Shivapurana 7.2.33: trayastriṃśo'dhyāyaḥ | āmuṣmikakarmavidhivarṇanam
Śivapurāṇa (complete text) 7.2.33
- Language
- Sanskrit
Contents
- 7.2.33.18 — 4 parts
trayastriṃśo'dhyāyaḥ | āmuṣmikakarmavidhivarṇanam
7.2.33.1
upamanyuruvāca |
ataḥ paraṃ pravakṣyāmi kevalāmuṣmikaṃ vidhim |
naitena sadṛśaṃ kiñcitkarmāsti bhuvanatraye ||
7.2.33.2
puṇyātiśayasaṃyuktaḥ sarvairdevairanuṣṭhitaḥ |
brahmaṇā viṣṇunā caiva rudreṇa ca viśeṣataḥ ||
7.2.33.3
indrādilokapāraiśca sūryādyairnavabhirgrahaiḥ |
viśvāmitravasiṣṭhādyairbrahmavidbhirmaharṣibhiḥ ||
7.2.33.4
śvetāgastyadadhīcādyairasmābhiśca śivāśritaiḥ |
nandīśvaramahākālabhṛṅgīśādyairgaṇeśvaraiḥ ||
7.2.33.5
pātālavāsibhirdaityaiḥ śeṣādyaiśca mahoragaiḥ |
siddhairyakṣaiśca gandharvai rakṣobhūtapiśācakaiḥ ||
7.2.33.6
svaṃ svaṃ padamanuprāptaṃ sarvairayamanuṣṭhitaḥ |
anena vidhinā sarve devā devatvamāgatāḥ ||
7.2.33.7
brahmā brahmatvamāpanno viṣṇurviṣṇutvamāgataḥ |
rudro rudratvamāpanna indraścendratvamāgataḥ ||
7.2.33.8
gaṇeśaśca gaṇeśatvamanena vidhinā gataḥ |
sitacandanatoyena liṅgaṃ snāpya śivaṃ śivām |
śvetairvikasitaiḥ padmaiḥ sampūjya praṇipatya ca ||
7.2.33.9
tatra padmāsanaṃ ramyaṃ kṛtvā lakṣaṇasaṃyutam |
vibhave sati hemādyai ratnādyairvā svaśaktitaḥ ||
7.2.33.10
madhye kesarajālāsya sthāpya liṅgaṃ kanīyasam |
aṅguṣṭhapratimaṃ ramyaṃ sarvagandhamayaṃ śubham ||
7.2.33.11
dakṣiṇe sthāpayitvā tu bilvapatraiḥ samarcayet |
aguruṃ dakṣiṇe pārśve paścime tu manaḥśilām ||
7.2.33.12
uttare candanaṃ dadyāddharitālaṃ tu pūrvataḥ |
sugandhaiḥ kusumai ramyairvicitraiścāpi pūjayet ||
7.2.33.13
dhūpaṃ kṛṣṇāguruṃ dadyātsarvataśca saguggulam |
vāsāṃsi cātisūkṣmāṇi vikāśāni nivedayet ||
7.2.33.14
pāyasaṃ ghṛtasammiśraṃ ghṛtadīpāṃśca dāpayet |
sarvaṃ nivedya mantreṇa tato gacchetpradakṣiṇām ||
7.2.33.15
praṇamya bhaktyā deveśaṃ stutvā cānte kṣamāpayet |
sarvopahārasammiśraṃ tato liṅgaṃ nivedayet ||
7.2.33.16
śivāya śivamantreṇa dakṣiṇāmūrtimāśritaḥ |
evaṃ yo'rcayate nityaṃ pañcagandhamayaṃ śubham ||
7.2.33.17
sarvapāpavinirmuktaḥ śivaloke mahīyate |
etad vratottamaṃ guhyaṃ śivaliṅgamahāvratam ||
7.2.33.18
bhaktasya te samākhyātaṃ na deyaṃ yasya kasyacit |
deyaṃ ca śivabhaktebhyaḥ śivena kathitaṃ purā ||
7.2.33.18.c1
iti śrīśivamahāpurāṇe saptamyāṃ vāyavīyasaṃhitāyāmuttarakhaṇḍe āmuṣmikakarmavidhivarṇanaṃ nāma trayastriṃśo'dhyāyaḥ ||
7.2.33.18.p2
śrīgaṇeśāya namaḥ ||
7.2.33.18.p3
śrīgaurīśaṅkarābhyāṃ namaḥ ||
7.2.33.18.p4
śrīśivamahāpurāṇam ||
Other recensions (1)
- Śivapurāṇa — Vyāsa, Sanskrit