Shiva Purana 2.2.8: aṣṭamo'dhyāyaḥ | vasantasvarūpavarṇanam
Śivapurāṇa (complete text) 2.2.8
- Language
- Sanskrit
Contents
- 2.2.8.53 — 5 parts
aṣṭamo'dhyāyaḥ | vasantasvarūpavarṇanam
2.2.8.1
sūta uvāca |
ityākarṇya vacastasya brahmaṇo hi prajāpateḥ |
prasannamānaso bhūtvā taṃ provāca sa nāradaḥ ||
2.2.8.2
nārada uvāca |
brahman vidhe mahābhāga viṣṇuśiṣya mahāmate |
dhanyastvaṃ śivabhakto hi paratattvapradarśakaḥ ||
2.2.8.3
śrāvitā sukathā divyā śivabhaktivivardhinī |
arundhatyāstathā tasyāḥ svarūpāyāḥ pare bhave ||
2.2.8.4
idānīṃ brūhi dharmajña pavitraṃ caritaṃ param |
śivasya parapāpaghnaṃ maṅgalapradamuttamam ||
2.2.8.5
gṛhītadāre kāme ca hṛṣṭe teṣu gateṣu ca |
sandhyāyāṃ kiṃ tapastaptuṃ gatāyāmabhavattataḥ ||
2.2.8.6
sūta uvāca |
iti śrutvā vacastasya ṛṣervai bhāvitātmanaḥ |
suprasannataro bhūtvā brahmā vacanamabravīt ||
2.2.8.7
brahmovāca |
śṛṇu nārada viprendra tadeva caritaṃ śubham |
śivalīlānvitaṃ bhaktyā dhanyastvaṃ śivasevakaḥ ||
2.2.8.8
ahaṃ vimohitastāta yadaivāntarhitaḥ purā |
acintayaṃ sadāhaṃ tacchambhuvākyaviṣārditaḥ ||
2.2.8.9
cintayitvā ciraṃ citte śivamāyāvimohitaḥ |
śive cerṣyāmakārṣaṃ hi tacchṛṇuṣva vadāmi te ||
2.2.8.10
athāhamagamaṃ tatra yatra dakṣādayaḥ sthitāḥ |
saratiṃ madanaṃ dṛṣṭvā samado'haṃ hi kiñcana ||
2.2.8.11
dakṣamābhāṣya suprītyā parānputrāṃśca nārada |
avocaṃ vacanaṃ so'haṃ śivamāyāvimohitaḥ ||
2.2.8.12
brahmovāca |
he dakṣa he marīcyādyāḥ sutāḥ śṛṇuta madvacaḥ |
śrutvopāyaṃ vidheyaṃ hi mama kaṣṭāpanuttaye ||
2.2.8.13
kāntābhilāṣamātraṃ me dṛṣṭvā śambhuragarhayat |
māṃ ca yuṣmānmahāyogī dhikkāraṃ kṛtavānbahu ||
2.2.8.14
tena duḥkhābhitapto'haṃ labhe'haṃ śarma na kvacit |
yathā gṛhṇātu kāntāṃ sa sa yatnaḥ kārya eva hi ||
2.2.8.15
yathā gṛhṇātu kāntāṃ sa sukhī syāṃ duḥkhavarjitaḥ |
durlabhaḥ sa tu kāmo me paraṃ manye vicārataḥ ||
2.2.8.16
kāntābhilāṣamātraṃ me dṛṣṭvā śambhuragarhayat |
munīnāṃ purataḥ kasmātsa kāntāṃ saṅgrahīṣyati ||
2.2.8.17
kā vā nārī triloke'smin yā bhavettanmanaḥsthitā |
yogamārgamavajñāpya tasya mohaṃ kariṣyati ||
2.2.8.18
manmatho'pi samartho no bhaviṣyatyasya mohane |
nitāntayogī rāmāṇāṃ nāmāpi sahate na saḥ ||
2.2.8.19
parigrahaṃ vinā caiva hareṇa kathayādinā |
madhyamā ca bhavetsṛṣṭistadvācā nānyavāritā ||
2.2.8.20
bhuvi kecidbhaviṣyanti mama vadhyā mahāsurāḥ |
vadhyāḥ keciddharernūnaṃ kecicchambhorupāyataḥ ||
2.2.8.21
saṃsāravimukhe śambhau tathaikāntavirāgiṇi |
asmādṛte na karmānyat kariṣyati na saṃśayaḥ ||
2.2.8.22
ityuktvā tanayāṃścāhaṃ dakṣādīn sunirīkṣya ca |
saratiṃ madanaṃ tatra sānandamagadaṃ tataḥ ||
2.2.8.23
brahmovāca |
matputravara kāma tvaṃ sarvathā sukhadāyakaḥ |
madvacaḥ śṛṇu suprītyā svapatnyā pitṛvatsala ||
2.2.8.24
anayā sahacāriṇyā rājase tvaṃ manobhava |
eṣā ca bhavatā patyā yuktā saṃśobhate bhṛśam ||
2.2.8.25
yathā striyā hṛṣīkeśo hariṇā sā yathā ramā |
kṣaṇadā vidhunā yuktā tayā yukto yathā vidhuḥ ||
2.2.8.26
tathaiva yuvayoḥ śobhā dāmpatyaṃ ca puraskṛtam |
atastvaṃ jagataḥ keturviśvaketurbhaviṣyasi ||
2.2.8.27
jagaddhitāya vatsa tvaṃ mohayasva pinākinām |
yathāśu sumanaḥ śambhuḥ kuryāddārapratigraham ||
2.2.8.28
vijane snigdhadeśe tu parvateṣu saraḥsu ca |
yatra yatra prayātīśastatra tatrānayā saha ||
2.2.8.29
mohaya tvaṃ yatātmānaṃ vanitāvimukhaṃ haram |
tvadṛte vidyate nānyaḥ kaścidasya vimohakaḥ ||
2.2.8.30
bhūte hare sānurāge bhavato'pi manobhava |
śāpopaśāntirbhavitā tasmādātmahitaṃ kuru ||
2.2.8.31
sānurāgo varārohāṃ yadīcchati maheśvaraḥ |
tadā bhavo'pi yogyāryastvāṃ ca santārayiṣyati ||
2.2.8.32
tasmājjāyādvitīyastvaṃ yatasva haramohane |
viśvasya bhava ketustvaṃ mohayitvā maheśvaram ||
2.2.8.33
brahmovāca |
iti śrutvā vaco me hi janakasya jagatprabhoḥ |
uvāca manmathastathyaṃ tadā māṃ jagatāṃ patim ||
2.2.8.34
manmatha uvāca |
kariṣye'haṃ tava vibho vacanācchambhumohanam |
kiṃ tu yoṣinmamāstraṃ me tatkāntāṃ bhagavan sṛja ||
2.2.8.35
mayā sammohite śambhau yayā tasyānumohanam |
kartavyamadhunā dhātastatropāyaṃ paraṃ kuru ||
2.2.8.36
brahmovāca |
evaṃvādini kandarpe dhātāhaṃ sa prajāpatiḥ |
kayā sammohanīyosāviti cintāmayāmaham ||
2.2.8.37
cintāviṣṭasya me tasya niḥśvāso yo viniḥsṛtaḥ |
tasmādvasantaḥ sañjātaḥ puṣpavrātavibhūṣitaḥ ||
2.2.8.38
śoṇarājīvasaṅkāśaḥ phullatāmarasekṣaṇaḥ |
sandhyoditākhaṇḍaśaśipratimāsyaḥ sunāsikaḥ ||
2.2.8.39
śārṅgavaccaraṇāvartaḥ śyāmakuñcitamūrdhajaḥ |
sandhyāṃśumālisadṛśaḥ kuṇḍaladvayamaṇḍitaḥ ||
2.2.8.40
pramattebhagatiḥ pīnāyatadorunnatāṃsakaḥ |
kambugrīvaḥ suvistīrṇahṛdayaḥ pīnasanmukhaḥ ||
2.2.8.41
sarvāṅgasundaraḥ śyāmaḥ sampūrṇaḥ sarvalakṣaṇaiḥ |
darśanīyatamaḥ sarvamohanaḥ kāmavardhanaḥ ||
2.2.8.42
etādṛśe samutpanne vasante kusumākare |
vavau vāyuḥ susurabhiḥ pādapā api puṣpitāḥ ||
2.2.8.43
pikā vineduḥ śataśaḥ pañcamaṃ madhurasvanāḥ |
praphullapadmā abhavansarasyaḥ svacchapuṣkarāḥ ||
2.2.8.44
tamutpannamahaṃ vīkṣya tadā tādṛśamuttamam |
hiraṇyagarbho madanamagadaṃ madhuraṃ vacaḥ ||
2.2.8.45
brahmovāca |
evaṃ sa manmathanibhaḥ sadā sahacaro'bhavat |
ānukūlyaṃ tava kṛte sarvaṃ devaḥ kariṣyati ||
2.2.8.46
yathāgneḥ pavano mitraṃ sarvatropakariṣyati |
tathāyaṃ bhavato mitraṃ sadā tvāmanuyāsyati ||
2.2.8.47
vasaterantahetutvādvasantākhyo bhavatvayam |
tavānugamanaṃ karma tathā lokānurañjanam ||
2.2.8.48
asau vasantaśṛṅgāro vāsanto malayānilaḥ |
bhavettu suhṛdo bhāvaḥ sadā tvadvaśavartinaḥ ||
2.2.8.49
vivvokādyāstathā hāvāścatuṣṣaṣṭikalāstathā |
ratyāḥ kurvantu sauhṛdyaṃ suhṛdaste yathā tava ||
2.2.8.50
ebhiḥ sahacaraiḥ kāma vasantapramukhairbhavān |
mohayasva mahādevaṃ ratyā saha mahodyamaḥ ||
2.2.8.51
ahaṃ tāṃ kāminīṃ tāta bhāvayiṣyāmi yatnataḥ |
manasā suvicāryaiva yā haraṃ mohayiṣyati ||
2.2.8.52
brahmovāca |
evamukto mayā kāmaḥ surajyeṣṭhena harṣitaḥ |
nanāma caraṇau me'pi sa patnīsahitastadā ||
2.2.8.53
dakṣaṃ praṇamya tān sarvānmānasānabhivādya ca |
yatrātmā gatavān śambhustatsthānaṃ manmatho yayau ||
2.2.8.53.c1
iti śrīśivamahāpurāṇe dvitīyāyāṃ rudrasaṃhitāyāṃ satīcaritre dvitīye satīkhaṇḍe vasantasvarūpavarṇanaṃ nāmāṣṭamo'dhyāyaḥ ||
2.2.8.53.p2
śrīgaṇeśāya namaḥ ||
2.2.8.53.p3
śrīgaurīśaṅkarābhyāṃ namaḥ ||
2.2.8.53.p4
śrīśivamahāpurāṇam ||
2.2.8.53.p5
dvitīyāyāṃ rudrasaṃhitāyāṃ dvitīyaḥ satīkhaṇḍe
Linked texts (1)
- Kālikāpurāṇa — Sanskrit