Shiva Purana 2.2.16: ṣoḍaśo'dhyāyaḥ | brahmaviṣṇukṛtā śivaprārthanā
Śivapurāṇa (complete text) 2.2.16
- Language
- Sanskrit
Contents
- 2.2.16.58 — 5 parts
ṣoḍaśo'dhyāyaḥ | brahmaviṣṇukṛtā śivaprārthanā
2.2.16.1
brahmovāca |
iti stutiṃ ca haryādikṛtāmākarṇya śaṅkaraḥ |
babhūvātiprasanno hi vijahāsa ca sūtikṛt ||
2.2.16.2
brahmaviṣṇū tu dṛṣṭvā tau sastrīkau saṅgatau haraḥ |
yathocitaṃ samābhāṣya papracchāgamanaṃ tayoḥ ||
2.2.16.3
rudra uvāca |
he hare he vidhe devā munayaścādya nirbhayāḥ |
nijāgamanahetuṃ hi kathayadhvaṃ sutattvataḥ ||
2.2.16.4
kimarthamāgatā yūyaṃ kiṃ kāryaṃ ceha vidyate |
tatsarvaṃ śrotumicchāmi bhavatstutyā prasannadhīḥ ||
2.2.16.5
brahmovāca |
iti pṛṣṭe hareṇāhaṃ sarvalokapitāmahaḥ |
mune'vocaṃ mahādevaṃ viṣṇunā paricoditaḥ ||
2.2.16.6
devadeva mahādeva karuṇāsāgara prabho |
yadarthamāgatāvāvāṃ tacchṛṇu tvaṃ surarṣibhiḥ ||
2.2.16.7
viśeṣatastavaivārthamāgatā vṛṣabhadhvaja |
sahārthinaḥ sadā yogyamanyathā na jagadbhavet ||
2.2.16.8
kecidbhaviṣyantyasurā mama vadhyā maheśvara |
harervadhyāstathā kecidbhavantaścāpi kecana ||
2.2.16.9
kecittvadvīryajātasya tanayasya mahāprabho |
māyāvadhyāḥ prabho kecidbhaviṣyantyasurāḥ sadā ||
2.2.16.10
tavaiva kṛpayā śambhoḥ surāṇāṃ sukhamuttamam |
nāśayitvāsurān ghorāñjagatsvāsthyaṃ sadābhayam ||
2.2.16.11
yogayukte tvayi sadā rāgadveṣavivarjite |
dayāmātraikanirate na vadhyā hyathavā tava ||
2.2.16.12
ārādhiteṣu teṣvīśa kathaṃ sṛṣṭistathā sthitiḥ |
ataśca bhavitā yuktaṃ nityaṃ nityaṃ vṛṣadhvaja ||
2.2.16.13
sṛṣṭisthityantakarmāṇi na kāryāṇi yadā tadā |
śarīrabhedamasmākaṃ māyāyāśca na yujyate ||
2.2.16.14
ekasvarūpā hi vayaṃ bhinnāḥ kāryasya bhedataḥ |
kāryabhedo na siddhaścedrūpabhedo'prayojanaḥ ||
2.2.16.15
eka eva tridhā bhinnaḥ paramātmā maheśvaraḥ |
māyāyāḥ kāraṇādeva svatantro līlayā prabhuḥ ||
2.2.16.16
vāmāṅgajo haristasya dakṣiṇāṅgabhavo hyaham |
śivasya hṛdayājjātastvaṃ hi pūrṇatanuḥ śivaḥ ||
2.2.16.17
itthaṃ vayaṃ tridhā bhūtāḥ prabho bhinnasvarūpiṇaḥ |
śivāśivasutāstattvaṃ hṛdā viddhi sanātana ||
2.2.16.18
ahaṃ viṣṇuśca sastrīkau sañjātau kāryahetutaḥ |
lokakāryakarau prītyā tava śāsanataḥ prabho ||
2.2.16.19
tasmādviśvahitārthāya surāṇāṃ sukhahetave |
parigṛhṇīṣva bhāryārthe rāmāmekāṃ suśobhanām ||
2.2.16.20
anyacchṛṇu maheśāna pūrvavṛttaṃ smṛtaṃ mayā |
yanno puraḥ purā proktaṃ tvayaiva śivarūpiṇā ||
2.2.16.21
madrūpaṃ paramaṃ brahmannīdṛśaṃ bhavadaṅgataḥ |
prakaṭībhavitā loke nāmnā rudraḥ prakīrtitaḥ ||
2.2.16.22
sṛṣṭikartābhavad brahmā hariḥ pālanakārakaḥ |
layakārī bhaviṣyāmi rudrarūpo guṇākṛtiḥ ||
2.2.16.23
striyaṃ vivāhya lokasya kariṣye kāryamuttamam |
iti saṃsmṛtya svaproktaṃ pūrṇaṃ kuru nijaṃ paṇam ||
2.2.16.24
nideśastava ca svāminnahaṃ sṛṣṭikaro hariḥ |
pālako layahetustvamāvirbhūtaḥ svayaṃ śivaḥ ||
2.2.16.25
tvāṃ vinā na samarthau hi āvāṃ ca svasvakarmaṇi |
lokakāryaratāṃ tasmādekāṃ gṛhṇīṣva kāminīm ||
2.2.16.26
yathā padmālayā viṣṇoḥ sāvitrī ca yathā mama |
tathā sahacarīṃ śambho kāntāṃ gṛhṇīṣva samprati ||
2.2.16.27
brahmovāca |
iti śrutvā vaco me hi brahmaṇaḥ purato hareḥ |
sa māṃ jagāda lokeśaḥ smerānanamukho haraḥ ||
2.2.16.28
īśvara uvāca |
he brahman he hare me hi yuvāṃ priyatarau sadā |
dṛṣṭvā vāṃ ca mamānando bhavatyatitarāṃ khalu ||
2.2.16.29
yuvāṃ suraviśiṣṭau hi tribhuvasvāminau kila |
kathanaṃ vāṃ gariṣṭheti bhavakāryaratātmanoḥ ||
2.2.16.30
ucitaṃ na suraśreṣṭhau vivāhakaraṇaṃ mama |
taporataviraktasya sadā viditayoginaḥ ||
2.2.16.31
yo nivṛttisumārgasthaḥ svātmārāmo nirañjanaḥ |
avadhūtatanurjñānī svadraṣṭā kāmavarjitaḥ ||
2.2.16.32
avikārī hyabhogī ca sadāśuciramaṅgalaḥ |
tasya prayojanaṃ loke kāminyā kiṃ vadādhunā ||
2.2.16.33
kevalaṃ yogalagnasya mamānandaḥ sadāsti vai |
jñānahīnastu puruṣo manute bahu kāmakam ||
2.2.16.34
vivāhakaraṇaṃ loke vijñeyaṃ parabandhanam |
tasmāttasya rucirno me satyaṃ satyaṃ vadāmyaham ||
2.2.16.35
na svārthaṃ me pravṛttirhi samyak svārthavicintanāt |
tathāpi tatkariṣyāmi bhavaduktaṃ jagaddhitam ||
2.2.16.36
matvā vaco gariṣṭhaṃ vā nijoktiparipūrtaye |
kariṣyāmi vivāhaṃ vai bhaktavaśyaḥ sadā hyaham ||
2.2.16.37
parantu yādṛśīṃ kāntāṃ grahīṣyāmi yathāpaṇam |
tacchṛṇuṣva hare brahman yuktameva vaco mama ||
2.2.16.38
yā me tejaḥ samarthā hi grahītuṃ syādvibhāgaśaḥ |
tāṃ nideśaya bhāryārthe yoginīṃ kāmarūpiṇīm ||
2.2.16.39
yogayukte mayi tathā yoginyeva bhaviṣyati |
kāmāsakte mayi tathā kāminyeva bhaviṣyati ||
2.2.16.40
yamakṣaraṃ vedavido nigadanti manīṣiṇaḥ |
jyotīrūpaṃ śivaṃ te ca cintayiṣye sanātanam ||
2.2.16.41
taccintāyāṃ yadāsakto brahman gacchāmi bhāvinīm |
tatra yā vighnajananī na bhavitrī hatāstu me ||
2.2.16.42
tvaṃ vā viṣṇurahaṃ vāpi śivasya brahmarūpiṇaḥ |
aṃśabhūtā mahābhāgā yogyaṃ tadanucintanam ||
2.2.16.43
taccintayā vinodvāhaṃ sthāsyāmi kamalāsana |
tasmājjāyāṃ prādiśa tvaṃ matkarmānugatāṃ sadā ||
2.2.16.44
tatrāpyekaṃ paṇaṃ me tvaṃ śṛṇu brahmam̐śca māṃ prati |
aviśvāso madukte cenmayā tyaktā bhaviṣyati ||
2.2.16.45
brahmovāca |
iti tasya vacaḥ śrutvāhaṃ sa viṣṇurharasya ca |
sasmitaṃ moditamano'vocaṃ ceti vinamrakaḥ ||
2.2.16.46
śṛṇu nātha maheśāna mārgitā yādṛśī tvayā |
nivedayāmi suprītyā tāṃ striyaṃ tādṛśīṃ prabho ||
2.2.16.47
umā sā bhinnarūpeṇa sañjātā kāryasādhinī |
sarasvatī tathā lakṣmīrdvidhārūpā purā prabho ||
2.2.16.48
padmā kāntābhavadviṣṇostathā mama sarasvatī |
tṛtīyarūpā sā no'bhūllokakāryahitaiṣiṇī ||
2.2.16.49
dakṣasya tanayā yābhūtsatī nāmnā tu sā vibho |
saivedṛśī bhavedbhāryā bhaveddhi hitakāriṇī ||
2.2.16.50
sā tapasyati deveśa tvadarthaṃ hi dṛḍhavratā |
tvāṃ patiṃ prāptukāmā vai mahātejovatī satī ||
2.2.16.51
dātuṃ gaccha varaṃ tasyai kṛpāṃ kuru maheśvara |
tāṃ vivāhaya suprītyā varaṃ dattvā ca tādṛśam ||
2.2.16.52
harermama ca devānāmiyaṃ vāñchāsti śaṅkara |
paripūraya saddṛṣṭyā paśyāmotsavamādarāt ||
2.2.16.53
maṅgalaṃ paramaṃ bhūyāt trilokeṣu sukhāvaham |
sarvajvaro vinaśyed vai sarveṣāṃ nātra saṃśayaḥ ||
2.2.16.54
athavāsmadvacaḥśeṣe'vadattaṃ madhusūdanaḥ |
līlājākṛtimīśānaṃ bhaktavatsalamacyutaḥ ||
2.2.16.55
viṣṇuruvāca |
devadeva mahādeva karuṇākara śaṅkara |
yaduktaṃ brahmaṇā sarvaṃ maduktaṃ tanna saṃśayaḥ ||
2.2.16.56
tatkuruṣva maheśāna kṛpāṃ kṛtvā mamopari |
sanāthaṃ kuru saddṛṣṭyā trilokaṃ suvivāhya tām ||
2.2.16.57
brahmovāca |
ityuktvā bhagavān viṣṇuḥ tūṣṇīmāsa mune sudhīḥ |
tathāstviti vihasyāha sa prabhurbhaktavatsalaḥ ||
2.2.16.58
tatastvāvāṃ ca samprāpya cājñāṃ sa munibhiḥ suraiḥ |
agacchāva sveṣṭadeśaṃ sastrīkau paraharṣitau ||
2.2.16.58.c1
iti śrīśivamahāpuṇe dvitīyāyāṃ rudrasaṃhitāyāṃ dvitīye satīkhaṇḍe viṣṇubrahmakṛtaśivaprārthanāvarṇanaṃ nāma ṣoḍaśo'dhyāyaḥ ||
2.2.16.58.p2
śrīgaṇeśāya namaḥ ||
2.2.16.58.p3
śrīgaurīśaṅkarābhyāṃ namaḥ ||
2.2.16.58.p4
śrīśivamahāpurāṇam ||
2.2.16.58.p5
dvitīyāyāṃ rudrasaṃhitāyāṃ dvitīyaḥ satīkhaṇḍe
Linked texts (1)
- Kālikāpurāṇa — Sanskrit