Pramāṇa · Search · About · API

Shivapurana 9.18

Śivapurāṇa (complete text) 9.18

Language
Sanskrit

Contents

9.18.1

ṛṣaya ūcuḥ
devī dakṣasya tanayā tyaktvā dākṣāyaṇī tanum
kathaṃ himavataḥ putrī menāyāmabhavatpurā

9.18.2

kathaṃ ca nindito rudro dakṣeṇa ca mahātmanā
nimittamapi kiṃ tatra yena syānniṃdito bhavaḥ

9.18.3

utpannaśca kathaṃ dakṣo abhiśāpādbhavasya tu
cākṣuṣasyāṃtare pūrvaṃ manoḥ prabrūhi māruta

9.18.4

vāyuruvāva
śṛṇvaṃtu kathayiṣyāmi dakṣasya laghucetasaḥ
vṛttaṃ pāpātpramādācca viśvāmaravidūṣaṇam

9.18.5

purā surāsurāḥ sarve siddhāśca paramarṣayaḥ
kadāciddraṣṭumīśānaṃ himavacchikharaṃ yayuḥ

9.18.6

tadā devaśca devī ca divyāsanagatāvubhau
darśanaṃ dadatusteṣāṃ devādīnāṃ dvijottamāḥ

9.18.7

tadānīmeva dakṣo'pi gatastatra sahāmaraiḥ
jāmātaraṃ haraṃ draṣṭuṃ draṣṭuṃ cātmasutāṃ satīm

9.18.8

tadātmagauravāddevo devyā dakṣe samāgate
devādibhyo viśeṣeṇa na kadācidabhūtsmṛtiḥ

9.18.9

tasya tasyāḥ paraṃ bhāvamajñātuścāpi kevalam
putrītyevaṃ vimūḍhasya tasyāṃ vairamajāyata

9.18.10

tatastenaiva vaireṇa vidhinā ca pracoditaḥ
nājuvāha bhavaṃ dakṣo dīkṣitastāmapi dviṣan

9.18.11

anyān 1jāmātarassarvānāhūya sa yathākramam
śataśaḥ puṣkalāmarcāñcakāra ca pṛthakpṛthak

9.18.12

tathā tānsaṃgatāñchrutvā nāradasya mukhāttadā
yayau rudrāya rudrāṇī vijñāpya bhavanaṃ pituḥ

9.18.13

atha saṃnihitaṃ divyaṃ vimānaṃ viśvatomukham
lakṣaṇāḍhyaṃ sukhārohamatimātramanoharam

9.18.14

taptajāṃbūnadaprakhyaṃ citraratnapariṣkṛtam
muktāmayavitānāgnyaṃ sragdāmasamalaṃkṛtam

9.18.15

taptakaṃcananirvyūhaṃ ratnastaṃbhaśatāvṛtam
vajrakalpitasopānaṃ vidrumastaṃbhatoraṇam

9.18.16

puṣpapaṭṭaparistīrṇaṃ citraratnamahāsanam
vajrajālakiracchidramacchidramaṇikuṭṭimam

9.18.17

maṇidaṃḍamanojñena mahāvṛṣabhalakṣmaṇā
alaṃkṛtapurobhāgamabbhraśubbhreṇa ketunā

9.18.18

ratnakaṃcukaguptāṃgaiścitravetrakapāṇibhiḥ
adhiṣṭhitamahādvāramapradhṛṣyairguṇeśvaraiḥ

9.18.19

mṛdaṃgatālagītādiveṇuvīṇāviśāradaiḥ
vidagdhaveṣabhāṣaiśca bahubhiḥ strījanairvṛtam

9.18.20

āruroha mahādevī saha priyasakhījanaiḥ
cāmāravyañjanaṃ tasyā vajradaṃḍamanohare

9.18.21

gṛhītvā rudrakanye dve vivījaturubhe śubhe
tadācāmarayormadhye devyā vadanamābabhau

9.18.22

anyonyaṃ yudhyatormadhye haṃsayoriva paṃkajam
chatraṃ śaśinibhaṃ tasyāścūḍopari sumālinī

9.18.23

dhṛtamuktāparikṣiptaṃ babhāra premanirbharā
tacchatramujjvalaṃ devyā ruruce vadanopari

9.18.24

uparyamṛtabhāṃḍasya maṃḍalaṃ śaśino yathā
atha cāgre samāsīnā susmitāsyā śubhāvatī

9.18.25

akṣadyūtavinodena ramayāmāsa vai satīm
suyaśāḥ pāduke devyāśśubhe ratnapariṣkṛte

9.18.26

stanayoraṃtare kṛtvā tadā devīmasevataḥ
anyā kāṃcanacārvaṃgī dīptaṃ jagrāha darpaṇam

9.18.27

aparā tālavṛntaṃ ca parā tāṃbūlapeṭikām
kācitkrīḍāśukaṃ cāru kare'kuruta bhāminī

9.18.28

kācittu sumanojñāni puṣpāṇi surabhīṇi ca
kācidābharaṇādhāraṃ babhāra kamalekṣaṇā

9.18.29

kācicca punarālepaṃ suprasūtaṃ śubhāṃjanam
anyāśca sadṛśāstāstā yathāsvamucitakriyāḥ

9.18.30

āvṛttyā tāṃ mahādevīmasevaṃta samaṃtataḥ
atīva śuśubhe tāsāmaṃtare parameśvarī

9.18.31

tārāpariṣado madhye caṃdralekheva śāradī
tataḥ śaṃkhasamutthasya nādasya samanaṃtaram

9.18.32

prāsthāniko mahānādaḥ paṭahaḥ samatāḍyata
tato madhuravādyāni saha tālodyataissvanaiḥ

9.18.33

anāhatāni sanneduḥ kāhalānāṃ śatāni ca
sāyudhānāṃ gaṇeśānāṃ maheśasamatejasām

9.18.34

sahasrāṇi śatānyaṣṭau tadānīṃ purato yayuḥ
teṣāṃ madhye vṛṣārūḍho gajārūḍho yathā guruḥ

9.18.35

jagāma gaṇapaḥ śrīmān somanaṃdīśvarārcitaḥ
devaduṃdubhayo nedurdivi divyasukhā ghanāḥ

9.18.36

nanṛturmunayassarve mumuduḥ siddhayoginaḥ
sasṛjuḥ puṣpavṛṣṭiṃ ca vitānopari vāridāḥ

9.18.37

tadā devagaṇaiścānyaiḥ pathi sarvatra saṃgatā
kṣaṇādiva piturgehaṃ praviveśa maheśvarī

9.18.38

tāṃ dṛṣṭvā kupito dakṣaścātmanaḥ kṣayakāraṇāt
tasyā yavīyasībhyo'pi cakre pūjāma satkṛtām

9.18.39

tadā śaśimukhī devī pitaraṃ sadasi sthitam
aṃbikā yuktamavyagramuvācākṛpaṇaṃ vacaḥ

9.18.40

devyuvāca
brahmādayaḥ piśācāṃtā yasyājñāvaśavartinaḥ
sa devassāṃprataṃ tāta vidhinā nārcitaḥ kila

9.18.41

tadāstāṃ mama jyāyasyāḥ putryāḥ pūjāṃ kimīdṛśīm
asatkṛtāmavajñāya kṛtavānasi garhitam

9.18.42

evamukto'bravīdenāṃ dakṣaḥ krodhādamarṣitaḥ
tvattaḥ śreṣṭhā viśiṣṭāśca pūjyā bālāḥ sutā mama

9.18.43

tāsāṃ tu ye ca bharttāraste me bahumatā mudā
gunaiścāpyadhikāssarvairbhartuste tryaṃbakādapi

9.18.44

stabdhātmā tāmasaśśarvastvamimaṃ samupāśritā
tena tvāmavamanye'haṃ pratikūlo hi me bhavaḥ

9.18.45

tathoktā pitaraṃ dakṣaṃ kruddhā devī tamabravīt
śṛṇvatāmeva sarveṣāṃ ye yajñasadasi sthitāḥ

9.18.46

akasmānmama bhartāramajātāśeṣadūṣaṇam
vācā dūṣayase dakṣa sākṣāllokamaheśvaram

9.18.47

vidyācauro gurudrohī vedeśvaravidūṣakaḥ
ta ete bahupāpmānassarve daṃḍyā iti śrutiḥ

9.18.48

tasmādatyutkaṭasyāsya pāpasya sadṛśo bhṛśam
sahasā dāruṇo daṃḍastava daivādbhaviṣyati

9.18.49

tvayā na pūjito yasmāddevadevastriyaṃbakaḥ
tasmāttava kulaṃ duṣṭaṃ naṣṭamityavadhāraya

9.18.50

ityuktvā pitaraṃ ruṣṭā satī saṃtyaktasādhvasā
tadīyāṃ ca tanuṃ tyaktvā himavaṃtaṃ yayau girim

9.18.51

sa parvataparaḥ śrīmām̐llabdhapuṇyaphalodayaḥ
tadarthameva kṛtavān suciraṃ duścaraṃ tapaḥ

9.18.52

tasmāttamanugṛhṇāti bhūdhareśvaramīśvarī
svecchayā pitaraṃ cakre svātmano yogamāyayā

9.18.53

yadā gatā satī dakṣaṃ viniṃdya bhayavihvalā
tadā tirohitā maṃtrā vihataśca tato'dhvaraḥ

9.18.54

tadupaśrutya gamanaṃ devyāstripurumardanaḥ
dakṣāya ca ṛṣibhyaśca cukopa ca śaśāpa tān

9.18.55

yasmādavamatā dakṣamatkṛte'nāgasā satī
pūjitāścetarāḥ sarvāḥ svasutā bhartṛbhiḥ saha

9.18.56

vaivasvate'tare tasmāttava jāmātarastvamī
utpatsyaṃte samaṃ sarve brahmayajñeṣvayonijāḥ

9.18.57

bhavitā mānuṣo rājā cākṣuṣasya tvamanvaye
prācīnabarhiṣaḥ pautraḥ putraścāpi pracetasaḥ

9.18.58

ahaṃ tatrāpi te vighnamācariṣyāmi durmate
dharmārthakāmayukteṣu karmasvapi punaḥ punaḥ

9.18.59

tenaivaṃ vyāhṛto dakṣo rudreṇāmitatejasā
svāyaṃbhuvīṃ tanuṃ tyaktvā papāta bhuvi duḥkhitaḥ

9.18.60

tataḥ prācetaso dakṣo jajñe vai cākṣuṣe'ntare
prācīnabarhiṣaḥ pautraḥ putraścaiva pracetasām

9.18.61

bhṛgvādayo'pi jātā vai manorvaivasvatasya tu
aṃtare brahmaṇo yajñe vāruṇīṃ bibhratastanum

9.18.62

tadā dakṣasya dharmārthaṃ yajñe tasya durātmanaḥ
maheśaḥ kṛtavānvighnaṃ manā vavasvate sati

9.18.62.p1

iti śrīśivamahāpurāṇe saptamyāṃ vāyavīyasaṃhitāyāṃ pūrvakhaṇḍe satīdehatyāgo nāmāṣṭādaśo'dhyāyaḥ

Linked texts (2)