Shivapurana 7.2.34: catustriṃśo'dhyāyaḥ | harividhimohavarṇanam
Śivapurāṇa (complete text) 7.2.34
- Language
- Sanskrit
Contents
- 7.2.34.43 — 4 parts
catustriṃśo'dhyāyaḥ | harividhimohavarṇanam
7.2.34.1
upamanyuruvāca |
nityanaimittikātkāmyādyā siddhiriha kīrtitā |
sā sarvā labhyeta sadyo liṅgaberapratiṣṭhayā ||
7.2.34.2
sarvo liṅgamayo lokaḥ sarvaṃ liṅge pratiṣṭhitam |
tasmātpratiṣṭhite liṅge bhavetsarvaṃ patiṣṭhitam ||
7.2.34.3
brahmaṇā viṣṇunā vāpi rudreṇānyena kena vā |
liṅgapratiṣṭhāmutsṛjya kriyate svapadasthitiḥ ||
7.2.34.4
kimanyadiha vaktavyaṃ pratiṣṭhāṃ prati kāraṇam |
partiṣṭhitaṃ śivenāpi liṅgaṃ vaiśveśvaraṃ yataḥ ||
7.2.34.5
tasmātsarvaprayatnena paratreha ca śarmaṇe |
sthāpayetparameśasya liṅgaṃ beramathāpi vā ||
7.2.34.6
śrīkṛṣṇa uvāca |
kimidaṃ liṅgamākhyātaṃ kathaṃ liṅgī maheśvaraḥ |
kathaṃ ca liṅgabhāvo'sya kasmādasmiñchivo'rcyate ||
7.2.34.7
upamanyuruvāca |
avyaktaṃ liṅgamākhyātaṃ triguṇaprabhavāpyayam |
anādyanantaṃ viśvasya yadupādānakāraṇam ||
7.2.34.8
tadeva mūlaprakṛtirmāyā ca gaganātmikā |
tata eva samutpannaṃ jagadetaccarācaram ||
7.2.34.9
aśuddhaṃ caiva śuddhaṃ yacchuddhāśuddhaṃ ca tattridhā |
tataḥ śivo maheśaśca rudro viṣṇuḥ pitāmahaḥ ||
7.2.34.10
bhūtāni cendriyairjātā līyante'tra śivājñayā |
ata eva śivo liṅgo liṅgamājñāpayedyataḥ ||
7.2.34.11
yato na tadanājñātaṃ kāryāya prabhavetsvataḥ |
tato jātasya viśvasya tatraiva vilayo yataḥ ||
7.2.34.12
anena liṅgatā tasya bhavennānyena kenacit |
liṅgaṃ ca śivayordehastābhyāṃ yasmādadhiṣṭhitam ||
7.2.34.13
atastatra śivaḥ sāmbo nityameva samarcayet |
liṅgavedī mahādevī liṅgaṃ sākṣānmaheśvaraḥ ||
7.2.34.14
tayoḥ sampūjanādeva sa ca sā ca samarcitau |
na tayorliṅgadehatvaṃ vidyate paramārthataḥ ||
7.2.34.15
yatastvetau viśuddhau tau dehastadupacārataḥ |
tadeva paramā śaktiḥ śivasya paramātmanaḥ ||
7.2.34.16
śaktirājñāṃ yadādatte prasūte taccarācaram |
na tasya mahimā śakyo vaktuṃ varṣaśatairapi ||
7.2.34.17
yenādau mohitau syātāṃ brahmanārāyaṇāvapi |
purā tribhuvanasyāsya pralaye samupasthite ||
7.2.34.18
vāriśayyāgato viṣṇuḥ suṣvāpānākulaḥ sukham |
yadṛcchayā gatastatra brahmā lokapitāmahaḥ ||
7.2.34.19
dadarśa puṇḍarīkākṣaṃ svapantaṃ tamanākulam |
māyayā mohitaḥ śambhorviṣṇumāha pitāmahaḥ ||
7.2.34.20
kastvaṃ vadetyamarṣeṇa prahṛtyotthāpya mādhavam |
sa tu hastaprahāreṇa tīvreṇābhihataḥ kṣaṇāt ||
7.2.34.21
prabuddhotthāya śayanāddadarśa parameṣṭhinam |
tamāha cāntaḥ saṅkruddhaḥ svayamakruddhavaddhariḥ ||
7.2.34.22
kutastvamāgato vatsa kasmāttvaṃ vyākulo vada |
iti viṣṇuvacaḥ śrutvā prabhutvaguṇasūcakam ||
7.2.34.23
rajasā baddhavairastaṃ brahmā punarabhāṣata |
vatseti māṃ kuto brūṣe guruḥ śiṣyamivātmanaḥ ||
7.2.34.24
māṃ na jānāsi kiṃ nāthaṃ prapañco yasya me kṛtiḥ |
tridhātmānaṃ vibhajyedaṃ sṛṣṭvātha paripālyate ||
7.2.34.25
saṃharāmi name kaścitsraṣṭā jagati vidyate |
ityukte sati so'pyāha brahmāṇaṃ viṣṇuravyayaḥ ||
7.2.34.26
ahamevādikartāsya hartā ca paripālakaḥ |
bhavānapi mamaivāṅgādavatīrṇaḥ purāvyayāt ||
7.2.34.27
manniyogāttvamātmānaṃ tridhā kṛtvā jagattrayam |
sṛjasyavasi cānte tatpunaḥ pratisṛjasyapi ||
7.2.34.28
vismṛto'si jagannāthaṃ nārāyaṇamanāmayam |
tavāpi janakaṃ sākṣānmāmevamavamanyase ||
7.2.34.29
tavāparādho nāstyatra bhrānto'si mama māyayā |
matprasādādiyaṃ bhrāntirapaiṣyati tavācirāt ||
7.2.34.30
śṛṇu satyaṃ caturvaktra sarvadeveśvaro hyaham |
kartā bhartā ca hartā ca na mayāsti samo vibhuḥ ||
7.2.34.31
evameva vivādo'bhūd brahmaviṣṇvoḥ parasparam |
abhavacca mahāyuddhaṃ bhairavaṃ romaharṣaṇam ||
7.2.34.32
muṣṭibhirnnighnatostīvraṃ rajasā baddhavairayoḥ |
tayordarpāpahārāya prabodhāya ca devayoḥ ||
7.2.34.33
madhye samāvirabhavalliṅgamaiśvaramadbhutam |
jvālāmālāsahasrāḍhyamaprameyamanaupamam ||
7.2.34.34
kṣayavṛddhivinirmuktamādimadhyāntavarjitam |
tasya jvālāsahasreṇa brahmaviṣṇū vimohitau ||
7.2.34.35
visṛjya yuddhaṃ kiṃ tvetadityacintayatāṃ tadā |
na tayostasya yāthātmyaṃ prabuddhamabhavadyadā ||
7.2.34.36
tadā samudyatau syātāṃ tasyādyantaṃ parīkṣitum ||
7.2.34.37
tatra haṃsākṛtirbrahmā viśvataḥ pakṣasaṃyutaḥ |
mano'nilajavo bhūtvā gatastūrdhvaṃ prayatnataḥ ||
7.2.34.38
nārāyaṇo'pi viśvātmā nīlāñjanacayopamam |
vārāhamamitaṃ rūpamāsthāya gatavānadhaḥ ||
7.2.34.39
evaṃ varṣasahasraṃ tu tvaran viṣṇuradhogataḥ |
nāpaśyadalpamapyasya mūlaṃ liṅgasya sūkaraḥ ||
7.2.34.40
tāvatkālaṃ gataścordhvaṃ tasyāntaṃ jñātumicchayā |
śrānto'tyantamadṛṣṭvāntaṃ pāpatādhaḥ pitāmahaḥ ||
7.2.34.41
tathaiva bhagavān viṣṇuḥ śrāntaḥ saṃvignalocanaḥ |
kleśena mahatā tūrṇamadhastādutthito'bhavat ||
7.2.34.42
samāgatāvathānyonyaṃ vismayasmeravīkṣaṇau |
māyayā mohitau śambhoḥ kṛtyākṛtyaṃ na jagmatuḥ ||
7.2.34.43
pṛṣṭhataḥ pārśvatastasya cāgrataśca sthitāvubhau |
praṇipatya kimātmedamityacintayatāṃ tadā ||
7.2.34.43.c1
iti śrīśivamahāpurāṇe saptamyāṃ vāyavīyasaṃhitāyāmuttarakhaṇḍe harividhimohavarṇanaṃ nāma catustriṃśo'dhyāyaḥ ||
7.2.34.43.p2
śrīgaṇeśāya namaḥ ||
7.2.34.43.p3
śrīgaurīśaṅkarābhyāṃ namaḥ ||
7.2.34.43.p4
śrīśivamahāpurāṇam ||
Other recensions (1)
- Śivapurāṇa — Vyāsa, Sanskrit
Linked texts (1)
- Kālottara (IFP T0059) — Sanskrit