Shivapurana 7.2.31: ekatriṃśo'dhyāyaḥ | śivamahāstotravarṇanam
Śivapurāṇa (complete text) 7.2.31
- Language
- Sanskrit
Contents
- 7.2.31.189 — 4 parts
ekatriṃśo'dhyāyaḥ | śivamahāstotravarṇanam
7.2.31.1
upamanyuruvāca |
stotraṃ vakṣyāmi te kṛṣṇa pañcāvaraṇamārgataḥ |
yogeśvaramidaṃ puṇyaṃ karma yena samāpyate ||
7.2.31.2
jaya jaya jagadekanātha śambho, prakṛtimanohara nityacitsvabhāva |
atigatakaluṣaprapañcavācāmapi manasāṃ padavīmatītatattvam ||
7.2.31.3
svabhāvanirmalābhoga jaya sundaraceṣṭita |
svātmatulyamahāśakte jaya śuddhaguṇārṇava ||
7.2.31.4
anantakāntisampanna jayāsadṛśavigraha |
atarkyamahimādhāra jayānākulamaṅgala ||
7.2.31.5
nirañjana nirādhāra jaya niṣkāraṇodaya |
nirantaraparānanda jaya nirvṛtikāraṇa ||
7.2.31.6
jayātiparamaiśvarya jayātikaruṇāspada |
jaya svatantrasarvasva jayāsadṛśavaibhava ||
7.2.31.7
jayāvṛtamahāviśva jayānāvṛta kenacit |
jayottara samastasya jayātyantaniruttara ||
7.2.31.8
jayādbhuta jayākṣudra jayākṣata jayāvyaya |
jayāmeya jayāmāya jayābhāva jayāmala ||
7.2.31.9
mahābhuja mahāsāra mahāguṇa mahākatha |
mahābala mahāmāya mahārasa mahāratha ||
7.2.31.10
namaḥ paramadevāya namaḥ paramahetave |
namaḥ śivāya śāntāya namaḥ śivatarāya te ||
7.2.31.11
tvadadhīnamidaṃ kṛtsnaṃ jagaddhi sasurāsuram ||
7.2.31.12
atastvadvihitāmājñāṃ kṣamate ko'tivartitum ||
7.2.31.13
ayaṃ punarjano nityaṃ bhavadekasamāśrayaḥ |
bhavānato'nugṛhyāsmai prārthitaṃ samprayacchatu ||
7.2.31.14
jayāmbike jaganmātarjaya sarvajaganmayi |
jayānavadhikaiśvarye jayānupamavigrahe ||
7.2.31.15
jaya vāṅmanasātīte jayāciddhvāntabhañjike |
jaya janmajarāhīne jaya kālottarottare ||
7.2.31.16
jayānekavidhānasthe jaya viśveśvarapriye |
jaya viśvasurārādhye jaya viśvavijṛmbhiṇi ||
7.2.31.17
jaya maṅgaladivyāṅgi jaya maṅgaladīpike |
jaya maṅgalacāritre jaya maṅgaladāyini ||
7.2.31.18
namaḥ paramakalyāṇaguṇasañcayamūrtaye |
tvattaḥ khalu samutpannaṃ jagattvayyeva līyate ||
7.2.31.19
tvadvinātaḥ phalaṃ dātumīśvaro'pi na śaknuyāt |
janmaprabhṛti deveśi jano'yaṃ tvadupāśritaḥ ||
7.2.31.20
ato'sya tava bhaktasya nirvartaya manoratham |
pañcavaktro daśabhujaḥ śuddhasphaṭikasannibhaḥ ||
7.2.31.21
varṇabrahmakalādeho devaḥ sakalaniṣkalaḥ |
śivamūrtisamārūḍhaḥ śāntyatītaḥ sadāśivaḥ |
bhaktyā mayārcito mahyaṃ prārthitaṃ śaṃ prayacchatu ||
7.2.31.22
sadāśivāṅkamārūḍhā śaktiricchā śivāhvayā |
jananī sarvalokānāṃ prayacchatu manoratham ||
7.2.31.23
śivayordayitau putrau devau herambaṣaṇmukhau |
śivānubhāvau sarvajñau śivajñānāmṛtāśinau ||
7.2.31.24
tṛptau parasparaṃ snigdhau śivābhyāṃ nityasatkṛtau |
satkṛtau ca sadā devau brahmādyaistridaśairapi ||
7.2.31.25
sarvalokaparitrāṇaṃ kartumabhyuditau sadā |
svecchāvatāraṃ kurvantau svāṃśabhedairanekaśaḥ ||
7.2.31.26
tāvimau śivayoḥ pārśve nityamitthaṃ mayārcitau |
tayorājñāṃ puraskṛtya prārthitaṃ me prayacchatām ||
7.2.31.27
śuddhasphaṭikasaṅkāśamīśānākhyaṃ sadāśivam |
mūrdhābhimāninī mūrtiḥ śivasya paramātmanaḥ ||
7.2.31.28
śivārcanarataṃ śāntaṃ śāntyatītaṃ khamāsthitam |
pañcākṣarāntimaṃ bījaṃ kalābhiḥ pañcabhiryutam ||
7.2.31.29
prathamāvaraṇe pūrvaṃ śaktyā saha samarcitam |
pavitraṃ paramaṃ brahma prārthitaṃ me prayacchatu ||
7.2.31.30
bālasūryapratīkāśaṃ puruṣākhyaṃ purātanam |
pūrvavaktrābhimānaṃ ca śivasya parameṣṭhinaḥ ||
7.2.31.31
śāntyātmakaṃ marutsaṃsthaṃ śambhoḥ pādārcane ratam |
prathamaṃ śivabījeṣu kalāsu ca catuṣkalam ||
7.2.31.32
pūrvabhāge mayā bhaktyā śaktyā saha samarcitam |
pavitraṃ paramaṃ brahma prārthitaṃ me prayacchatu ||
7.2.31.33
añjanādipratīkāśamaghoraṃ ghoravigraham |
devasya dakṣiṇaṃ vaktraṃ devadevapadārcakam ||
7.2.31.34
vidyāpādaṃ samārūḍhaṃ vahnimaṇḍalamadhyagam |
dvitīyaṃ śivabījeṣu kalāsvaṣṭakalānvitam ||
7.2.31.35
śambhordakṣiṇadigbhāge śaktyā saha samarcitam |
pavitraṃ paramaṃ brahma prārthitaṃ me prayacchatu ||
7.2.31.36
kuṅkumakṣodasaṅkāśaṃ vāmākhyaṃ varaveṣadhṛk |
vaktramuttaramīśasya pratiṣṭhāyāṃ pratiṣṭhitam ||
7.2.31.37
vārimaṇḍalamadhyasthaṃ mahādevārcane ratam |
turīyaṃ śivabījeṣu trayodaśakalānvitam ||
7.2.31.38
devasyottaradigbhāge śaktyā saha samarcitam |
pavitraṃ paramaṃ brahma prārthitaṃ me prayacchatu ||
7.2.31.39
śaṅkhakundendudhavalaṃ sadyākhyaṃ saumyalakṣaṇam |
śivasya paścimaṃ vaktraṃ śivapādārcane ratam ||
7.2.31.40
nivṛttipadaniṣṭhaṃ ca pṛthivyāṃ samavasthitam |
tṛtīyaṃ śivabījeṣu kalābhiścāṣṭabhiryutam ||
7.2.31.41
devasya paścime bhāge śaktyā saha samarcitam |
pavitraṃ paramaṃ brahma prārthitaṃ me prayacchatu ||
7.2.31.42
śivasya tu śivāyāśca hṛnmūrttī śivabhāvite |
tayorājñāṃ puraskṛtya te me kāmaṃ prayacchatām ||
7.2.31.43
śivasya ca śivāyāśca śivāmūrttī śivāśrite |
satkṛtya śivayorājñāṃ te me kāmaṃ prayacchatām ||
7.2.31.44
śivasya ca śivāyāśca varmaṇī śivabhāvite |
satkṛtya śivayorājñāṃ te me kāmaṃ prayacchatām ||
7.2.31.45
śivasya ca śivāyāśca netramūrttī śivāśrite |
satkṛtya śivayorājñāṃ te me kāmaṃ prayacchatām ||
7.2.31.46
astramūrtī ca śivayornityamarcanatatpare |
satkṛtya śivayorājñāṃ te me kāmaṃ prayacchatām ||
7.2.31.47
vāmo jyeṣṭhastathā rudraḥ kālo vikaraṇastathā |
balo vikaraṇaścaiva balapramathanaḥ paraḥ ||
7.2.31.48
sarvabhūtasya damanastādṛśāścāṣṭaśaktayaḥ |
prārthitaṃ me prayacchantu śivayoreva śāsanāt ||
7.2.31.49
athānantaśca sūkṣmaśca śivaścāpyekanetrakaḥ |
ekarudrastrimūrtiśca śrīkaṇṭhaśca śikhaṇḍikaḥ ||
7.2.31.50
tathāṣṭau śaktayasteṣāṃ dvitīyāvaraṇe'rcitāḥ |
te me kāmaṃ prayacchantu śivayoreva śāsanāt ||
7.2.31.51
bhavādyā mūrtayaścāṣṭau tāsāmapi ca śaktayaḥ |
mahādevādayaścānye tathaikādaśamūrtayaḥ ||
7.2.31.52
śaktibhiḥ sahitāḥ sarve tṛtīyāvaraṇe sthitāḥ |
satkṛtya śivayorājñāṃ diśantu phalamīpsitam ||
7.2.31.53
vṛṣarājo mahātejā mahāmeghasamasvanaḥ |
merumandarakailāsahimādriśikharopamaḥ ||
7.2.31.54
sitābhraśikharākāraḥ kakudā pariśobhitaḥ |
mahābhogīndrakalpena vālena ca virājitaḥ ||
7.2.31.55
raktāsyaśṛṅgacaraṇo raktaprāyavilocanaḥ |
pīvaronnatasarvāṅgaḥ sucārugamanojjvalaḥ ||
7.2.31.56
praśastalakṣaṇaḥ śrīmān prajvalanmaṇibhūṣaṇaḥ |
śivapriyaḥ śivāsaktaḥ śivayordhvajavāhanaḥ ||
7.2.31.57
tathā taccaraṇanyāsapāvitāparavigrahaḥ |
gorājapuruṣaḥ śrīmān śrīmacchūlavarāyudhaḥ |
tayorājñāṃ puraskṛtya sa me kāmaṃ prayacchatu ||
7.2.31.58
nandīśvaro mahātejā nagendratanayātmajaḥ |
sanārāyaṇakairdevairnityamabhyarcya vanditaḥ ||
7.2.31.59
śarvasyāntaḥpuradvāri sārdhaṃ parijanaiḥ sthitaḥ |
sarveśvarasamaprakhyaḥ sarvāsuravimardanaḥ ||
7.2.31.60
sarveṣāṃ śivadharmāṇāmadhyakṣatve'bhiṣecitaḥ |
śivapriyaḥ śivāsaktaḥ śrīmacchūlavarāyudhaḥ ||
7.2.31.61
śivāśriteṣu saṃsaktastvanuraktaśca tairapi |
satkṛtya śivayorājñāṃ sa me kāmaṃ prayacchatu ||
7.2.31.62
mahākālo mahābāhurmahādeva ivāparaḥ |
mahādevāśritānāṃ tu nityamevābhirakṣatu ||
7.2.31.63
śivapriyaḥ śivāsaktaḥ śivayorarcakaḥ sadā |
satkṛtya śivayorājñāṃ sa me diśatu kāṅkṣitam ||
7.2.31.64
sarvaśāstrārthatattvajñaḥ śāstā viṣṇoḥ parā tanuḥ |
mahāmohātmatanayo madhumāṃsāsavapriyaḥ |
tayorājñāṃ puraskṛtya sa me kāmaṃ prayacchatu ||
7.2.31.65
brahmāṇī caiva māheśī kaumārī vaiṣṇavī tathā |
vārāhī caiva māhendrī cāmuṇḍā caṇḍavikramā ||
7.2.31.66
etā vai mātaraḥ sapta sarvalokasya mātaraḥ |
prārthitaṃ me prayacchantu parameśvaraśāsanāt ||
7.2.31.67
mattamātaṅgavadano gaṅgomāśaṅkarātmajaḥ |
ākāśadeho digbāhuḥ somasūryāgnilocanaḥ ||
7.2.31.68
airāvatādibhirdivyairdiggajairnityamarcitaḥ |
śivajñānamadodbhinnastridaśānāmavighnakṛt ||
7.2.31.69
vighnakṛccāsurādīnāṃ vighneśaḥ śivabhāvitaḥ |
satkṛtya śivayorājñāṃ sa me diśatu kāṅkṣitam ||
7.2.31.70
ṣaṇmukhaḥ śivasambhūtaḥ śaktivajradharaḥ prabhuḥ |
agneśca tanayo devo hyaparṇātanayaḥ punaḥ ||
7.2.31.71
gaṅgāyāśca gaṇāmbāyāḥ kṛttikānāṃ tathaiva ca |
viśākhena ca śākhena naigameyena cāvṛtaḥ ||
7.2.31.72
indrajiccandrasenānīstārakāsurajittathā |
śailānāṃ merumukhyānāṃ vedhakaśca svatejasā ||
7.2.31.73
taptacāmīkaraprakhyaḥ śatapatradalekṣaṇaḥ |
kumāraḥ sukumārāṇāṃ rūpodāharaṇaṃ mahat ||
7.2.31.74
śivapriyaḥ śivāsaktaḥ śivapadārcakaḥ sadā |
satkṛtya śivayorājñāṃ sa me diśatu kāṅkṣitam ||
7.2.31.75
jyeṣṭhā variṣṭhā varadā śivayoryajane ratā |
tayorājñāṃ puraskṛtya sā me diśatu kāṅkṣitam ||
7.2.31.76
trailokyavanditā sākṣādulkākārā gaṇāmbikā |
jagatsṛṣṭivivṛddhyarthaṃ brahmaṇābhyarthitā śivāt ||
7.2.31.77
śivāyāḥ pravibhaktāyā bhruvorantaraniḥsṛtāḥ |
dākṣāyaṇī satī menā tathā haimavatī hyumā ||
7.2.31.78
kauśikyāścaiva jananī bhadrakālyāstathaiva ca |
aparṇāyāśca jananī pāṭalāyāstathaiva ca ||
7.2.31.79
śivārcanaratā nityaṃ rudrāṇī rudravallabhā |
satkṛtya śivayorājñāṃ sā me diśatu kāṅkṣitam ||
7.2.31.80
caṇḍaḥ sarvagaṇeśānaḥ śambhorvadanasambhavaḥ |
satkṛtya śivayorājñāṃ sa me diśatu kāṅkṣitam ||
7.2.31.81
piṅgalo gaṇapaḥ śrīmān śivāsaktaḥ śivapriyaḥ |
ājñayā śivayoreva sa me kāmaṃ prayacchatu ||
7.2.31.82
bhṛṅgīśo nāma gaṇapaḥ śivarādhanatatparaḥ |
prayacchatu sa me kāmaṃ patyurājñāpuraḥsaram ||
7.2.31.83
vīrabhadro mahātejā himakundendusannibhaḥ |
bhadrakālīpriyo nityaṃ mātṛṇāṃ cābhirakṣitā ||
7.2.31.84
yajñasya ca śirohartā dakṣasya ca durātmanaḥ |
upendrendrayamādīnāṃ devānāmaṅgatakṣakaḥ ||
7.2.31.85
śivasyānucaraḥ śrīmān śivaśāsanapālakaḥ |
śivayoḥ śāsanādeva sa me diśatu kāṅkṣitam ||
7.2.31.86
sarasvatī maheśasya vāksarojasamudbhavā |
śivayoḥ pūjane saktā sa me diśatu kāṅkṣitam ||
7.2.31.87
viṣṇorvakṣaḥsthitā lakṣmīḥ śivayoḥ pūjane ratā |
śivayoḥ śāsanādeva sā me diśatu kāṅkṣitam ||
7.2.31.88
mahāmoṭī mahādevyāḥ pādapūjāparāyaṇā |
tasyā eva niyogena sā me diśatu kāṅkṣitam ||
7.2.31.89
kauśikī siṃhamārūḍhā pārvatyāḥ paramā sutā |
viṣṇornidrā mahāmāyā mahāmahiṣamardinī ||
7.2.31.90
niśambhaśumbhasaṃhartrī madhumāṃsāsavapriyā |
satkṛtya śāsanaṃ mātuḥ sā me diśatu kāṅkṣitam ||
7.2.31.91
rudrā rudrasamaprakhyāḥ pramathāḥ prathitaujasaḥ |
bhūtākhyāśca mahāvīryā mahādevasamaprabhāḥ ||
7.2.31.92
nityamuktā nirupamā nirdvandvā nirupaplavāḥ |
saśaktayaḥ sānucarāḥ sarvalokanamaskṛtāḥ ||
7.2.31.93
sarveṣāmeva lokānāṃ sṛṣṭisaṃharaṇakṣamāḥ |
parasparānuraktāśca parasparamanuvratāḥ ||
7.2.31.94
parasparamatisnigdhāḥ parasparanamaskṛtāḥ |
śivapriyatamā nityaṃ śivalakṣaṇalakṣitāḥ ||
7.2.31.95
saumyā ghorāstathā miśrāścāntarāladvayātmikāḥ |
virūpāśca surūpāśca nānārūpadharāstathā ||
7.2.31.96
satkṛtya śivayorājñāṃ te me kāmaṃ diśantu vai |
devyā priyasakhīvargo devīlakṣaṇalakṣitaḥ ||
7.2.31.97
sahito rudrakanyābhiḥ śaktibhiścāpyanekaśaḥ |
tṛtīyāvaraṇe śambhorbhaktyā nityaṃ samarcitaḥ ||
7.2.31.98
satkṛtya śivayorājñāṃ sa me diśatu maṅgalam |
divākaro maheśasya mūrtirdīptisumaṇḍalaḥ ||
7.2.31.99
nirguṇo guṇasaṅkīrṇastathaiva guṇakevalaḥ |
avikārātmakaścādya ekaḥ sāmānyavikriyaḥ ||
7.2.31.100
asādhāraṇakarmā ca sṛṣṭisthitilayakramāt |
evaṃ tridhā caturdhā ca vibhaktāḥ pañcadhā punaḥ ||
7.2.31.101
caturthāvaraṇe śambhoḥ pūjitaścānugaiḥ saha |
śivapriyaḥ śivāsaktaḥ śivapādārcane rataḥ ||
7.2.31.102
satkṛtya śivayorājñāṃ sa me diśatu maṅgalam |
divākaraṣaḍaṅgāni dīptādyāścāṣṭaśaktayaḥ ||
7.2.31.103
ādityo bhāskaro bhānū raviścetyanupūrvaśaḥ |
arko brahmā tathā rudro viṣnuścādityamūrtayaḥ ||
7.2.31.104
vistarā sutarā bodhinyāpyāyinyaparāḥ punaḥ |
uṣā prabhā tathā prājñā sandhyā cetyapi śaktayaḥ ||
7.2.31.105
somādiketuparyantā grahāśca śivabhāvitāḥ |
śivayorājñayā nunnā maṅgalaṃ pradiśantu me ||
7.2.31.106
athavā dvādaśādityāstathā dvādaśa śaktayaḥ |
ṛṣayo devagandharvāḥ pannagāpsarasāṃ gaṇāḥ ||
7.2.31.107
grāmaṇyaśca tathā yakṣā rākṣasāśca surāstathā |
sapta saptagaṇāścaite saptacchandomayā hayāḥ ||
7.2.31.108
vālakhilyādayaścaiva sarve śivapadārcakāḥ |
satkṛtya śivayorājñāṃ maṅgalaṃ pradiśantu me ||
7.2.31.109
brahmātha devadevasya mūrtirbhūmaṇḍalādhipaḥ |
catuḥṣaṣṭiguṇaiśvaryo buddhitattve pratiṣṭhitaḥ ||
7.2.31.110
nirguṇo guṇasaṅkīrṇastathaiva guṇakevalaḥ |
avikārātmako devastataḥ sādhāraṇaḥ puraḥ ||
7.2.31.111
asādhāraṇakarmā ca sṛṣṭisthitilayakramāt |
evaṃ tridhā caturdhā ca vibhaktaḥ pañcadhā punaḥ ||
7.2.31.112
caturthāvaraṇe śambhoḥ pūjitaśca sahānugaiḥ |
śivapriyaḥ śivāsaktaḥ śivapādārcane rataḥ ||
7.2.31.113
satkṛtya śivayorājñāṃ sa me diśatu maṅgalam |
hiraṇyagarbho lokeśo virāṭ kālaśca pūruṣaḥ ||
7.2.31.114
sanatkumāraḥ sanakaḥ sanandaśca sanātanaḥ |
prajānāṃ patayaścaiva dakṣādyā brahmasūnavaḥ ||
7.2.31.115
ekādaśa sapatnīkā dharmaḥ saṅkalpa eva ca |
śivārcanaratāścaite śivabhaktiparāyaṇāḥ ||
7.2.31.116
śivājñāvaśagāḥ sarve diśantu mama maṅgalam |
catvāraśca tathā vedāḥ setihāsapurāṇakāḥ ||
7.2.31.117
dharmaśāstrāṇi vidyābhirvaidikībhiḥ samanvitāḥ |
parasparāviruddhārthāḥ śivaprakṛtipādakāḥ ||
7.2.31.118
satkṛtya śivayorājñāṃ maṅgalaṃ pradiśantu me |
atha rudro mahādevaḥ śambhormūrtirgarīyasī ||
7.2.31.119
vāhneyamaṇḍalādhīśaḥ pauruṣaiśvaryavān prabhuḥ |
śivābhimānasampanno nirguṇastriguṇātmakaḥ ||
7.2.31.120
kevalaṃ sāttvikaścāpi rājasaścaiva tāmasaḥ |
avikārarataḥ pūrvaṃ tatastu samavikriyaḥ ||
7.2.31.121
asādhāraṇakarmā ca sṛṣṭyādikaraṇātpṛthak |
brahmaṇo'pi śiraśchettā janakastasya tatsutaḥ ||
7.2.31.122
janakastanayaścāpi viṣṇorapi niyāmakaḥ |
bodhakaśca tayornityamanugrahakaraḥ prabhuḥ ||
7.2.31.123
aṇḍasyāntarbahirvartī rudro lokadvayādhipaḥ |
śivapriyaḥ śivāsaktaḥ śivapādārcane rataḥ ||
7.2.31.124
śivasyājñāṃ puraskṛtya sa me diśatu maṅgalam |
tasya brahma ṣaḍaṅgāni vidyeśānāṃ tathāṣṭakam ||
7.2.31.125
catvāro mūrtibhedāśca śivapūrvāḥ śivārcakāḥ |
śivo bhavo haraścaiva mṛḍaścaiva tathāparaḥ |
śivasyājñāṃ puraskṛtya maṅgalaṃ pradiśantu me ||
7.2.31.126
atha viṣṇurmaheśasya śivasyaiva parā tanuḥ |
vāritattvādhipaḥ sākṣādavyaktapadasaṃsthitaḥ ||
7.2.31.127
nirguṇaḥ sattvabahulastathaiva guṇakevalaḥ |
avikārābhimānī ca trisādhāraṇavikriyaḥ ||
7.2.31.128
asādhāraṇakarmā ca sṛṣṭyādikaraṇātpṛthak |
dakṣiṇāṅgabhavenāpi spardhamānaḥ svayambhuvā ||
7.2.31.129
ādyena brahmaṇā sākṣātsṛṣṭaḥ sraṣṭā ca tasya tu |
aṇḍasyāntarbahirvartī viṣṇurlokadvayādhipaḥ ||
7.2.31.130
asurāntakaraścakrī śakrasyāpi tathānujaḥ |
prādurbhūtaśca daśadhā bhṛguśāpacchalādiha ||
7.2.31.131
bhūbhāranigrahārthāya svecchayāvātarat kṣitau |
aprameyabalo māyī māyayā mohayan jagat ||
7.2.31.132
mūrtiṃ kṛtvā mahāviṣṇuṃ sadāśiṣṇumathāpi vā |
vaiṣṇavaiḥ pūjito nityaṃ mūrtitrayamayāsane ||
7.2.31.133
śivapriyaḥ śivāsaktaḥ śivapādārcane rataḥ |
śivasyājñāṃ puraskṛtya sa me diśatu maṅgalam ||
7.2.31.134
vāsudevo'niruddhaśca pradyumnaśca tataḥ paraḥ |
saṅkarṣaṇaḥ samākhyātāścatasro mūrtayo hareḥ ||
7.2.31.135
matsyaḥ kūrmo varāhaśca nārasiṃho'tha vāmanaḥ |
rāmatrayaṃ tathā kṛṣṇo viṣṇusturagavaktrakaḥ ||
7.2.31.136
cakraṃ nārāyaṇasyāstraṃ pāñcajanyaṃ ca śārṅgakam |
satkṛtya śivayorājñāṃ maṅgalaṃ pradiśantu me ||
7.2.31.137
prabhā sarasvatī gaurī lakṣmīśca śivabhāvitā |
śivayoḥ śāsanādetā maṅgalaṃ pradiśantu me ||
7.2.31.138
indro'gniśca yamaścaiva nirṛtirvaruṇastathā |
vāyuḥ somaḥ kuberaśca tatheśānastriśūladhṛk ||
7.2.31.139
sarve śivārcanaratāḥ śivasadbhāvabhāvitāḥ |
satkṛtya śivayorājñāṃ maṅgalaṃ pradiśantu me ||
7.2.31.140
triśūlamatha vajraṃ ca tathā paraśusāyakau |
khaḍgapāśāṅkuśāścaiva pinākaścāyudhottamaḥ ||
7.2.31.141
divyāyudhāni devasya devyāścaitāni nityaśaḥ |
satkṛtya śivayorājñāṃ rakṣāṃ kurvantu me sadā ||
7.2.31.142
vṛṣarūpadharo devaḥ saurabheyo mahābalaḥ |
vaḍavākhyānalasparddhī pañcagomātṛbhirvṛtaḥ ||
7.2.31.143
vāhanatvamanuprāptastapasā parameśayoḥ |
tayorājñāṃ puraskṛtya sa me kāmaṃ prayacchatu ||
7.2.31.144
nandā sunandā surabhiḥ suśīlā sumanāstathā |
pañca gomātarastvetāḥ śivaloke vyavasthitāḥ ||
7.2.31.145
śivabhaktiparā nityaṃ śivārcanaparāyaṇāḥ |
śivayoḥ śāsanādeva diśantu mama vāñchitam ||
7.2.31.146
kṣetrapālo mahātejā nīlajīmūtasannibhaḥ |
daṃṣṭrākarālavadanaḥ sphuradraktādharojjvalaḥ ||
7.2.31.147
raktordhvamūrdhajaḥ śrīmān bhṛkuṭīkuṭilekṣaṇaḥ |
raktavṛttatrinayanaḥ śaśipannagabhūṣaṇaḥ ||
7.2.31.148
nagnastriśūlapāśāsikapālodyatapāṇikaḥ |
bhairavo bhairavaiḥ siddhairyoginībhiśca saṃvṛtaḥ ||
7.2.31.149
kṣetre kṣetre samāsīnaḥ sthito yo rakṣakaḥ satām |
śivapraṇāmaparamaḥ śivasadbhāvabhāvitaḥ ||
7.2.31.150
śivāśritān viśeṣeṇa rakṣan putrānivaurasān |
satkṛtya śivayorājñāṃ sa me diśatu maṅgalam ||
7.2.31.151
tālajaṅghādayastasya prathamāvaraṇe'rcitāḥ |
satkṛtya śivayorājñāṃ catvāraḥ samavantu mām ||
7.2.31.152
bhairavādyāśca ye cānye samantāttasya veṣṭitāḥ |
te'pi māmanugṛhṇantu śivaśāsanagauravāt ||
7.2.31.153
nāradādyāśca munayo divyā devaiśca pūjitāḥ |
sādhyā nāgāśca ye devā janalokanivāsinaḥ ||
7.2.31.154
vinivṛttādhikārāśca maharlokanivāsinaḥ |
saptarṣayastathānye vai vaimānikaguṇaiḥ saha ||
7.2.31.155
sarve śivārcanaratāḥ śivājñāvaśavartinaḥ |
śivayorājñayā mahyaṃ diśantu samakāṅkṣitam ||
7.2.31.156
gandharvādyāḥ piśācāntāścatasro devayonayaḥ |
siddhā vidyādharādyāśca ye'pi cānye nabhaścarāḥ ||
7.2.31.157
asurā rākṣasāścaiva pātālatalavāsinaḥ |
anantādyāśca nāgendrā vainateyādayo dvijāḥ ||
7.2.31.158
kūṣmāṇḍāḥ pretavetālā grahā bhūtagaṇāḥ pare |
ḍākinyaścāpi yoginyaḥ śākinyaścāpi tādṛśāḥ ||
7.2.31.159
kṣetrārāmagṛhādīni tīrthānyāyatanāni ca |
dvīpāḥ samudrā nadyaśca nadāścānye sarāṃsi ca ||
7.2.31.160
girayaśca sumervādyāḥ kānanāni samantataḥ |
paśavaḥ pakṣiṇo vṛkṣāḥ kṛmikīṭādayo mṛgāḥ ||
7.2.31.161
bhuvanānyapi sarvāṇi bhuvanānāmadhīśvarāḥ |
aṇḍānyāvaraṇaiḥ sārdhamāsāśca daśa diggajāḥ ||
7.2.31.162
varṇāḥ padāni mantrāśca tattvānyapi sahādhipaiḥ |
brahmāṇḍadhārakā rudrā rudrāścānye saśaktikāḥ ||
7.2.31.163
yacca kiñcijjagatyasmindṛṣṭaṃ cānumitaṃ śrutam |
sarve kāmaṃ prayacchantu śivayoreva śāsanāt ||
7.2.31.164
atha vidyā parā śaivī paśupāśavimocinī |
pañcārthasaṃjñitā divyā paśuvidyābahiṣkṛtā ||
7.2.31.165
śāstraṃ ca śivadharmākhyaṃ dharmākhyaṃ ca taduttaram |
śaivākhyaṃ śivadharmākhyaṃ purāṇaṃ śrutisammitam ||
7.2.31.166
śaivāgamāśca ye cānye kāmikādyāścaturvidhāḥ |
śivābhyāmaviśeṣeṇa satkṛtyeha samarcitāḥ ||
7.2.31.167
tābhyāmeva samājñātā mamābhipretasiddhaye |
karmedamanumanyantāṃ saphalaṃ sādhvanuṣṭhitam ||
7.2.31.168
śvetādyā nakulīśāntāḥ saśiṣyāścāpi deśikāḥ |
tatsantatīyā guravo viśeṣād guravo mama ||
7.2.31.169
śaivā māheśvarāścaiva jñānakarmaparāyaṇāḥ |
karmedamanumanyantāṃ saphalaṃ sādhvanuṣṭhitam ||
7.2.31.170
laukikā brāhmaṇāḥ sarve kṣatriyāśca viśaḥ kramāt |
vedavedāṅgatattvajñāḥ sarvaśāstraviśāradāḥ ||
7.2.31.171
sāṅkhyā vaiśeṣikāścaiva yaugā naiyāyikā narāḥ |
saurā brahmāstathā raudrā vaiṣṇavāścāpare narāḥ ||
7.2.31.172
śiṣṭāḥ sarve viśiṣṭāśca śivaśāsanayantritāḥ |
karmedamanumanyantāṃ mamābhipretasādhakam ||
7.2.31.173
śaivāḥ siddhāntamārgasthāḥ śaivāḥ pāśupatāstathā |
śaivā mahāvratadharāḥ śaivāḥ kāpālikāḥ pare ||
7.2.31.174
śivājñāpālakāḥ pūjyā mamāpi śivaśāsanāt |
sarve mamānugṛhṇantu śaṃsantu saphalakriyām ||
7.2.31.175
dakṣiṇajñānaniṣṭhāśca dakṣiṇottaramārgagāḥ |
avirodhena vartantāṃ mantraṃ śreyo'rthino mama ||
7.2.31.176
nāstikāśca śaṭhāścaiva kṛtaghnāścaiva tāmasāḥ |
pāṣaṇḍāścātipāpāśca vartantāṃ dūrato mama ||
7.2.31.177
bahubhiḥ kiṃ stutairatra ye'pi ke'pi cidāstikāḥ |
sarve māmanugṛhṇantu santaḥ śaṃsantu maṅgalam ||
7.2.31.178
namaḥ śivāya sāmbāya sasutāyādihetave |
pañcāvaraṇarūpeṇa prapañcenāvṛtāya te ||
7.2.31.179
ityuktvā daṇḍavad bhūmau praṇipatya śivaṃ śivām |
japetpañcākṣarīṃ vidyāmaṣṭottaraśatāvarām ||
7.2.31.180
tathaiva śaktividyāṃ ca japitvā tatsamarpaṇam |
kṛtvā taṃ kṣamayitveśaṃ pūjāśeṣaṃ samāpayet ||
7.2.31.181
etatpuṇyatamaṃ stotraṃ śivayorhṛdayaṅgamam |
sarvābhīṣṭapradaṃ sākṣādbhuktimuktyaikasādhanam ||
7.2.31.182
ya idaṃ kīrtayennityaṃ śṛṇuyādvā samāhitaḥ |
sa vidhūyāśu pāpāni śivasāyujyamāpnuyāt ||
7.2.31.183
goghnaścaiva kṛtaghnaśca vīrahā bhrūṇahāpi vā |
śaraṇāgataghātī ca mitraviśrambhaghātakaḥ ||
7.2.31.184
duṣṭapāpasamācāro mātṛhā pitṛhāpi vā |
stavenānena japtena tattatpāpāt pramucyate ||
7.2.31.185
duḥsvapnādimahānarthasūcakeṣu bhayeṣu ca |
yadi saṅkīrtayedetanna tato'narthabhāgbhavet ||
7.2.31.186
āyurārogyamaiśvaryaṃ yaccānyadapi vāñchitam |
stotrasyāsya jape tiṣṭhaṃstatsarvaṃ labhate naraḥ ||
7.2.31.187
asampūjya śivastotraṃ japātphalamudāhṛtam |
sampūjya ca jape tasya phalaṃ vaktuṃ na śakyate ||
7.2.31.188
āstāmiyaṃ phalāvāptirasmin saṅkīrtite sati |
sārdhamambikayā devaḥ śrutyaivaṃ divi tiṣṭhati ||
7.2.31.189
tasmānnabhasi sampūjya devadevaṃ sahomayā |
kṛtāñjalipuṭastiṣṭhan stotrametadudīrayet ||
7.2.31.189.c1
iti śrīśivamahāpurāṇe saptamyāṃ vāyavīyasaṃhitāyāmuttarakhaṇḍe śivamahāstotravarṇanaṃ nāmaikatriṃśo'dhyāyaḥ ||
7.2.31.189.p2
śrīgaṇeśāya namaḥ ||
7.2.31.189.p3
śrīgaurīśaṅkarābhyāṃ namaḥ ||
7.2.31.189.p4
śrīśivamahāpurāṇam ||
Other recensions (1)
- Śivapurāṇa — Vyāsa, Sanskrit
Linked texts (4)
- Dīkṣādarśa — Sanskrit
- Śivadharmaśāstra (IFP/EFEO 860 copied from R2442 G.O.N.L., Madras) — Sanskrit
- Bṛhatstotraratnākaraḥ — Sanskrit
- Skanda Purāṇa (Kumāra Kavi) — Kumāra Kavi, Sanskrit