Shiva Purana 2.2.7: saptamo'dhyāyaḥ | sandhyāyā arundhatīnāmaprāptīrvasiṣṭhena saha vivāhaśca
Śivapurāṇa (complete text) 2.2.7
- Language
- Sanskrit
Contents
saptamo'dhyāyaḥ | sandhyāyā arundhatīnāmaprāptīrvasiṣṭhena saha vivāhaśca
2.2.7.1
brahmovāca |
varaṃ dattvā mune tasmin śambhāvantarhite tadā |
sandhyāpyagacchattatraiva yatra medhātithirmuniḥ ||
2.2.7.2
tatra śambhoḥ prasādena na kenāpyupalakṣitā |
sasmāra varṇinaṃ taṃ vai svopadeśakaraṃ tapaḥ ||
2.2.7.3
vasiṣṭhena purā sā tu varṇībhūtvā mahāmune |
upadiṣṭā tapaścartuṃ vacanātparameṣṭhinaḥ ||
2.2.7.4
tameva kṛtvā manasā tapaścaryopadeśakam |
patitvena tadā sandhyā brāhmaṇaṃ brahmacāriṇam ||
2.2.7.5
samiddhe'gnau mahāyajñe munibhirnopalakṣitā |
hṛṣṭā śambhuprasādena sā viveśa vidheḥ sutā ||
2.2.7.6
tasyāḥ puroḍāśamayaṃ śarīraṃ tatkṣaṇāttataḥ |
dagdhaṃ havyamayaṃ gandhaṃ tastāra yadalakṣitam ||
2.2.7.7
vahnistasyāḥ śarīraṃ tu dagdhvā sūryasya maṇḍalam |
śuddhaṃ praveśayāmāsa śambhorevājñayā punaḥ ||
2.2.7.8
sūryo dvayardhaṃ vibhajyātha taccharīraṃ tadā rathe |
svake saṃsthāpayāmāsa prītaye pitṛdevayoḥ ||
2.2.7.9
tadūrdhvabhāgastasyāstu śarīrasya munīśvara |
prātaḥsandhyābhavatsā tu ahorātrādimadhyagā ||
2.2.7.9.p1
taccheṣabhāgastasyāstu ahorātrāntamadhyagā ||
2.2.7.10
sā sāyamabhavatsandhyā pitṛprītipradā sadā ||
2.2.7.11
sūryodayāttu prathamaṃ yadā syādaruṇodayaḥ |
prātaḥsandhyā tadodeti devānāṃ prītikāriṇī ||
2.2.7.12
astaṃ gate tataḥ sūrye śoṇapadmanibhe sadā |
udeti sāyaṃsandhyāpi pitṝṇāṃ modakāriṇī ||
2.2.7.13
tasyāḥ prāṇāstu manasā śambhunātha dayālunā |
divyena tu śarīreṇa cakrire hi śarīriṇaḥ ||
2.2.7.14
muneryajñāvasāne tu samprāpte muninā tu sā |
prāptā putrī vahnimadhye taptakāñcanasuprabhā ||
2.2.7.15
tāṃ jagrāha tadā putrīṃ munirāmodasaṃyutaḥ |
yajñārthaṃ tāṃ tu saṃsnāpya nijakroḍe dadhau mune ||
2.2.7.16
arundhatīti tasyāstu nāma cakre mahāmuniḥ |
śiṣyaiḥ parivṛtastatra mahāmodamavāpa ha ||
2.2.7.17
na ruṇaddhi yato dharmaṃ sā kasmādapi kāraṇāt |
atastriloke viditaṃ nāma samprāpa tatsvayam ||
2.2.7.18
yajñaṃ samāpya sa muniḥ kṛtakṛtyabhāva-māsādya sammadayutastanayāpralambhāt |
tasminnijāśramapade saha śiṣyavargai-stāmeva santatamasau dayate surarṣe ||
2.2.7.19
atha sā vavṛdhe devī tasminmunivarāśrame |
candrabhāgānadītīre tāpasāraṇyasaṃjñake ||
2.2.7.20
samprāpte pañcame varṣe candrabhāgāṃ tadā guṇaiḥ |
tāpasāraṇyamapi sā pavitramakarotsatī ||
2.2.7.21
vivāhaṃ kārayāmāsustasyā brahmasutena vai |
vasiṣṭhena hyarundhatyā brahmaviṣṇumaheśvarāḥ ||
2.2.7.22
tadvivāhe mahotsāho babhūva sukhavardhanaḥ |
sarve surāśca munayaḥ sukhamāpuḥ paraṃ mune ||
2.2.7.23
brahmaviṣṇumaheśānāṃ karanissṛtatoyataḥ |
saptanadyaḥ samutpannāḥ śiprādyāḥ supavitrakāḥ ||
2.2.7.24
arundhatī mahāsādhvī sādhvīnāṃ pravarottamā |
vasiṣṭhaṃ prāpya saṃreje medhātithisutā mune ||
2.2.7.25
yasyāḥ putrāḥ samutpannāḥ śreṣṭhāḥ śaktyādayaḥ śubhāḥ |
vasiṣṭhaṃ prāpya taṃ kāntaṃ saṃreje munisattama ||
2.2.7.26
evaṃ sandhyācaritraṃ te kathitaṃ munisattama |
pavitraṃ paramaṃ divyaṃ sarvakāmaphalapradam ||
2.2.7.27
ya idaṃ śṛṇuyānnārī puruṣo vā śubhavrataḥ |
sarvānkāmānavāpnoti nātra kāryā vicāraṇā ||
2.2.7.27.c1
iti śrīśivamahāpurāṇe dvitīyāyāṃ rudrasaṃhitāyāṃ dvitīye satīkhaṇḍe arundhatīvasiṣṭhavivāhavarṇanaṃ nāma saptamo'dhyāyaḥ ||
2.2.7.27.p2
śrīgaṇeśāya namaḥ ||
2.2.7.27.p3
śrīgaurīśaṅkarābhyāṃ namaḥ ||
2.2.7.27.p4
śrīśivamahāpurāṇam ||
2.2.7.27.p5
dvitīyāyāṃ rudrasaṃhitāyāṃ dvitīyaḥ satīkhaṇḍe