Shivapurana 1.20
Śivapurāṇa (complete text) 1.20
- Language
- Sanskrit
Contents
- 1.20.66 — 1 part
1.20.54
stutibhiścaiva deveśaṃ stuvīta praṇamansudhīḥ
nānābhidhābhirviprendrāḥ paṭhedvai śatarudriyam
1.20.55
tataḥ sākṣatapuṣpāṇi gṛhītvāṃjalinā mudā
prārthayecchekaraṃ bhaktyā maṃtrairebhiḥ subhaktitaḥ
1.20.56
tāvakastvadguṇaprāṇastvaccittohaṃ sadā mṛḍa
kṛpānidha iti jñātvā bhūtanātha prasīda me
1.20.57
ajñānādyadi vā jñānājjapa pūjādikaṃ mayā
kṛtaṃ tadastu saphalaṃ kṛpayā tava śaṃkara
1.20.58
ahaṃ pāpī mahānadya pāvanaśca bhavānmahān
iti vijñāya gaurīśa yadicchasi tathā kuru
1.20.59
vedaiḥ purāṇaiḥ siddhāntairṛṣibhirvividhairapi
na jñātosi mahādeva kutohaṃ tvaṃ mahāśiva
1.20.60
yathā tathā tvadīyosmi sarvabhāvairmaheśvara
rakṣaṇīyastvayāhaṃ vai prasīda parameśvara
1.20.61
ityevaṃ cākṣatānpuṣpānāropya ca śivopari
praṇamedbhaktitaśśaṃbhuṃ sāṣṭāṃgaṃ vidhivanmune
1.20.62
tataḥ pradakṣiṇāṃ kuryādyathoktavidhinā sudhīḥ
punaḥ stuvīta deveśaṃ stutibhiḥ śraddhayānvitaḥ
1.20.63
tato galaravaṃ kṛtvā praṇamecchucinamradhīḥ
kuryādvijñaptimādṛtya visarjanamathācaret
1.20.64
ityuktā muniśārdūlāḥ pārthivārcā vidhānataḥ
bhuktidā muktidā caiva śivabhaktivivardhinī
1.20.65
ityadhyāyaṃ sucittena yaḥ paṭhecchṛṇuyādapi
sarvapāpaviśuddhātmāsarvānkāmānavāpnuyāt
1.20.66
āyurāyogyadaṃ caiva yaśasyaṃ svargyameva ca
putrapautrādisukhadamākhyānamidamuttamam
1.20.66.p1
iti śrīśivamahāpurāṇe vidyeśvarasaṃhitāyāṃ sādhyasādhanakhaṇḍe pārthivaśivaliṃgapūjāvidhivarṇanaṃ nāma viṃśo'dhyāyaḥ
Other recensions (2)
- Śivapurāṇa — Vyāsa, Sanskrit
- Śivapurāṇa (complete text) — Sanskrit