Pramāṇa · Search · About · API

Skandapurana 95

Kāśīkhaṇḍaṭīkā 95

Language
Sanskrit

95.1

svasyāgāmivṛttaṃ kathayati-śṛṇu sūteti |

95.6

vibhūtidhāriṇa ityādīnāṃ dvitīyāntānāṃ padānāṃ vilokya sa iti tṛtīyenānvayaḥ |

95.8

viśveśvaracittān | vaco vacanam | punaḥ punariti kvacit |

95.11

naimiṣāraṇyaṃ viśinaṣṭi – yatra santīti | pādādhikenaikena |

95.13

api eva |

95.14

vipakṣe bādhakamāha–vihāyeti |

95.17

tadeva ca vacanamāha – na vedādityādi |

95.19

yadyataḥ |

95.21

viniścayakṛto nirṇayakārakasya |

95.23

viṣṇuṃ vihāyānyaṃ sevamānānāṃ na kevalaṃ saṃsārapraveśamātramapi tu mahatī nindā cetyāha–śārṅgiṇamiti |

95.24

vai niścitam | ṛtamiti kvacit |

95.25

yugadharmābhāve hetumāha–na ca lagneti | na tatretyastyā'yaṃ bhāvaḥ–yugadharma-vaśāttvamevaṃ brūṣe vārāṇasyāṃ gato na vakṣyasīti |

95.26

pādodakaṃ gaṅgāvaraṇasaṅgamam |

95.28

pañcarātraṃ pañcadināni | kṛtvā vaiṣṇavatīrthāni saṃsevyetyarthaḥ | yadvā pañcarātraṃ kṛtvā pañcarātrāgamoktena prakāreṇa mādhavakeśavādīn dṛṣṭvā samarcya sampūjyetyarthaḥ |

95.29

māṇavakā bālakāḥ |

95.30

balarātistuta indranuta |

95.34

viṣvak sarvataścamūḥ senā yasya tatsambodhanaṃ viṣvakkacamūḥ | hrasvābhāvo visargaścārṣaḥ | viṣvaksena mahābāho iti kvacit |

95.35

gopālavallabha gopānāṃ priya |

95.36

jaya viṣṇo ityādīnāṃ ityādināmamālābhiḥ saṃstuvan vyāso viśveśavanaṃ samāyāta ityekādaśenā'nvayaḥ |

95.44

ādau bhava ādyaḥ, na ādyaḥ anādyaḥ, tatsambodhanamanādya | anagheti kvacit |

95.51

tatprasiddhaṃ paramaiśvaryaṃ ca dattam | labdhaṃ varāttata iti | varāccheṣṭhāttasmātparamaiśvaryaṃ labdhamityarthaḥ |

95.52

kaṇṭhakadalīṃ kaṇṭhamūlam |

95.53

bhavāntakaṃ saṃsāranāśakam |

95.54

stambhitaḥ dorlataḥ stimitahastavallikaḥ |

95.55

padaiścitrapadārthāḍhyairaṣṭabhiḥ sumanoramaiḥ | kṛṣṇadvaipāyano'stauṣīd bhavānīśaṃ jagatpatim || tāpatrayātmakaṃ saṃsāraduḥkhaṃ duḥkhaheturvā rut taddrāvayati nāśayatīti rudraḥ – "rudduḥkhaṃ duḥkhaheturvā drāvayatyeṣa naḥ prabhuḥ | rudra ityucyate sadbhiḥ śivaḥ paramakāraṇam" || iti smṛteḥ |

95.56

śemuṣī buddhiḥ | īdaśī matstavanaparā | me stutiḥ pareti kvacit¹ | saṃjñayā netracālanādinā |
yatkīlābhiryasya jvālābhiḥ | yajjvālābhiriti kvacit | kṛṣṇatāṃ navīnameghaśyāmatām | taduktam– viṣeṇottiṣṭhamānena kālānalasamatviṣā | nirdagdho hemagaurāṅgaḥ kṛtaḥ kṛṣṇo janārdanaḥ || iti |

95.57

yad bāṇo yasya śaraḥ | yantā sārathiḥ | lokeśo brahmā | yena śrīrudreṇa |

95.58

aśubhadrāvako rudro yajñahā ca punarvadan | tataḥ smṛtamatho rudraśabdenā'tra vidhīyate || iti | rutāni bhūtāni tvante dravati drāvayatīti vā rudraḥ – rutyā vedarūpayā dharmādīn bodhayati drāvayatīti vā rudraḥ | rutyā praṇavarūpayā svātmānaṃ prāpayatīti vā rudraḥ | rorūyamāṇo dravati praviśati martyāniti vā rudraḥ | "tridhā baddho vṛṣabho roravīti mahodevo martyā āviveśa" iti śruteḥ | bodhikā bandhikā mohikā ca śaktī rut, tadvāṃstasyāḥ drāvayitā bhaktebhya iti vā rudraḥ | rutiṃ śabdaṃ vedātmānaṃ kalpādau brahmaṇe dadātīti rudraḥ | "yo vai vedāṃśca prahiṇoti tasmā" iti śruteḥ | alamativistareṇa | sa ekaḥ sajātīyavijātīyasvagatabhedaśūnyaḥ | etadeva vyatirekamukhenāha–na dvitīya iti | ekatve hetumāha–yatastadbrahmaivaikamiti | padatrayeṇa sajātīyavijātīyasvagatabhedatrayaṃ nirākriyate – ekamevādvitīyamiti | yasyānatyā caikayālpendralakṣmīḥ | 5 hetumāha–neheti | tathā ca śrutirnehādikiñcanāntā yathāpādameva | kutracidveti vāśabdaḥ samuccayārthaḥ | kālaṃ samuccaිnoti| kvacitkāle vetyarthaḥ | kutraciddeśe | tattatpadārtham | madagre mama sammukham | samagreti kvacit |

95.61

ānatyā namaskāramātreṇa |

95.63

sarvaṃ viśvam | sarve iti kvacit | sarvaḥ sarvasvarūpaḥ |

95.64

|| iti śrīrāmānandakṛtāyāṃ kāśīkhaṇḍaṭīkāyāṃ pañcanavatitamo'dhyāyaḥ |

95.69

smāyaṃ smāyaṃ smitvā smitvā punaḥ punarīṣaddhāsyaṃ vidhāyeti yāvat |

Linked texts (1)