Shivapurana 7.2.8: aṣṭamo'dhyāyaḥ | śivatattvajñāne vyāsāvatāravarṇanam
Śivapurāṇa (complete text) 7.2.8
- Language
- Sanskrit
Contents
- 7.2.8.51 — 4 parts
aṣṭamo'dhyāyaḥ | śivatattvajñāne vyāsāvatāravarṇanam
7.2.8.1
kṛṣṇa uvāca |
bhagavan śrotumicchāmi śivena paribhāṣitam |
vedasāraṃ śivajñānaṃ svāśritānāṃ vimuktaye ||
7.2.8.2
abhaktānāmabuddhīnāmayuktānāmagocaram |
arthairdaśardhaiḥ saṃyuktaṃ gūḍhamaprājñaninditam ||
7.2.8.3
varṇāśramakṛtairdharmairviparītaṃ kvacitsamam |
vedāt ṣaḍaṅgāduddhṛtya sāṅkhyādyogācca kṛtsnaśaḥ ||
7.2.8.4
śatakoṭipramāṇena vistīrṇaṃ granthasaṅkhyayā |
kathitaṃ parameśena tatra pūjā kathaṃ prabhoḥ ||
7.2.8.5
kasyādhikāraḥ pūjādau jñānayogādayaḥ katham |
tatsarvaṃ vistarādeva vaktumarhasi suvrata ||
7.2.8.6
upamanyuruvāca |
śaivaṃ saṅkṣipya vedoktaṃ śivena paribhāṣitam |
stutinindādirahitaṃ sadyaḥ pratyayakārakam ||
7.2.8.7
guruprasādajaṃ divyamanāyāsena muktidam |
kathayiṣye samāsena tasya śakyo na vistaraḥ ||
7.2.8.8
sisṛkṣayā purāvyaktācchivaḥ sthāṇurmaheśvaraḥ |
satkāryakāraṇopetaḥ svayamāvirabhūtprabhuḥ ||
7.2.8.9
janayāmāsa ca tadā ṛṣirviśvādhikaḥ prabhuḥ |
devānāṃ prathamaṃ devaṃ brahmāṇaṃ brahmaṇaspatim ||
7.2.8.10
brahmāpi pitaraṃ devaṃ jāyamānaṃ nyavaikṣata |
taṃ jāyamānaṃ janako devaḥ prāpaśyadājñayā ||
7.2.8.11
dṛṣṭo rudreṇa devo'sāvasṛjadviśvamīśvaraḥ |
varṇāśramavyavasthāṃ ca cakāra sa pṛthak pṛthak ||
7.2.8.12
somaṃ sasarja yajñārthe somād ghauḥ samajāyata |
dharā ca vahniḥ sūryaśca yajño viṣṇuḥ śacīpatiḥ ||
7.2.8.13
te cānye ca surā rudraṃ rudrādhyāyena tuṣṭuvuḥ |
prasannavadanastasthau devānāmagrataḥ prabhuḥ ||
7.2.8.14
apahṛtya svalīlārthaṃ teṣāṃ jñānaṃ maheśvaraḥ |
tamapṛcchaṃstato devāḥ ko bhavāniti mohitāḥ ||
7.2.8.15
so'bravīdbhagavān rudro hyahamekaḥ purātanaḥ |
āsaṃ prathamamevāhaṃ vartāmi ca surottamāḥ ||
7.2.8.16
bhaviṣyāmi ca matto'nyo vyatirikto na kaścana |
ahameva jagat sarvaṃ tarpayāmi svatejasā ||
7.2.8.17
matto'dhikaḥ samo nāsti māṃ yo veda sa mucyate |
ityuktvā bhagavān rudrastatraivāntaradhatta saḥ ||
7.2.8.18
apaśyantastamīśānaṃ stuvantaścaiva sāmabhiḥ |
vrataṃ pāśupataṃ kṛtvā tvatharvaśirasi sthitam ||
7.2.8.19
bhasmasañchannasarvāṅgā babhūvuramarāstadā |
atha teṣāṃ prasādārthaṃ paśūnāṃ patirīśvaraḥ ||
7.2.8.20
sagaṇaścomayā sārdhaṃ sānnidhyamakarotprabhuḥ |
yaṃ vinidrā jitaśvāsā yogino dagdhakilbiṣāḥ ||
7.2.8.21
hṛdi paśyanti taṃ devaṃ dadṛśurdevapuṅgavāḥ |
yāmāhuḥ paramāṃ śaktimīśvarecchānuvartinīm ||
7.2.8.22
tāmapaśyan maheśasya vāmato vāmalocanām |
ye vinirdhūtasaṃsārāḥ prāptāḥ śaivaṃ paraṃ padam ||
7.2.8.23
nityasiddhāśca ye vānye te ca dṛṣṭā gaṇeśvarāḥ |
atha taṃ tuṣṭuvurdevā devyā saha maheśvaram ||
7.2.8.24
stotrairmāheśvarairdivyaiḥ śrotaiḥ paurāṇikairapi |
devo'pi devānālokya ghṛṇayā vṛṣabhadhvajaḥ ||
7.2.8.25
tuṣṭo'smītyāha suprītaḥ svabhāvamadhurāṃ giram |
atha suprītamanasaṃ praṇipatya vṛṣadhvajam |
arthamahattamaṃ devāḥ papracchurimamādarāt ||
7.2.8.26
devā ūcuḥ |
bhagavan kena mārgeṇa pūjanīyo'si bhūtale |
kasyādhikāraḥ pūjāyāṃ vaktumarhasi tattvataḥ ||
7.2.8.27
tataḥ sasmitamālokya devīṃ devavaro haraḥ |
svarūpaṃ darśayāmāsa ghoraṃ sūryātmakaṃ param ||
7.2.8.28
sarvaiśvaryaguṇopetaṃ sarvatejomayaṃ param |
śaktibhirmūrtibhiścāṅgairgrahairdevaiśca saṃvṛtam ||
7.2.8.29
aṣṭabāhuṃ caturvaktramarddhanārīkamadbhutam |
dṛṣṭvaivamadbhutākāraṃ devā viṣṇupurogamāḥ ||
7.2.8.30
buddhvā divākaraṃ devaṃ devīṃ caiva niśākaram |
pañcabhūtāni śeṣāṇi tanmayaṃ ca carācaram ||
7.2.8.31
evamuktvā namaścakrustasmai cārghyaṃ pradāya vai ||
7.2.8.32
sindūravarṇāya sumaṇḍalāya suvarṇavarṇābharaṇāya tubhyam |
padmābhanetrāya sapaṅkajāya brahmendranārāyaṇakāraṇāya ||
7.2.8.33
suratnapūrṇaṃ sasuvarṇatoyaṃ sukuṅkumādyaṃ sakuśaṃ sapuṣpam |
pradattamādāya sahemapātraṃ praśastamarghyaṃ bhagavan prasīda ||
7.2.8.34
namaḥ śivāya śāntāya sagaṇāyādihetave |
rudrāya viṣṇave tubhyaṃ brahmaṇe sūryamūrtaye ||
7.2.8.35
yaḥ śivaṃ maṇḍale saure sampūjyaiva samāhitaḥ |
prātarmadhyāhnasāyāhne pradadyādarghyamuttamam ||
7.2.8.36
praṇamedvā paṭhedetān śalokān śrutimukhānimān |
na tasya durllabhaṃ kiñcidbhaktaścenmucyate dṛḍham ||
7.2.8.37
tasmādabhyarcayenityaṃ śivamādityarūpiṇam |
dharmakāmārthamuktyarthaṃ manasā karmaṇā girā ||
7.2.8.38
atha devān samālokya maṇḍalastho maheśvaraḥ |
sarvāgamottaraṃ dattvā śāstramantaradhāddharaḥ ||
7.2.8.39
tatra pūjādhikāro'yaṃ brahmakṣatraviśāmiti |
jñātvā praṇamya deveśaṃ devā jagmuryathāgatam ||
7.2.8.40
atha kālena mahatā tasmin śāstre tirohite |
bhartāraṃ paripapraccha tadaṅkasthā maheśvarī ||
7.2.8.41
tayā sañcodito devo devyā candravibhūṣaṇaḥ |
avadatkaramuddhṛtya śāstraṃ sarvāgamottaram ||
7.2.8.42
pravartitaṃ ca talloke niyogātparameṣṭhinaḥ |
mayāgastyena guruṇā dadhīcena maharṣiṇā ||
7.2.8.43
svayamapyavatīryorvyāṃ yugāvarteṣu śūladhṛk |
svāśritānāṃ vimuktyarthaṃ kurute jñānasantatim ||
7.2.8.44
ṛbhuḥ satyo bhārgavaśca hyaṅgirāḥ savitā dvijāḥ |
mṛtyuḥ śatakraturdhīmān vasiṣṭho munipuṅgavaḥ ||
7.2.8.45
sārasvatastridhāmā ca trivṛto munipuṅgavaḥ |
śatatejāḥ svayaṃ dharmo nārāyaṇa iti śrutaḥ ||
7.2.8.46
svarakṣaścāruṇirdhīmāṃstathā caiva kṛtañjayaḥ |
māmateyo bharadvājo gautamaḥ kaviruttamaḥ ||
7.2.8.47
vācaḥsravā munissākṣāttathā sūkṣmāyaṇiḥ śuciḥ |
tṛṇabindurmuniḥ kṛṣṇaḥ śaktiḥ śākteya uttaraḥ ||
7.2.8.48
jātūkarṇyo hariḥ sākṣāt kṛṣṇadvaipāyano muniḥ |
vyāsāvatārān śṛṇvantu kalpayogeśvarān kramāt ||
7.2.8.49
laiṅge vyāsāvatārā hi dvāparānteṣu suvratāḥ |
yogācāryāvatārāśca tathā śiṣyeṣu śūlinaḥ ||
7.2.8.50
tatra tatra vibhoḥ śiṣyāścatvāraḥ syurmahaujasaḥ |
śiṣyāsteṣāṃ praśiṣyāśca śataśo'tha sahasraśaḥ ||
7.2.8.51
teṣāṃ sambhāvanālloke śaivājñākaraṇādibhiḥ |
bhāgyavanto vimucyante bhaktyā cātyantabhāvitāḥ ||
7.2.8.51.c1
iti śrīśivamahāpurāṇe saptamyāṃ vāyavīyasaṃhitāyāmuttarakhaṇḍe śivatattvajñāne vyāsāvatāravarṇanaṃ nāmāṣṭamo'dhyāyaḥ ||
7.2.8.51.p2
śrīgaṇeśāya namaḥ ||
7.2.8.51.p3
śrīgaurīśaṅkarābhyāṃ namaḥ ||
7.2.8.51.p4
śrīśivamahāpurāṇam ||
Other recensions (1)
- Śivapurāṇa — Vyāsa, Sanskrit
Linked texts (1)
- Liṅgapurāṇa — Vyāsa, Sanskrit