Shivapurana 4.3: tṛtīyo'dhyāyaḥ | koṭirudrasaṃhitāyāmanasūyātritapovarṇanam
Śivapurāṇa (complete text) 4.3
- Language
- Sanskrit
Contents
- 4.3.39 — 5 parts
tṛtīyo'dhyāyaḥ | koṭirudrasaṃhitāyāmanasūyātritapovarṇanam
4.3.1
sūta uvāca |
brahmapuryāṃ citrakūṭe liṅgaṃ mattagajendrakam |
brahmaṇā sthāpitaṃ pūrvaṃ sarvakāmasamṛddhidam ||
4.3.2
tatpūrvadiśi koṭīśaṃ liṅgaṃ sarvavarapradam |
godāvaryāḥ paścime talliṅgaṃ paśupatināmakam ||
4.3.3
dakṣiṇasyāṃ diśi kaścidatrīśvara iti svayam |
lokānāmupakārārthamanasūyāsukhāya ca ||
4.3.4
prādurbhūtaḥ svayaṃ devo hyanāvṛṣṭyāmajīvayat |
sa eva śaṅkaraḥ sākṣādaṃśena svayameva hi ||
4.3.5
ṛṣaya ūcuḥ |
sūta sūta mahābhāga kathamatrīśvaro haraḥ |
utpannaḥ paramo divyastattvaṃ kathaya suvrata ||
4.3.6
sūta uvāca |
sādhu pṛṣṭamṛṣiśreṣṭhāḥ kathayāmi kathāṃ śubhām |
yāṃ kathāṃ satataṃ śrutvā pātakairmucyate dhruvam ||
4.3.7
dakṣiṇasyāṃ diśi mahat kāmadaṃ nāma yadvanam |
citrakūṭasamīpe'sti tapasāṃ hitadaṃ satām ||
4.3.8
tatra ca brahmaṇaḥ putro hyatrināmā ṛṣiḥ svayam |
tapastepe'tikaṭhinamanasūyāsamanvitaḥ ||
4.3.9
pūrvaṃ kadācittatraiva hyanāvṛṣṭirabhūnmune |
duḥkhadā prāṇināṃ daivādvikaṭā śatavārṣikī ||
4.3.10
vṛkṣāḥ śuṣkāstadā sarve pallavāni phalāni ca |
nityārthaṃ na jalaṃ kvāpi dṛṣṭamāsīnmunīśvarāḥ ||
4.3.11
ārdrībhāvo na labhyeta kharā vātā diśo daśa |
hāhākāro mahānāsītpṛthivyāṃ duḥkhado'ti hi ||
4.3.12
saṃvartaṃ caiva bhūtānāṃ dṛṣṭvātrigṛhiṇī priyā |
sādhvī caivābravīdatriṃ mayā duḥkhaṃ na sahyate ||
4.3.13
samādhau ca vilīno'bhūdāsane saṃsthitaḥ svayam |
prāṇāyāmaṃ trirāvṛttyā kṛtvā munivarastadā ||
4.3.14
dhyāyati sma paraṃ jyotirātmasthamātmanā ca saḥ |
atrirmunivaro jñānī śaṅkaraṃ nirvikārakam ||
4.3.15
svāmini dhyānalīne ca śiṣyāste dūrato gatāḥ |
annaṃ vinā tadā te tu muktvā taṃ svaguruṃ munim ||
4.3.16
ekākinī tadā jātā sānasūyā pativratā |
siṣeve sā ca satataṃ taṃ mudā munisattamam ||
4.3.17
pārthivaṃ sundaraṃ kṛtvā mantreṇa vidhipūrvakam |
mānasairupacāraiśca pūjayāmāsa śaṅkaram ||
4.3.18
tuṣṭāva śaṅkaraṃ bhaktyā saṃsevitvā muhurmuhuḥ |
baddhāñjalipuṭā bhūtvā prakramya svāminaṃ śivam ||
4.3.19
daṇḍavatpraṇipātena pratiprakramaṇaṃ tadā |
cakāra sucaritrā sānasūyā munikāminī ||
4.3.20
daityāśca dānavāḥ sarve dṛṣṭvā tu sundarīṃ tadā |
vihvalāścābhavam̐statra tejasā dūrataḥ sthitāḥ ||
4.3.21
agniṃ dṛṣṭvā yathā dūre vartante tadvadeva hi |
tathaināṃ ca tadā dṛṣṭvā nāyāntīha samīpagāḥ ||
4.3.22
atreśca tapasaścaivānasūyāśivasevanam |
viśiṣyate sma viprendrā manovākkāyasaṃskṛtam ||
4.3.23
tāvatkālaṃ tu sā devī paricaryāṃ cakāra ha |
yāvatkālaṃ munivaraḥ prāṇāyāmaparāyaṇaḥ ||
4.3.24
tau dampatī tadā tatra svasvakāryaparāyaṇau |
saṃsthitau muniśārdūla nānyaḥ kaścitparaḥ sthitaḥ ||
4.3.25
evaṃ jāte tadā kāle hyatriśca ṛṣisattamaḥ |
dhyāne ca parame līno na vyabudhyata kiñcana ||
4.3.26
anasūyāpi sā sādhvī svāminaṃ vai śivaṃ tathā |
bheje nānyatparaṃ kiñcijjānīte sma ca sā satī ||
4.3.27
tasyaiva tapasā sarve tasyāśca bhajanena ca |
devāśca ṛṣayaścaiva gaṅgādyāḥ saritastathā ||
4.3.28
darśanārthaṃ tayoḥ sarvāḥ paraprītyā samāyayuḥ |
dṛṣṭvā ca tattapaḥ sevāṃ vismayaṃ paramaṃ yayuḥ ||
4.3.29
tayostadadbhutaṃ dṛṣṭvā samūcurbhajanaṃ varam |
ubhayoḥ kiṃ viśiṣṭaṃ ca tapaso bhajanasya ca ||
4.3.30
atreścaiva tapaḥproktamanasūyānusevanam |
tatsarvamubhayordṛṣṭvā samūcurbhajanaṃ varam ||
4.3.31
pūrvaiśca ṛṣibhiścaiva duṣkaraṃ tu tapaḥ kṛtam |
etādṛśaṃ tu kenāpi kva kṛtaṃ naitadabruvan ||
4.3.32
dhanyo'yaṃ ca munirdhanyā tatheyamanasūyikā |
yadaitābhyāṃ paraṃ prītyā kriyate sutapaḥ punaḥ ||
4.3.33
etādṛśaṃ śubhaṃ caitattapo duṣkaramuttamam |
trilokyāṃ kriyate kena sāmprataṃ jñāyate na hi ||
4.3.34
tayoreva praśaṃsāṃ ca kṛtvā te tu yathāgatam |
gatāste ca tadā tatra gaṅgāñca giriśaṃ vinā ||
4.3.35
gaṅgā madbhajanaprītā sādhvī dharmavimohitā |
kṛtvopakārametasyāgamiṣyāmītyuvāca sā ||
4.3.36
śivo'pi dhyānasambaddho muneratrermunīśvarāḥ |
pūrṇāṃśena sthitastatra kailāsaṃ na jagāma ha ||
4.3.37
pañcāśacca tathā cātra catvāri ṛṣisattamāḥ |
varṣāṇi ca gatānyāsan vṛṣṭirnaivābhavattadā ||
4.3.38
yāvaccāpyatriṇā hyevaṃ tapasā dhyānamāśritam |
anasūyā tadā naiva gṛhṇāmītīṣaṇā kṛtā ||
4.3.39
evaṃ ca kriyamāṇe hi muninā tapasi sthite |
anasūyāsubhajane yajjātaṃ śrūyatāmiti ||
4.3.39.c1
iti śrīśivamahāpurāṇe caturthyāṃ koṭirudrasaṃhitāyāmanasūyātritapovarṇanaṃ nāma tṛtīyo'dhyāyaḥ ||
4.3.39.p2
śrīgaṇeśāya namaḥ ||
4.3.39.p3
śrīgaurīśaṅkarābhyāṃ namaḥ ||
4.3.39.p4
śrīśivamahāpurāṇam ||
4.3.39.p5
koṭirudrasaṃhitā
Other recensions (1)
- Śivapurāṇa (complete text) — Sanskrit