Shiva Purana 2.2.9: navamo'dhyāyaḥ | kāmaprabhāva māragaṇotpattiśca
Śivapurāṇa (complete text) 2.2.9
- Language
- Sanskrit
Contents
- 2.2.9.63 — 5 parts
navamo'dhyāyaḥ | kāmaprabhāva māragaṇotpattiśca
2.2.9.1
brahmovāca |
tasmin gate sānucare śivasthānaṃ ca manmathe |
caritramabhavaccitraṃ tacchṛṇuṣva munīśvara ||
2.2.9.2
gatvā tatra mahāvīro manmatho mohakārakaḥ |
svaprabhāvaṃ tatānāśu mohayāmāsa prāṇinaḥ ||
2.2.9.3
vasanto'pi prabhāvaṃ svaṃ cakāra haramohanam |
sarve vṛkṣā ekadaiva praphullā abhavanmune ||
2.2.9.4
vividhānkṛtavānyatnān ratyā saha manobhavaḥ |
jīvāḥ sarve vaśaṃ yātāḥ sagaṇeśaḥ śivo na hi ||
2.2.9.5
samadhormadanasyāsanprayāsā niṣphalā mune |
jagāma sa nijasthānaṃ nivṛtya vimadastadā ||
2.2.9.6
kṛtvā praṇāmaṃ vidhaye mahyaṃ gadgadayā girā |
uvāca madano māṃ codāsīno vimado mune ||
2.2.9.7
kāma uvāca |
brahman śambhurmohanīyo na vai yogaparāyaṇaḥ |
na śaktirmama nānyasya tasya śambhorhi mohane ||
2.2.9.8
samitreṇa mayā brahmannupāyā vividhāḥ kṛtāḥ |
ratyā sahākhilāste ca niṣphalā abhavan śive ||
2.2.9.9
śṛṇu brahmanyathāsmābhiḥ kṛtā hi haramohane |
prayāsān vividhām̐stāta gadatastānmune mama ||
2.2.9.10
yadā samādhimāśritya sthitaḥ śambhurniyantritaḥ |
tadā sugandhivātena śītalenātiveginā ||
2.2.9.11
udvejayāmi rudraṃ sma nityaṃ mohanakāriṇā |
prayatnato mahādevaṃ samādhisthaṃ trilocanam ||
2.2.9.12
svasāyakāṃstathā pañca samādāya śarāsanam |
tasyābhito bhramatastu mohayaṃstadgaṇānaham ||
2.2.9.13
mama praveśamātreṇa suvaśyāḥ sarvajantavaḥ |
abhavadvikṛto naiva śaṅkaraḥ sagaṇaḥ prabhuḥ ||
2.2.9.14
yadā himavataḥ prasthaṃ sa gataḥ pramathādhipaḥ |
tatrāgatastadaivāhaṃ saratiḥ samadhurvidhe ||
2.2.9.15
yadā meruṃ gato rudro yadā vā nāgakeśaram |
kailāsaṃ vā yadā yātastatrāhaṃ gatavāṃstadā ||
2.2.9.16
yadā tyaktasamādhistu harastasthau kadācana |
tadā tasya puraścakrayugaṃ racitavānaham ||
2.2.9.17
tacca bhrūyugalaṃ brahman hāvabhāvayutaṃ muhuḥ |
nānābhāvānakārṣīcca dāmpatyakramamuttamam ||
2.2.9.18
nīlakaṇṭhaṃ mahādevaṃ sagaṇaṃ tatpuraḥsthitāḥ |
akārṣurmohitaṃ bhāvaṃ mṛgāśca pakṣiṇastathā ||
2.2.9.19
mayūramithunaṃ tatrākārṣīdbhāvaṃ rasotsukam |
vividhāṃ gatimāśritya pārśve tasya purastathā ||
2.2.9.20
nālabhad vivaraṃ tasmin kadācidapi maccharaḥ |
satyaṃ bravīmi lokeśa mama śaktirna mohane ||
2.2.9.21
madhurapyakarotkarma yuktaṃ yattasya mohane |
tacchṛṇuṣva mahābhāga satyaṃ satyaṃ vadāmyaham ||
2.2.9.22
campakānkeśarānbālānkāraṇānpāṭalāṃstathā |
nāgakeśarapunnāgānkiṃśukānketakān varān ||
2.2.9.23
mālatīmallikāparṇabhārānkurabakāṃstathā |
utphullayati tatra sma yatra tiṣṭhati vai haraḥ ||
2.2.9.24
sarāṃsyutphullapadmāni vījayan malayānilaiḥ |
yatnātsugandhīnyakarodatīva giriśāśrame ||
2.2.9.25
latāḥ sarvāḥ sumanaso dhattūrāṅkurasañcayāḥ |
vṛkṣāṅkaṃ cirabhāvena veṣṭayanti sma tatra ca ||
2.2.9.26
tānvṛkṣāṃśca supuṣpaughān taiḥ sugandhisamīraṇaiḥ |
dṛṣṭvā kāmavaśaṃ yātā munayo'pi pare kimu ||
2.2.9.27
evaṃ satyapi śambhorna dṛṣṭaṃ mohasya kāraṇam |
bhāvamātramakārṣīnno kopo mayyapi śaṅkaraḥ ||
2.2.9.28
iti sarvamahaṃ dṛṣṭvā jñātvā tasya ca bhāvanām |
vimukho'haṃ śambhumohānniyataṃ te vadāmyaham ||
2.2.9.29
tasya tyaktasamādhestu kṣaṇaṃ no dṛṣṭigocare |
śaknuyāmo vayaṃ sthātuṃ taṃ rudraṃ ko vimohayet ||
2.2.9.30
jvaladagniprakāśākṣaṃ jaṭārāśikarālinam |
śṛṅgiṇaṃ vīkṣya kaḥ sthātuṃ brahman śaknoti tatpuraḥ ||
2.2.9.31
brahmovāca |
manobhavavacaścetthaṃ śrutvāhaṃ caturānanaḥ |
vivakṣurapi nāvocaṃ cintāviṣṭo'bhavaṃ tadā ||
2.2.9.32
mohane'haṃ samartho na harasyeti manobhavaḥ |
vacaḥ śrutvā mahāduḥkhānniraśvasamahaṃ mune ||
2.2.9.33
niśśvāsamārutā me hi nānārūpā mahābalāḥ |
jātā gaṇā lolajihvā lolāścātibhayaṅkarāḥ ||
2.2.9.34
avādayanta te sarve nānāvādyānasaṅkhyakān |
paṭahādigaṇāstāṃstān vikarālānmahāravān ||
2.2.9.35
atha te mama niḥśvāsasambhavāśca mahāgaṇāḥ |
mārayacchedayetyūcurbrahmaṇo me puraḥ sthitāḥ ||
2.2.9.36
teṣāṃ tu vadatāṃ tatra mārayacchedayeti mām |
vacaḥ śrutvā vidhiṃ kāmaḥ pravaktumupacakrame ||
2.2.9.37
mune'tha māṃ samābhāṣya tān dṛṣṭvā madano gaṇān |
uvāca vārayan brahmangaṇānāmagrataḥ smaraḥ ||
2.2.9.38
kāma uvāca |
he brahman he prajānātha sarvasṛṣṭipravartaka |
utpannāḥ ka ime vīrā vikarālā bhayaṅkarāḥ ||
2.2.9.39
kiṃ karmaite kariṣyanti kutra sthāsyanti vā vidhe |
kinnāmadheyā ete tadvada tatra niyojaya ||
2.2.9.40
niyojya tānnije kṛtye sthānaṃ dattvā ca nāma ca |
māmājñāpaya deveśa kṛpāṃ kṛtvā yathocitām ||
2.2.9.41
brahmovāca |
iti tadvākyamākarṇya mune'haṃ lokakārakaḥ |
tamavocaṃ ha madanaṃ teṣāṃ karmādikaṃ diśan ||
2.2.9.42
eta utpannamātrā hi mārayetyavadan vacaḥ |
muhurmuhurato'mīṣāṃ nāma māreti jāyatām ||
2.2.9.43
sadaiva vighnaṃ jantūnāṃ kariṣyanti gaṇā ime |
vinā nijārcanaṃ kāma nānākāmaratātmanām ||
2.2.9.44
tavānugamanaṃ karma mukhyameṣāṃ manobhava |
sahāyino bhaviṣyanti sadā tava na saṃśayaḥ ||
2.2.9.45
yatra yatra bhavān yātā svakarmārthaṃ yadā yadā |
gantārastatra tatraite sahāyārthaṃ tadā tadā ||
2.2.9.46
cittabhrāntiṃ kariṣyanti tvadastravaśavartinām |
jñānināṃ jñānamārgaṃ ca vighnayiṣyanti sarvathā ||
2.2.9.47
brahmovāca |
ityākarṇya vaco me hi saratiḥ sa manobhavaḥ |
kiñcitprasannavadano babhūva munisattama ||
2.2.9.48
śrutvā te'pi gaṇāḥ sarve madanaṃ māṃ ca sarvataḥ |
parivārya yathākāmaṃ tasthustatra nijākṛtim ||
2.2.9.49
atha brahmā smaraṃ prītyāgadaṃ me kuru śāsanam |
ebhiḥ sahaiva gaccha tvaṃ punaśca haramohane ||
2.2.9.50
mana ādhāya yatnāni kuru māragaṇaiḥ saha |
moho bhavedyathā śambhordāragrahaṇahetave ||
2.2.9.51
ityākarṇya vacaḥ kāmaḥ provāca vacanaṃ punaḥ |
devarṣe gauravaṃ matvā praṇamya vinayena mām ||
2.2.9.52
kāma uvāca |
mayā samyak kṛtaṃ karma mohane tasya yatnataḥ |
tanmoho nābhavattāta na bhaviṣyati nādhunā ||
2.2.9.53
tava vāggauravaṃ matvā dṛṣṭvā māragaṇānapi |
gamiṣyāmi punastatra sadāro'haṃ tvadājñayā ||
2.2.9.54
mano niścitametaddhi tanmoho na bhaviṣyati |
bhasma kuryānna me dehamiti śaṅkāsti me vidhe ||
2.2.9.55
ityuktvā samadhuḥ kāmaḥ saratiḥ sabhayastadā |
yayau māragaṇaiḥ sārdhaṃ śivasthānaṃ munīśvara ||
2.2.9.56
pūrvavat svaprabhāvaṃ ca cakre manasijastadā |
bahūpāyaṃ sa hi madhurvividhāṃ buddhimāvahan ||
2.2.9.57
upāyaṃ sa cakārāti tatra māragaṇo'pi ca |
moho'bhavanna vai śambhorapi kaścitparātmanaḥ ||
2.2.9.58
nivṛttya punarāyāto mama sthānaṃ smarastadā |
āsīnmāragaṇo'garvo'harṣo me'pi purasthitaḥ ||
2.2.9.59
kāmaḥ provāca māṃ tāta praṇamya ca nirutsavaḥ |
sthitvā mama puro'garvo māraiśca madhunā tadā ||
2.2.9.60
kṛtaṃ pūrvādadhikataḥ karma tanmohane vidhe |
nābhavattasya moho'pi kaściddhyānaratātmanaḥ ||
2.2.9.61
na dagdhā me tanuścaiva tatra tena dayālunā |
kāraṇaṃ pūrvapuṇyaṃ ca nirvikāraḥ sa vai prabhuḥ ||
2.2.9.62
cedvaraste haro bhāryāṃ gṛhṇīyāditi padmaja |
paropāyaṃ kuru tadā vigarva iti me matiḥ ||
2.2.9.63
brahmovāca |
ityuktvā saparīvāro yayau kāmaḥ svamāśramam |
praṇamya māṃ smaran śambhuṃ garvadaṃ dīnavatsalam ||
2.2.9.63.c1
iti śrīśivamahāpurāṇe dvitīyāyāṃ rudrasaṃhitāyāṃ satīkhaṇḍe satyupākhyāne kāmaprabhāvamāragaṇotpattivarṇanaṃ nāma navamo'dhyāyaḥ ||
2.2.9.63.p2
śrīgaṇeśāya namaḥ ||
2.2.9.63.p3
śrīgaurīśaṅkarābhyāṃ namaḥ ||
2.2.9.63.p4
śrīśivamahāpurāṇam ||
2.2.9.63.p5
dvitīyāyāṃ rudrasaṃhitāyāṃ dvitīyaḥ satīkhaṇḍe
Linked texts (1)
- Revākhaṇḍa (Vāyupurāṇa) — Sanskrit