Pramāṇa · Search · About · API

Shiva Purana 3.7: saptamo'dhyāyaḥ | nandikeśvarāvatārābhiṣeka vivāhavarṇanam

Śivapurāṇa (complete text) 3.7

Language
Sanskrit

Contents

saptamo'dhyāyaḥ | nandikeśvarāvatārābhiṣeka vivāhavarṇanam

3.7.1

nandikeśvara uvāca |
tatra gatvā mune'haṃ vai sthitvaikāntasthale sudhīḥ |
atapaṃ tapa ugraṃ sanmunīnāmapi duṣkaram ||

3.7.2

hṛtpuṇḍarīkasuṣire dhyātvā devaṃ triyambakam |
tryakṣaṃ daśabhujaṃ śāntaṃ pañcavaktraṃ sadāśivam ||

3.7.3

rudrajāpyamakārṣaṃ vai paramadhyānamāsthitaḥ |
saritaścottare puṇye hyekacittaḥ samāhitaḥ ||

3.7.4

tasmiñjāpye'tha samprītaḥ sthitaṃ māṃ parameśvaraḥ |
tuṣṭo'bravīnmahādevaḥ somaḥ somārddhabhūṣaṇaḥ ||

3.7.5

śiva uvāca |
śailāde varado'haṃ te tapasānena toṣitaḥ |
sādhu taptaṃ tvayā dhīman brūhi yatte manogatam ||

3.7.6

sa evamukto devena śirasā pādayornataḥ |
astavaṃ parameśānaṃ jarāśokavināśanam ||

3.7.7

atha māṃ nandinaṃ śambhurbhaktyā parāmayā yutam |
aśrupūrṇekṣaṇaṃ samyak pādayoḥ śirasā natam ||

3.7.8

utthāpya parameśānaḥ pasparśa paramārtihā |
karābhyāṃ sammukhābhyāṃ tu saṅgṛhya vṛṣabhadhvajaḥ ||

3.7.9

nirīkṣya gaṇapāṃścaiva devīṃ himavataḥ sutām |
uvāca māṃ kṛpādṛṣṭyā samīkṣya jagatāṃ patiḥ ||

3.7.10

vatsa nandin mahāprājña mṛtyorbhītiḥ kutastava |
mayaiva preṣitau viprau matsamastvaṃ na saṃśayaḥ ||

3.7.11

amaro jarayā tyakto'duḥkhī gaṇapatiḥ sadā |
avyayaścākṣayaśceṣṭaḥ sapitā sasuhṛjjanaḥ ||

3.7.12

madbalaḥ pārśvago nityaṃ mameṣṭo bhavitāniśam |
na jarā janma mṛtyurvai matprasādādbhaviṣyati ||

3.7.13

nandīśvara uvāca |
evamuktvā śiromālāṃ kuśeśayamayīṃ nijām |
samunmucya babandhāśu mama kaṇṭhe kṛpānidhiḥ ||

3.7.14

tayāhaṃ mālayā vipra śubhayā kaṇṭhasaktayā |
tryakṣo daśabhujaścāsaṃ dvitīya iva śaṅkaraḥ ||

3.7.15

tata eva samādāya hastena parameśvaraḥ |
uvāca brūhi kiṃ te'dya dadāmi varamuttamam ||

3.7.16

tato jaṭāśritaṃ vāri gṛhītvā hāranirmalam |
uktvā nadī bhavetīha visasarja vṛṣadhvajaḥ ||

3.7.17

tataḥ pañcamitā nadyaḥ prāvartanta śubhāvahāḥ |
sutoyāśca mahāvegā divyarūpā ca sundarīḥ ||

3.7.18

jaṭodakā trisrotāśca vṛṣadhvaniritīva hi |
svarṇodakā jambunadī pañca nadyaḥ prakīrtitāḥ ||

3.7.19

etatpañcanadaṃ nāma śivapṛṣṭhatamaṃ śubham |
japeśvarasamīpe tu pavitraṃ paramaṃ mune ||

3.7.20

yaḥ pañcanadamāsādya snātvā japtveśvareśvaram |
pūjayecchivasāyujyaṃ prayātyeva na saṃśayaḥ ||

3.7.21

atha śambhuruvācomāmabhiṣiñcāmi nandinam |
gaṇendraṃ vyāhariṣyāmi kiṃ vā tvaṃ manyase'vyaye ||

3.7.22

umovāca |
dātumarhasi deveśa nandine parameśvara |
mahāpriyatamo nātha śailādistanayo mama ||

3.7.23

nandīśvara uvāca |
tataḥ sa śaṅkaraḥ svīyānsasmāra gaṇapānvarān |
svatantraḥ parameśānaḥ sarvado bhaktavatsalaḥ ||

3.7.24

smaraṇādeva rudrasya samprāptāśca gaṇeśvarāḥ |
asaṅkhyātā mahāmodāḥ śaṅkarākṛtayo'khilāḥ ||

3.7.25

te gaṇeśāḥ śivaṃ devīṃ praṇamyāhuḥ śubhaṃ vacaḥ |
te praṇamya karau baddhvā nataskandhā mahābalāḥ ||

3.7.26

gaṇeśā ūcuḥ |
kimarthaṃ ca smṛtā deva hyājñāpaya mahāprabho |
kiṅkarānnaḥ samāyātāṃstripurārdana kāmada ||

3.7.27

kiṃ sāgarān śoṣayāmo yamaṃ vā saha kiṅkaraiḥ |
hanmo mṛtyuṃ mahāmṛtyuṃ viśeṣaṃ vṛddhapadmajam ||

3.7.28

baddhvendraṃ saha devaiśca viṣṇuṃ vā pārṣadaiḥ saha |
ānayāmaḥ susaṅkruddhāndaityānvā dānavaiḥ saha ||

3.7.29

kasyādya vyasanaṃ ghoraṃ kariṣyāmastavājñayā |
kasya vādyotsavo deva sarvakāmasamṛddhaye ||

3.7.30

nandīśvara uvāca |
ityākarṇya vacasteṣāṃ gaṇānāṃ vīravādinām |
uvāca tānsa praśaṃsya gaṇeśānparameśvaraḥ ||

3.7.31

śiva uvāca |
nandīśvaro'yaṃ putro me sarveṣāmīśvareśvaraḥ |
priyo gaṇāgraṇīḥ sarvaiḥ kriyatāṃ vacanaṃ mama ||

3.7.32

sarve prītyābhiṣiñcadhvaṃ madgaṇānāṃ gatiṃ patim |
adyaprabhṛti yuṣmākamayaṃ nandīśvaraḥ prabhuḥ ||

3.7.33

nandīśvara uvāca |
evamuktāḥ śaṅkareṇa gaṇapāḥ sarva eva te |
evamastviti samprocya sambhārānāharam̐stataḥ ||

3.7.34

tato devāśca sendrāśca nārāyaṇamukhāstathā |
munayaḥ sarvato lokā ājagmurmuditānanāḥ ||

3.7.35

pitāmaho'pi bhagavanniyogācchaṅkarasya vai |
cakāra nandinaḥ sarvamabhiṣekaṃ samāhitaḥ ||

3.7.36

tato viṣṇustataḥ śakro lokapālāstathaiva ca |
ṛṣayastuṣṭuvuścaiva pitāmahapurogamāḥ ||

3.7.37

stutimatsu tatasteṣu viṣṇuḥ sarvajagatpatiḥ |
śirasyañjalimādhāya tuṣṭāva ca samāhitaḥ ||

3.7.38

prāñjaliḥ praṇato bhūtvā jayaśabdaṃ cakāra ca |
tato gaṇādhipāḥ sarva tato devāstato'surāḥ ||

3.7.39

evaṃ stutaścābhiṣikto devaiḥ sabrahmakaistadā |
nandīśvarohaṃ viprendra niyogātpa rameśituḥ ||

3.7.40

udvāhaśca kṛtastatra niyogātparameṣṭhinaḥ |
mahotsavayutaḥ prītyā viṣṇubrahmādibhirmama ||

3.7.41

marutāṃ ca sutā devī suyaśāstu manoharā |
patnī sā me'bhavaddivyā manonayananandinī ||

3.7.42

labdhaṃ śaśiprabhaṃ chatraṃ tayā tatra vibhūṣitam |
cāmaraiścāmarāsaktahastāgraiḥ strīgaṇairyutam ||

3.7.43

siṃhāsanaṃ ca paramaṃ tayā cādhiṣṭhitaṃ mayā |
alaṅkṛto mahālakṣmyā mukuṭādyaiḥ subhūṣaṇaiḥ ||

3.7.44

labdho hāraśca paramo devyāḥ kaṇṭhagatastathā |
vṛṣendraśca śito nāgassiṃhaḥ siṃhadhvajastathā ||

3.7.45

rathaśca hemahāraśca candrabimbasamaḥ śubhaḥ |
anyānyapi ca vastūni labdhāni hi mayā mune ||

3.7.46

evaṃ kṛtavivāho'haṃ tayā patnyā mahāmune |
pādau vavande śambhośca śivāyā brahmaṇo hareḥ ||

3.7.47

tathāvidhaṃ trilokeśaḥ sapatnīkaṃ ca māṃ prabhuḥ |
provāca parayā prītyā sa śivo bhaktavatsalaḥ ||

3.7.48

īśvara uvāca |
śṛṇu satputra tātastvaṃ suyaśeyaṃ tava priyā |
dadāmi te varaṃ prītyā yatte manasi vāñchitam ||

3.7.49

sadā'haṃ tava nandīśa santuṣṭo'smi gaṇeśvara |
devyā ca sahito vatsa śṛṇu me paramaṃ vacaḥ ||

3.7.50

sadeṣṭaśca viśiṣṭaśca paramaiśvaryasaṃyutaḥ |
mahāyogī maheṣvāsaḥ sapitā sapitāmahaḥ ||

3.7.51

ajeyaḥ sarvajetā ca sadā pūjyo mahābalaḥ |
ahaṃ yatra bhavāṃstatra yatra tvaṃ tatra cāpyaham ||

3.7.52

ayaṃ ca te pitā putra paramaiśvaryasaṃyutaḥ |
bhaviṣyati gaṇādhyakṣo mama bhakto mahābalaḥ ||

3.7.53

pitāmaho'pi te vatsa tathāstu niyamā ime |
matsamīpaṃ gamiṣyanti mayā dattavarāstathā ||

3.7.54

nandīśvara uvāca |
tato devī mahābhāgā nandinaṃ varadābravīt |
varaṃ brūhīti māṃ putra sarvānkāmānyathepsitān ||

3.7.55

tacchrutvā vacanaṃ devyāḥ prāvocatsāñjalistadā |
bhaktirbhavatu me devi pādayoste sadā varā ||

3.7.56

śrutvā mama vaco devī hyevamastviti sābravīt |
suyaśāṃ tāṃ ca suprītyā nandipriyatamāṃ śivām ||

3.7.57

devyuvāca |
vatse varaṃ yatheṣṭaṃ hi trinetrā janmavarjitā |
putrapautraistu bhaktirme tathā ca bhartureva hi ||

3.7.58

nandyuvāca |
tadā brahmā ca viṣṇuśca sarve devagaṇāśca vai |
tābhyāṃ varāndaduḥ prītyā suprasannāḥ śivājñayā ||

3.7.59

sānvayaṃ māṃ gṛhītveśastataḥ sambandhibāndhavaiḥ |
āruhya vṛṣamīśāno gato devyā nijaṃ gṛham ||

3.7.60

viṣṇvādayaḥ surāḥ sarve praśaṃsanto hyamī tadā |
svadhāmāni yayuḥ prītyā saṃstuvantaḥ śivaṃ śivam ||

3.7.61

iti te kathito vatsa svāvatāro mahāmune |
sadānandakaraḥ puṃsāṃ śivabhaktipravarddhanaḥ ||

3.7.62

ya idaṃ nandino janma varadānaṃ tathā mama |
abhiṣekaṃ vivāhaṃ ca śṛṇuyācchrāvayettathā ||

3.7.63

paṭhedvā pāṭhayedvāpi śraddhāvānbhaktisaṃyutaḥ |
iha sarvasukhaṃ bhuktvā paratra labhate gatim ||

3.7.63.c1

iti śrīśivamahāpurāṇe tṛtīyāyāṃ śatarudrasaṃhitāyāṃ nandikeśvarāvatārābhiṣeka vivāhavarṇanaṃ nāma saptamo'dhyāyaḥ ||

3.7.63.p2

śrīgaṇeśāya namaḥ ||

3.7.63.p3

śrīgaurīśaṅkarābhyāṃ namaḥ ||

3.7.63.p4

śrīśivamahāpurāṇam ||

3.7.63.p5

tṛtīyāyāṃ śatarudrasaṃhitāyāṃ

Other recensions (1)

Linked texts (3)