Pramāṇa · Search · About · API

Shiva Purana 2.8

Śivapurāṇa (complete text) 2.8

Language
Sanskrit

Contents

2.8.1

brahmovāca
evaṃ tayormuniśreṣṭha darśanaṃ kāṃkṣamāṇayoḥ
vigarvayośca surayoḥ sadā nau sthitayormune

2.8.2

dayālu rabhavacchaṃbhurdīnānāṃ pratipālakaḥ
garviṇāṃ garvahartā ca sarveṣāṃ prabhuravyayaḥ

2.8.3

tadā samabhavattatra nādo vai śabdalakṣaṇaḥ
omomiti suraśreṣṭhātsuvyaktaḥ plutalakṣaṇaḥ

2.8.4

kimidaṃ tviti saṃciṃtya mayā tiṣṭhanmahāsvanaḥ
viṣṇussarvasurārādhyo nirvairastuṣṭacetasā

2.8.5

liṃgasya dakṣiṇe bhāge tathāpaśyatsanātanam
ādyaṃ varṇamakārākhyamukāraṃ cottaraṃ tataḥ

2.8.6

makāraṃ madhyataścaiva nādamaṃte'sya comiti
sūryamaṃḍalavaddṛṣṭvā varṇamādyaṃ tu dakṣiṇe

2.8.7

uttare pāvakaprakhyamukāramṛṣi sattama
śītāṃśumaṇḍalaprakhyaṃ makāraṃ tasya madhyataḥ

2.8.8

tasyopari tadā'paśyacchuddhasphaṭikasuprabham
turīyātītamamalaṃ niṣkalaṃ nirupadravam

2.8.9

nirdvaṃdvaṃ kevalaṃ śūnyaṃ bāhyābhyaṃtaravarjitam
sa bāhyabhyaṃtare caiva bāhyābhyaṃtarasaṃsthitam

2.8.10

ādimadhyāṃtarahitamānaṃdasyāpikāraṇam
satyamānandamamṛtaṃ paraṃ brahma parāyaṇam

2.8.11

kuta evātra saṃbhūtaḥ parīkṣāvo'gnisaṃbhavam
adhogamiṣyāmyanalastaṃbhasyānupamasya ca

2.8.12

vedaśabdobhayāveśaṃ viśvātmānaṃ vyaciṃtayat
tadā'bhavadṛṣistatra ṛṣessāratamaṃ smṛtam

2.8.13

tenaiva ṛṣiṇā viṣṇurjñātavānparameśvaram
mahādevaṃ paraṃ brahma śabdabrahmatanuṃ param

2.8.14

ciṃtayā rahito rudro vāco yanmanasā saha
aprāpya tannivartaṃte vācyastvekākṣareṇa saḥ

2.8.15

ekākṣareṇa tadvākyamṛtaṃ paramakāraṇam
satyamānandamamṛtaṃ paraṃ brahma parātparam

2.8.16

ekākṣarādakārākhyādbhagavānbījakoṇḍajaḥ
ekākṣarādukārākhyāddhariḥ paramakāraṇam

2.8.17

ekākṣarānmakārākhyādbhagavānnīlalohitaḥ
sargakartā tvakārākhyo hyukārākhyastu mohakaḥ

2.8.18

makārākhyastu yo nityamanugrahakaro'bhavat
makārākhyo vibhurbījī hyakāro bīja ucyate

2.8.19

ukārākhyo hariryoniḥ pradhānapuruṣeśvaraḥ
bījī ca bījaṃ tadyonirnādākhyaśca maheśvaraḥ

2.8.20

bījī vibhajya cātmānaṃ svecchayā tu vyavasthitaḥ
asya liṃgādabhūdbījamakāro bījinaḥ prabhoḥ

2.8.21

ukārayonau niḥkṣiptamavarddhata samaṃ tataḥ
sauvarṇamabhavaccāṃḍamāvedyaṃ tadalakṣaṇam

2.8.22

anekābdaṃ tathā cāpsu divyamaṃḍaṃ vyavasthitam
tato varṣasahasrāṃte dvidhākṛtamajodbhavam

2.8.23

aṃḍamapsu sthitaṃ sākṣādvyāghāteneśvareṇa tu
tathāsyasuśubhaṃ himaṃ kapālaṃ corddhvasaṃsthitam

2.8.24

jajñe sā dyaustadaparaṃ pṛthivī paṃcalakṣaṇā
tasmādaṃḍādbhavo jajñe kakārākhyaścaturmukhaḥ

2.8.25

a sraṣṭā sarvalokānāṃ sa eva trividhaḥ prabhuḥ
evamomomiti proktamityāhuryajuṣāṃ varāḥ

2.8.26

yajuṣāṃ vacanaṃ śrutvā ṛcaḥ samāni sādaram
evameva hare brahmannityāhuścāvayostadā

2.8.27

tato vijñāya deveśaṃ yathāvacchaktisaṃbhavaiḥ
maṃtraṃ maheśvaraṃ devaṃ tuṣṭāva sumahodayam

2.8.28

etasminnaṃtare'nyacca rūpamadbhutasundaram
dadarśa ca mayā sārddhaṃ bhagavānviśvapālakaḥ

2.8.29

paṃcavaktraṃ daśabhujaṃgaurakarpūravanmune
nānākāṃti samāyuktaṃ nānābhūṣaṇabhūṣitam

2.8.30

mahodāraṃ mahāvīryaṃ mahāpuruṣalaṇam
taṃ dṛṣṭvā paramaṃ rūpaṃ kṛtārtho'bhūnmayā hariḥ

2.8.31

atha prasanno bhagavānmaheśaḥ parameśvaraḥ
divyaṃ śabdamayaṃ rūpamākhyāya prahasansthitaḥ

2.8.32

akārastasya mūrddhā hi lalāṭo dīrgha ucyate
ikāro dakṣiṇaṃ netramīkāro vāmalocanam

2.8.33

ukāro dakṣiṇaṃ śrotramūkāro vāma ucyate
ṛkāro dakṣiṇaṃ tasya kapolaṃ parameṣṭhinaḥ

2.8.34

vāmaṃ kapolamūkāro lṛ lṝ nāsāpuṭe ubhe
ekāraścoṣṭha ūrddhvaśca hyaikārastvadharo vibhoḥ

2.8.35

okāraśca tathaukāro dantapaṃktidvayaṃ kramāt
amastu tālunī tasya devadevasya śūlinaḥ

2.8.36

kādipaṃcākṣarāṇyasya pañca hastāśca dakṣiṇe
cādipaṃcākṣarāṇyevaṃ paṃca hastāstu vāmataḥ

2.8.37

ṭādipaṃcākṣaraṃ pādāstādipaṃcākṣaraṃ tathā
pakāra udaraṃ tasya phakāraḥ pārśva ucyate

2.8.38

bakāro vāmapārśvastu bhakāraḥ skaṃdha ucyate
makāro hṛdayaṃ śaṃbhormahādevasya yoginaḥ

2.8.39

yakārādisakārāntā vibhorvai saptadhātavaḥ
hakāro nābhirūpo hi kṣakāro ghrāṇa ucyate

2.8.40

evaṃ śabdamayaṃ rūpamaguṇasya guṇātmanaḥ
dṛṣṭvā tamumayā sārddhaṃ kṛtārtho'bhūnmayā hariḥ

2.8.41

evaṃ dṛṣṭvā maheśānaṃ śabdabrahama tanuṃ śivam
praṇamya ca mayā viṣṇuḥ punaścāpaśyadūrddhvataḥ

2.8.42

—kāraprabhavaṃ maṃtraṃ kalāpaṃcakasaṃyutam
śuddhasphaṭikasaṃkāśaṃ śubhāṣṭatriṃśadakṣaram

2.8.43

medhākāramabhūdbhūyassarvadharmārthasādhakam
gāyatrīprabhavaṃ maṃtraṃ sahitaṃ vaśyakārakam

2.8.44

caturviṃśativarṇāḍhyaṃ catuṣkālamanuttamam
atha paṃcasitaṃ maṃtraṃ kalāṣṭakasamāyutam

2.8.45

ābhicārikamatyarthaṃ prāyastriṃśacchubhākṣaram
yajurvedasamāyuktaṃ pañcaviṃśacchubhākṣaram

2.8.46

kalāṣṭakasamā yuktaṃ suśvetaṃ śāṃtikaṃ tathā
trayodaśakalāyuktaṃ bālādyaissaha lehitam

2.8.47

babhūvurasya cotpattivṛddhisaṃhārakāraṇam
varṇā ekādhikāḥ ṣaṣṭirasya maṃtravarasya tu

2.8.48

punarmṛtyuṃjayaṃ mantraṃ pañcākṣaramataḥ param
ciṃtāmaṇiṃ tathā maṃtraṃ dakṣiṇāmūrti saṃjñakam

2.8.49

tatastattvamasītyuktaṃ mahāvākyaṃ harasya ca
pañcamaṃtrāṃstathā labdhvā jajāpa bhagavānhariḥ

2.8.50

atha dṛṣṭvā kalāvarṇamṛgyajussāmarūpiṇam
īśānamīśamukuṭaṃ puruṣākhyaṃ purātanam

2.8.51

aghorahṛdayaṃ hṛdyaṃ sarvaguhyaṃ sadāśivam
vāmapādaṃ mahādevaṃ mahābhogīndrabhūṣaṇam

2.8.52

viśvataḥ pādavantaṃ taṃ viśvatokṣikaraṃ śivam
brahmaṇo'dhipati sargasthitisaṃhārakāraṇam

2.8.53

tuṣṭāva vāgbhiriṣṭābhissāmbaṃ varadamīśvaram
mayā ca sahito viṣṇurbhagavāṃstuṣṭacetasā

2.8.53.p1

iti śrīśivamahāpurāṇe dvitīyāyāṃ rudrasaṃhitāyāṃ prathamakhaṇḍe sṛṣṭyupākhyāne śabdabrahmatanuvarṇano nāmāṣṭamo'dhyāyaḥ

Linked texts (1)