Shivapurana 10.7-3
Śivapurāṇa (complete text) 10.7-3
- Language
- Sanskrit
10.7-3.1
kṛṣṇa uvāca
bhagavañchrotumicchāmi śivena paribhāṣitam
vedasāre śivajñānaṃ svāśritānāṃ vimuktaye
10.7-3.2
abhaktānāmabuddhīnāmayuktānāmagocaram
arthairdaśarddhaiḥ saṃyuktaṃ gūḍhamaprājñaniṃditam
10.7-3.3
varṇāśramakṛtairddharmairviparītaṃ kvacitsamam
vedātṣaḍegāduddhṛtya sāṃkhyādyogācca kṛtsnaśaḥ
10.7-3.4
śatakoṭipramāṇena vistīrṇaṃ graṃthasaṃkhyayā
kathitaṃ parameśena tatra pūjā kathaṃ prabhoḥ
10.7-3.5
kasyādhikāraḥ pūjādau jñānayogādayaḥ katham
tatsarvaṃ vistarādeva vaktumarhasi suvrata
10.7-3.6
upamanyuruvāca
śaivaṃ saṃkṣipya vedoktaṃ śivena paribhāṣitam
stutiniṃdādirahitaṃ sadyaḥ pratyayakāraṇam
10.7-3.7
guruprasādajaṃ divyamanāyāsena muktidam
kathayiṣye samāsena tasya śakyo na vistaraḥ
10.7-3.8
sisṛkṣayā purāvyaktācchivaḥ sthāṇurmaheśvaraḥ
satkāryakāraṇopetassvayamāvirabhūtprabhuḥ
10.7-3.9
janayāmāsa ca tadā ṛṣirviśvādhikaḥ prabhuḥ
devānāṃ prathamaṃ devaṃ brahmāṇaṃ brahmaṇaspatim
10.7-3.10
brahmāpi pitaraṃ devaṃ jāyamānaṃ nyavaikṣata
taṃ jāyamānaṃ janako devaḥ prāpaśyadājñayā
10.7-3.11
dṛṣṭo rudreṇa devo'sāvasṛjadviśvamīśvaraḥ
varṇāśramavyavasthāṃ ca cakāra sa pṛthakpṛthak
10.7-3.12
somaṃ sasarja yajñārthe somāddyaussamajāyata
dharā ca vahniḥ sūryaśca yajño viṣṇuśśacīpatiḥ
10.7-3.13
te cānye ca surā rudraṃ rudrādhyāyena tuṣṭuvuḥ
prasannavadanastasthau devānāmagrataḥ prabhuḥ
10.7-3.14
apahṛtya svalīlārthaṃ teṣāṃ jñānaṃ maheśvaraḥ
tamapṛcchestato devāḥ ko bhavāniti mohitāḥ
Linked texts (1)
- Vāyupurāṇa — Vyāsa, Sanskrit