Shivapurana 7.2.24: caturviṃśo'dhyāyaḥ | śāstroktaśivapūjanavarṇanam
Śivapurāṇa (complete text) 7.2.24
- Language
- Sanskrit
Contents
- 7.2.24.72 — 4 parts
caturviṃśo'dhyāyaḥ | śāstroktaśivapūjanavarṇanam
7.2.24.1
upamanyuruvāca |
prokṣayenmūlamantreṇa pūjāsthānaṃ viśuddhaye |
gandhacandanatoyena puṣpaṃ tatra vinikṣipet ||
7.2.24.2
astreṇotsārya vai vighnānavaguṇṭhya ca varmaṇā |
astraṃ dikṣu pravinyasya kalpayedarcanābhuvam ||
7.2.24.3
tatra darbhānparistīrya kṣālayetprokṣaṇādibhiḥ |
saṃśodhya sarvapātrāṇi dravyaśuddhiṃ samācaret ||
7.2.24.4
prokṣaṇīmarghyapātraṃ ca pādyapātramataḥ param |
tathaivācamanīyasya pātraṃ ceti catuṣṭayam ||
7.2.24.5
prakṣālya prokṣya vīkṣyātha kṣipetteṣu jalaṃ śivam |
puṇyadravyāṇi sarvāṇi yathālābhaṃ vinikṣipet ||
7.2.24.6
ratnāni rajataṃ hema gandhapuṣpākṣatādayaḥ |
phalapallavadarbhāṃśca puṇyadravyāṇyanekadhā ||
7.2.24.7
snānodake sugandhādi pānīye ca viśeṣataḥ |
śītalāni manojñānī kusumādīni nikṣipet ||
7.2.24.8
uśīraṃ candanaṃ caiva pādye tu parikalpayet |
jātikaṅkolakarpūrabahumūlatamālakān ||
7.2.24.9
kṣipedācamanīye ca cūrṇayitvā viśeṣataḥ |
elāṃ pātreṣu sarveṣu karpūraṃ candanaṃ tathā ||
7.2.24.10
kuśāgrāṇyakṣatāṃścaiva yavavrīhitilānapi |
ājyasiddhārthapuṣpāṇi bhasitaṃ cārghyapātrake ||
7.2.24.11
kuśapuṣpayavavrīhibahumūlatamālakān |
prakṣipet prokṣaṇīpātre bhasitaṃ ca yathākramam ||
7.2.24.12
sarvatra mantraṃ vinyasya varmaṇāveṣṭya bāhyataḥ |
paścādastreṇa saṃrakṣya dhenumudrāṃ pradarśayet ||
7.2.24.13
pūjādravyāṇi sarvāṇi prokṣaṇīpātravāriṇā |
samprokṣya mūlamantreṇa śodhayedvidhivattataḥ ||
7.2.24.14
pātrāṇāṃ prokṣaṇīmekāmalābhe sarvakarmasu |
sādhayedarghyamadbhistatsāmānyaṃ sādhakottamaḥ ||
7.2.24.15
tato vināyakaṃ devaṃ bhakṣyabhojyādibhiḥ kramāt |
pūjayitvā vidhānena dvārapārśve'tha dakṣiṇe ||
7.2.24.16
antaḥpurādhipaṃ sākṣānnandinaṃ samyagarcayet |
cāmīkarācalaprakhyaṃ sarvābharaṇabhūṣitam ||
7.2.24.17
bālendumukuṭaṃ saumyaṃ trinetraṃ ca caturbhujam |
dīptaśūlamṛgīṭaṅkatigmavetradharaṃ prabhum ||
7.2.24.18
candrabimbābhavadanaṃ harivaktramathāpi vā |
uttare dvārapārśvasya bhāryāṃ ca marutāṃ sutām ||
7.2.24.19
suyaśāṃ suvratāmambāṃ pādamaṇḍanatatparām |
pūjayitvā praviśyāntarbhavanaṃ parameṣṭhinaḥ ||
7.2.24.20
sampūjya liṅgaṃ tairdravyairnirmālyamapanodayet |
prakṣālya puṣpaṃ śirasi nyasettasya viśuddhaye ||
7.2.24.21
puṣpahasto japet śaktyā mantraṃ mantraviśuddhaye |
aiśānyāṃ caṇdamārādhya nirmālyaṃ tasya dāpayet ||
7.2.24.22
kalpayedāsanaṃ paścādādhārādi yathākramam |
ādhāraśaktiṃ kalyāṇīṃ śyāmāṃ dhyāyedatho bhuvi ||
7.2.24.23
tasyāḥ purastādutkaṇṭhamanantaṃ kuṇḍalākṛtim |
dhavalaṃ pañcaphaṇinaṃ lelihānamivāmbaram ||
7.2.24.24
tasyoparyāsanaṃ bhadraṃ kaṇṭhīravacatuṣpadam |
dharmo jñānaṃ ca vairāgyamaiśvaryaṃ ca padāni vai ||
7.2.24.25
āgneyādiśvetaraktapītaśyāmāni varṇataḥ |
adharmādīni pūrvādīnyuttarāntānyanukramāt ||
7.2.24.26
rājāvartamaṇiprakhyānnyasya gātrāṇi bhāvayet |
asyordhvacchādanaṃ padmamāsanaṃ vimalaṃ sitam ||
7.2.24.27
aṣṭapatrāṇi tasyāhuraṇimādiguṇāṣṭakam |
kesarāṇi ca vāmādyā rudrā vāmādiśaktibhiḥ ||
7.2.24.28
bījānyapi ca tā eva śaktayontarmanonmanīḥ |
karṇikāparavairāgyaṃ nālaṃ jñānaṃ śivātmakam ||
7.2.24.29
kandaśca śivadharmātmā karṇikānte trimaṇḍale |
trimaṇḍaloparyātmāditattvatritayamāsanam ||
7.2.24.30
sarvāsanopari sukhaṃ vicitrāstaraṇāstṛtam |
āsanaṃ kalpayeddivyaṃ śuddhavidyāsamujjvalam ||
7.2.24.31
āvāhanaṃ sthāpanaṃ ca sannirodhaṃ nirīkṣaṇam |
namaskāraṃ ca kurvīta badhvā mudrāḥ pṛthakpṛthak ||
7.2.24.32
pādyamācamanaṃ cārghyaṃ gandhaṃ puṣpaṃ tataḥ param |
dhūpaṃ dīpaṃ ca tāmbūlaṃ dattvātha snāpayet śivau ||
7.2.24.33
athavā parikalpyaivamāsanaṃ mūrtimeva ca |
sakalīkṛtya mūlena brahmabhiścāparaistathā ||
7.2.24.34
āvāhayettato devyā śivaṃ paramakāraṇam |
śuddhasphaṭikasaṅkāśaṃ devaṃ niścalamakṣaram ||
7.2.24.35
kāraṇaṃ sarvalokānāṃ sarvalokamayaṃ param |
antarbahiḥsthitaṃ vyāpya hyaṇoraṇu mahattaram ||
7.2.24.36
bhaktānāmaprayatnena dṛśyamīśvaramavyayam |
brahmendraviṣṇurudrādyairapi devairagocaram ||
7.2.24.37
devasāraṃ ca vidvadbhiragocaramiti śrutam |
ādimadhyāntarahitaṃ bheṣajaṃ bhavarogiṇām ||
7.2.24.38
śivatattvamiti khyātaṃ śivārthaṃ jagati sthiram |
pañcopacāravadbhaktyā pūjayelliṅgamuttamam ||
7.2.24.39
liṅgamūrttirmaheśasya śivasya paramātmanaḥ |
snānakāle prakurvīta jayaśabdādimaṅgalam ||
7.2.24.40
pañcagavyaghṛtakṣīradadhimadhvādipūrvakaiḥ |
mūlaiḥ phalānāṃ sāraiśca tilasarṣapasaktubhiḥ ||
7.2.24.41
bījairyavādibhiśśastaiścūrṇairmāṣādisambhavaiḥ |
saṃsnāpyālipya piṣṭādyaiḥ snāpayeduṣṇavāribhiḥ ||
7.2.24.42
gharṣayedbilvapatrādyairlepagandhāpanuttaye |
punaḥ saṃsnāpya salilaiścakravarttyupacārataḥ ||
7.2.24.43
sugandhāmalakaṃ dadyād haridrāṃ ca yathākramam |
tataḥ saṃśodhya salilairliṅgaṃ beramathāpi vā ||
7.2.24.44
snāpayedgandhatoyena kuśapuṣpodakena ca |
hiraṇyaratnatoyaiśca mantrasiddhairyathākramam ||
7.2.24.45
asambhave tu dravyāṇāṃ yathāsambhavasambhṛtaiḥ |
kevalairmantratoyairvā snāpayecchraddhayā śivam ||
7.2.24.46
kalaśenātha śaṅkhena varddhanyā pāṇinā tathā |
sakuśena sapuṣpeṇa snāpayenmantrapūrvakam ||
7.2.24.47
pavamānena rudreṇa nīlena tvaritena ca |
liṅgasūktādisūktaiśca śirasātharvaṇena ca ||
7.2.24.48
ṛgbhiśca sāmabhiḥ śaivairbrahmabhiścāpi pañcabhiḥ |
snāpayeddevadeveśaṃ śivena praṇavena ca ||
7.2.24.49
yathā devasya devyāśca kuryātsnānādikaṃ tathā |
na tu kaścidviśeṣo'sti tatra tau sadṛśau yataḥ ||
7.2.24.50
prathamaṃ devamuddiśya kṛtvā snānādikāḥ kriyāḥ |
devyai praścātprakurvīta devadevasya śāsanāt ||
7.2.24.51
arddhanārīśvare pūjye paurvāparyaṃ na vidyate |
tatra tatropacārāṇāṃ liṅge vānyatra vā kvacit ||
7.2.24.52
kṛtvā'bhiṣekaṃ liṅgasya śucinā ca sugandhinā |
sammṛjya vāsasā dadyādambaraṃ copavītakam ||
7.2.24.53
pādyamācamanaṃ cārghyaṃ gandhaṃ puṣpaṃ ca bhūṣaṇam |
dhūpaṃ dīpaṃ ca naivedyaṃ pānīyaṃ mukhaśodhanam ||
7.2.24.54
punaścācamanīyaṃ ca mukhavāsaṃ tataḥ param |
mukuṭaṃ ca śubhaṃ bhadraṃ sarvaratnairalaṅkṛtam ||
7.2.24.55
bhūṣaṇāni pavitrāṇi mālyāni vividhāni ca |
vyajane cāmare chatraṃ tālavṛntaṃ ca darpaṇam ||
7.2.24.56
dattvā nīrājanaṃ kuryātsarvamaṅgalaniḥsvanaiḥ |
gītanṛtyādibhiścaiva jayaśabdasamanvitaḥ ||
7.2.24.57
haime ca rājate tāmre pātre vā mṛṇmaye śubhe |
padmakaiḥ śobhitaiḥ puṣpairbījairdadhyakṣatādibhiḥ ||
7.2.24.58
triśūlaśaṅkhayugmābjanandyāvartaiḥ karīṣajaiḥ |
śrīvatsasvastikādarśavajrairvahnyādicihnitaiḥ ||
7.2.24.59
aṣṭau pradīpānparito vidhāyaikaṃ tu madhyame |
teṣu vāmādikāścintyāḥ pūjyāśca nava śaktayaḥ ||
7.2.24.60
kavacena samācchādya saṃrakṣyāstreṇa sarvataḥ |
dhenumudrāṃ ca sandarśya pāṇibhyāṃ pātramuddharet ||
7.2.24.61
athavāropayetpātre pañcadīpānyathākramam |
vidikṣvapi ca madhye ca dīpamekamathāpi vā ||
7.2.24.62
tatastatpātramuddhṛtya liṅgāderupari kramāt |
triḥpradakṣiṇayogena bhrāmayenmūlavidyayā ||
7.2.24.63
dadyādarghyaṃ tato mūrdhni bhasitaṃ ca sugandhitam |
kṛtvā puṣpāñjaliṃ paścādupahārānnivedayet ||
7.2.24.64
pānīyaṃ ca tato dadyāddattvā vācamanaṃ punaḥ |
pañca saugandhikopetaṃ tāmbūlaṃ ca nivedayet ||
7.2.24.65
prokṣayetprokṣaṇīyāni gānanāṭyāni kārayet |
liṅgādau śivayościntāṃ kṛtvā śaktyā japet śivam ||
7.2.24.66
pradakṣiṇaṃ praṇāmaṃ ca stavaṃ cātmasamarpaṇam |
vijñāpanaṃ ca kāryāṇāṃ kuryādvinayapūrvakam ||
7.2.24.67
arghyaṃ puṣpāñjaliṃ dattvā baddhvā mudrāṃ yathāvidhi |
paścātkṣamāpayeddevamudvāsyātmani cintayet ||
7.2.24.68
pādyādimukhavāsāntamarghyādyaṃ cātisaṅkaṭe |
puṣpavikṣepamātraṃ vā kuryādbhāvapuraḥsaram ||
7.2.24.69
tāvataiva paro dharmo bhāvane sukṛto bhavet |
asampūjya na bhuñjīta śivamāprāṇasañcarāt ||
7.2.24.70
yadi pāpastu bhuñjīta svairaṃ tasya na niṣkṛtiḥ |
pramādena tu bhuṅkte cettadudgīrya prayatnataḥ ||
7.2.24.71
snātvā dviguṇamabhyarcya devaṃ devīmupoṣya ca |
śivasyāyutamabhyasyed brahmacaryapuraḥsaram ||
7.2.24.72
paredyuḥ śaktito dattvā suvarṇādyaṃ śivāya ca |
śivabhaktāya vā kṛtvā mahāpūjāṃ śucirbhavet ||
7.2.24.72.c1
iti śrīśivamahāpurāṇe saptamyāṃ vāyavīyasaṃhitāyāmuttarakhaṇḍe śāstroktaśivapūjanavarṇanaṃ nāma caturviṃśo'dhyāyaḥ ||
7.2.24.72.p2
śrīgaṇeśāya namaḥ ||
7.2.24.72.p3
śrīgaurīśaṅkarābhyāṃ namaḥ ||
7.2.24.72.p4
śrīśivamahāpurāṇam ||
Other recensions (1)
- Śivapurāṇa — Vyāsa, Sanskrit
Linked texts (3)
- Samūrtārcanādhikaraṇa — Atri, Sanskrit
- Bṛhadbrahmasaṃhitā — Sanskrit
- Saṃvatsaradīdhiti — Anantadeva 1650, Sanskrit