Shiva Purana 9.28
Śivapurāṇa (complete text) 9.28
- Language
- Sanskrit
Contents
- 9.28.20 — 1 part
9.28.1
ṛṣaya ūcuḥ
devīṃ samādadhānena devenedaṃ kimīritam
agniṣomātmakaṃ viśvaṃ vāgarthātmakamityapi
9.28.2
ājñaikasāramaiśvaryyamājñā tvamiti coditam
tadidaṃ śrotumicchāmo yathāvadanupūrvaśaḥ
9.28.3
vāyuruvāca
agnirityucyate raudrī ghorā yā taijasī tanuḥ
somaḥ śākto'mṛtamayaḥ śakteḥ śāntikarī tanuḥ
9.28.4
amṛtaṃ yatpratiṣṭhā sā tejo vidyā kalā svayam
bhūtasūkṣmeṣu sarveṣu ta eva rasatejasī
9.28.5
dvividhā tejaso vṛttisūryyātmā cānalātmikā
tathaiva rasavṛttiśca somātmā ca jalātmikā
9.28.6
vidyudādimayantejo madhurādimayo rasaḥ
tejorasavibhedaistu dhṛtametaccarācaram
9.28.7
agneramṛtaniṣpattiramṛtenāgniredhate
ata eva hi vikrāntamagnīṣomaṃ jagaddhitam
9.28.8
haviṣe sasyasampattirvṛṣṭiḥ sasyābhivṛddhaye
vṛṣṭereva havistasmādagnīṣomadhṛtaṃ jagat
9.28.9
agnirūrddhvaṃ jvalatyeṣa yāvatsaumyaṃ parāmṛtam
yāvadagnyāspadaṃ saumyamamṛtaṃ ca sravatyadhaḥ
9.28.10
ata eva hi kālāgniradhastācchaktirūrddhvataḥ
yāvadādahanaṃ corddhvamadhaścāplāvanaṃ bhavet
9.28.11
ādhāraśaktyaiva dhṛtaḥ kālāgnirayamūrddhvagaḥ
tathaiva nimnagaḥ somaśśivaśaktipadāspadaḥ
9.28.12
śivaścorddhvamadhaśśaktirūrddhvaṃ śaktiradhaḥ śivaḥ
taditthaṃ śivaśaktibhyānnāvyāptamiha kiñcana
9.28.13
asakṛccāgninā dagdhaṃ jagadyadbhasmasātkṛtam
agnervīryamidaṃ cāhustadvīryaṃ bhasma yattataḥ
9.28.14
yaścetthaṃ bhasmasadbhāvaṃ jñātvā snāti ca bhasmanā
agnirityādibhirmantrairbaddhaḥ pāśātpramucyate
9.28.15
agnervīryaṃ tu yadbhasma somenāplāvitampunaḥ
ayogayuktyā prakṛteradhikārāya kalpate
9.28.16
yogayuktyā tu tadbhasma plāvyamānaṃ samantataḥ
śāktenāmṛtavarṣeṇa cādhikārānnivartayet
9.28.17
ato mṛtyuṃjayāyetthamamṛtaplāvanaṃ sadā
śivaśaktyamṛtasparśe labdhaṃ yena kuto mṛtiḥ
9.28.18
yo veda dahanaṃ guhyaṃ plāvanaṃ ca yathoditam
agnīṣomapadaṃ hitvā na sa bhūyo'bhijāyate
9.28.19
śivāgninā tanuṃ dagdhvā śaktisaumyā mṛtena yaḥ
plāvayedyogamārgeṇa so'mṛtatvāya kalpate
9.28.20
hṛdi kṛtvemamarthaṃ vai devena samudāhṛtam
agnīṣomātmakaṃ viśvaṃ jagadityanurūpataḥ
9.28.20.p1
iti śrīśivamahāpurāṇe saptamyāṃ vāyavīyasaṃhitāyāṃ pūrvakhaṇḍe bhasmatattvavarṇanaṃ nāmāṣṭāviṃśo'dhyāyaḥ
Linked texts (1)
- Dāśarathīyatantra — Sanskrit