Shivapurana 7.2.41: ekacatvāriṃśo'dhyāyaḥ | śrīśivamahāpurāṇamāhātmyavarṇanam
Śivapurāṇa (complete text) 7.2.41
- Language
- Sanskrit
Contents
- 7.2.41.51 — 2 parts
ekacatvāriṃśo'dhyāyaḥ | śrīśivamahāpurāṇamāhātmyavarṇanam
7.2.41.1
sūta uvāca |
tatra skandasaro nāma saraḥ sāgarasannibham |
amṛtasvāduśiśirasvacchāgādhalaghūdakam ||
7.2.41.2
samantataḥ saṅghaṭitaṃ sphaṭikopalasañcayaiḥ |
sarvartukusumaiḥ phullaiśchāditākhiladiṅmukham ||
7.2.41.3
śaivalairutpalaiḥ padmaiḥ kumudaistārakopamaiḥ |
taraṅgairabhrasaṅkāśairākāśamiva bhūmigam ||
7.2.41.4
sukhāvataraṇārohaiḥ sthalairnīlaśilāmayaiḥ |
sopānamārgau ruciraiḥ śobhamānāṣṭadiṅmukham ||
7.2.41.5
tatrāvatīrṇaiśca yathā tatrottīrṇaiśca bhūyasā |
snātaiḥ sitopavītaiśca śuklākaupīnavalkalaiḥ ||
7.2.41.6
jaṭāśikhāyanairmuṇḍaistripuṇḍrakṛtamaṇḍanaiḥ |
virāgavivaśasmeramukhairmunikumārakaiḥ ||
7.2.41.7
ghaṭaiḥ kamalinīpatrapuṭaiśca kalaśaiḥ śivaiḥ |
kamaṇḍalubhiranyaiśca tādṛśaiḥ karakādibhiḥ ||
7.2.41.8
ātmārthaṃ ca parārthaṃ ca devatārthaṃ viśeṣataḥ |
ānīyamānasalilamāttapuṣpaṃ ca nityaśaḥ ||
7.2.41.9
antarjalaśilārūḍhairnīcānāṃ sparśaśaṅkayā |
ācāravadbhirmunibhiḥ kṛtabhasmāṅgadhūsaraiḥ ||
7.2.41.10
itastato'psu majjadbhiriṣṭaśiṣṭaiḥ śilāgataiḥ |
tilaiśca sākṣataiḥ puṣpaistyaktadarbhapavitrakaiḥ ||
7.2.41.11
devādyamṛṣimadhyaṃ ca nirvartya pitṛtarpaṇam |
nivedayedabhijñebhyo nityasnānagatān dvijān ||
7.2.41.12
sthāne sthāne kṛtānekabalipuṣpasamīraṇaiḥ |
saurārghyapūrvaṃ kurvadbhiḥ sthaṇḍalebhyarcanādikam ||
7.2.41.13
kvacinnimajjadunmajjatprasrastagajayūthapam |
kvacicca tṛṣayāyātamṛgīmṛgaturaṅgamam ||
7.2.41.14
kvacitpītajanottīrṇamayūravaravāraṇam |
kvacitkṛtataṭāghātavṛṣaprativṛṣojjvalam ||
7.2.41.15
kvacitkāraṇḍavaravaiḥ kvacitsārasakūjitaiḥ |
kvacicca kokaninadaiḥ kvacidbhramaragītibhiḥ ||
7.2.41.16
snānapānādikaraṇaiḥ svasampaddrumajīvibhiḥ |
praṇayātprāṇibhistaistairbhāṣamāṇamivāsakṛt ||
7.2.41.17
kūlaśākhiśikhālīnakokilākulakūjitaiḥ |
ātapopahatān sarvānnāmantrayadivāniśam ||
7.2.41.18
uttare tasya sarasastīre kalpataroradhaḥ |
vedyāṃ vajraśilāmayyāṃ mṛdule mṛgacarmaṇi ||
7.2.41.19
sanatkumāramāsīnaṃ śaśvadbālavapurdharam |
tatkālamātroparataṃ samādheracalātmanaḥ ||
7.2.41.20
upāsyamānaṃ munibhiryogīndrairapi pūjitam |
dadṛśurnaimiṣeyāste praṇatāścopatasthire ||
7.2.41.21
yāvatpṛṣṭavate tasmai procuḥ svāgatakāraṇam |
tumulaḥ śuśruve tāvaddivi dundubhiniḥsvanaḥ ||
7.2.41.22
dadṛśe tatkṣaṇe tasmin vimānaṃ bhānusannibham |
gaṇeśvarairasaṅkhyeyaiḥ saṃvṛtaṃ ca samantataḥ ||
7.2.41.23
apsarogaṇasaṅkīrṇaṃ rudrakanyābhirāvṛtam |
mṛdaṅgamurajodghuṣṭaṃ veṇuvīṇāravānvitam ||
7.2.41.24
citraratnavitānāḍhyaṃ muktādāmavirājitam |
munibhiḥ siddhagandharvairyakṣacāraṇakinnaraiḥ ||
7.2.41.25
nṛtyadbhiścaiva gāyadbhirvādayadbhiśca saṃvṛtam |
vīragovṛṣacihnena vidramadrumayaṣṭinā ||
7.2.41.26
kṛtagopurasatkāraṃ ketunā mānyahetunā |
tasya madhye vimānasya cāmaradvitayāntare ||
7.2.41.27
chattrasya maṇidaṇḍasya candrasyeva śuceradhaḥ |
divyasiṃhāsanārūḍhaṃ devyā suyaśayā saha ||
7.2.41.28
śriyā ca vapuṣā caiva tribhiścāpi vilocanaiḥ |
prākārairabhikṛtyānāṃ pratyabhijñāpakaṃ prabhoḥ ||
7.2.41.29
avilaṅghya jagatkarturājñāpanamivāgatam |
sarvānugrahaṇaṃ śambhoḥ sākṣādiva puraḥsthitam ||
7.2.41.30
śilādatanayaṃ sākṣācchrīmacchūlavarāyudham |
viśveśvaragaṇādhyakṣaṃ viśveśvaramivāparam ||
7.2.41.31
viśvasyāpi vidhātṝṇāṃ nigrahānugrahakṣamam |
caturbāhumudārāṅgaṃ candrarekhāvibhūṣitam ||
7.2.41.32
kaṇṭhe nāgena maulau ca śaśāṅkenāpyalaṅkṛtam |
savigrahamivaiśvaryaṃ sāmarthyamiva sakriyam ||
7.2.41.33
samāptamiva nirvāṇaṃ sarvajñamiva saṅgatam |
dṛṣṭvā prahṛṣṭavadano brahmaputraḥ saharṣibhiḥ ||
7.2.41.34
tasthau prāñjalirutthāya tasyātmānamivārpayan |
atha tatrāntare tasminvimāne cāvaniṃ gate ||
7.2.41.35
praṇamya daṇḍavaddevaṃ stutvā vyajñāpayanmunīm |
ṣaṭkulīyā ime dīrghaṃ naimiṣe satramāsthitāḥ |
āgatā brahmaṇādiṣṭāḥ pūrvamevābhikāṅkṣayā ||
7.2.41.36
śrutvā vākyaṃ brahmaputrasya nandī chittvā pāśāndṛṣṭipātena sadyaḥ |
śaivaṃ dharmaṃ caiśvaraṃ jñānayogaṃ dattvā bhūyo devapārśvaṃ jagāma ||
7.2.41.37
sanatkumāreṇa ca tatsamastaṃ vyāsāya sākṣādgurave mamoktam |
vyāsena coktaṃ mahitena mahyaṃ mayā ca tadvaḥ kathitaṃ samāsāt ||
7.2.41.38
nāvedavidbhyaḥ kathanīyametat purāṇaratnaṃ puraśāsanasya |
nābhaktaśiṣyāya ca nāstikebhyo dattaṃ hi mohānnirayaṃ dadāti ||
7.2.41.39
mārgeṇa sevānugatena yaistad dattaṃ gṛhītaṃ paṭhitaṃ śrutaṃ vā |
tebhyaḥ sukhaṃ dharmamukhaṃ trivargaṃ nirvāṇamante niyataṃ dadāti ||
7.2.41.40
parasparasyopakṛtaṃ bhavadbhi rmayā ca paurāṇikamārgayogāt |
ato gamiṣye'hamavāptakāmaḥ samastamevāstu śivaṃ sadā naḥ ||
7.2.41.41
sūte kṛtāśiṣi gate munayaḥ suvṛttā yāge ca paryavasite mahati prayoge |
kāle kalau ca viṣayaiḥ kaluṣāyamāṇe vārāṇasīparisare vasatiṃ vinetuḥ ||
7.2.41.42
atha ca te paśupāśamumukṣayā-khilatayā kṛtapāśupatavratāḥ |
adhikṛtākhilabodhasamādhayaḥ paramanirvṛtimāpuraninditāḥ ||
7.2.41.43
vyāsa uvāca |
etacchivapurāṇaṃ hi samāptaṃ hitamādarāt |
paṭhitavyaṃ prayatnena śrotavyaṃ ca tathaiva hi ||
7.2.41.44
nāstikāya na vaktavyamaśraddhāya śaṭhāya ca |
abhaktāya maheśasya tathā dharmadhvajāya ca ||
7.2.41.45
etacchrutyā hyekavāraṃ bhavet pāpaṃ hi bhasmasāt |
abhakto bhaktimāpnoti bhakto bhaktisamṛddhibhāk ||
7.2.41.46
punaḥ śrute ca sadbhaktirmuktiḥ syācca śruteḥ punaḥ |
tasmāt punaḥpunaścaiva śrotavyaṃ hi mumukṣubhiḥ ||
7.2.41.47
pañcāvṛttiḥ prakartavyā purāṇasyāsya saddhiyā |
paraṃ phalaṃ samuddiśya tatprāpnoti na saṃśayaḥ ||
7.2.41.48
purātanāśca rājāno viprā vaiśyāśca sattamāḥ |
saptakṛtvastadāvṛttyālabhanta śivadarśanam ||
7.2.41.49
śroṣyatyathāpi yaścedaṃ mānavo bhaktitatparaḥ |
ihabhuktvākhilān bhogānante muktiṃlabhecca saḥ ||
7.2.41.50
etacchivapurāṇaṃ hi śivasyātipriyaṃ param |
bhuktimuktipradaṃ brahmasammitaṃ bhaktivardhanam ||
7.2.41.51
etacchivapurāṇasya vaktuḥ śrotuśca sarvadā |
sagaṇaḥ sasutaḥ sāmbaḥ śaṃ karotu sa śaṅkaraḥ ||
7.2.41.51.c1
iti śrīśivamahāpurāṇe saptamyāṃ vāyavīyasaṃhitāyāmuttarakhaṇḍe vyāsopadeśaśrīśivamahāpurāṇamāhātmyavarṇanaṃ nāmaikacatvāriṃśo'dhyāyaḥ ||
7.2.41.51.p2
samāpto'yaṃ śrīśivamahāpurāṇagranthaḥ |
oṃ |
Other recensions (1)
- Śivapurāṇa — Vyāsa, Sanskrit