[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Shivapurana](https://indike.org/pramana/in.purana.siva) › 1.12 # Shivapurana 1.12 Śivapurāṇa 1.12 - **Language:** Sanskrit ## Contents - [1.12.43](https://indike.org/pramana/in.purana.siva.1.12.43) — 2 parts ### [1.12.1](https://indike.org/pramana/in.purana.siva.1.12.1) / tadāgamāṃstato vakṣye lokarakṣārthameva hi // / pañcāśatkoṭivistīrṇā saśailavanakānanā // ### [1.12.2](https://indike.org/pramana/in.purana.siva.1.12.2) / śivājñayā hi pṛthivī lokaṃ dhṛtvā ca tiṣṭhati // / tatra tatra śivakṣetraṃ tatra tatra nivāsinām // ### [1.12.3](https://indike.org/pramana/in.purana.siva.1.12.3) / mokṣārthaṃ kṛpayā devaḥ kṣetraṃ kalpitavānprabhuḥ // / parigrahādṛṣīṇāṃ ca devānāṃ parigrahāt // ### [1.12.4](https://indike.org/pramana/in.purana.siva.1.12.4) / svayaṃbhūtānyathānyāni lokarakṣārthameva hi // / tīrthe kṣetre sadākāryaṃ snānadānajapādikam // ### [1.12.5](https://indike.org/pramana/in.purana.siva.1.12.5) / anyathā rogadāridryamūkatvādyāpnuyānnaraḥ // / athāsminbhārate varṣe prāpnoti maraṇaṃ naraḥ // ### [1.12.6](https://indike.org/pramana/in.purana.siva.1.12.6) / svayaṃbhūsthānavāsena punarmānuṣyamāpnuyāt // / kṣetre pāpasya karaṇaṃ dṛḍhaṃ bhavati bhūsurāḥ // ### [1.12.7](https://indike.org/pramana/in.purana.siva.1.12.7) / puṇyakṣetre nivāse hi pāpamaṇvapi nācaret // / yena kenāpyupāyena puṇyakṣetre vasennaraḥ // ### [1.12.8](https://indike.org/pramana/in.purana.siva.1.12.8) / siṃdhoḥ śatanadītīre saṃti kṣetrāṇyanekaśaḥ // / sarasvatī nadī puṇyā proktā ṣaṣṭimukhā tathā // ### [1.12.9](https://indike.org/pramana/in.purana.siva.1.12.9) / tattattīre vasetprājñaḥ kramādbrahmapadaṃ labhet // / himavadgirijā gaṃgā puṇyā śatamukhā nadī // ### [1.12.10](https://indike.org/pramana/in.purana.siva.1.12.10) / tattīre caiva kāśyādipuṇyakṣetrāṇyanekaśaḥ // / tatra tīraṃ praśastaṃ hi mṛgabṛhaspatau // ### [1.12.11](https://indike.org/pramana/in.purana.siva.1.12.11) / śoṇabhadro daśamukhaḥ puṇyobhīṣṭaphalapradaḥ // / tatra snānopavāsena padaṃ vaināyakaṃ labhet // ### [1.12.12](https://indike.org/pramana/in.purana.siva.1.12.12) / caturvīṃśamukhā puṇyā narmadā ca mahānadī // / tasyāṃ snānena vāsena padaṃ vaiṣṇavamāpnuyāt // ### [1.12.13](https://indike.org/pramana/in.purana.siva.1.12.13) / tamasā dvādaśamukhā revā daśamukhā nadī // / godāvarī mahāpuṇyā brahmagovadhanāśinī // ### [1.12.14](https://indike.org/pramana/in.purana.siva.1.12.14) / ekaviṃśamukhā proktā rudralokapradāyinī // / kṛṣṇaveṇī puṇyanadī sarvapāpakṣayāvahā // ### [1.12.15](https://indike.org/pramana/in.purana.siva.1.12.15) / sāṣṭādaśamukhāproktā viṣṇulokapradāyinī // / tuṃgabhadrā daśamukhā brahmalokapradāyinī // ### [1.12.16](https://indike.org/pramana/in.purana.siva.1.12.16) / suvarṇamukharī puṇyā proktā navamukhā tathā // / tatraiva suprajāyaṃte brahmalokacyutāstathā // ### [1.12.17](https://indike.org/pramana/in.purana.siva.1.12.17) / sarasvatī ca paṃpā ca kanyāśvetanadī śubhā // / etāsāṃ tīravāsena iṃdralokamavāpnuyāt // ### [1.12.18](https://indike.org/pramana/in.purana.siva.1.12.18) / sahyādrijā mahāpuṇyā kāverīti mahānadī // / saptaviṃśamukhā proktā sarvābhīṣṭaṃ pradāyinī // ### [1.12.19](https://indike.org/pramana/in.purana.siva.1.12.19) / tattīrāḥ svargadāścaiva brahmaviṣṇupadapradāḥ // / śivalokapradā śaivās tathā 'bhīṣṭaphalapradāḥ // ### [1.12.20](https://indike.org/pramana/in.purana.siva.1.12.20) / naimiṣe badare snāyānmeṣage ca gurau ravau // / brahmalokapradaṃ vidyāttataḥ pūjādikaṃ tathā // ### [1.12.21](https://indike.org/pramana/in.purana.siva.1.12.21) / siṃdhunadyāṃ tathā snānaṃ siṃhe karkaṭage ravau // / kedārodakapānaṃ ca snānaṃ ca jñānadaṃ viduḥ // ### [1.12.22](https://indike.org/pramana/in.purana.siva.1.12.22) / godāvaryāṃ siṃhamāse snāyātsiṃhabṛhaspatau // / śivalokapradamiti śivenoktaṃ tathā purā // ### [1.12.23](https://indike.org/pramana/in.purana.siva.1.12.23) / yamunāśoṇayoḥ snāyādgurau kanyāgate ravau // / dharmaloke daṃtiloke mahābhogapradaṃ viduḥ // ### [1.12.24](https://indike.org/pramana/in.purana.siva.1.12.24) / kāveryāṃ ca tathāsnāyāttulāge tu ravau gurau // / viṣṇorvacanamahātmyātsarvābhīṣṭapradaṃ viduḥ // ### [1.12.25](https://indike.org/pramana/in.purana.siva.1.12.25) / vṛścike māsi saṃprāpte tathārke guruvṛścike // / narmadāyāṃ nadīsnānādviṣṇulokamvāpnuyāt // ### [1.12.26](https://indike.org/pramana/in.purana.siva.1.12.26) / suvarṇamukharīsnānaṃ cāpage ca gurau ravau // / śivalokapradamiti brāhmaṇo vacanaṃ yathā // ### [1.12.27](https://indike.org/pramana/in.purana.siva.1.12.27) / mṛgamāsi tathā snāyājjāhnavyāṃ mṛgage gurau // / śivalokapradamiti brahmaṇo vacanaṃ yathā // ### [1.12.28](https://indike.org/pramana/in.purana.siva.1.12.28) / brahmaviṣṇvoḥ pade bhuktvā tadaṃte jñānamāpnuyāt // / gaṃgāyāṃ māghamāse tu tathākuṃbhagate ravau // ### [1.12.29](https://indike.org/pramana/in.purana.siva.1.12.29) / śrāddhaṃ vā piṃḍadānaṃ vā tilodakamathāpivā // / vaṃśadvayapitḥṇāṃ ca kulakoṭyuddharaṃ viduḥ // ### [1.12.30](https://indike.org/pramana/in.purana.siva.1.12.30) / kṛṣṇaveṇyāṃ praśaṃsaṃti mīnage ca gurau ravau // / tattattīrthe ca tanmāsi snānamiṃdrapadapradam // ### [1.12.31](https://indike.org/pramana/in.purana.siva.1.12.31) / gaṃgāṃ vā sahyajāṃ vāpi samāśritya vasedbudhaḥ // / tatkālakṛtapāpasya kṣayo bhavati niścitam // ### [1.12.32](https://indike.org/pramana/in.purana.siva.1.12.32) / rudralokapradānyeva saṃti kṣetrāṇyanekaśaḥ // / tāmraparṇī vegavatī brahmalokaphalaprade // ### [1.12.33](https://indike.org/pramana/in.purana.siva.1.12.33) / tayostīre hi saṃtyeva kṣetrāṇi svargadāni ca // / saṃti kṣetrāṇi tanmadhye puṇyadāni ca bhūriśaḥ // ### [1.12.34](https://indike.org/pramana/in.purana.siva.1.12.34) / tatra tatra vasanprājñastādṛśaṃ ca phalaṃ labhet // / sadācāreṇa sadvṛttyā sadā bhāvanayāpi ca // ### [1.12.35](https://indike.org/pramana/in.purana.siva.1.12.35) / vaseddayāluḥ prājño vai nānyathā tatphalaṃ labhet // / puṇyakṣetre kṛtaṃ puṇyaṃ bahudhā ṛddhimṛcchati // ### [1.12.36](https://indike.org/pramana/in.purana.siva.1.12.36) / puṇyakṣetre kṛtaṃ pāpaṃ mahadaṇvapi jāyate // / tatkālaṃ jīvanārthaścetpuṇyena kṣayameṣyati // ### [1.12.37](https://indike.org/pramana/in.purana.siva.1.12.37) / puṇyamaiśvaryadaṃ prāhuḥ kāyikaṃ vācikaṃ tathā // / mānasaṃ ca tathā pāpaṃ tādṛśaṃ nāśayeddvijāḥ // ### [1.12.38](https://indike.org/pramana/in.purana.siva.1.12.38) / mānasaṃ vajralepaṃ tu kalpakalpānugaṃ tathā // / dhyānādeva hi tannaśyennānyathā nāśamṛcchati // ### [1.12.39](https://indike.org/pramana/in.purana.siva.1.12.39) / vācikaṃ japajālena kāyikaṃ kāyaśoṣaṇāt // / dānāddhanakṛtaṃ naśyennā 'nyathākalpakoṭibhiḥ // ### [1.12.40](https://indike.org/pramana/in.purana.siva.1.12.40) / kvacitpāpena puṇyaṃ ca vṛddhipūrveṇa naśyati // / bījāṃśaścaiva vṛddhyaṃśo bhogāṃśaḥ puṇyapāpayoḥ // ### [1.12.41](https://indike.org/pramana/in.purana.siva.1.12.41) / jñānanāśyo hi bījāṃśo vṛddhiruktaprakārataḥ // / bhojāṃśo bhoganāśyastu nānyathā puṇyakoṭibhiḥ // ### [1.12.42](https://indike.org/pramana/in.purana.siva.1.12.42) / bījaprarohe naṣṭe tu śeṣo bhogāya kalpate // / devānāṃ pūjayā caiva brahmaṇānāṃ ca dānataḥ // ### [1.12.43](https://indike.org/pramana/in.purana.siva.1.12.43) / tapodhikyācca kālena bhogaḥ sahyo bhavennṛṇām // / tasmātpāpamakṛtvaiva vastavyaṃssukhamicchatā // ### [1.12.43.p1](https://indike.org/pramana/in.purana.siva.1.12.43.p1) iti śrīśivamahāpurāṇe vidyeśvarasaṃhitāyāṃ dvādaśo 'dhyāyaḥ ### [1.12.43.p2](https://indike.org/pramana/in.purana.siva.1.12.43.p2) Chapter 13 ṛṣaya ūcuḥ sadācāraṃ śrāvayāśu yena lokāñjayedbudhaḥ // ## Other recensions (2) - [Śivapurāṇa (complete text)](https://indike.org/pramana/in.purana.siva*complete-2.1.12.1) — Sanskrit - [Śivapurāṇa (complete text)](https://indike.org/pramana/in.purana.siva*complete.1.12.1) — Sanskrit --- Source: [https://indike.org/pramana/in.purana.siva.1.12](https://indike.org/pramana/in.purana.siva.1.12) · Pramāṇa