Shiva Purana 2.2.34: catustriṃśo'dhyāyaḥ | yajñavāṭe devānāṃ duḥśakunadarśanam
Śivapurāṇa (complete text) 2.2.34
- Language
- Sanskrit
Contents
catustriṃśo'dhyāyaḥ | yajñavāṭe devānāṃ duḥśakunadarśanam
2.2.34.1
brahmovāca |
evaṃ pracalite cāsmin vīrabhadre gaṇānvite |
duṣṭacihnāni dakṣeṇa dṛṣṭāni vibudhairapi ||
2.2.34.2
utpātā vividhāścāsan vīrabhadre gaṇānvite |
trividhā api devarṣe yajñavidhvaṃsasūcakāḥ ||
2.2.34.3
dakṣavāmākṣibāhūruvispandaḥ samajāyata |
nānākaṣṭapradastāta sarvathāśubhasūcakaḥ ||
2.2.34.4
bhūkampaḥ samabhūttatra dakṣayāgasthale tadā |
dakṣo'paśyacca madhyāhne nakṣatrāṇyadbhutāni ca ||
2.2.34.5
diśaścāsansumalināḥ karburo'bhūddivākaraḥ |
pariveṣasahasreṇa saṅkrāntaśca bhayaṅkaraḥ ||
2.2.34.6
nakṣatrāṇi patanti sma vidyudagniprabhāṇi ca |
nakṣatrāṇāmabhūdvakrā gatiścādhomukhī tadā ||
2.2.34.7
gṛdhrā dakṣaśiraḥ spṛṣṭvā samudbhūtāḥ sahasraśaḥ |
āsīd gṛdhrapakṣacchāyaiḥ sacchāyo yāgamaṇḍapaḥ ||
2.2.34.8
vavāśire yāgabhūmau kroṣṭāro netrakastadā |
ulkāvṛṣṭirabhūttatra śvetavṛścikasambhavā ||
2.2.34.9
kharā vātā vavustatra pāṃśuvṛṣṭisamanvitāḥ |
śalabhāśca samudbhūtā vivartānilakampitāḥ ||
2.2.34.10
nītaśca pavanairūrdhvaṃ sa dakṣādhvaramaṇḍapaḥ |
daivānvitena dakṣeṇa yaḥ kṛto nūtano'dbhutaḥ ||
2.2.34.11
vemurdakṣādayaḥ sarve tadā śoṇitamadbhutam |
vemuśca māṃsakhaṇḍāni saśalyāni muhurmuhuḥ ||
2.2.34.12
sakampāśca babhūvuste dīpā vātahatā iva |
duḥkhitāścābhavansarve śastradhārāhatā iva ||
2.2.34.13
tadā ninādajātāni bāṣpavarṣāṇi tatkṣaṇe |
prātastuṣāravarṣīṇi padmānīva vanāntare ||
2.2.34.14
dakṣādyakṣīṇi jātāni hyakasmādviśadānyapi |
niśāyāṃ kamalāścaiva kumudānīva saṅgave ||
2.2.34.15
asṛgvavarṣa devaśca timireṇāvṛtā diśaḥ |
digdāho'bhūdviśeṣeṇa trāsayan sakalāñjanān ||
2.2.34.16
evaṃvidhānyariṣṭāni dadṛśurvibudhādayaḥ |
bhayamāpedire'tyantaṃ mune viṣṇvādikāstadā ||
2.2.34.17
bhuvi te mūrchitāḥ peturhā hatāḥ sma itīrayan |
taravastīrasañjātā nadīvegahatā iva ||
2.2.34.18
patitvā te sthitā bhūmau krūrāḥ sarpā hatā iva |
kandukā iva te bhūyaḥ patitāḥ punarutthitāḥ ||
2.2.34.19
tataste tāpasantaptā ruruduḥ kurarī iva |
rodanadhvanisaṅkrātoruktipratyuktikā iva ||
2.2.34.20
savaikuṇṭhāstataḥ sarve tadā kuṇṭhitaśaktayaḥ |
svasvopakaṇṭhamākaṇṭhaṃ luluṭhuḥ kamaṭhā iva ||
2.2.34.21
etasminnantare tatra sañjātā cāśarīravāk |
śrāvayatyakhilān devān dakṣaṃ caiva viśeṣataḥ ||
2.2.34.21.p1
ākāśavāṇyuvāca |
dhik janma tava dakṣādya mahāmūḍho'si pāpadhīḥs ||
2.2.34.21.p2
bhaviṣyati mahadduḥkhamanivāryaṃ harodbhavam | 22 ||
2.2.34.23
sahāyino'tra ye mūḍhāstava devādayaḥ sthitāḥ |
teṣāmapi mahadduḥkhaṃ bhaviṣyati na saṃśayaḥ ||
2.2.34.24
brahmovāca |
tacchrutvākāśavacanaṃ dṛṣṭvāriṣṭāni tāni ca |
dakṣaḥ prāpadbhayaṃ cāti pare devādayo'pi ha ||
2.2.34.25
vepamānastadā dakṣo vikalaścāti cetasi |
agacchaccharaṇaṃ viṣṇoḥ svaprabhorindirāpateḥ ||
2.2.34.26
supraṇamya bhayāviṣṭaḥ saṃstūya ca vicetanaḥ |
avocaddevadevaṃ taṃ viṣṇuṃ svajanavatsalam ||
2.2.34.26.c1
iti śrīśivamahāpurāṇe dvitīyāyāṃ rudrasaṃhitāyāṃ dvitīye satīkhaṇḍe duḥśakunadarśanaṃ nāma catustriṃśo'dhyāyaḥ ||
2.2.34.26.p2
śrīgaṇeśāya namaḥ ||
2.2.34.26.p3
śrīgaurīśaṅkarābhyāṃ namaḥ ||
2.2.34.26.p4
śrīśivamahāpurāṇam ||
2.2.34.26.p5
dvitīyāyāṃ rudrasaṃhitāyāṃ dvitīyaḥ satīkhaṇḍe
Linked texts (2)
- Revākhaṇḍa (Skandapurāṇa) — Sanskrit
- Skandapurāṇa (early; "Ambikākhaṇḍa") (ed. Bakker) — Sanskrit