Pramāṇa · Search · About · API

Shricandi 13

Śrīcaṇḍī 13

Language
Sanskrit

13.1

ṛṣiruvāca

13.2

ājñaptāste tato daityāścaṇḍa-muṇḍa-puro gamāḥ
caturaṅga - balopetā, yayurabhyudyatāyudhāḥ

13.3

dadṛśuste tato devīmīṣaddhāsāṃ vyavasthitām
siṃhasyopari śailendra-śṛṅge mahati kāñcane

13.4

suvarṇa-maṇi-māṇikya-nāga-hāra-virājitā
sadā sugandhibhiḥ padmairamlānairati - sundarī
mālāṃ bibharti grīvāyāṃ, ratna - keyūra-dhāriṇī
mṛṇālāyata-vṛttaistu, bāhubhiḥ komalaiḥ śubhaiḥ
rājatī kañcukopeta - pīnonnata - payodharā
kṣīṇa-madhyāpīta-vastrā, trivalī-prakhya-bhūṣitā
śūlaṃ vajraṃ ca bāṇaṃ ca, khaḍgaṃ śaktiṃ tathaiva ca
dakṣiṇaiḥ pāṇibhirdevī, gṛhītvā tu virājitā
gadāṃ ghaṇṭāṃ ca cāpaṃ ca, carma śaṅkhaṃ tathaiva ca
ūrdhvādi-kramato devī, dadhatī vāma-pāṇibhiḥ
siṃhasyopari tiṣṭhantī,vyāghra-carmāṇi kauśikī
vibhratī rūpamatulaṃ, sa-surāsura-mohanam
te dṛṣṭvā tāṃ samādātumudyamaṃ cakrurudyatāḥ
ākṛṣṭa-cāpāsi-dharāstathānye tat-samīpagāḥ

13.5

tataḥ kopaṃ cakāroccairambikā tānarīn prati
kopena cāsyā vadanaṃ, masī-varṇamabhūt tadā

13.6

bhrakuṭī-kuṭilāt tasyā, lalāṭa-phalakād drutam
kālī karāla-vadanā, viniṣkrāntā'si-pāśinī

13.7

vicitra-khaṭvāṅga-dharā, nara-mālā-vibhūṣaṇā
dvīpi-carma-parīdhānā, śuṣka-māṃsā'ti-bhairavā

13.8

ati-vistāra-vadanā, jihvā-lalana-bhīṣaṇā
nimagnā''rakta-nayanā, nādā''pūrita-diṅ-mukhā

13.9

nīlotpala-dala-śyāmā, caturbāhu-samanvitā
khaṭvāṅgaṃ candra-hāsaṃ ca, vibhratī dakṣiṇe kare
vāme carma ca pāśaṃ ca, ūrdhvādho-bhāgataḥ punaḥ
dadhatī muṇḍa-mālāṃ ca, vyāghra-carma-dharā varām
kṛśāṅgī dīrgha-daṃṣṭrā ca, ati-dīrghāti-bhīṣaṇā
lola-jihvā nimna-rakta-nayanā nāda-bhairavā
kabandha-vāhanāsīnā, vistāra-śravaṇānanā
eṣā kālī samākhyātā, cāmuṇḍā iti kathyate
sā vegenābhi-patitā, ghātayantī mahā'surān
sainye tatra surārīṇāmabhakṣayata tad-balam

13.10

pārṣṇi-grāhāṃkuśa-grāhi-yodha-ghaṇṭā-samanvitān
samādāyaika-hastena, mukhe cikṣepa vāraṇān

13.11

tathaiva yodhaṃ turagai, rathaṃ sārathinā saha
nikṣipya vaktre daśanaiścarvayantyati-bhairavam

13.12

ekaṃ jagrāha keśeṣu, grīvāyāmatha cāparam
pādenākramya caivānyamurasānyamapothayat

13.13

tairmuktāni ca śastrāṇi, mahā'strāṇi tathā'suraiḥ
mukhena jagrāha ruṣā, daśanairmathitānyapi

13.14

balināṃ tad-balaṃ sarvamasurāṇāṃ mahātmanām
mamardā'bhakṣayaccānyānanyāṃścātāḍayat tathā

13.15

asinā nihatāḥ kecit, kecitkhaṭvāṅga-tāḍitāḥ
jagmurvināśamasurā, dantāgrābhi-hatāstathā

13.16

kṣaṇena tad balaṃ sarvamasurāṇāṃ nipātitam
dṛṣṭvā caṇḍo'bhidudrāva, tāṃ kālīmati-bhīṣaṇām

13.17

śara-varṣairmahā-bhīmairbhīmākṣīṃ tāṃ mahā'suraḥ
chādayāmāsa cakraiśca, muṇḍaḥ kṣiptaiḥ sahasraśaḥ

13.18

tāni cakrāṇyanekāni, viśamānāni tanmukham
babhuryathārka-bimbāni, su-bahūni ghanodaram

13.19

tato jahāsā'ti-ruṣā, bhīmaṃ bhairava - nādinī
kālī karāla-vaktrāntardurdarśa-daśanojjvalā

13.20

utthāya ca mahā-siṃhaṃ, devī caṇḍamadhāvata
gṛhītvā cāsya keśeṣu, śirastenāsinācchinat

13.21

atha muṇḍo'bhyadhāvattāṃ, dṛṣṭvā caṇḍaṃ nipātitam
tamapyapātayad bhūmau, sa khaḍgābhi- hataṃ ruṣā

13.22

hata - śeṣaṃ tataḥ sainyaṃ, dṛṣṭvā caṇḍaṃ nipātitam
muṇḍaṃ ca su-mahā-vīryaṃ, diśo bheje bhayāturam

13.23

śiraścaṇḍasya kālī ca, gṛhītvā muṇḍameva ca
prāha pracaṇḍāṭṭahāsa-miśramabhyetya caṇḍikām

13.24

mayā tavātropahṛtau, caṇḍa-muṇḍau mahā-paśū
yuddha-yajñe svayaṃ śumbhaṃ, niśumbhaṃ ca haniṣyasi

13.25

ṛṣiruvāca

13.26

tāvānītau tato dṛṣṭvā, caṇḍa-muṇḍau mahāsurau
uvāca kālīṃ kalyāṇī, lalitaṃ caṇḍikā vacaḥ

13.27

yasmāccaṇḍaṃ ca muṇḍaṃ ca, gṛhītvā tvamupāgatā
cāmuṇḍeti tato loke, khyātā devi! bhaviṣyasi

Linked texts (14)