Pramāṇa · Search · About · API

Shiva Purana 9.16: Devīśaktyudbhavaḥ

Śivapurāṇa (complete text) 9.16

Language
Sanskrit

Contents

Devīśaktyudbhavaḥ

9.16.1

vāyuruvāca
atha devo mahādevo mahājaladanādayā
vācā madhuragaṃbhīraśivadaślakṣṇavarṇayā

9.16.2

arthasaṃpannapadayā rājalakṣaṇayuktayā
aśeṣaviṣayāraṃbharakṣāvimaladakṣayā

9.16.3

manoharatarodāramadhurasmitapūrvayā
saṃbabhāṣe susaṃpīto viśvakarmāṇamīśvaraḥ

9.16.4

īśvara uvāca
vatsa vatsa mahābhāga mama putra pitāmaha
jñātameva mayā sarvaṃ tava vākyasya gauravam

9.16.5

prajānāmeva bṛddhyarthaṃ tapastaptaṃ tvayādhunā
tapasā'nena tuṣṭosmi dadāmi ca tavepsitam

9.16.6

ityuktvā paramodāraṃ svabhāvamadhuraṃ vacaḥ
sasarja vapuṣo bhāgāddevīṃ devavaro haraḥ

9.16.7

yāmāhurbrahmavidvāṃso devīṃ divyaguṇānvitām
parasya paramāṃ śaktiṃ bhavasya paramātmanaḥ

9.16.8

yasyāṃ na khalu vidyaṃte janma mṛtyujarādayaḥ
yā bhavānī bhavasyāṃgātsamāvirabhavatkila

9.16.9

yasyā vāco nivartante manasā ceṃdriyaiḥ saha
sā bharturvapuṣo bhāgājjāteva samadṛśyata

9.16.10

yā sā jagadidaṃ kṛtsnaṃ mahimnā vyāpya tiṣṭhati
śarīriṇīva sa devī vicitraṃ samalakṣyata

9.16.11

sarvaṃ jagadidaṃ caiṣā saṃmohayati māyayā
īśvarātsaiva jātābhūdajātā paramārthataḥ

9.16.12

na yasyā paramo bhāvaḥ surāṇāmapi gocaraḥ
viśvāmareśvarī caiva vibhaktā bharturaṃgataḥ

9.16.13

tāṃ dṛṣṭvā parameśānīṃ sarvalokamaheśvarīm
sarvajñāṃ sarvagāṃ sūkṣmāṃ sadasadvyaktivarjitām

9.16.14

paramāṃ nikhilaṃ bhāsā bhāsayantīmidaṃ jagat
praṇipatya mahādevīṃ prārthayāmāsa vai virāṭ

9.16.15

brahmovāca
devi devena sṛṣṭo'hamādau sarvajaganmayi
prajāsarge niyuktaśca sṛjāmi sakalaṃ jagat

9.16.16

manasā nirmitāḥ sarve devi devādayo mayā
na vṛddhimupagacchanti sṛjyamānāḥ punaḥ punaḥ

9.16.17

mithunaprabhavāmeva kṛtvā sṛṣṭimataḥ param
saṃvardhayitumicchāmi sarvā eva mama prajāḥ

9.16.18

na nirgataṃ purā tvatto nārīṇāṃ kulamavyayam
tena nārīkulaṃ sraṣṭuṃ śaktirmama na vidyate

9.16.19

sarvāsāmeva śaktīnāṃ tvattaḥ khalu samudbhavaḥ
tasmātsarvatra sarveṣāṃ sarvaśaktipradāyinīm

9.16.20

tvāmeva varadāṃ māyāṃ prārthayāmi sureśvarīm
carācaravivṛddhyarthamaṃśenaikena sarvage

9.16.21

dakṣasya mama putrasya putrī bhava bhavārdini
evaṃ sā yācitā devī brahmaṇā brahmayoninā

9.16.22

śaktimekāṃ bhruvormadhyātsasarjātmasamaprabhām
tāmāha prahasanprekṣya devadevavaro haraḥ

9.16.23

brahmāṇaṃ tapasārādhya kuru tasya yathepsitam
tāmājñāṃ parameśasya śirasā pratigṛhya sā

9.16.24

brahmaṇo vacanāddevī dakṣasya duhitābhavat
dattvaivamatulāṃ śaktiṃ brahmaṇe brahmarūpiṇīm

9.16.25

viveśa dehaṃ devasya devaścāṃtaradhīyata
tadā prabhṛti loke'smin striyāṃ bhogaḥ pratiṣṭhitaḥ

9.16.26

prajāsṛṣṭiśca vipreṃdrā maithunena pravartate
brahmāpi prāpa sānandaṃ santoṣaṃ munipuṃgavāḥ

9.16.27

etadvassarvamākhyātaṃ devyāḥ śaktisamudbhavam
puṇyavṛddhikaraṃ śrāvyaṃ bhūtasargānupaṃgataḥ

9.16.28

ya idaṃ kīrtayennityaṃ devyāḥ śaktisamudbhavam
puṇyaṃ sarvamavāpnoti putrāṃśca labhate śubhān

9.16.28.p1

iti śrīśivamahāpurāṇe saptamyāṃ vāyavīyasaṃhitāyāṃ pūrvakhaṇḍe devīśaktyudbhavo nāma ṣoḍaśo'dhyāyaḥ