Shiva Purana 2.2.4: caturtho'dhyāyaḥ | kāmavivāhaḥ
Śivapurāṇa (complete text) 2.2.4
- Language
- Sanskrit
Contents
- 2.2.4.34 — 5 parts
caturtho'dhyāyaḥ | kāmavivāhaḥ
2.2.4.1
nārada uvāca |
viṣṇuśiṣya mahāprājña vidhe lokakara prabho |
adbhuteyaṃ kathā proktā śivalīlāmṛtānvitā ||
2.2.4.2
tataḥ kimabhavattāta caritaṃ tad vadādhunā |
ahaṃ śraddhānvitaḥ śrotuṃ yadi śambhukathāśrayam ||
2.2.4.3
brahmovāca |
śambhau gate nijasthāne vedhasyantarhite mayi |
dakṣaḥ prāhātha kandarpaṃ saṃsmaran mama tadvacaḥ ||
2.2.4.4
dakṣa uvāca |
maddehajeyaṃ kandarpa sadrūpaguṇasaṃyutā |
enāṃ gṛhṇīṣva bhāryārthaṃ bhavataḥ sadṛśīṃ guṇaiḥ ||
2.2.4.5
eṣā tava mahātejāḥ sarvadā sahacāriṇī |
bhaviṣyati yathākāmaṃ dharmato vaśavartinī ||
2.2.4.6
brahmovāca |
ityuktvā pradadau tasyai dehasvedāmbusambhavām |
kandarpāyāgrataḥ kṛtvā nāma kṛtvā ratīti tām ||
2.2.4.7
vivāhya tāṃ smaraḥ so'pi mumodātīva nārada |
dakṣajāṃ tanayāṃ ramyāṃ munīnāmapi mohinīm ||
2.2.4.8
atha tāṃ vīkṣya madano ratyākhyāṃ svastriyaṃ śubhām |
ātmāguṇena viddho'sau mumoha ratirañjitaḥ ||
2.2.4.9
kṣaṇapradābhavatkāntā gaurī mṛgadṛśī mudā |
lolāpāṅgyatha tasyaiva bhāryā ca sadṛśī ratau ||
2.2.4.10
tasyā bhrūyugalaṃ vīkṣya saṃśayaṃ madano'karot |
utsādanaṃ matkodaṇḍaṃ vidhātrāsyāṃ niveśitam ||
2.2.4.11
gatiṃ dṛṣṭvā kaṭākṣāṇāmāśu tasyā dvijottama |
āśu gantuṃ nijāstrāṇāṃ śraddadhe na ca cārutām ||
2.2.4.12
tasyāḥ svabhāvasaurabhyaṃ dhīraśvāsānilaṃ tathā |
āghrāya madanaḥ śraddhāṃ tyaktavān malayānile ||
2.2.4.13
pūrṇendusadṛśaṃ vaktraṃ dṛṣṭvā lakṣmasulakṣitam |
na niścikāya madano bhedaṃ tanmukhacandrayoḥ ||
2.2.4.14
suvarṇapadmakalikātulyaṃ tasyāḥ kucadvayam |
reje cūcukayugmena bhramareṇeva veṣṭitam ||
2.2.4.15
dṛḍhapīnonnataṃ tasyāḥ stanamadhyaṃ vilambinīm |
ānābhilambinīṃ mālāṃ tanvīṃ candrāyitāṃ śubhām ||
2.2.4.16
jyāṃ puṣpadhanuṣaḥ kāmaḥ ṣaṭpadāvalisambhramām |
visasmāra ca yasmāttāṃ visṛjyaināṃ nirīkṣate ||
2.2.4.17
gambhīranābhirandhrāntaścatuḥpārśvatvagāvṛtam |
ānanābjekṣaṇadvandvamāraktakamalaṃ yathā ||
2.2.4.18
kṣīṇamadhyena vapuṣā nisargāṣṭāpadaprabhā |
rukmavedīva dadṛśe kāmena ramaṇī hi sā ||
2.2.4.19
rambhāstambhāyataṃ snigdhaṃ yadūruyugalaṃ mṛdu |
nijaśaktisamaṃ kāmo vīkṣāñcakre manoharam ||
2.2.4.20
āraktapārṣṇipādāgraṃ prāntabhāgaṃ padadvayam |
anurāgamivānena mitraṃ tasyā manobhavaḥ ||
2.2.4.21
tasyāḥ karayugaṃ raktaṃ nakharaiḥ kiṃśukopamaiḥ |
vṛttābhiraṅgulībhiśca sūkṣmāgrābhirmanoharam ||
2.2.4.22
tad bāhuyugulaṃ kāntaṃ mṛṇālayugalāyatam |
mṛdu snigdhaṃ ciraṃ rājatkāntilohapravālavat ||
2.2.4.23
nīlanīradasaṅkāśaḥ keśapāśo manoharaḥ |
camarībālabharavadvibhāti sma smarapriyā ||
2.2.4.24
etādṛśīṃ ratiṃ nāmnīṃ prāleyādrisamudbhavām |
gaṅgāmiva mahādevo jagrāhotphullalocanaḥ ||
2.2.4.25
cakrapadmāṃ cārubāhuṃ mṛṇālaśakalānvitām |
bhrūyugmavibhramavrātatanūrmiparirājitām ||
2.2.4.26
kaṭākṣapātatuṅgaughāṃ svīyanetrotpalānvitām |
tanulomāmbuśaivālāṃ manodrumavilāsinīm ||
2.2.4.27
nimnanābhihradāṃ kṣāmāṃ sarvāṅgaramaṇīyikām |
sarvalāvaṇyasadanāṃ śobhamānāṃ ramāmiva ||
2.2.4.28
dvādaśābharaṇairyuktāṃ śṛṅgāraiḥ ṣoḍaśairyutām |
mohanīṃ sarvalokānāṃ bhāsayantīṃ diśo daśa ||
2.2.4.29
iti tāṃ madano vīkṣya ratiṃ jagrāha sotsukaḥ |
rāgādupasthitāṃ lakṣmīṃ hṛṣīkeśa ivottamām ||
2.2.4.30
novāca ca tadā dakṣaṃ kāmo modabhavāttataḥ |
vismṛtya dāruṇaṃ śāpaṃ vidhidattaṃ vimohitaḥ ||
2.2.4.31
tadā mahotsavastāta babhūva sukhavardhanaḥ |
dakṣaḥ prītataraścāsīnmumude tanayā mama ||
2.2.4.32
kāmo'tīva sukhaṃ prāpya sarvaduḥkhakṣayaṃ gataḥ |
dakṣajāpi ratiḥ kāmaṃ prāpya cāpi jaharṣa ha ||
2.2.4.33
rarāja ca tayā sārdhaṃ bhinnaścāruvacāḥ smaraḥ |
jīmūta iva sandhyāyāṃ saudāmanyā manojñayā ||
2.2.4.34
iti ratipatiruccairmohayukto ratiṃ tāṃ hṛdupari jagṛhe vai yogadarśīva vidyām |
ratirapi patimagryaṃ prāpya sā cāpi reje harimiva kamalā vai pūrṇacandropamāsyā ||
2.2.4.34.c1
iti śrīśivamahāpurāṇe dvitīyāyāṃ rudrasaṃhitāyāṃ dvitīye satīkhaṇḍe kāmavivāhavarṇanaṃ nāma caturtho'dhyāyaḥ ||
2.2.4.34.p2
śrīgaṇeśāya namaḥ ||
2.2.4.34.p3
śrīgaurīśaṅkarābhyāṃ namaḥ ||
2.2.4.34.p4
śrīśivamahāpurāṇam ||
2.2.4.34.p5
dvitīyāyāṃ rudrasaṃhitāyāṃ dvitīyaḥ satīkhaṇḍe
Linked texts (1)
- Kālikāpurāṇa — Sanskrit