Shiva Purana 10.7: Śivatattvakathanam
Śivapurāṇa (complete text) 10.7
- Language
- Sanskrit
Contents
- 10.7.40 — 1 part
Śivatattvakathanam
10.7.1
upamanyuruvaca
śaktissvābhavikī tasya vidyā viśvavilakṣaṇā
ekānekasya rūpeṇa bhāti bhānoriva prabhā
10.7.2
anaṃtāḥ śaktayo yasyā icchājñānakriyādayaḥ
māyādyāścābhavanvahnorvisphuliṃgā yathā tathā
10.7.3
sadāśiveśvarādyā hi vidyā'vidyeśvarādayaḥ
abhavanpuruṣāścāsyāḥ prakṛtiśca parātparā
10.7.4
mahadādiviśeṣāṃtāstvajādyāścāpi mūrttayaḥ
yaccānyadasti tatsarvaṃ tasyāḥ kāryyaṃ na saṃśayaḥ
10.7.5
sā śaktissarvagā sūkṣmā prabodhānaṃdarūpiṇī
śaktimānucyate devaśśivaśśītāṃśubhūṣaṇaḥ
10.7.6
vedyaśśivaśśivā vidyā prajñā caiva śrutiḥ smṛtiḥ
dhṛtireṣā sthitirniṣṭhā jñānecchākarmaśaktayaḥ
10.7.7
ājñā caiva paraṃ brahma dve vidye ca parāpare
śuddhavidyā śuddhakalā sarvaṃ śaktikṛtaṃ yataḥ
10.7.8
māyā ca prakṛtirjīvo vikāro vikṛtistathā
asacca sacca yatkiṃcittayā sarvamidaṃ tatam
10.7.9
sā devī māyayā sarvaṃ brahmāṃḍaṃ sacarācaram
mohayatyaprayatnena mocayatyapi līlayā
10.7.10
anayā saha sarveśaḥ saptaviṃśaprakārayā
viśvaṃ vyāpya sthitastasmānmuktiratra pravartate
10.7.11
mumukṣavaḥ purā kecinmunayo brahmavādinaḥ
saṃśayāviṣṭamanaso vismṛśaṃti yathātatham
10.7.12
kiṃ kāraṇaṃ kuto jātā jīvāmaḥ kena vā vayam
kutrāsmākaṃ saṃpratiṣṭhā kena vādhiṣṭhitā vayam
10.7.13
kena vartāmahe śaśvatsukheṣvanyeṣu cāniśam
avilaṃghyā ca viśvasya vyavasthā kena vā kṛtā
10.7.14
kālasya bhāvo niyatiryadṛcchā nātra yujyate
bhūtāni yoniḥ puruṣo yogī caiṣāṃ paro'tha vā
10.7.15
acetanatvātkālādeścetanatvepi cātmanaḥ
sukhaduḥkhāni bhūtatvādanīśatvādvicāryate
10.7.16
taddhyānayogānugatāṃ prapaśyañchaktimaiśvarīm
pāśavicchedikāṃ sākṣānnigūḍhāṃ svaguṇairbhṛśam
10.7.17
tayā vicchinnapāśāste sarvakāraṇakāraṇam
śaktimaṃtaṃ mahādevamapaśyandivyacakṣuṣā
10.7.18
yaḥ kāraṇānyaśeṣāṇi kālātmasahitāni ca
aprameyo'nayā śaktyā sakalaṃ yo'dhitiṣṭhati
10.7.19
tataḥ prasādayogena yogena parameṇa ca
dṛṣṭena bhaktiyogena divyaḥ gatimavāpnuyuḥ
10.7.20
tasmātsaha tathā śaktyā hṛdi paśyaṃti ye śivam
teṣāṃ śāśvatikī śāṃtirnaitareṣāmiti śrutiḥ
10.7.21
na hi śaktimataśśaktyā viprayogo'sti jātucit
tasmācchakteḥ śaktimatastādātmyānnirvṛtirdvayoḥ
10.7.22
kramo vivakṣito nūnaṃ vimuktau jñānakarmaṇoḥ
prasāde sati sā mūrtiryasmātkaratale sthitā
10.7.23
devo vā dānavo vāpi paśurvā vihago'pi vā
kīro vātha kṛmirvāpi mucyate tatprasādataḥ
10.7.24
garbhastho jāyamāno vā bālo vā taruṇo'pi vā
vṛddho vā mriyamāṇo vā svargastho vātha nārakī
10.7.25
patito vāpi dharmātmā paṃḍito mūḍha eva vā
prasāde tatkṣaṇādeva mucyate nātra saṃśayaḥ
10.7.26
ayogyānāṃ ca kāruṇyādbhaktānāṃ parameśvaraḥ
prasīdati na saṃdeho vigṛhya vividhānmalān
10.7.27
prasadādeva sā bhaktiḥ prasādo bhaktisaṃbhavaḥ
avasthābhedamutprekṣya vidvāṃstatra na muhyati
10.7.28
prasādapūrvikā yeyaṃ bhuktimuktividhāyinī
naiva sā śakyate prāptuṃ narairekena janmanā
10.7.29
anekajanmasiddhānāṃ śrautasmārtānuvartinām
viraktānāṃ prabuddhānāṃ prasīdati maheśvaraḥ
10.7.30
prasanne sati deveśa paśau tasminpravartate
asti nātho mametyalpā bhaktirbuddhipurassarā
10.7.31
tapasā vividhaiśśaivairdharmaissaṃyujyate naraḥ
tatra yoge tadabhyāsastato bhaktiḥ parā bhavet
10.7.32
parayā ca tayā bhaktyā prasādo labhyate paraḥ
prasādātsarvapāśebhyo muktirmuktasya nirvṛtiḥ
10.7.33
alpabhāvo'pi yo martyasso'pi janmatrayātparam
nayoniyaṃtrapīḍāyai bhavennaivātra saṃśayaḥ
10.7.34
sāṃgā'naṃgā ca yā sevā sā bhaktiriti kathyate
sā punarbhidyate tredhā manovākkāyasādhanaiḥ
10.7.35
śivarūpādiciṃtā yā sā sevā mānasī smṛtā
japādirvācikī sevā karmapūjādi kāyikī
10.7.36
seyaṃ trisādhanā sevā śivadharmaśca kathyate
sa tu paṃcavidhaḥ proktaḥ śivena paramātmanā
10.7.37
tapaḥ karma japo dhyānaṃ jñānaṃ ceti samāsataḥ
karmaliṇgārcanādyaṃ ca tapaścāndrāyaṇādikam
10.7.38
japastridhā śivābhyāsaścintā dhyānaṃ śivasya tu
śivāgamoktaṃ yajjñānaṃ tadatra jñānamucyate
10.7.39
śrīkaṃṭhena śivenoktaṃ śivāyai ca śivāgamaḥ
śivāśritānāṃ kāruṇyācchreyasāmekasādhanam
10.7.40
tasmādvivardhayedbhaktiṃ śive paramakāraṇe
tyajecca viṣayāsaṃgaṃ śreyo'rthī matimānnaraḥ
10.7.40.p1
iti śrīśivamahāpurāṇe saptamyāṃ vāyavīyasaṃhitāyāmuttarakhaṇḍe śivatattvakathanaṃ nāma saptamo'dhyāyaḥ
Linked texts (3)
- Kriyāsāra — Śrīkaṇtha, Sanskrit
- Siddhāntaśikhāmaṇi — Śivayogi Śivācārya, Sanskrit
- Lele1916 — Sanskrit