Shivapurana 7.2.3: tṛtīyo'dhyāyaḥ | ṛṣṇāyopamanyorupadeśavarṇanam
Śivapurāṇa (complete text) 7.2.3
- Language
- Sanskrit
Contents
- 7.2.3.33 — 3 parts
tṛtīyo'dhyāyaḥ | ṛṣṇāyopamanyorupadeśavarṇanam
7.2.3.1
upamanyuruvāca |
śṛṇu kṛṣṇa maheśasya śivasya paramātmanaḥ |
mūrtyātmabhistataṃ kṛtsnaṃ jagadetaccarācaram ||
7.2.3.2
sa śivaḥ sarvamevedaṃ svakīyābhiśca mūrtibhiḥ |
adhitiṣṭhatyameyātmā hyetatsarvamanusmṛtam ||
7.2.3.3
brahmā viṣṇustathā rudro maheśānaḥ sadāśivaḥ |
mūrtayastasya vijñeyā yābhirviśvamidaṃ tatam ||
7.2.3.4
athānyāścāpi tanavaḥ pañca brahmasamāhvayāḥ |
tanūbhistābhirāvyāptamiha kiñcinna vidyate ||
7.2.3.5
īśānaḥ puruṣo'ghoro vāmaḥ sadyastathaiva ca |
brahmāṇyetāni devasya mūrtayaḥ pañca viśrutāḥ ||
7.2.3.6
īśānākhyā tu yā tasya mūrtirādyā garīyasī |
bhoktāraṃ prakṛteḥ sākṣāt kṣetrajñamadhitiṣṭhati ||
7.2.3.7
sthāṇostatpuruṣākhyā yā mūrtirmūrtimataḥ prabhoḥ |
guṇāśrayātmakaṃ bhogyamavyaktamadhitiṣṭhati ||
7.2.3.8
dharmādyaṣṭāṅgasaṃyuktaṃ buddhitattvaṃ pinākinaḥ |
adhitiṣṭhatyaghorākhyā mūrtiratyantapūjitā ||
7.2.3.9
vāmadevāhvayāṃ mūrtiṃ mahādevasya vedhasaḥ |
ahaṅkṛteradhiṣṭhātrīmāhurāgamavedinaḥ ||
7.2.3.10
sadyo jātāhvayāṃ mūrtiṃ śambhoramitavarcasaḥ |
mānasaḥ samadhiṣṭhātrīṃ matimantaḥ pracakṣate ||
7.2.3.11
śrotrasya vācaḥ śabdasya vibhorvyomnastathaiva ca |
īśvarīmīśvarasyemāmīśākhyāṃ hi vidurbudhāḥ ||
7.2.3.12
tvakpāṇisparśavāyūnāmīśvarīṃ mūrtimaiśvarīm |
puruṣākhyaṃ viduḥ sarve purāṇārthaviśāradāḥ ||
7.2.3.13
cakṣuṣaścaraṇasyāpi rūpasyāgnestathaiva ca |
aghorākhyāmadhiṣṭhātrīṃ mūrtimāhurmanīṣiṇaḥ ||
7.2.3.14
ramanāyāśca pāyośca rasasyāpāṃ tathaiva ca |
īśvarīṃ vāmadevākhyāṃ mūrtiṃ tanniratāṃ viduḥ ||
7.2.3.15
ghrāṇasya caivopasthasya gandhasya ca bhuvastathā |
sadyojñātāhvayāṃ mūrtimīśvarīṃ sampracakṣate ||
7.2.3.16
mūrtayaḥ pañca devasya vandanīyāḥ prayatnataḥ |
śreyo'rthibhirnarairnityaṃ śreyasāmekahetavaḥ ||
7.2.3.17
tasya devādidevasya mūrtyaṣṭakamayaṃ jagat |
tasmin vyāpya sthitaṃ viśvaṃ sūtre maṇigaṇā iva ||
7.2.3.18
śarvo bhavastathā rudra ugro bhīmaḥ paśoḥ patiḥ |
īśānaśca mahādevo mūrtayaścāṣṭa viśrutāḥ ||
7.2.3.19
bhūmyambho'gnimarudvyomakṣetrajñārkaniśākarāḥ |
adhiṣṭhitā maheśasya śarvādyairaṣṭamūrtibhiḥ ||
7.2.3.20
carācarātmakaṃ viśvaṃ dhatte viśvambharātmikā |
śārvī rśivāhvayā mūrtiriti śāstrasya niścayaḥ ||
7.2.3.21
sañjīvanaṃ samastasya jagataḥ salilātmikāj |
bhāvīti gīyate mūrtibhavasya paramātmanaḥ ||
7.2.3.22
bahirantargatā viśvaṃ vyāpya tejomayī śubhā |
raudrī rudrāvyayā mūrtirāsthitā ghorarūpiṇī ||
7.2.3.23
spandayatyanilātmedaṃ bibharti spandate svayam |
augrīti kathyate sadbhirmūrtirugrasya vedhasaḥ ||
7.2.3.24
sarvāvakāśadā sarvavyāpikā gaganātmikā |
mūrtirbhīmasya bhīmākhyā bhūtavṛndasya bhedikā ||
7.2.3.25
sarvātmanāmadhiṣṭhātrī sarvakṣetranivāsinī |
mūrtiḥ paśupaterjñeyā paśupāśanikṛntanī ||
7.2.3.26
dīpayantī jagatsarvaṃ divākarasamāhvayā |
īśānākhyā maheśasya mūrtirdivi visarpati ||
7.2.3.27
āpyāyayati yo viśvamamṛtāṃśurniśākaraḥ |
mahādevasya sā mūrtirmahādevasamāhvayā ||
7.2.3.28
ātmā tasyāṣṭamī mūrtiḥ śivasya paramātmanaḥ |
vyāpiketaramūrtīnāṃ viśvaṃ tasmāt śivātmakam ||
7.2.3.29
vṛkṣasya mūlasekena śākhāḥ puṣyanti vai yathā |
śivasya pūjayā tadvatpuṣyatyasya vapurjagat ||
7.2.3.30
sarvābhayapradānaṃ ca sarvānugrahaṇaṃ tathā |
sarvopakārakaraṇaṃ śivasyārādhanaṃ viduḥ ||
7.2.3.31
yatheha putrapautrādeḥ prītyā prīto bhavetpitā |
tathā sarvasya samprītyā prīto bhavati śaṅkaraḥ ||
7.2.3.32
dehino yasya kasyāpi kriyate yadi nigrahaḥ |
aniṣṭamaṣṭamūrtestatkṛtameva na saṃśayaḥ ||
7.2.3.33
aṣṭamūrtyātmanā viśvamadhiṣṭhāya sthitaṃ śivam |
bhajasva sarvabhāvena rudraṃ paramakāraṇam ||
7.2.3.33.c1
iti śrīśivamahāpurāṇe saptamyāṃ vāyavīyasaṃhitāyāmuttarakhaṇḍe kṛṣṇāyopamanyorupadeśavarṇanaṃ nāma tṛtīyo'dhyāyaḥ ||
7.2.3.33.p2
śrīgaṇeśāya namaḥ ||
7.2.3.33.p3
śrīgaurīśaṅkarābhyāṃ namaḥ ||
Other recensions (1)
- Śivapurāṇa — Vyāsa, Sanskrit
Linked texts (1)
- Śivārcanacandrikā (Appayya Dīkṣita) — Appayya Dīkṣita, Sanskrit