Shivapurana 7.2.28: aṣṭāviṃśo'dhyāyaḥ | nityanaimittikavidhivarṇanam
Śivapurāṇa (complete text) 7.2.28
- Language
- Sanskrit
Contents
- 7.2.28.35 — 4 parts
aṣṭāviṃśo'dhyāyaḥ | nityanaimittikavidhivarṇanam
7.2.28.1
upamanyuruvāca |
ataḥ paraṃ pravakṣyāmi śivāśramaniṣeviṇām |
śivaśāstroktamārgeṇa naimittikavidhikramam ||
7.2.28.2
sarveṣvapi ca māseṣu pakṣayorubhayorapi |
aṣṭabhyāṃ ca caturdaśyāṃ tathā parvaṇi ca kramāt ||
7.2.28.3
ayane viṣuve caiva grahaṇeṣu viśeṣataḥ |
kartavyā mahatī pūjā hyadhikā vāpi śaktitaḥ ||
7.2.28.4
māsi māsi yathānyāyaṃ brahmakūrcaṃ prasādhya tu |
snāpayitvā śivaṃ tena pibeccheṣamupoṣitaḥ ||
7.2.28.5
brahmahatyādidoṣāṇāmatīva mahatāmapi |
niṣkṛtirbrahmakūrcasya pānānnānyā viśiṣyate ||
7.2.28.6
pauṣe tu puṣyanakṣatre kuryānnīrājanaṃ vibhoḥ |
māghe maghākhye nakṣatre pradadyād ghṛtakambalam ||
7.2.28.7
phālgune cottarānte vai prārabheta mahotsavam |
caitre citrāpaurṇamāsyāṃ dolāṃ kuryādyathāvidhi ||
7.2.28.8
vaiśākhyāṃ tu viśākhāyāṃ kuryātpuṣpamahālayam |
jyeṣṭhe mūlākhyanakṣatre śītakumbhaṃ pradāpayet ||
7.2.28.9
āṣāḍhe cottarāṣāḍhe pavitrāropaṇaṃ tathā |
śrāvaṇe prākṛtānyāpi maṇḍalāni prakalpayet ||
7.2.28.10
śraviṣṭhākhye tu nakṣatre prauṣṭhapadyāṃ tataḥ param |
prokṣayecca jalakrīḍāṃ pūrvāṣāḍhāśraye dine ||
7.2.28.11
āśvayujyāṃ tato dadyātpāyasaṃ ca navaudanam |
agnikāryaṃ ca tenaiva kuryāt śatabhiṣagdine ||
7.2.28.12
kārtikyāṃ kṛtikāyoge dadyāddīpasahasrakam |
mārgaśīrṣe tathārdrāyāṃ ghṛtena snāpayet śivam ||
7.2.28.13
aśaktasteṣu kāleṣu kuryādutsavameva vā |
āsthānaṃ vā mahāpūjāmadhikaṃ vā samarcanam ||
7.2.28.14
āvṛtte'pi ca kalyāṇe praśasteṣvapi karmasu |
daurmanasye durācāre duḥsvapne duṣṭadarśane ||
7.2.28.15
utpāte vāśubhe'nyasmin roge vā prabale'thavā |
snānapūjājapadhyānahomadānādikāḥ kriyaḥ ||
7.2.28.16
nimittānuguṇāḥ kāryāḥ puraścaraṇapūrvikāḥ |
śivānale ca vihate punaḥ sandhānamācaret ||
7.2.28.17
ya evaṃ śarvadharmiṣṭho vartate nityamudyataḥ |
tasyaikajanmanā muktiṃ prayacchati maheśvaraḥ ||
7.2.28.18
etadyathottaraṃ kuryāt nityanaimittikeṣu yaḥ |
divyaṃ śrīkaṇṭhanāthasya sthānamādyaṃ sa gacchati ||
7.2.28.19
tatra bhuktvā mahābhogān kalpakoṭiśataṃ naraḥ |
kālāntare cyutastasmādaumaṃ kaumārameva ca ||
7.2.28.20
samprāpya vaiṣṇavaṃ brāhmaṃ rudralokaṃ viśeṣataḥ |
tatroṣitvā ciraṃ kālaṃ bhuktvā bhogānyathoditān ||
7.2.28.21
punaścordhvaṃ gatastasmādatītya sthānapañcakam |
śrīkaṇṭhājjñānamāsādya tasmāt śaivapuraṃ vrajet ||
7.2.28.22
arddhacaryārataścāpi dvirāvṛttyaivameva tu |
paścājjñānaṃ samāsādya śivasāyujyamāpnuyāt ||
7.2.28.23
arddhārddhacarito yastu dehī dehakṣayātparam |
aṇḍāntaṃ vordhvamavyaktamatītya bhuvanadvayam ||
7.2.28.24
samprāpya pauruṣaṃ raudrasthānamadrīndrajāpateḥ |
anekayugasāhasraṃ bhuktvā bhogānanekadhā ||
7.2.28.25
puṇyakṣaye kṣitiṃ prāpya kule mahati jāyate |
tatrāpi pūrvasaṃskāravaśena sa mahādyutiḥ ||
7.2.28.26
paśudharmān parityajya śivadharmarato bhavet |
taddharmagauravādeva dhyātvā śivapuraṃ vrajet ||
7.2.28.27
bhogāṃśca vividhān bhuktvā vidyeśvarapadaṃ vrajet |
tatra vidyeśvaraiḥsārddhaṃ bhuktvā bhogān bahūn kramāt ||
7.2.28.28
aṇḍasyāntarbahirvātha sakṛdāvartate punaḥ |
tato labdhvā śivajñānaṃ parāṃ bhaktimavāpya ca ||
7.2.28.29
śivasādharmyamāsādya na bhūyo vinivartate |
yaścātīva śive bhakto viṣayāsaktacittavat ||
7.2.28.30
śivadharmānasau kurvannakurvan vāpi mucyate |
ekāvṛtto dvirāvṛttastrirāvṛtto nivartakaḥ ||
7.2.28.31
na punaścakravartī syāt śivadharmādhikāravān |
tasmāt śivāśrito bhūtvā yena kenāpi hetunā ||
7.2.28.32
śivadharme matiṃ kuryāt śreyase cetkṛtodyamaḥ |
nātra nirbandhayiṣyāmo vayaṃ kañcana kenacit ||
7.2.28.33
nirbandhebhyo'tivādebhyaḥ prakṛtyaitanna rocate |
rocate vā parebhyastu puṇyasaṃskāragauravāt ||
7.2.28.34
saṃsārakāraṇaṃ yeṣāṃ na praroḍhumalaṃ bhavet |
prakṛtyanuguṇaṃ tasmādvimṛśyaitadaśeṣataḥ ||
7.2.28.35
śivadharme'dhikurvīta yadīcchecchivamātmanaḥ ||
7.2.28.35.c1
iti śrīśivamahāpurāṇe saptamyāṃ vāyavīyasaṃhitāyāmuttarakhaṇḍe nityanaimittikavidhivarṇanaṃ nāmāṣṭāviṃśo'dhyāyaḥ ||
7.2.28.35.p2
śrīgaṇeśāya namaḥ ||
7.2.28.35.p3
śrīgaurīśaṅkarābhyāṃ namaḥ ||
7.2.28.35.p4
śrīśivamahāpurāṇam ||
Other recensions (1)
- Śivapurāṇa — Vyāsa, Sanskrit