Shivapurana 7.2.23: trayoviṃśo'dhyāyaḥ | pūjāvidhāna vyākhyānavarṇanam
Śivapurāṇa (complete text) 7.2.23
- Language
- Sanskrit
Contents
- 7.2.23.23 — 4 parts
trayoviṃśo'dhyāyaḥ | pūjāvidhāna vyākhyānavarṇanam
7.2.23.1
upamanyuruvāca |
vyākhyāṃ pūjāvidhānasya pravadāmi samāsataḥ |
śivaśāstre śivenaiva śivāyai kathitasya tu ||
7.2.23.2
aṅgamabhyantaraṃ yāgamagnikāryāvasānakam |
vidhāya vā na vā paścād bahiryāgaṃ samācaret ||
7.2.23.3
tatra dravyāṇi manasā kalpayitvā viśodhya ca |
dhyātvā vināyakaṃ devaṃ pūjayitvā vidhānataḥ ||
7.2.23.4
dakṣiṇe cottare caiva nandīśaṃ suyaśāṃ tathā |
ārādhya manasā samyagāsanaṃ kalpayedbudhaḥ ||
7.2.23.5
ārādhanādikairyuktaḥ siṃhayogāsanādikam |
padmāsanaṃ vā vimalaṃ tattvatrayasamanvitam ||
7.2.23.6
tasyopari śivaṃ dhyāyet sāmbaṃ sarvamanoharam |
sarvalakṣaṇasampannaṃ sarvāvayavaśobhanam ||
7.2.23.7
sarvātiśayasaṃyuktaṃ sarvābharaṇabhūṣitam |
raktāsyapāṇicaraṇaṃ kundacandrasmitānanam ||
7.2.23.8
śuddhasphaṭikasaṅkāśaṃ phullapadmatrilocanam |
caturbhujamudārāṅgaṃ cārucandrakalādharam ||
7.2.23.9
varadābhayahastaṃ ca mṛgaṭaṅkadharaṃ haram |
bhujaṅgahāravalayaṃ cārunīlagalāntaram ||
7.2.23.10
sarvopamānarahitaṃ sānugaṃ saparicchadam |
tataḥ sañcintayettasya vāmabhāge maheśvarīm ||
7.2.23.11
praphullotpalapatrābhāṃ vistīrṇāyatalocanām |
pūrṇacandrābhavadanāṃ nīlakuñcitamūrdhajām ||
7.2.23.12
nīlotpaladalaprakhyāṃ candrārddhakṛtaśekharām |
ativṛttaghanottuṅgasnigdhapīnapayodharām ||
7.2.23.13
tanumadhyāṃ pṛthuśroṇīṃ pītasūkṣmavarāmbarām |
sarvābharaṇasampannāṃ lalāṭatilakojjvalām ||
7.2.23.14
vicitrapuṣpasaṅkīrṇakeśapāśopaśobhitām |
sarvato'nuguṇākārāṃ kiñcillajjānatānanām ||
7.2.23.15
hemāravindaṃ vilasaddadhānāṃ dakṣiṇe kare |
daṇḍavaccāparaṃ hastaṃ nyasyāsīnāṃ mahāsane ||
7.2.23.16
pāśavicchedikāṃ sākṣātsaccidānandarūpiṇīm |
evaṃ devaṃ ca devīṃ ca dhyātvāsanavare śubhe ||
7.2.23.17
sarvopacāravad bhaktyā bhāvapuṣpaiḥ samarcayet |
athavā parikalpyaivaṃ mūrtimanyatamāṃ vibhoḥ ||
7.2.23.18
śaivīṃ sadāśivākhyāṃ vā tathā māheśvarīṃ parām |
ṣaḍviṃśakābhidhānāṃ vā śrīkaṇṭhākhyāmathāpi vā ||
7.2.23.19
mantranyāsādikāṃścāpi kṛtvā svasyāṃ tanau yathā |
asyāṃ mūrtau mūrtimantaṃ śivaṃ sadasataḥ param ||
7.2.23.20
dhyātvā bāhyakrameṇaiva pūjāṃ nirvarttayeddhiyā |
samidājyādibhiḥ paścānnābhau homaṃ ca bhāvayet ||
7.2.23.21
bhrūmadhye ca śivaṃ dhyāyecchuddhadīpaśikhākṛtim |
itthamaṅge svatantre vā yoge dhyānamaye śubhe ||
7.2.23.22
agnikāryāvasānaṃ ca sarvatraiva samo vidhiḥ |
atha cintāmayaṃ sarvaṃ samāpyārādhanakramam ||
7.2.23.23
liṅge ca pūjayeddevaṃ sthaṇḍile vānale'pi vā ||
7.2.23.23.c1
iti śrīśivamahāpurāṇe saptamyāṃ vāyavīyasaṃhitāyāmuttarakhaṇḍe pūjāvidhāna vyākhyānavarṇanaṃ nāma trayoviṃśo'dhyāyaḥ ||
7.2.23.23.p2
śrīgaṇeśāya namaḥ ||
7.2.23.23.p3
śrīgaurīśaṅkarābhyāṃ namaḥ ||
7.2.23.23.p4
śrīśivamahāpurāṇam ||
Other recensions (1)
- Śivapurāṇa — Vyāsa, Sanskrit
Linked texts (1)
- Kriyāsāraḥ — Sanskrit