||
7.2.21.36
suvarṇavarṇamacchinnaṃ śubhaṃ nānyairdhṛtaṃ śubham |
viprādīnāṃ kramāt śreṣṭhaṃ pītaṃ raktamathāsitam ||
7.2.21.37
tadalābhe yathālābhaṃ dhāraṇīyamadūṣitam |
tatrāpi nottaraṃ nīcairdhāryaṃ nīcamathottaraiḥ ||
7.2.21.38
nāśucirddhārayedakṣaṃ sadā kāleṣu dhārayet |
itthaṃ trisandhyamathavā dvisandhyaṃ sakṛdeva vā ||
7.2.21.39
kṛtvā snānādikaṃ śaktyā pūjayetparameśvaram |
pūjāsthānaṃ samāsādya baddhvā ruciramāsanam ||
7.2.21.40
dhyāyeddevaṃ ca devīṃ ca prāṅmukho vāpyudaṅmukhaḥ |
śvetādīnnakulīśāntāṃstacchiṣyānpraṇamedgurum ||
7.2.21.41
punardevaṃ śivaṃ natvā tato nāmāṣṭakaṃ japet |
śivo maheśvaraścaiva rudro viṣṇuḥ pitāmahaḥ ||
7.2.21.42
saṃsāravaidyaḥ sarvajñaḥ paramātmeti cāṣṭakam |
athavā śivamevaikaṃ japitvaikādaśādhikam ||
7.2.21.43
jihvāgre tejaso rāśiṃ dhyātvā vyādhyādiśāntaye |
prakṣālya caraṇau kṛtvā karau candanacarcitau |
prakurvīta karanyāsaṃ karaśodhanapūrvakam ||
7.2.21.43.c1
iti śrīśivamahāpurāṇe saptamyāṃ vāyavīyasaṃhitāyāmuttarakhaṇḍe nityanaimittikakarmavarṇanaṃ nāmaikaviṃśo'dhyāyaḥ ||
7.2.21.43.p2
śrīgaṇeśāya namaḥ ||
7.2.21.43.p3
śrīgaurīśaṅkarābhyāṃ namaḥ ||
7.2.21.43.p4
śrīśivamahāpurāṇam ||
Other recensions (1)
- Śivapurāṇa — Vyāsa, Sanskrit
Linked texts (1)
- Candrajñānāgama — Sanskrit