Shivapurana 9.16-3

Śivapurāṇa (complete text) 9.16-3

vāyuruvāca
evaṃ labdhvā parāṃ śaktimīśvarādeva śāśvatīm
maithunaprabhavāṃ sṛṣṭiṃ kartṛkāmaḥ prajāpatiḥ

svayamapyadbhuto nārī cārddhena puruṣo'bhavat
yārddhena nārī sā tasmācchatarūpā vyajāyata

virājamasṛjadbrahmā so'rddhana puruṣo'bhavat
sa vai svāyaṃbhuvaḥ pūrvaṃ puruṣo manurucyate

sā devī śatarūpā tu tapaḥ kṛtvā suduścaram
bharttāraṃ dīptayaśasaṃ manumevānvapadyata

tasmāttu śatarūpā sā putradvayamasūyata
priyavratottānapādau putrau putravatāṃ varau

kanye dve ca mahābhāge yābhyāṃ jātāstvimāḥ prajāḥ
ākūtirekā vijñeyā prasūtiraparā smṛtā

svāyaṃbhuvaḥ prasūtiṃ ca dadau dakṣāya tāṃ prabhuḥ
ruceḥ prajāpatiścaiva cākūtiṃ samapādayat

ākūtyāṃ mithunaṃ jajñe mānasasya ruceḥ śubham
yajñaśca dakṣiṇā caiva yābhyāṃ saṃvartitaṃ jagat

Linked texts (1)