Shiva Purana 2.2.12: dvādaśo'dhyāyaḥ | dakṣavaraprāptiḥ
Śivapurāṇa (complete text) 2.2.12
- Language
- Sanskrit
Contents
dvādaśo'dhyāyaḥ | dakṣavaraprāptiḥ
2.2.12.1
nārada uvāca |
brahman śambhuvara prājña samyaguktaṃ tvayānagha |
śivāśivacaritraṃ ca pāvitaṃ janma me hitam ||
2.2.12.2
idānīṃ vada dakṣastu tapaḥ kṛtvā dṛḍhavrataḥ |
kaṃ varaṃ prāpa devyāstu kathaṃ sā dakṣajābhavat ||
2.2.12.3
brahmovāca |
śṛṇu nārada dhanyastvaṃ munibhirbhaktito'khilaiḥ |
yathā tepe tapo dakṣo varaṃ prāpa ca suvrataḥ ||
2.2.12.4
madājñaptaḥ sudhīrdakṣaḥ samādhāya mahādhipaḥ |
ayādyaṣṭuṃ ca tāṃ devīṃ tatkāmo jagadambikām ||
2.2.12.5
kṣīrodottaratīrasthāṃ tāṃ kṛtvā hṛdayasthitām |
tapastaptuṃ samārebhe draṣṭuṃ pratyakṣato'mbikām ||
2.2.12.6
divyavarṣeṇa dakṣastu sahasrāṇāṃ trayaṃ samāḥ |
tapaścacāra niyataḥ saṃyatātmā dṛḍhavrataḥ ||
2.2.12.7
mārutāśī nirāhāro jalāhārī ca parṇabhuk |
evaṃ nināya taṃ kālaṃ cintayantāṃ jaganmayīm ||
2.2.12.8
durgādhyānasamāsaktaściraṃ kālaṃ taporataḥ |
niyamairbahubhirdevīmārādhayati suvrataḥ ||
2.2.12.9
tato yamādiyuktasya dakṣasya munisattama |
jagadambāṃ pūjayataḥ pratyakṣamabhavacchivā ||
2.2.12.10
tataḥ pratyakṣato dṛṣṭvā jagadambāṃ jaganmayīm |
kṛtakṛtyamathātmānaṃ mene dakṣaḥ prajāpatiḥ ||
2.2.12.11
siṃhasthāṃ kālikāṃ kṛṣṇāṃ cāruvaktrāṃ caturbhujām |
varadābhayanīlābjakhaḍgahastāṃ manoharām ||
2.2.12.11.p1
āraktanayanāṃ cārumuktakeśīṃ jagatprasūm |
tuṣṭāva vāgbhiścitrābhiḥ supraṇamyātha suprabhām | 12 ||
2.2.12.13
dakṣa uvāca |
jagadabaṃ mahāmāye jagadīśe maheśvari |
kṛpāṃ kṛtvā namaste'stu darśitaṃ svavapurmama ||
2.2.12.14
prasīda bhagavatyādye prasīda śivarūpiṇi |
prasīda bhaktavarade jaganmāye namo'stu te ||
2.2.12.15
brahmovāca |
iti stutā maheśānī dakṣeṇa prayatātmanā |
uvāca dakṣaṃ jñātvāpi svayaṃ tasyepsitaṃ mune ||
2.2.12.16
devyuvāca |
tuṣṭāhaṃ dakṣa bhavataḥ sadbhaktyā hyanayā bhṛśam |
varaṃ vṛṣṇīṣva svābhīṣṭaṃ nādeyaṃ vidyate tava ||
2.2.12.17
brahmovāca |
jagadambāvacaḥ śrutvā tato dakṣaḥ prajāpatiḥ |
suprahṛṣṭataraḥ prāha nāmaṃ nāmaṃ ca tāṃ śivām ||
2.2.12.18
dakṣa uvāca |
jagadamba mahāmāye yadi tvaṃ varadā mama |
madvacaḥ śṛ ṇu suprītyā mama kāmaṃ prapūraya ||
2.2.12.19
mama svāmī śivo yo hi sa jāto brahmaṇaḥ sutaḥ |
rudranāmā pūrṇarūpāvatāraḥ paramātmanaḥ ||
2.2.12.20
tavāvatāro no jātaḥ kā tatpatnī bhavedataḥ |
taṃ mohaya maheśānamavatīrya kṣitau śive ||
2.2.12.21
tvadṛte tasya mohāya na śaktānyā kadācana |
tasmānmama sutā bhūtvā harajāyā bhavādhunā ||
2.2.12.22
itthaṃ kṛtvā sulīlāṃ ca bhava tvaṃ haramohinī |
mamaivaiṣa varo devi satyamuktaṃ tavāgrataḥ ||
2.2.12.23
svārthaṃ na kevalaṃ me'sti sarveṣāṃ jagatāmapi |
brahmaviṣṇuśivānāṃ ca brahmaṇā prerito hyaham ||
2.2.12.24
brahmovāca |
ityākarṇya prajeśasya vacanaṃ jagadambikā |
pratyuvāca vihasyeti smṛtvā taṃ manasā śivam ||
2.2.12.25
devyuvāca |
tāta prajāpate dakṣa śṛṇu me paramaṃ vacaḥ |
satyaṃ bravīmi tvadbhaktyā suprasannākhilapradā ||
2.2.12.26
ahaṃ tava sutā dakṣa tvajjāyāyāṃ maheśvarī |
bhaviṣyāmi na sandehastvadbhaktivaśavartinī ||
2.2.12.27
tathā yatnaṃ kariṣyāmi tapaḥ kṛtvā suduḥsaham |
harajāyā bhaviṣyāmi tadvaraṃ prāpya cānagha ||
2.2.12.28
nānyathā kāryasiddhirhi nirvikārī ca sa prabhuḥ |
vidherviṣṇośca saṃsevyaḥ pūrṇa eva sadāśivaḥ ||
2.2.12.29
ahaṃ tasya sadā dāsī priyā janmani janmani |
mama svāmī sa vai śambhurnānārūpadharo'pi ha ||
2.2.12.30
varaprabhāvād bhrukuṭeravatīrṇo vidheḥ sa ca |
ahaṃ tadvarato'pīhāvatariṣye tadājñayā ||
2.2.12.31
gaccha svabhavanaṃ tāta mayā jñātā tu dūtikā |
harajāyā bhaviṣyāmi bhūtvā te tanayācirāt ||
2.2.12.32
ityuktvā sadvaco dakṣaṃ śivājñāṃ prāpya cetasi |
punaḥ provāca sā devī smṛtvā śivapadāmbujam ||
2.2.12.33
parantu praṇa ādheyo manasā te prajāpate |
śrāvayiṣyāmi te taṃ vai satyaṃ jānīhi no mṛṣā ||
2.2.12.34
yadā bhavān mayi punarbhavenmandādarastadā |
dehaṃ tyakṣye nijaṃ satyaṃ svātmanyasmyatha vetaram ||
2.2.12.35
eṣa dattastava varaḥ pratisargaṃ prajāpate |
ahaṃ tava sutā bhūtvā bhaviṣyāmi harapriyā ||
2.2.12.35.p1
brahmovāca |
evamuktvā maheśānī dakṣaṃ mukhyaprajāpatim ||
2.2.12.35.p2
antardadhe drutaṃ tatra samyag dakṣasya paśyataḥ | 36 ||
2.2.12.37
antarhitāyāṃ durgāyāṃ sa dakṣo'pi nijāśramam |
jagāma ca mudaṃ lebhe bhaviṣyati suteti sā ||
2.2.12.37.c1
iti śrīśivamahāpurāṇe dvitīyāyāṃ rudrasaṃhitāyāṃ dvitīye satīkhaṇḍe dakṣavaraprāptivarṇanaṃ nāma dvādaśo'dhyāyaḥ ||
2.2.12.37.p2
śrīgaṇeśāya namaḥ ||
2.2.12.37.p3
śrīgaurīśaṅkarābhyāṃ namaḥ ||
2.2.12.37.p4
śrīśivamahāpurāṇam ||
2.2.12.37.p5
dvitīyāyāṃ rudrasaṃhitāyāṃ dvitīyaḥ satīkhaṇḍe
Linked texts (1)
- Kālikāpurāṇa — Sanskrit