Shiva Purana 2.2.22: dvāviṃśo'dhyāyaḥ | śivāśivavihāravarṇanam
Śivapurāṇa (complete text) 2.2.22
- Language
- Sanskrit
Contents
- 2.2.22.70 — 5 parts
dvāviṃśo'dhyāyaḥ | śivāśivavihāravarṇanam
2.2.22.1
brahmovāca |
kadācidatha dakṣasya tanayā jaladāgame |
kailāsakṣmābhṛtaḥ prāha prasthasthaṃ vṛṣabhadhvajam ||
2.2.22.2
satyuvāca |
devadeva mahādeva śambho matprāṇavallabha |
śṛṇu me vacanaṃ nātha śrutvā tatkuru mānada ||
2.2.22.3
ghanāgamo'yaṃ samprāptaḥ kālaḥ paramaduḥsahaḥ |
anekavarṇameghaughāḥ saṅgītāmbaradikcayāḥ ||
2.2.22.4
vivānti vātā hṛdayaṃ hārayantīti veginaḥ |
kadambarajasā dhautāḥ pāthobinduvikarṣaṇāḥ ||
2.2.22.5
meghānāṃ garjitairuccairdhārāsāraṃ vimuñcatām |
vidyutpatākināṃ tīvraiḥ kṣubdhaṃ syātkasya no manaḥ ||
2.2.22.6
na sūryo dṛśyate nāpi meghacchanno niśāpatiḥ |
divāpi rātrivadbhāti virahivyasanākaraḥ ||
2.2.22.7
meghā naikatra tiṣṭhanto dhvanantaḥ pavaneritāḥ |
patanta iva lokānāṃ dṛśyante mūrdhni śaṅkara ||
2.2.22.8
vātāhatā mahāvṛkṣā nartanta iva cāmbare |
dṛśyante hara bhīrūṇāṃ trāsadāḥ kāmukepsitāḥ ||
2.2.22.9
snigdhanīlāñjanasyāśu sadivaughasya pṛṣṭhataḥ |
balākarājīvātyuccairyamunāpṛṣṭhaphenavat ||
2.2.22.10
kṣapāyāmīśa valayo dṛśyante karabhāśritāḥ |
ambudhāviva sandīptapāvako vaḍavāmukhaḥ ||
2.2.22.11
prārohantīha sasyāni mandare prāṅgaṇeṣvapi |
kimanyatra virūpākṣa sasyodbhūtiṃ vadāmyaham ||
2.2.22.12
śyāmalai rājatai raktairviśado'yaṃ himācalaḥ |
mandarāśrayameghaughaḥ patrairdugdhāmbudhiryathā ||
2.2.22.13
asamaśrīśca kuṭilaṃ bheje yasyātha kiṃśukān |
uccāvacān kalau lakṣmīrgantā santyajya sajjanān ||
2.2.22.14
mandarācalameghānāṃ śabdena hṛṣitā muhuḥ |
kekāyante prativane satataṃ pṛṣṭhasūcakam ||
2.2.22.15
meghotsukānāṃ madhuraścātakānāṃ manoharaḥ |
dhārāsāraśaraistāpaṃ petuḥ pratipathodgatam ||
2.2.22.16
meghānāṃ paśya maddehe durnayaṃ karakotkaraiḥ |
ye chādayantyanugate mayūrāṃścātakāṃstathā ||
2.2.22.17
śikhisāraṅgayordṛṣṭvā mitrādapi parābhavam |
harṣaṃ gacchanti giriśa vidūramapi mānasam ||
2.2.22.18
etasminviṣame kāle nīḍaṃ kākāścakorakāḥ |
kurvanti tvāṃ vinā gehān kathaṃ śāntimavāpsyasi ||
2.2.22.19
mahatīvādya no bhītirmāṃ meghotthā pinākadhṛk |
yatasva yasmādvāsāya māciraṃ vacanānmama ||
2.2.22.20
kailāse vā himādrau vā mahākośyāmatha kṣitau |
tatropayogyaṃ saṃvāsaṃ kuru tvaṃ vṛṣabhadhvaja ||
2.2.22.21
brahmovāca |
evamuktastayā śambhurdākṣāyaṇyā tathāsakṛt |
sañjahāsa ca śīrṣasthacandraraśmismitālayam ||
2.2.22.22
athovāca satīṃ devīṃ smitābhinnauṣṭhasampuṭaḥ |
mahātmā sarvatattvajñastoṣayanparameśvaraḥ ||
2.2.22.23
īśvaraḥ uvāca |
yatra prītyai mayā kāryo vāsastava manohare |
meghāstatra na gantāraḥ kadācidapi matpriye ||
2.2.22.24
meghā nitambaparyantaṃ sañcaranti mahībhṛtaḥ |
sadā prāleyasānostu varṣāsvapi manohare ||
2.2.22.25
kailāsasya tathā devi pādagāḥ prāyaśo ghanāḥ |
sañcaranti na gacchanti tata ūrdhvaṃ kadācana ||
2.2.22.26
sumerorvā girerūrdhvaṃ na gacchanti balāhakāḥ |
jambūmūlaṃ samāsādya puṣkarāvartakādayaḥ ||
2.2.22.27
ityukteṣu girīndreṣu yasyopari bhaveddhi te |
manorucirnivāsāya tamācakṣva drutaṃ hi me ||
2.2.22.28
svecchāvihāraistava kautukāni suvarṇapakṣānilavṛndavṛndaiḥ |
śabdottaraṅgairmadhurasvanaistai-rmudopageyāni girau himotthe ||
2.2.22.29
siddhāṅganāste racitāsanā bhuvaṃ kāṅkṣanti caivopahṛtaṃ sakautukam |
svecchāvihāre maṇikuṭṭime girau kurvanti ceṣyanti phalādidānakaiḥ ||
2.2.22.30
phaṇīndrakanyā girikanyakāśca yā nāgakanyāśca turaṅgamukhyāḥ |
sarvāstu tāste satataṃ sahāyatāṃ samācariṣyantyanumodavibhramaiḥ ||
2.2.22.31
rūpaṃ tadevamatulaṃ vadanaṃ sucāru dṛṣṭvāṅganā nijavapurnijakāntisahyam |
helā nije vapuṣi rūpagaṇeṣu nityaṃ kartāra ityanimiṣekṣaṇacārurūpāḥ ||
2.2.22.32
yā menakā parvatarāja jāyā rūpairguṇaiḥ khyātavatī triloke |
sā cāpi te tatra mano'numodaṃ nityaṃ kariṣyatyanunāthanādyaiḥ ||
2.2.22.33
purasthavargairgirirājavandyaiḥ prītiṃ vicinvadbhirudārarūpām |
śikṣā sadā te khalu śocitāpi kāryānvahaṃ prītiyutā guṇādyaiḥ ||
2.2.22.34
vicitraiḥ kokilālāpamodaiḥ kuñjagaṇāvṛtam |
sadā vasantaprabhavaṃ gantumicchasi kiṃ priye ||
2.2.22.35
nānābahujalāpūrṇasaraḥ śītasamāvṛtam |
padminīśataśoyuktamacalendraṃ himālayam ||
2.2.22.36
sarvakāmapradairvṛkṣaiḥ śādvalaiḥ kalpasaṃjñakaiḥ |
sakṣaṇaṃ paśya kusumānyathāśvakarigovrajam ||
2.2.22.37
praśāntaśvāpadagaṇaṃ munibhiryatibhirvṛtam |
devālaye mahāmāye nānāmṛgagaṇairyutam ||
2.2.22.38
sphāṭikaiḥ svarṇavaprādyai rājataiśca virājitam |
mānasādisaroraṅgairabhitaḥ pariśobhitam ||
2.2.22.39
hiraṇmayai ratnanālaiḥ paṅkajairmukulairvṛtam |
śiśumāraistathāsaṅkhyaiḥ kacchapairmakaraiḥ karaiḥ ||
2.2.22.40
niṣevitaṃ mañjulaiśca tathā nīlotpalādibhiḥ |
deveśi tasmānmuktaiśca sarvagandhaiśca kuṅkumaiḥ ||
2.2.22.41
lasadgandhajalaiḥ śubhrairāpūrṇaiḥ svacchakāntibhiḥ |
śādvalaistaruṇaistuṅgaistīrasthairupaśobhitam ||
2.2.22.42
nṛtyadbhiriva śākhoṭairvarjayantaṃ svasambhavam |
kāmadevaiḥ sārasaiśca mattacakrāṅgaśobhitaiḥ ||
2.2.22.43
madhurārāvibhirmodakāribhirbhramarādibhiḥ |
śabdāyamānaṃ ca mudā kāmoddīpanakārakam ||
2.2.22.44
vāsavasya kuberasya yamasya varuṇasya ca |
agneḥ koṇaparājasya mārutasya parasya ca ||
2.2.22.45
purībhiḥ śobhiśikharaṃ meroruccaiḥ surālayam |
rambhāśacīmenakādirambhorugaṇasevitam ||
2.2.22.46
kiṃ tvamicchasi sarveṣāṃ parvatānāṃ hi bhūbhṛtām |
sārabhūte mahāramye saṃvihartuṃ mahāgirau ||
2.2.22.47
tatra devī sakhiyutā sāpsarogaṇamaṇḍitā |
nityaṃ kariṣyati śacī tava yogyāṃ sahāyatām ||
2.2.22.48
athavā mama kailāse parvatendre sadāśraye |
sthānamicchasi vitteśapurīparivirājite ||
2.2.22.49
gaṅgājalaughaprayate pūrṇacandrasamaprabhe |
darīṣu sānuṣu sadā brahmakanyābhyudīrite ||
2.2.22.50
nānāmṛgagaṇairyukte padmākaraśatāvṛte |
sarvairguṇaiśca sadvastusumerorapi sundare ||
2.2.22.51
sthāneṣveteṣu yatrāpi tavāntaḥkaraṇe spṛhā |
taṃ drutaṃ me samācakṣva vāsakartāsmi tatra te ||
2.2.22.52
brahmovāca |
itīrite śaṅkareṇa tadā dākṣāyaṇī śanaiḥ |
idamāha mahādevaṃ lakṣaṇaṃ svaprakāśanam ||
2.2.22.53
satyuvāca |
himādrāveva vasitumahamicche tvayā saha |
nacirātkuru saṃvāsaṃ tasminneva mahāgirau ||
2.2.22.54
brahmovāca |
atha tadvākyamākarṇya haraḥ paramamohitaḥ |
himādriśikharaṃ tuṅgaṃ dākṣāyaṇyā samaṃ yayau ||
2.2.22.55
siddhāṅganāgaṇayutamagamyaṃ caiva pakṣibhiḥ |
agamacchikharaṃ ramyaṃ sarasīvanarājitam ||
2.2.22.56
vicitrarūpaiḥ kamalaiḥ śikharaṃ ratnakarburam |
bālārkasadṛśaṃ śambhurāsasāda satīsakhaḥ ||
2.2.22.57
sphaṭikābhramaye tasmin śādvaladrumarājite |
vicitrapuṣpāvalibhiḥ sarasībhiśca saṃyute ||
2.2.22.58
praphullataruśākhāgraṃ guñjad bhramarasevitam |
paṅkeruhaiḥ praphullaiśca nīlotpalacayaistathā ||
2.2.22.59
śobhitaṃ cakravākādyaiḥ kādambairhaṃsasaṅkulaiḥ |
pramattasārasaiḥ krauñcairnīlaskandhaiśca śabditaiḥ ||
2.2.22.60
puṃskokilānāṃ ninadairmadhurairgaṇasevitaiḥ |
turaṅgavadanaiḥ siddhairapsarobhiśca guhyakaiḥ ||
2.2.22.61
vidyādharībhirdevībhiḥ kinnarībhirvihāritam |
purandhrībhiḥ pārvatībhiḥ kanyābhirabhisaṅgatam ||
2.2.22.62
vipañcītāntrikāmattamṛdaṅgapaṭahasvanaiḥ |
nṛtyadbhirapsarobhiśca kautukotthaiśca śobhitam ||
2.2.22.63
devikābhirdīrghikābhirgandhibhiḥ susamāvṛtam |
praphullakusumairnityaṃ sukuñjairupaśobhitam ||
2.2.22.64
śailarājapurābhyarṇe śikhare vṛṣabhadhvajaḥ |
saha satyā ciraṃ reme evambhūteṣu śobhanam ||
2.2.22.65
tasmin svargasame sthāne divyamānena śaṅkaraḥ |
daśavarṣasahasrāṇi reme satyā samaṃ mudā ||
2.2.22.66
sa kadācittataḥ sthānādanyadyāti sthalaṃ haraḥ |
kadācinmeruśikharaṃ devīdevavṛtaṃ sadā ||
2.2.22.67
dvīpānnānā tathodyānavanāni vasudhātalam |
gatvā gatvā punastatrābhyetya reme satīsukham ||
2.2.22.68
na yajñe sa divārātrau na brahmaṇi tapassamam |
satyāṃ hi manasā śambhuḥ prītimeva cakāra ha ||
2.2.22.69
evaṃ mahādevamukhaṃ satyapaśyatsma sarvadā |
mahādevo'pi sarvatra sadādrākṣītsatīmukham ||
2.2.22.70
evamanyonyasaṃsargādanurāgamahīruham |
vardhayāmāsatuḥ kālīśivau bhāvāmbusecanaiḥ ||
2.2.22.70.c1
iti śrīśivamahāpurāṇe dvitīyāyāṃ rudrasaṃhitāyāṃ dvitīye satīkhaṇḍe śivāśivavihāravarṇanaṃ nāmadvāviṃśo'dhyāyaḥ ||
2.2.22.70.p2
śrīgaṇeśāya namaḥ ||
2.2.22.70.p3
śrīgaurīśaṅkarābhyāṃ namaḥ ||
2.2.22.70.p4
śrīśivamahāpurāṇam ||
2.2.22.70.p5
dvitīyāyāṃ rudrasaṃhitāyāṃ dvitīyaḥ satīkhaṇḍe
Linked texts (1)
- Kālikāpurāṇa — Sanskrit