Pramāṇa · Search · About · API

Shiva Purana 2.4: Viṣṇūpadeśavarṇanaḥ

Śivapurāṇa (complete text) 2.4

Language
Sanskrit

Contents

Viṣṇūpadeśavarṇanaḥ

2.4.1

ṛṣaya ūcuḥ
sūta sūta mahāprājña varṇitā hyadbhutā kathā
dhanyā tu śāṃbhavī māyā tadadhīnaṃ carācaram

2.4.2

gatayorgaṇayośśaṃbhossvayamātmecchayā vibhoḥ
kiṃ cakāra muniḥ kruddho nāradaḥ smaravihvalaḥ

2.4.3

sūta uvāca
vimohito munirdattvā tayośśāpaṃ yathocitam
jale mukhaṃ nirīkṣyātha svarūpaṃ giriśecchayā

2.4.4

śivecchayā na pravuddhaḥ smṛtvā harikṛtacchalam
krodhaṃ durviṣahaṃ kṛtvā viṣṇulokaṃ jagāma ha

2.4.5

uvāca vacanaṃ kruddhassamiddha iva pāvakaḥ
duruktigarbhitaṃ vyaṅgaṃ naṣṭajñānaśśivecchayā

2.4.6

nārada uvāca
he hare tvaṃ mahāduṣṭaḥ kapaṭī viśvamohanaḥ
parotsāhaṃ na sahase māyāvīmalināśayaḥ

2.4.7

mohinīrūpamādāya kapaṭaṃ kṛtavānpurā
asurebhyo'pāyayastvaṃ vāruṇīmamṛtaṃ na hi

2.4.8

cetpibenna viṣaṃ rudrodayāṃ kṛtvā maheśvaraḥ
bhavennaṣṭā'khilā māyā tava vyājarate hare

2.4.9

gatissakapaṭā te'tipriyā viṣṇoviśeṣataḥ
sādhusvabhāvo nabhavānsvataṃtraḥ prabhuṇā kṛtaḥ

2.4.10

kṛtaṃ samucitannaiva śivena paramātmanā
tatprabhāvabalaṃ dhyātvā svataṃtrakṛtikārakaḥ

2.4.11

tvadgatiṃ susamājñāya paścāttāpamavāpa saḥ
vipraṃ sarvopariprāha svoktavedapramāṇakṛt

2.4.12

tajjñātvāhaṃ hare tvādya śikṣayiṣyāmi tadbalāt
yathā na kuryāḥ kutrāpīdṛśaṃ karma kadācana

2.4.13

adyāpi nirbhayastvaṃ hi saṃgaṃ nāpastarasvinā
idānīṃ lapsyase viṣṇo phalaṃ svakṛtakarmaṇaḥ

2.4.14

itthamuktvā hariṃ sotha munirmāyā vimohitaḥ
śaśāpakrodhanirviṇo brahmatejaḥ pradarśayan

2.4.15

strīkṛte vyākulaṃ viṣṇo māmakārṣīrvimohakaḥ
anvakārṣīssvarūpeṇa yena kāpaṭyakāryakṛt

2.4.16

tadrūpeṇa manuṣyastvaṃ bhava tadduḥkhabhugghare
yanmukhaṃ kṛtavānmetvaṃ te bhavaṃtu sahāyinaḥ

2.4.17

tvaṃ strīviyogajaṃ duḥkhaṃ labhasva paraduḥkhadaḥ
manuṣyagatikaḥ prāyo bhavājñānavimohitaḥ

2.4.18

iti śaptvā hariṃ mohānnārado'jñānamohitaḥ
viṣṇurjagrāha taṃ śāpaṃ praśaṃsañśāṃbhavīmajām

2.4.19

atha śaṃbhurmahālīlo niścakarṣa vimohinīṃ
svamāyāṃ mohito jñānī nāradopyabhavadyayā

2.4.20

aṃtarhitāyāṃ māyāyāṃ pūrvavanmatimānabhūt
nārado vismitamanāḥ prāptabodho nirākulaḥ

2.4.21

paścāttāpamavāpyāti nininda svaṃ muhurmuhuḥ
praśaśaṃsa tadā māyāṃ śāṃbhavīṃ jñānimohinīm

2.4.22

atha jñātvā munissarvaṃ māyāvibhramamātmanaḥ
apatatpādayorviṣṇornārado vaiṣṇavottamaḥ

2.4.23

haryyupasthāpitaḥ prāha vacanaṃ naṣṭadurmatiḥ
mayā duraktayaḥ proktā mohitena kubuddhinā

2.4.24

dattaśśāpo'pi tenātha vitathaṃ kuru taṃ prabho
mahatpāpamakārṣaṃ hi yāsyāmi nirayaṃ dhruvam

2.4.25

kamupāyaṃ hare kuryāṃ dāso'haṃ te tamādiśa
yena pāpakulaṃ naśyennirayo na bhavenmama

2.4.26

ityuktvā sa punarviṣṇoḥ pādayormunisattamaḥ
papāta sumatirbhaktyā paścāttāpamupāgataḥ

2.4.27

atha viṣṇustamutthāpya babhāṣe sūnṛtaṃ vacaḥ
viṣṇuruvāca
na khedaṃ kuru me bhakta varastvaṃ nātra saṃśayaḥ

2.4.28

śṛṇu tāta pravakṣyāmi suhitaṃ tava niścayāt
nirayaste na bhavitā śivaśśaṃ te vidhāsyati

2.4.29

yadakārṣīśśivavaco vitathaṃ madamohitaḥ
sa dattavānīdṛśaṃ te phalaṃ karma phalapradaḥ

2.4.30

śivecchā'khilaṃ jātaṃ kurvitthaṃ niścitāṃ matim
garvāpahartā sa svāmī śaṃkaraḥ parameśvaraḥ

2.4.31

paraṃ brahma parātmā sa saccidānaṃdabodhanaḥ
nirguṇo nirvikāro ca rajassatvatamaḥ para

2.4.32

sa evamādāya māyāṃ svāṃ tridhā bhavati rūpataḥ
brahmaviṣṇumaheśātmānirguṇo'nirguṇo'pi saḥ

2.4.33

nirguṇatve śivāhvo hi paramātmā maheśvaraḥ
paraṃ brahmāvyayo'naṃto mahādeveti gīyate

2.4.34

tatsevayā vidhissraṣṭā pālako jagatāmaham
svayaṃ sarvasya saṃhārī rudrarūpeṇa sarvadā

2.4.35

sākṣī śivasvarūpeṇa māyābhinnassa nirguṇaḥ
svecchācārī saṃvihārī bhaktānugrahakārakaḥ

2.4.36

śṛṇu tvaṃ nārada mune sadupāyaṃ sukhapradam
sarvapāpāpaharttāraṃ bhuktimuktipradaṃ sadā

2.4.37

tyuktvā stvasaṃśayaṃ sarvaṃ śaṃkarasadyaśaḥ
śatanāmaśivastotraṃ sadānanyamatirjapa

2.4.38

yajjapitvā drutaṃ sarvaṃ tava pāpaṃ vinaśyati
ityuktvā nāradaṃ viṣṇuḥ punaḥ prāha dayānvitaḥ

2.4.39

mune na kuru śokaṃ tvaṃ tvayā kiṃcitkṛtaṃ nahi
svecchayā kṛtavānśaṃbhuridaṃ sarvaṃ na saṃśayaḥ

2.4.40

ahārṣittvanmatiṃ divyāṃ kāma kleśamadātsa te
tvanmukhāddāpayāṃcakre śāpaṃ me sa maheśvaraḥ

2.4.41

itthaṃ svacaritaṃ loke prakaṭīkṛtavān svayam
mṛtyuṃjayaḥ kālakālo bhaktoddhāraparāyaṇaḥ

2.4.42

na me śivasamānosti priyaḥ svāmī sukhapradaḥ
sarvaśaktiprado me'sti sa eva parameśvaraḥ

2.4.43

tasyopāsyāṃ kuru mune tameva satataṃ bhaja
tadyaśaḥ śṛṇu gāya tvaṃ kuru nityaṃ tadarcanam

2.4.44

kāyena manasā vācā yaśśaṃkaramupaiti bho
sa paṇḍita iti jñeyassa jīvanmukte ucyate

2.4.45

śiveti nāmadāvāgnermahāpātakaparvatāḥ
bhasmībhavantyanāyāsātsatyaṃ satyaṃ na saṃśayaḥ

2.4.46

pāpamūlāni duḥkhāni vividhānyapi tānyataḥ
śivārcanaikanaśyāni nānya naśyāni sarvathā

2.4.47

sa vaidikassa puṇyātmā sa dhanyassa budho mune
yassadā kāyavākcittaiśśaraṇaṃ yāti śaṃkaram

2.4.48

bhavaṃti vividhā dharmā yeṣāṃ sadyaḥ phalonmukhāḥ
teṣāṃ bhavati viśvāsastripurāṃtakapūjane

2.4.49

pātakāni vinaśyaṃti yāvaṃti śivapūjayā
bhuvi tāvaṃti pāpāni na saṃtyeva mahāmune

2.4.50

brahmahatyādipāpānāṃ rāśayopyamitā mune
śivasmṛtyā vinaśyaṃti satyaṃ satyaṃ vadāmyaham

2.4.51

śivanāmatarīṃ prāpya saṃsārābdhiṃ taraṃti te
saṃsāramūlapāpāni tasya naśyaṃtyasaṃśayam

2.4.52

saṃsāramūlabhūtanāṃ pātakānāṃ mahāmune
śivanāmakuṭhāreṇa vināśo jāyate dhruvam

2.4.53

śivanāmāmṛtaṃ peyaṃ pāpadāvānalārditaiḥ
pāpadāvāgnitaptānāṃ śāṃtistena vinā na hi

2.4.54

śiveti nāmapīyūṣavarṣadhārāpariplutaḥ
saṃsāradavamadhyapi na śocati na saṃśayaḥ

2.4.55

na bhaktiśśaṃkare puṃsāṃ rāgadveṣaratātmanām
tadvidhānāṃ hi sahasā muktirbhavati sarvathā

2.4.56

anaṃtajanmabhiryena tapastaptaṃ bhaviṣyati
tasyaivabhaktirbhavati bhavānī prāṇavallabhe

2.4.57

jātāpi śaṃkare bhaktiranyasādhāraṇī vṛthā
paraṃtvavyabhicāreṇaśivabhaktirapekṣitā

2.4.58

yasyāsādhāraṇīśaṃbhau bhaktiravyabhicārriṇī
tasyaivamokṣassulabhonāsyetinya matirmama

2.4.59

kṛtvāpyanaṃtapāpāniyadi bhaktirmaheśvare
sarvapāpavinirmukto bhavatyeva na saṃśayaḥ

2.4.60

bhavaṃti bhasmasādvṛkṣādavadagdhā yathāvane
tathā bhavanti dagdhāni śāṃkarāṇāmaghānyapi

2.4.61

yonityaṃ bhasmapūtāṃgo śivapūjonmukho bhavet
sa taratyeva saṃsāramapāramatidāruṇam

2.4.62

brahmasvaharaṇaṃ kṛtvā hatvāpi brāhmaṇānbahūn
lipyate naraḥ pāpairvirūpākṣasya sevakaḥ

2.4.63

vilokya vedānakhilāñchivasyaivārcanamparam
saṃsāranāśanopāya iti pūrvairviniścitam

2.4.64

adyaprabhṛti yatnena sāvadhāno yathāvidhi
sāmbaṃ sadāśivaṃ bhaktyā bhaja nityaṃ maheśvaram

2.4.65

āpādamastakaṃ samyak bhasmanoddhūlya sādaram
sarvaśrutiśrutaṃ śaivammaṃtrañjapa ṣaḍakṣaram

2.4.66

sarvāṅgeṣu prayatnena rudrākṣāñchivavallabhān
dhārayasvātisadbhaktyā samantramvidhipūrvakam

2.4.67

śṛṇu śaivīṃ kathāṃ nityaṃ vada śaivīṃ kathāṃ sadā
pūjayasvātiyatnena śivabhaktānpunaḥ punaḥ

2.4.68

apramādena satataṃ śivaikaśaraṇo bhava
śivārcanena satatamānandaḥ prāpyate yataḥ

2.4.69

urasyādhāya viśade śivasya caraṇāmbujau
śivatīrthāni vicara prathamaṃ munisattama

2.4.70

paśyanmāhātmyamatulaṃ śaṃkarasya parātmanaḥ
gacchānandavanaṃ paścācchaṃbhupriyatamaṃ mune

2.4.71

tatra viśveśvaraṃ dṛṣṭvā pūjanaṃ kuru bhaktitaḥ
natvā stutvā viśeṣeṇa nirvikalpo bhaviṣyasi

2.4.72

tataśca bhavatā nūnaṃ vidheyaṃ gamanaṃ mune
brahmaloke svakāmārthaṃ śāsanānmama bhaktitaḥ

2.4.73

natvā stutvā viśeṣeṇa vidhiṃ svajanakaṃ mune
praṣṭavyaṃ śivamāhātmyaṃ bahuśaḥ prītacetasā

2.4.74

sa śaivapravaro brahmā māhātmyaṃ śaṃkarasya te
śrāvayiṣyati suprītyā śatanāmastavaṃ ca hi

2.4.75

adyatastvaṃ bhava mune śaivaśśivaparāyaṇaḥ
muktiṃ bhāgī viśeṣeṇa śivaste śaṃvidhāsyati

2.4.76

itthaṃ viṣṇurmuniṃ prītyā hyupadiśya prasannadhīḥ
smṛtvā nutvā śivaṃ stutvā tatastvaṃtaradhīyata

2.4.76.p1

iti śrīśivamahāpurāṇe dvitīyāyāṃ rudrasaṃhitāyāṃ prathamakhaṃḍe sṛṣṭyupākhyāne nāradasya viṣṇūpadeśavarṇano nāma caturtho'dhyāyaḥ