Pramāṇa · Search · About · API

Shivapurana 9.11-3

Śivapurāṇa (complete text) 9.11-3

Language
Sanskrit

Contents

9.11-3.1

vāyuruvāca
sargaṃ ciṃtayatastasya tadā vai buddhipūrvakam
pradhyānakāle mohastu prādurbhūtastamomayaḥ

9.11-3.2

tamomoho mahāmohastāmisraścāndhasaṃjñitaḥ
avidyā pañcamī caiṣā prādurbhūtā mahātmanaḥ

9.11-3.3

paṃcadhā'vasthitaḥ sargo dhyāyatastvabhimāninaḥ
sarvvatastamasātīva bījakumbhavadāvṛtaḥ

9.11-3.4

bahirantaścāprakāśaḥ stabdho niḥsaṃjña eva ca
tasmātteṣāṃ vṛtā buddhirmukhāni karaṇāni ca

9.11-3.5

tasmātte saṃvṛtātmāno nagā mukhyāḥ prakīrtitāḥ
taṃ dṛṣṭvā'sādhakaṃ brahmā prathamaṃ sargamīdṛśam

9.11-3.6

aprasannamanā bhūtvā dvitīyaṃ so'bhyamanyata
tasyābhidhāyataḥ sargaṃ tiryyaksroto'bhyavarttata

9.11-3.7

antaḥprakāśāstiryyaṃca āvṛtāśca bahiḥ punaḥ
paścātmānastato jātā utpathagrāhiṇaśca te

9.11-3.8

tamapyasādhakaṃ jñātvā sargamanyamamanyata
tadorddhvasrotaso vṛtto devasargastu sāttvikaḥ

9.11-3.9

te sukhaprītibahulā bahirantaśca nāvṛtāḥ
prakāśā bahirantaścasvabhāvādeva saṃjñitāḥ

9.11-3.10

tato'bhidhyāyatovyaktādarvvāksrotastu sādhakaḥ
manuṣyanāmā sañjātaḥ sargo duḥkhasamutkaṭaḥ

9.11-3.11

prakāśābahirantaste tamodriktā rajo'dhikāḥ
paṃcamonugrahaḥ sargaścaturdhā saṃvyavasthitaḥ

9.11-3.12

viparyyayeṇa śaktyā ca tuṣṭyāsiddhyā tathaiva ca
te'parigrāhiṇaḥ sarvve saṃvibhāgaratāḥ punaḥ

9.11-3.13

khādanāścāpyaśīlāśca bhūtādyāḥ parikīrttitāḥ
prathamo mahataḥ sargo brahmaṇaḥ parameṣṭhinaḥ

9.11-3.14

tanmātrāṇāṃ dvitīyastu bhūtasargaḥ sa ucyate
vaikārikastṛtīyastu sarga aindriyakaḥ smṛtaḥ

9.11-3.15

ityeṣa prakṛteḥ sargaḥ sambhṛto'buddhipūrvakaḥ
mukhyasargaścaturthastu mukhyā vai sthāvarāḥ smṛtāḥ

9.11-3.16

tiryyaksrotastu yaḥ proktastiryagyoniḥ sa pacamaḥ
tadūrddhvasrotasaḥ ṣaṣṭho devasargastu sa smṛtaḥ

9.11-3.17

tato'rvāk srotasāṃ sargaḥ saptamaḥ sa tu mānuṣaḥ
aṣṭamo'nugrahaḥ sargaḥ kaumāro navamaḥ smṛtaḥ

9.11-3.18

prākṛtāśca trayaḥ pūrvve sargāste'buddhipūrvakāḥ
buddhipūrvvaṃ pravarttante mukhyādyāḥ pañca vaikṛtāḥ

9.11-3.19

agre sasarjja vai brahmā mānasānātmanaḥ samān
sanandaṃ sanakañcaiva vidvāṃsañca sanātanam

9.11-3.20

ṛbhuṃ sanatkumārañca pūrvvameva prajāpatiḥ
sarvve te yogino jñeyā vītarāgā vimatsarāḥ

9.11-3.21

iśvarāsaktamanaso na cakruḥ sṛṣṭaye matim
teṣu sṛṣṭyanapekṣeṣu gateṣu sanakādiṣu

9.11-3.22

sraṣṭukāmaḥ punarbrahmā tatāpa paramaṃ tapaḥ
tasyaivaṃ tapyamānasya na kiṃcitsamavarttata

9.11-3.23

tato dīrgheṇa kālena duḥkhātkrodho vyajāyata
krodhāviṣṭasya netrābhyāṃ prāpatannaśrubindavaḥ

9.11-3.24

tatastebhyo'śrubindubhyo bhūtāḥ pretāstadābhavan
sarvāṃstānaśrujāndṛṣṭvā brahmātmānamaniṃdata

9.11-3.25

tasya tīvrā'bhavanmūrcchā krodhāmarṣasamudbhavā
mūrcchitastu jahau prāṇānkrodhāviṣṭaḥ prajāpatiḥ

9.11-3.26

tataḥ prāṇeśvaro rudro bhagavānnīlalohitaḥ
prasādamatulaṃ karttuṃ prādurāsītprabhormukhāt

9.11-3.27

daśadhā caikadhā cakre svātmānaṃ prabhurīśvaraḥ
te tenoktā mahātmāno daśadhā caikadhā kṛtāḥ

9.11-3.28

yūyaṃ sṛṣṭā mayā vatsā lokānugrahakāraṇāt
tasmātsarvvasya lokasya sthāpanāya hitāya ca

9.11-3.29

prajāsantānahetośca prayatadhvamatandritāḥ
evamuktāśca rurudurdudruvuśca samantataḥ

9.11-3.30

rodanāddrāvaṇāccaiva te rudrā nāmataḥ smṛtāḥ
ye rudrāste khalu prāṇā ye prāṇāste mahātmakāḥ

9.11-3.31

tato mṛtasya devasya brahmaṇaḥ parameṣṭhinaḥ
ghṛṇī dadau punaḥ prāṇānbrahmaputro maheśvaraḥ

9.11-3.32

prahṛṣṭavadano rudraḥ prāṇapratyāgamādvibhoḥ
abhyabhāṣata viśveśo brahmāṇaṃ paramaṃ vacaḥ

9.11-3.33

mābhairmābhairmahābhāga viriṃca jagatāṃ guro
mayā te prāṇitāḥ prāṇāḥ sukhamuttiṣṭha suvrata

9.11-3.34

svapnānubhūtamiva tacchrutvā vākyaṃ manoharam
haraṃ nirīkṣya śanakairnetraiḥ phullāmbujaprabhaiḥ

9.11-3.35

tathā pratyāgataprāṇaḥ snigdhagambhīrayā girā
uvāca vacanaṃ brahmā tamuddiśya kṛtāñjaliḥ

9.11-3.36

tvaṃ hi darśanamātreṇa cānandayasi me manaḥ
ko bhavān viśvamūrtyā vā sthita ekādaśātmakaḥ

9.11-3.37

tasya tadvacanaṃ śrutvā vyājahāra maheśvaraḥ
spṛśan kārābhyāṃ brahmāṇaṃ susukhābhyāṃ sureśvaraḥ

9.11-3.38

māṃ viddhi paramātmānaṃ tava putratvamāgatam
ete caikādaśa rudrāstvāṃ surakṣitumāgatāḥ

9.11-3.39

tasmāttīvrāmimāmmūrcchāṃ vidhūya madanugrahāt
prabuddhasva yathāpūrvaṃ prajā vai sraṣṭumarhasi

9.11-3.40

evaṃ bhagavatā prokto brahmā prītamanā hyabhūt
nānāṣṭakena viśvātmā tuṣṭāva parameśvaram

9.11-3.40.p1

brahmovāca

9.11-3.40.p2

namaste bhagavan rudra bhāskarāmitatejase

9.11-3.41

namo bhavāya devāya rasāyāmbumayātmane
śarvāya kṣitirūpāya nandīsurabhaye namaḥ

9.11-3.42

īśāya vasave tubhyaṃ namassparśamayātmane
paśūnāṃ pataye caiva pāvakāyātitejase
bhīmāya vyomarūpāya śabdamātrāya te namaḥ

9.11-3.43

ugrāyograsvarūpāya yajamānātmane namaḥ
mahādevāya somāya namostvamṛtamūrtaye

9.11-3.44

evaṃ stutvā mahādevaṃ brahmā lokapitāmahaḥ
prārthayāmāsa viśveśaṃ girā praṇatipūrvayā

9.11-3.45

bhagavan bhūtabhavyeśa mama putra maheśvara
sṛṣṭihetostvamutpanno mamāṃge'naṃganāśanaḥ

9.11-3.46

tasmānmahati kāryesmin vyāpṛtasya jagatprabho
sahāyaṃ kuru sarvatra sraṣṭumarhasi sa prajāḥ

9.11-3.47

tenaiṣāṃ pāvito devo rudrastripuramardanaḥ
bāḍhamityeva tāṃ vāṇīṃ pratijagrāha śaṃkaraḥ

9.11-3.48

tatassa bhagavān brahmā hṛṣṭaṃ tamabhinaṃdya ca
sraṣṭuṃ tenābhyanujñātastathānyāścāsṛjatprajāḥ

9.11-3.49

marīcibhṛgvaṃgirasaḥ pulastyaṃ pulahaṃ kratum
dakṣamatriṃ vasiṣṭhaṃ ca so'sṛjanmanasaiva ca
purastādasṛjadbrahmā dharmaṃ saṃkalpameva ca

9.11-3.50

ityete brahmaṇaḥ putrā dvādaśādau prakīrtitāḥ
saha rudreṇa saṃbhūtāḥ purāṇā gṛhamedhinaḥ

9.11-3.51

teṣāṃ dvādaśa vaṃśāḥ syurdivyā devagaṇānvitāḥ
prajāvantaḥ kriyāvanto maharṣibhiralaṃkṛtāḥ

9.11-3.52

atha devāsurapitṛ-n manuṣyāṃśca catuṣṭayam
saha rudreṇa sisṛkṣuraṃbhasyetāni vai vidhiḥ

9.11-3.53

sa sṛṣṭyarthaṃ samādhāya brahmātmānamayūyujat
mukhādajanayaddevān pitṛ-ścaivopapakṣataḥ

9.11-3.54

jaghanādasurān sarvān prajanādapi mānuṣān
avaskare kṣudhāviṣṭā rākṣasāstasya jajñire

9.11-3.55

putrāstamorajaḥprāyā balinaste niśācarāḥ
sarpā yakṣāstathā bhūtā gaṃdharvāḥ saṃprajajñire

9.11-3.56

vayāṃsi pakṣataḥ sṛṣṭāḥ pakṣiṇo vakṣaso'sṛjat
mukhatojāṃstathā pārśvāduragāṃśca vinirmame

Linked texts (5)