Pramāṇa · Search · About · API

Skandapurana 94

Kāśīkhaṇḍaṭīkā 94

Language
Sanskrit

94.1

amṛteśādīni liṅgāni kathayati – anyānīti | amṛtapradaṃ mokṣapradam |
atra kāśyām |

94.6

tadeva darśayati-sarpeti |

94.7

prāṇitasampannaṃ ceṣṭāyuktamityarthaḥ |

94.8

prāṇitavye ceṣṭitavye | kṣetrāditi | kṣetrād bahirahiyaṃ dṛṣṭā daṃśakartā bhavet, sa kṣetramadhye ānītaḥ parāsutāṃ mṛtatāṃ na prāpnotītyarthaḥ | draṣṭeti pāṭhe spaṣṭa evārthaḥ |

94.9

tajjīvitaikikāṃ jīvitamevaikaṃ mukhyaṃ yasyāstām | tajjīvitaṃ pratīti kvacit |

94.10

śavaṃ mṛtam | śivamiti pāṭhe tasya kalyāṇamityarthaḥ |

94.11

jīvatputraḥ jīvan putro yasya saḥ | pāṭhantare'pi¹ sa evārthaḥ |

94.17

sa pipīlikaḥ | anan prāṇan ceṣṭannityarthaḥ | tattvaṃ padārtham | jīvitasūcita-mubhayorjīvanenānumitam |

94.19

karuṇāpuṣpaiḥ prasiddhaiḥ |

94.24

upasargotthaṃ grahādipīḍotthaṃ vighnotthamiti vā |

94.31

tatpatraistatphalairityatra tacchabdaḥ karuṇāvṛkṣaparaḥ |

94.37

eteṣu amṛteśādiṣu liṅgāṣṭakamamṛteśa-tārakeśa-jñāneśa-karuṇeśa-mokṣadvāreśa-svargadvāreśa-brahmeśa-lāṅgalīśānāmaṣṭakam |

94.38

tattvaṃ svarūpaṃ paramārthamiti yāvat |

94.39

niścitaṃ nirṇītamityarthaḥ |

94.40

saṃsthitiṃ samyag vasatiṃ maraṇaṃ vā |

94.42

ṣaṭtriṃśattattvarūpa iti | tānyuktānyāgametattvāni śaivānyucyante śivaḥ śaktiḥ sadāśivaḥ | īśvaro vidyayā sārdhaṃ pañcaśuddhānyamūni hi | māyā kālaśca niyatiḥ kalā vidyā punaḥ smṛtāḥ | rāgaḥ puruṣa etāni śuddhāśuddhāni sapta ca | prakṛtirbuddhirahaṅkāro mano jñānendriyāṇyatha | karmendriyāṇi tanmātrāḥ pañcabhūtāni deśikāḥ | etānyāhuraśuddhāni caturviṃśatirāgame | śaivānāmiti tattvānāṃ vibhāgo'tra pradarśitaḥ || iti |

94.49

muṣṭā vañcitā daiveneti śeṣaḥ | mūḍhā iti pāṭhe avivekinaḥ | tatra heturmanda-buddhaya iti |

94.51

nanu saptaitā mokṣadā ityādiṣvanyatrāpi muktiḥ śrūyate, kathamuktaṃ nā'nyatreti tatrāha-sāyujyeti |

94.55

yādṛgbhistapa ādibhiḥ | mokṣottamottamaḥ sāyujyamuktirityarthaḥ |

94.56

akathayat kathayāmāsa yanmahadvacaḥ | śroṣyatyetanmahadvaca iti kvacit | tatra eka eva hi viśveśo muktido nānya eva hi ityetacchabdena gṛhyate |
|| iti śrīrāmānandakṛtāyāṃ kāśīkhaṇḍaṭīkāyāṃ caturnavatitamo'dhyāyaḥ |

Linked texts (1)