Pramāṇa · Search · About · API

Shivapurana 9.19

Śivapurāṇa (complete text) 9.19

Language
Sanskrit

Contents

9.19.1

ṛṣaya ūcuḥ
kathaṃ dakṣasya dharmārthaṃ pravṛttasya durātmanaḥ
maheśaḥ kṛtavān vighnametadicchāma veditum

9.19.2

vāyuruvāca
viśvasya jagato māturapi devyāstapobalāt
pitṛbhāvamupāgamya mudite himavadgirau

9.19.3

deve'pi tatkṛtodvāhe himavacchikharālaye
saṃkīḍati tayā sārddhaṃ kāle bahutare gate

9.19.4

vaivasvate'tare prāpte dakṣaḥ prācetasaḥ svayam
aśvamedhena yajñena yakṣyamāṇo'nvapadyata

9.19.5

tato himavataḥ pṛṣṭhe dakṣo vai yajñamāharat
gaṃgādvāre śubhe deśe ṛṣisiddhaniṣevite

9.19.6

tasya tasminmakhedevāḥ sarve śakra purogamāḥ
gamanāya samāgamya buddhimāpedire tadā

9.19.7

ādityā vasavo rudrāssādhyāssaha marudgaṇaiḥ
ūṣmapāḥ somapāścaiva ājyapā dhūmapāstathā

9.19.8

aśvinau pitaraścaiva tathā cānye maharṣayaḥ
viṣṇunā sahitāḥ sarve svāgatā yajñabhāginaḥ

9.19.9

dṛṣṭvā devakulaṃ sarvamīśvareṇa vināgatam
dadhīco manyunāviṣṭo dakṣamevamabhāṣata

9.19.10

dadhīca uvāca
aprapūjye caiva pūjā pūjyānāṃ cāpya pūjane
naraḥ pāpamavāpnoti mahadvai nātra saṃśayaḥ

9.19.11

asatāṃ saṃmatiryatra satāmavamatistathā
daṃḍo devakṛtastatra sadyaḥ patati dāruṇaḥ

9.19.12

evamuktvā tu viprarṣiḥ punardakṣamabhāṣata
pūjyaṃ tu paśubhartāraṃ kasmānnārcayase prabhum

9.19.13

dakṣa uvāca
saṃti me bahavo rudrāḥ śūlahastāḥ kapardinaḥ
ekādaśāvasthitā ye nānyaṃ vedmi maheśvaram

9.19.14

dadhīca uvāca
kimebhiramarairanyaiḥ pūjitairadhvare phalam
rājā cedadhvarasyāsya na rudraḥ pūjyate tvayā

9.19.15

brahmaviṣṇumaheśānāṃ sraṣṭā yaḥ prabhuravyayaḥ
brahmādayaḥ piśācāṃtā yasya kaiṃkaryavādinaḥ

9.19.16

prakṛtīnāṃ paraścaiva puruṣasya ca yaḥ paraḥ
ciṃtyate yogavidvadbhi ṛṣibhistattvadarśibhiḥ

9.19.17

akṣaraṃ paramaṃ brahma hyasacca sadasacca yat
anādimadhyanidhanamapratarkyaṃ sanātanam

9.19.18

yaḥ sraṣṭā caiva saṃhartā bhartā caiva maheśvaraḥ
tasmādanyaṃ na paśyāmi śaṃkarātmānamadhvare

9.19.19

dakṣa uvāca
etanmakheśasya suvarṇapātre haviḥ samastaṃ vidhimaṃtrapūtam
viṣṇornayāmyapratimasya bhāgaṃ prabhorvibhajyāvahanīyamadya

9.19.20

dadhīca uvāca
yasmānnārādhito rudrassarvadeveśvareśvaraḥ
tasmāddakṣa tavāśeṣo yajño'yaṃ na bhaviṣyati

9.19.21

ityuktvā vacanaṃ kruddho dadhīco munisattamaḥ
nirgamya ca tato deśājjagāma svakamāśramam

9.19.22

nirgate'pi munau tasmindevā dakṣaṃ na tatyajuḥ
avaśyamanubhāvitvādanarthasya tu bhāvinaḥ

9.19.23

etasminneva kāle tu jñātvaitatsarvamīśvarāt
dagdhuṃ dakṣādhvaraṃ viprā devī devamacodayat

9.19.24

devyā saṃcodito devo dakṣādhvarajighāṃsayā
sasarja sahasā vīraṃ vīrabhadraṃ gaṇeśvaram

9.19.25

sahasravadanaṃ devaṃ sahasrakamalekṣaṇam
sahasramudgaradharaṃ sahasraśarapāṇikam

9.19.26

śūlaṭaṃkagadāhastaṃ dīptakārmukadhāriṇam
cakravajradharaṃ ghoraṃ caṃdrārddhakṛtaśekharam

9.19.27

kuliśodyotitakaraṃ taḍijjvalitamūrddhajam
daṃṣṭrākarālaṃ bibhrāṇaṃ mahāvaktraṃ mahodaram

9.19.28

vidyujjihve pralaṃboṣṭhaṃ meghasāgaraniḥsvanam
vasānaṃ carma vaiyāghraṃ mahadrudhiranisravam

9.19.29

gaṇḍadvitayasaṃsṛṣṭamaṇḍalīkṛtakuṇḍalam
varāmaraśiromālāvalīkalitaśekharam

9.19.30

raṇannūpurakeyūramahākanakabhūṣitam
ratnasaṃcayasaṃdīptaṃ tārahārāvṛtorasam

9.19.31

mahāśarabhaśārdūlasiṃhaiḥ sadṛśavikramam
praśastamattamātaṃgasamānagamanālasam

9.19.32

śaṃkhacāmarakuṃdendumṛṇālasadṛśaprabham
satuṣāramivādrīndraṃ sākṣājjaṃgamatāṃ gatam

9.19.33

jvālāmālāparikṣiptaṃ dīptamauktikabhūṣaṇam
tejasā caiva dīvyaṃtaṃ yugāṃta iva pāvakam

9.19.34

sa jānubhyāṃ mahīṃ gatvā praṇataḥ prāṃjalistataḥ
pārśvato devadevasya paryyatiṣṭhadgaṇeśvaraḥ

9.19.35

manyunā cāsṛjadbhadrāṃ bhadrakālīṃ maheśvarīm
ātmanaḥ karmasākṣitve tena gaṃtuṃ sahaiva tu

9.19.36

taṃ dṛṣṭvāvasthitaṃ vīrabhadraṃ kālāgnisannibham
bhadrayā sahitaṃ prāha bhadramastviti śaṃkaraḥ

9.19.37

sa ca vijñāpayāmāsa saha devyā maheśvaram
ājñāpaya mahādeva kiṃ kāryaṃ karavāṇyaham

9.19.38

tatastripurahā prāha haimavatyāḥ priyecchayā
vīrabhadraṃ mahābāhuṃ vācā vipulanādayā

9.19.39

devadeva uvāca
prācetasasya dakṣasya yajñaṃ sadyo vināśaya
bhadrakālyā sahāsi tvametatkṛtyaṃ gaṇeśvara

9.19.40

ahamapyanayā sārddhaṃ raibhyāśramasapīpataḥ
sthitvā vīkṣe gaṇeśāna vikramaṃ tava duḥsaham

9.19.41

vṛkṣā kanakhale ye tu gaṃgādvārasamīpagāḥ
suvarṇaśṛṃgasya girermerumaṃdarasaṃnibhāḥ

9.19.42

tasminpradeśe dakṣasya yujñaḥ saṃprati vartate
sahasā tasya yajñasya vighātaṃ kuru mā ciram

9.19.43

ityukte sati devena devī himagirīndrajā
bhadraṃ bhadraṃ ca saṃprekṣya vatsaṃ dhenurivaurasam

9.19.44

āliṃgya ca samāghrāya mūrdhni ṣaḍvadanaṃ yathā
sasmitā vacanaṃ prāha madhuraṃ madhuraṃ svayam

9.19.45

devyuvāca
vatsa bhadra mahābhāga mahābalaparākrama
matpriyārthaṃ tvamutpanno mama manyuṃ pramārjaka

9.19.46

yajñeśvaramanāhūya yajñakarmarato'bhavat
dakṣaṃ vaireṇa taṃ tasmādbhiṃdhi yajñaṃ gaṇeśvara

9.19.47

yajñalakṣmīmalakṣmīṃ tvaṃ bhadra kṛtvā mamājñayā
yajamānaṃ ca taṃ hatvā vatsa hiṃsaya bhadrayā

9.19.48

aśeṣāmiva tāmājñāṃ śivayościtrakṛtyayoḥ
mūrdhni kṛtvā namaskṛtya bhadro gaṃtuṃ pracakrame

9.19.49

athaiṣa bhagavānkruddhaḥ pretāvāsakṛtālayaḥ
vīrabhadro mahādevo devyā manyupramārjakaḥ

9.19.50

sasarja romakūpebhyo romajākhyāngaṇeśvarān
dakṣiṇādbhujadeśāttu śatakoṭigaviśvarān

9.19.51

pādāttathorudeśācca pṛṣṭhātpārśvānmukhādgalāt
guhyādgulphācchiromadhyātkaṃṭhādāsyāttathodarāt

9.19.52

tadā gaṇeśvarairbhadrairbhadratulyaparākramaiḥ
saṃchāditamabhūtsarvaṃ sākāśavivaraṃ jagat

9.19.53

sarve sahasrahastāste sahasrāyudhapāṇayaḥ
rudrasyānucarāssarve sarve rudrasamaprabhāḥ

9.19.54

śūlaśaktigadāhastāṣṭaṃkopalaśilādharāḥ
kālāgnirudrasadṛśāstrinetrāśca jaṭādharāḥ

9.19.55

nipeturbhṛśamākāśe śataśassiṃhavāhanāḥ
vineduśca mahānādāñjaladā iva bhadrajāḥ

9.19.56

tairbhadrairbhagavānmadrastathā parivṛto babhau
kālānalaśatairyukto yathāṃte kālabhairavaḥ

9.19.57

teṣāṃ madhye samāruhya vṛṣeṃdraṃ vṛṣabhadhvajaḥ
jagāma bhagavānbhadraśśubhamabhraṃ yathā bhavaḥ

9.19.58

tasminvṛṣabhamārūḍhe bhadre tu bhasitaprabhaḥ
babhāra mauktikaṃ chatraṃ gṛhītasitacāmaraḥ

9.19.59

sa tadā śuśubhe pārśve bhadrasya bhasitaprabhaḥ
bhagavāniva śailendraḥ pārśve viśvajagadguroḥ

9.19.60

so'pi tena babhau bhadraḥ śvetacāmarapāṇinā
bālasomena saumyena yathā śūlavarāyudhaḥ

9.19.61

dadhmau śaṃkhaṃ sitaṃ bhadraṃ bhadrasya purataḥ śubham
bhānukaṃpo mahātejā hemaratnairalaṃkṛtaḥ

9.19.62

devaduṃdubhayo nedurdivyasaṃkulaniḥsvanāḥ
vavṛṣuśśataśo mūrdhni puṣpavarṣaṃ balāhakāḥ

9.19.63

phullānāṃ madhugarbhāṇāṃ puṣpāṇāṃ gaṃdhabaṃdhavaḥ
mārgānukūlasaṃvāhā vabuśca pathi mārutāḥ

9.19.64

tato gaṇeśvarāḥ sarve mattā yuddhabaloddhatāḥ
nanṛturmumudur 1nedurjahasurjagadurjaguḥ

9.19.65

tadā bhadragaṇāṃtaḥstho babhau bhadraḥ sa bhadrayā
yathā rudragaṇāṃtaḥ sthastryambakoṃbikayā saha

9.19.66

tatkṣaṇādeva dakṣasya yajñavāṭaṃ raṇmayam
praviveśa mahābāhurvīrabhadro mahānugaḥ

9.19.67

tatastu dakṣapratipāditasya kratupradhānasya gaṇapradhānaḥ
prayogabhūmiṃ praviveśa bhadro rudro yathāṃte bhuvanaṃ didhakṣuḥ

9.19.67.p1

iti śrīśivamahāpurāṇe saptamyāṃ vāyavīyasaṃhitāyāṃ pūrvakhaṇḍe vīrabhadrotpattivarṇanaṃ nāmaikonaviṃśo'dhyāyaḥ

Linked texts (1)