Shiva Purana 2.5: Nāradapraśnavarṇanaḥ
Śivapurāṇa (complete text) 2.5
- Language
- Sanskrit
Contents
- 2.5.35 — 1 part
Nāradapraśnavarṇanaḥ
2.5.1
sūta uvāca
aṃtarhite harau viprā nārado munisattamaḥ
vicacāra mahīṃ paśyañchivaliṃgāni bhaktitaḥ
2.5.2
pṛthivyā aṭanaṃ kṛtvā śivarūpāṇyanekaśaḥ
dadarśa prītito viprā bhuktimuktipradāni saḥ
2.5.3
atha taṃ vicaraṃtaṃ kau nāradaṃ divyadarśanam
jñātvā śaṃbhugaṇau tau tu sucittamupajagmatuḥ
2.5.4
śirasā supraṇamyāśu gaṇāvūcaturādarāt
gṛhītvā caraṇau tasya śāpoddhārecchayā catau
2.5.5
śivagaṇāvūcatuḥ
brahmaputra surarṣe hi śṛṇu prītyāvayorvacaḥ
tavāparādhakartārāvāvāṃ viprau na vastutaḥ
2.5.6
āvāṃ haragaṇau vipra tavāgaskāriṇau mune
svayamvare rājaputryā māyāmohitacetasā
2.5.7
tvayā dattaśca nau śāpaḥ pareśapreritena ha
jñātvā kusamayaṃ tatra maunameva hi jīvanam
2.5.8
svakarmaṇaḥ phalaṃ prāptaṃ kasyāpi na hi dūṣaṇam
suprasanno bhava vibho kurvanugrahamadyanau
2.5.9
sūta uvāca
vaca ākarṇya gaṇayoriti bhaktyuktamādarāt
pratyuvāca muniḥ prītyā paścāttāpamavāpya saḥ
2.5.10
nārada uvāca
śṛṇutaṃ me mahādeva gaṇau mānyatamau satām
vacanaṃ sukhadaṃ mohanirmuktaṃ ca yathārthakam
2.5.11
purā mama matirbhraṣṭā sīcchivecchāvaśāt dhruvam
sarvathā mohamāpannaśśaptavānvāṃ kuśemuṣiḥ
2.5.12
yaduktaṃ tattathā bhāvi tathāpi śṛṇutāṃ gaṇau
śāpoddhāramahaṃ vacmi kṣamethā maghamadya me
2.5.13
vīryānmunivarasyāptvā rākṣaseśatvamādiśam
syātāṃ vibhavasaṃyuktau balino supratāpinau
2.5.14
sarvabrahmāṃḍarājānau śivabhaktau jitendriyau
śivāparatanormṛtyu prāpya svaṃ padamāpsyathaḥ
2.5.15
sūta uvāca
ityākarṇya munervākyaṃ nāradasya mahātmanaḥ
ubhau haragaṇau prītau svaṃ padaṃ jagmaturmudā
2.5.16
nārado'pi paraṃ prīto dhyāyacchivamananyadhīḥ
vicacāra mahīṃ paśyañchivatīrthānyabhīkṣṇaśaḥ
2.5.17
kāśīṃ prāpyātha sa muniḥ sarvopari virājitām
śivapriyāṃ śaṃbhusukhapradāṃ śambhusvarūpiṇīm
2.5.18
dṛṣṭvā kāśīṃ kṛtā'rthobhūtkāśīnāthaṃ dadarśa ha
ānarca parama prītyā paramānandasaṃyutaḥ
2.5.19
sa mudaḥ sevyatāṃ kāśīṃ kṛtārtho munisattamaḥ
namansaṃvarṇayanbhaktyā saṃsmaranpremavihvalaḥ
2.5.20
brahmalokaṃ jagāmātha śivasmaraṇasanmatiḥ
śivatattvaṃ viśeṣeṇa jñātumicchussa nāradaḥ
2.5.21
natvā tatra vidhiṃ bhaktyā stutvā ca vividhaistavaiḥ
papraccha śivattatvaṃ śivasaṃbhaktamānasaḥ
2.5.22
nārada uvāca
brahmanbrahmasvarūpajña pitāmaha jagatprabho
tvatprasādānmayā sarvaṃ viṣṇormāhātmyamuttamam
2.5.23
bhaktimārgaṃ jñānamārgaṃ tapomārgaṃ sudustaram
dānamārgañca tīrthānāṃ mārgaṃ ca śrutavāhanam
2.5.24
na jñātaṃ śivatattvaṃ ca pūjāvidhimataḥ kramāt
caritraṃ vividhaṃ tasya nivedaya mama prabho
2.5.25
nirguṇo'pi śivastāta saguṇaśśaṃkaraḥ katham
śivatattvaṃ na jānāmi mohitaśśivamāyayā
2.5.26
sṛṣṭeḥ pūrvaṃ kathaṃ śaṃbhussvarūpeṇa pratiṣṭhitaḥ
sṛṣṭimadhye sa hi kathaṃ krīḍansaṃvartate prabhuḥ
2.5.27
tadante ca kathaṃ devassa tiṣṭhati maheśvaraḥ
kathaṃ prasannatāṃ yāti śaṃkaro lokaśaṃkaraḥ
2.5.28
saṃtuṣṭaśca svabhaktebhyaḥ parebhyaśca maheśvaraḥ
kiṃ phalaṃ yacchati vidhe tatsarvaṃ kathayasva me
2.5.29
sadyaḥ prasanno bhagavānbhavatītyanusaṃśrutam
bhaktaprayāsaṃ sa mahānna paśyati dayāparaḥ
2.5.30
brahmā viṣṇurmaheśaśca trayo devāśśivāṃśajāḥ
maheśastatra pūrṇāṃśassvayameva śivaḥ paraḥ
2.5.31
tasyāvirbhāvamākhyāhi caritāni viśeṣataḥ
umāvirbhāvamākhyāhi tadvivāhaṃ tathā vibho
2.5.32
tadgārhasthyaṃ viśeṣeṇa tathā līlāḥ parā api
etatsarvaṃ tathānyacca kathanīyaṃtvayānagha
2.5.33
tadutpattiṃ vivāhaṃ ca śivāyāstuviśeṣataḥ
prabrūhi pre prajānātha guhajanmatathaiva ca
2.5.34
bahubhyaśca śrutaṃ pūrvaṃ na tṛpto'smijagatprabho
atastvāṃśaraṇaṃ prāptaḥ kṛpāṃ kuru mamo pari
2.5.35
iti śrutvā vacastasya nāradasyāṃgajasya hi
uvāca vacanaṃ tatra brahmālokapitāmahaḥ
2.5.35.p1
iti śrīśivamahāpurāṇe dvitīyāyāṃ rudrasaṃhitāyāṃ prathamakhaṃḍe sṛṣṭyupākhyāne nāradapraśnavarṇano nāma pañcamo'dhyāyaḥ