Pramāṇa · Search · About · API

Shivapurana 7.2.7: saptamo'dhyāyaḥ | śivatattvakathanam

Śivapurāṇa (complete text) 7.2.7

Language
Sanskrit

Contents

saptamo'dhyāyaḥ | śivatattvakathanam

7.2.7.1

upamanyuruvaca |
śaktiḥ svābhavikī tasya vidyā viśvavilakṣaṇā |
ekānekasya rūpeṇa bhāti bhānoriva prabhā ||

7.2.7.2

anantāḥ śaktayo yasyā icchājñānakriyādayaḥ |
māyādyāścābhavanvahnorvisphuliṅgā yathā tathā ||

7.2.7.3

sadāśiveśvarādyā hi vidyāvidyeśvarādayaḥ |
abhavan puruṣāścāsyāḥ prakṛtiśca parātparā ||

7.2.7.4

mahadādiviśeṣāntāstvajādyāścāpi mūrtayaḥ |
yaccānyadasti tatsarvaṃ tasyāḥ kāryaṃ na saṃśayaḥ ||

7.2.7.5

sā śaktiḥ sarvagā sūkṣmā prabodhānandarūpiṇī |
śaktimānucyate devaḥ śivaḥ śītāṃśubhūṣaṇaḥ ||

7.2.7.6

vedyaḥ śivaḥ śivā vidyā prajñā caiva śrutiḥ smṛtiḥ |
dhṛtireṣā sthitirniṣṭhā jñānecchākarmaśaktayaḥ ||

7.2.7.7

ājñā caiva paraṃ brahma dve vidye ca parāpare |
śuddhavidyā śuddhakalā sarvaṃ śaktikṛtaṃ yataḥ ||

7.2.7.8

māyā ca prakṛtirjīvo vikāro vikṛtistathā |
asacca sacca yatkiñcittayā sarvamidaṃ tatam ||

7.2.7.9

sā devī māyayā sarvaṃ brahmāṇḍaṃ sacarācaram |
mohayatyaprayatnena mocayatyapi līlayā ||

7.2.7.10

anayā saha sarveśaḥ saptaviṃśaprakārayā |
viśvaṃ vyāpya sthitastasmāt muktiratra pravartate ||

7.2.7.11

mumukṣavaḥ purā kecinmunayo brahmavādinaḥ |
saṃśayāviṣṭamanaso vismṛśanti yathātatham ||

7.2.7.12

kiṃ kāraṇaṃ kuto jātā jīvāmaḥ kena vā vayam |
kutrāsmākaṃ sampratiṣṭhā kena vādhiṣṭhitā vayam ||

7.2.7.13

kena vartāmahe śaśvatsukheṣvanyeṣu cāniśam |
avilaṅghyā ca viśvasya vyavasthā kena vā kṛtā ||

7.2.7.14

kālasya bhāvo niyatiryadṛcchā nātra yujyate |
bhūtāni yoniḥ puruṣo yogī caiṣāṃ paro'thavā ||

7.2.7.15

acetanatvātkālādeścetanatve'pi cātmanaḥ |
sukhaduḥkhāni bhūtatvādanīśatvādvicāryate ||

7.2.7.16

taddhyānayogānugatāḥ prapaśyan śaktimaiśvarīm |
pāśavicchedikāṃ sākṣānnigūḍhāṃ svaguṇairbhṛśam ||

7.2.7.17

tayā vicchinnapāśāste sarvakāraṇakāraṇam |
śaktimantaṃ mahādevamapaśyandivyacakṣuṣā ||

7.2.7.18

yaḥ kāraṇānyaśeṣāṇi kālātmasahitāni ca |
aprameyo'nayā śaktyā sakalaṃ yo'dhitiṣṭhati ||

7.2.7.19

tataḥ prasādayogena yogena parameṇa ca |
dṛṣṭena bhaktiyogena divyāṃ gatimavāpnuyuḥ ||

7.2.7.20

tasmātsaha tathā śaktyā hṛdi paśyanti ye śivam |
teṣāṃ śāśvatikī śāntirnaitareṣāmiti śrutiḥ ||

7.2.7.21

na hi śaktimataḥ śaktyā viprayogo'sti jātucit |
tasmāt śakteḥ śaktimatastādātmyānnirvṛtirdvayoḥ ||

7.2.7.22

kramo vivakṣito nūnaṃ vimuktau jñānakarmaṇoḥ |
prasāde sati sā mūrtiryasmātkaratale sthitā ||

7.2.7.23

devo vā dānavo vāpi paśurvā vihago'pi vā |
kīro vātha kṛmirvāpi mucyate tatprasādataḥ ||

7.2.7.24

garbhastho jāyamāno vā bālo vā taruṇo'pi vā |
vṛddho vā mriyamāṇo vā svargastho vātha nārakī ||

7.2.7.25

patito vāpi dharmātmā paṇḍito mūḍha eva vā |
prasāde tatkṣaṇādeva mucyate nātra saṃśayaḥ ||

7.2.7.26

ayogyānāṃ ca kāruṇyādbhaktānāṃ parameśvaraḥ |
prasīdati na sandeho vigṛhya vividhān malān ||

7.2.7.27

prasadādeva sā bhaktiḥ prasādo bhaktisambhavaḥ |
avasthābhedamutprekṣya vidvāṃstatra na muhyati ||

7.2.7.28

prasādapūrvikā yeyaṃ bhuktimuktividhāyinī |
naiva sā śakyate prāptuṃ narairekena janmanā ||

7.2.7.29

anekajanmasiddhānāṃ śrautasmārtānuvartinām |
viraktānāṃ prabuddhānāṃ prasīdati maheśvaraḥ ||

7.2.7.30

prasanne sati deveśe paśau tasmin pravartate |
asti nātho mametyalpā bhaktirbuddhipuraḥsarā ||

7.2.7.31

tapasā vividhaiḥ śaivairdharmaiḥ saṃyujyate naraḥ |
tattrayoge tadabhyāsastato bhaktiḥ parā bhavet ||

7.2.7.32

parayā ca tayā bhaktyā prasādo labhyate paraḥ |
prasādātsarvapāśebhyo muktirmuktasya nirvṛtiḥ ||

7.2.7.33

alpabhāvo'pi yo martyaḥ so'pi janmatrayātparam |
na yoniyantrapīḍāyai bhavennaivātra saṃśayaḥ ||

7.2.7.34

sāṅgānaṅgā ca yā sevā sā bhaktiriti kathyate |
sā punarbhidyate tredhā manovākkāyasādhanaiḥ ||

7.2.7.35

śivarūpādicintā yā sā sevā mānasī smṛtā |
japādirvācikī sevā karmapūjādi kāyikī ||

7.2.7.36

seyaṃ trisādhanā sevā śivadharmaśca kathyate |
sa tu pañcavidhaḥ proktaḥ śivena paramātmanā ||

7.2.7.37

tapaḥ karma japo dhyānaṃ jñānaṃ ceti samāsataḥ |
karma liṅgārcanādyaṃ ca tapaścāndrāyaṇādikam ||

7.2.7.38

japastridhā śivābhyāsaścintā dhyānaṃ śivasya tu |
śivāgamoktaṃ yajjñānaṃ tadatra jñānamucyate ||

7.2.7.39

śrīkaṇṭhena śivenoktaṃ śivāyai ca śivāgamaḥ |
śivāśritānāṃ kāruṇyācchreyasāmekasādhanam ||

7.2.7.40

tasmādvivardhayedbhaktiṃ śive paramakāraṇe |
tyajecca viṣayāsaṅgaṃ śreyo'rthī matimānnaraḥ ||

7.2.7.40.c1

iti śrīśivamahāpurāṇe saptamyāṃ vāyavīyasaṃhitāyāmuttarakhaṇḍe śivatattvakathanaṃ nāma saptamo'dhyāyaḥ ||

7.2.7.40.p2

śrīgaṇeśāya namaḥ ||

7.2.7.40.p3

śrīgaurīśaṅkarābhyāṃ namaḥ ||

7.2.7.40.p4

śrīśivamahāpurāṇam ||

Other recensions (1)

Linked texts (2)