Pramāṇa · Search · About · API

Shiva Purana 9.27

Śivapurāṇa (complete text) 9.27

Language
Sanskrit

Contents

9.27.1

ṛṣaya ūcuḥ
kṛtvā gauraṃ vapurdivyaṃ devī girivarātmajā
kathaṃ dadarśa bhartāraṃ praviṣṭā manditaṃ satī

9.27.2

praveśasamaye tasyā bhavanadvāragocaraiḥ
gaṇeśaiḥ kiṃ kṛtaṃ devastāndṛṣṭvā kintadā'karot

9.27.3

vāyuruvāca
pravaktumaṃjasā'śakyaḥ tādṛśaḥ paramo rasaḥ
yena praṇayagarbheṇa bhāvo bhāvavatāṃ hṛtaḥ

9.27.4

dvāsthaissasaṃbhramaireva devo devyāgamotsukaḥ
śaṃkamānā praviṣṭāntastañca sā samapaśyata

9.27.5

taistaiḥ praṇayabhāvaiśca bhavanāntaravarttibhiḥ
gaṇendrairvanditā vācā praṇanāma triyambakam

9.27.6

praṇamya notthitā yāvattāvattāṃ parameśvaraḥ
pragṛhya dorbhyāmāśliṣya paritaḥ parayā mudā

9.27.7

svāṃke dhartuṃ pravṛtto'pi sā paryyaṃke nyaṣīdata
paryyaṃkato balāddevīṃ soṇkamāropya susmitām

9.27.8

sasmito vivṛtairnetraistadvaktraṃ prapibanniva
tayā saṃbhāṣaṇāyeśaḥ pūrvabhāṣitamabravīt

9.27.9

devadeva uvāca
sā daśā ca vyatītā kiṃ tava sarvāṃgasundari
yasyāmanunayopāyaḥ ko'pi kopānna labhyate

9.27.10

svecchayāpi na kālīti nānyavarṇavatīti ca
tvatsvabhāvāhṛtaṃ cittaṃ subhru ciṃtāvahaṃ mama

9.27.11

vismṛtaḥ paramo bhāvaḥ kathaṃ svecchāṃgayogataḥ
na sambhavanti ye tatra cittakāluṣyahetavaḥ

9.27.12

pṛthagjanavadanyonyaṃ vipriyasyāpi kāraṇam
āvayorapi yadyasti nāstyevaitaccarācaram

9.27.13

ahamagniśironiṣṭhastvaṃ somaśirasi sthitā
agnīṣomātmakaṃ viśvamāvābhyāṃ samadhiṣṭhitam

9.27.14

jagaddhitāya caratoḥ svecchādhṛtaśarīrayoḥ
āvayorviprayoge hi syānnirālambanaṃ jagat

9.27.15

asti hetvantaraṃ cātra śāstrayuktiviniścitam
vāgarthamiva me vaitajjagatsthāvarajaṃgamam

9.27.16

tvaṃ hi vāgamṛtaṃ sākṣādahamarthāmṛtaṃ param
dvayamapyamṛtaṃ kasmādviyuktamupapadyate

9.27.17

vidyāpratyāyikā tvaṃ me vedyo'haṃ pratyayāttava
vidyāvedyātmanoreva viśleṣaḥ kathamāvayoḥ

9.27.18

na karmaṇā sṛjāmīdaṃ jagatpratisṛjāmi ca
sarvasyājñaikalabhyatvādājñātvaṃ hi garīyasī

9.27.19

ājñaikasāramaiśvaryyaṃ yasmātsvātaṃtryalakṣaṇam
ājñayā viprayuktasya caiśvaryyaṃ mama kīdṛśam

9.27.20

na kadācidavasthānamāvayorviprayuktayoḥ
devānāṃ kāryyamuddiśya līloktiṃ kṛtavānaham

9.27.21

tvayāpyaviditaṃ nāsti kathaṃ kupitavatyasi
tatastrilokarakṣārthe kopo mayyapi te kṛtaḥ

9.27.22

yadanarthāya bhūtānāṃ na tadasti khalu tvayi
iti priyaṃvade sākṣādīśvare parameśvare

9.27.23

śṛṃgārabhāvasārāṇāṃ janmabhūmirakṛtrimā
svabhartrā lalitantathyamuktaṃ matvā smitottaram

9.27.24

lajjayā na kimapyūce kauśikī varṇanātparam
tadeva varṇayāmyadya śṛṇu devyāśca varṇanam

9.27.25

devyuvāca
kiṃ devena na sā dṛṣṭā yā sṛṣṭā kauśikī mayā
tādṛśī kanyakā loke na bhūtā na bhaviṣyati

9.27.26

tasyā vīryyaṃ balaṃ vindhyanilayaṃ vijayaṃ tathā
śuṃbhasya ca niśuṃbhasya māraṇe ca raṇe tayoḥ

9.27.27

pratyakṣaphaladānaṃ ca lokāya bhajate sadā
lokānāṃ rakṣaṇaṃ śaśvadbrahmā vijñāpayiṣyati

9.27.28

iti saṃbhāṣamāṇāyā devyā evājñayā tadā
vyāghraḥ sakhyā samānīya puro'vasthāpitastadā

9.27.29

taṃ prekṣyāha punardevī devānītamupāyatam
vyāghraṃ paśya na cānena sadṛśo madupāsakaḥ

9.27.30

anena duṣṭasaṃghebhyo rakṣitaṃ mattapovanam
atīva mama bhaktaśca viśrabdhaśca svarakṣaṇāt

9.27.31

svadeśaṃ ca parityajya prasādārthaṃ samāgataḥ
yadi prītirabhūnmattaḥ parāṃ prītiṃ karoṣi me

9.27.32

nityamantaḥpuradvāri niyogānnandinaḥ svayam
rakṣibhissaha taccihnairvartatāmayamīśvara

9.27.33

vāyuruvāca
madhuraṃ praṇayodarkaṃ śrutvā devyāḥ śubhaṃ vacaḥ
prīto'smītyāha taṃ devassa cādṛśyata tatkṣaṇāt

9.27.34

bibhradvetralatāṃ haimīṃ ratnacitraṃ ca kaṃcukam
churikāmuragaprakhyāṃ gaṇeśo rakṣaveṣadhṛk

9.27.35

yasmātsomo mahādevo nandī cānena nanditaḥ
somanandīti vikhyātastasmādeṣa samākhyayā

9.27.36

itthaṃ devyāḥ priyaṃ kṛtvā devaścarddhendubhūṣaṇaḥ
bhūṣayāmāsa tandivyairbhūṣaṇai ratnabhūṣitaiḥ

9.27.37

tatassa gaurīṃ giriśo girīndrajāṃ sagauravāṃ sarvamanoharāṃ haraḥ
paryyaṃkamāropya varāṃgabhūṣaṇairvibhūṣayāmāsa śaśāṃkabhūṣaṇaḥ

9.27.37.p1

iti śrīśivamahāpurāṇe saptamyāṃ vāyavīyasaṃhitāyāṃ pūrvakhaṇḍe saptaviṃśo'dhyāyaḥ

Linked texts (2)