Pramāṇa · Search · About · API

Shricandi 14

Śrīcaṇḍī 14

Language
Sanskrit

14.1

sātaveṃ adhyāya ke pāṭhāntara
ṛṣiruvāca

14.2

caṇḍe ca nihate daitye, muṇḍe ca vinipātite
bahuleṣu ca sainyeṣu, kṣayiteṣvasureśvaraḥ

14.3

tataḥ kopa-parādhīna-cetāḥ śumbhaḥ pratāpa-vān
udyogaṃ sarva - sainyānāṃ, daityānāmādideśa ha

14.4

adya sarva-balairdaityāḥ, ṣaḍaśītirudāyudhāḥ
kambūnāṃ caturaśītirniryāntu sa-balairvṛtāḥ

14.5

koṭi-vīryāṇi pañcāśadasurāṇāṃ kulāni vai
śataṃ kulāni dhaumrāṇāṃ, nirgacchantu mamājñayā

14.6

kālakā dauhṛdā mauryāḥ, kālakeyāstathā'surāḥ
yuddhāya sajjā niryāntu, ājñayā tvaritā mama

14.7

ityājñāpyāsura-patiḥ, śumbho bhairava-śāsanaḥ
nirjagāma mahā - sainya - sahastrairbahubhirvṛtaḥ

14.8

āyāntaṃ caṇḍikā dṛṣṭvā, tat-sainyamati-bhīṣaṇam
jyā-svanaiḥ pūrayāmāsa, dhariṇī - gaganāntaram

14.9

tataḥ siṃho mahā-nādamatīva kṛta-vān nṛpa!
ghaṇṭā-svanena taṃ nādamambikā copa-vṛṃhayat

14.10

dhanurjyā-siṃha-ghaṇṭānāṃ, nādāpūrita-diṅ-mukhā
ninādairbhīṣaṇaiḥ kālī, jigye vistāritānanā

14.11

taṃ ninādamupa-śrutya, daitya-sainyaiścaturdiśam
devī siṃhasthā kālī, sa-roṣaiḥ parivāritā:

14.12

etasminnantare bhūpa! vināśāya sura-dviṣām
bhavāyāmara-siṃhānāmati-vīrya-balānvitāḥ

14.13

brahyeśa-guha-viṣṇūnāṃ, tathendrasya ca śaktayaḥ
śarīrebhyo viniṣkramya, tad-rūpaiścaṇḍikāṃ yayuḥ

14.14

yasya devasya yad-rūpaṃ, yathā bhūṣaṇa-vāhanam
tad-vadeva hi tacchaktirasurān yoddhumāyayau

14.15

haṃsa-yukta-vimānāgre, sākṣa-sūtra-kamaṇḍaluḥ
āyātā brahmaṇaḥ śaktirbrahmāṇī sā'bhidhīyate

14.16

māheśvarī vṛṣārūḍhā, triśūla-vara-dhāriṇī
mahāhi-valayā prāptā, candra-rekhā-vibhūṣaṇā

14.17

oṃ vṛṣārūḍhāṃ śubhāṃ śuklāṃ, trinetrāṃ varadāṃ śivām
māheśvarīṃ namāmyadya, sṛṣṭi-saṃhāra-kāriṇīm
jaṭā-mukuṭa-saṃyuktā, vṛṣasthā candra-śekharā
kapāla-śūla-khaṭvāṅga-varadāḍhyā caturbhujā
kaumārī śakti-hastā ca, mayūra-vara-vāhanā
yoddhumabhyāyayau daityānambikā guha-rūpiṇī

14.18

oṃ kaumārīṃ pīta-vasanāṃ, mayūra-vara-vāhanām
śakti-hastāṃ sitāṅgīṃ tāṃ, namāmi varadāṃ sadā
tathaiva vaiṣṇavī śaktirgaruḍopari-saṃsthitā
śaṅkha-cakra-gadā-śārṅga-khaḍga-hastābhyupāyayau

14.19

bāhubhirgaruḍārūḍhā, śaṅkha-cakra-gadāsinī
śārṅga-bāṇa-dharā jātā, vaiṣṇavī rūpa-śālinī
yajña-vārāhamatulaṃ, rūpaṃ yā bibhratī hareḥ
śaktiḥ sāpyāyayau tatra, vārāhīṃ bibhratī tanum

14.20

nārasiṃhī nṛsiṃhasya, bibhratī sadṛśaṃ vapuḥ
prāptā tatra saṭākṣepa-kṣipta-nakṣatra-saṃhatiḥ

14.21

vajra-hastā tathaivendrī, gaja-rājopari-sthitā
prāptā sahasra-nayanā, yathā śakrastathaiva sā

14.22

tataḥ parivṛtastābhirīśāno deva-śaktibhiḥ
hanyantāmasurāḥ śīghraṃ, mama prītyā''ha caṇḍikām

14.23

tato devī-śarīrāt tu, viniṣkrāntā'ti-bhīṣaṇā
caṇḍikā-śaktiratyugrā, śivā-śata-ninādinī

14.24

sā cāha dhūmra - jaṭilamīśānamaparājitā
dūta! tvaṃ gaccha bhagavan! pārśvaṃ śumbha-niśumbhayoḥ

14.25

brūhi śumbhaṃ niśumbhaṃ ca, dānavāvati-garvitau
ye cānye dānavāstatra, yuddhāya samupasthitāḥ

14.26

trailokyamindro labhatāṃ, devāḥ santu havirbhujaḥ
yūyaṃ prayāta pātālaṃ, yadi jīvitumicchatha

14.27

balāvalepādatha ced, bhavanto yuddha-kāṃkṣiṇaḥ
tadā''gacchata tṛpyantu, macchivāḥ piśitenava

14.28

yato niyukto dautyena, tayā devyā śivaḥ svayam
śiva-dūtīti loke'smiṃstataḥ sā khyātimāgatā

14.29

rūpamasyāḥ pravakṣyāmi, śṛṇu vatsaika - sammataḥ
caturbhujaṃ mahā - kāyaṃ, sindūra - sadṛśa - dyutiḥ
rakta-dantaṃ muṇḍa-mālā-jaṭā-jūṭārddha-candra-dhṛk
nāga-kuṇḍala-hārābhyāṃ, śobhitaṃ nakharojjvalam
vyāghra-carma-parīdhānaṃ, dakṣiṇe śūla-khaḍga-dhṛk
vāme pāśaṃ tathā carma, vibhradūrdhvāpara-kramāt
sthūla-vaktraṃ ca pīnoṣṭhaṃ, tuṅga-mūrtiṃ bhayaṅkaram
nikṣipya dakṣiṇaṃ pādaṃ, santiṣṭhat kuṇapopari
vāma-pādaṃ śṛgālasya, pṛṣṭhe pheru - śatairvṛtam
īdṛśīṃ śiva-dūtyāstu, mūrtiṃ dhyāyed vibhūtaye
te'pi śrutvā vaco devyāḥ, śarvākhyātaṃ mahā'surāḥ
amarṣāpūritā jagmuryatra kātyāyanī sthitā

14.30

tataḥ prathamamevāgre, śara-śaktyṛṣṭi-vṛṣṭibhiḥ
vavarṣuruddhatāmarṣāstāṃ devīmaparārayaḥ

14.31

sā ca tān prahitān vāṇāñchūla-śakti-paraśvadhān
ciccheda līlayā''dhmāta-dhanurmuktairmaheṣubhiḥ

14.32

tasyāgratastathā kālī, śūla-pāta-vidāritān
khaṭvāṅga-pothitāṃścārīn, kurvatīvyacarattadā

14.33

kamaṇḍalu-jalākṣepa - hata - vīryān hataujasaḥ
brahmāṇī cā'karocchatrūn, yena yena sma dhāvati

14.34

māheśvarī triśūlena, tathā cakreṇa vaiṣṇavī
daityāñjaghāna kaumārī, tathā śaktyātikopanā

14.35

aindrī kuliśa-pātena, śataśo daitya - dānavāḥ
peturvidāritāḥ pṛthvyāṃ, rudhiraugha-pravarṣiṇaḥ

14.36

tuṇḍa-prahāra-vidhvastā, daṃṣṭāgra - kṣata - vakṣasaḥ
vārāha - mūrtyā nyapataṃścakreṇa ca vidāritāḥ

14.37

nakhairvidāritāṃścānyān, bhakṣkayantī mahā'surān
nārasiṃhī cacārājau, nādāpūrṇa-digambarā

14.38

caṇḍāṭṭa-hāsairasurāḥ, śiva-dūtyabhi-dūṣitāḥ
petuḥ pṛthivyāṃ patitāṃstāṃśca khādātha sā tadā

14.39

iti mātṛ - gaṇaṃ kruddhaṃ, mardayantaṃ mahā'surān
dṛṣṭvā'bhyupāyairvividhairneśurdevāri-sainikāḥ

14.40

palāyana-parān dṛṣṭvā, daityān mātṛ-gaṇārditān
yoddhumabhyāyayau kruddho, rakta-bījo mahā'suraḥ

14.41

bhāgineyo mahā-vīryastayoḥ śumbha-niśumbhayoḥ
krodha-vatyāḥ suto jyeṣṭho, mahā-bala-parākramaḥ
rakta-binduryadā bhūmau, patatyasya śarīrataḥ
samutpatati medinyāṃ, tat-pramāṇastadā'suraḥ

14.42

yuyudhe sa gadā-pāṇirindra-śaktyā mahā'suraḥ
tataścaindrī sva - vajreṇa, rakta-bījamatāḍayat

14.43

kuliśenāhatasyāśu, bahu susrāva śoṇitam
samuttasthustato, yodhāstad -rūpāstat-parākramāḥ

14.44

yāvantaḥ patitāstasya, śarīrād rakta-bindavaḥ
tāvantaḥ puruṣā jātāstad-vīrya-bala-vikramāḥ

14.45

te cāpi yuyudhustatra, puruṣā rakta - sambhavāḥ
samaṃ mātṛbhiratyugra-śastra-pātāti-bhīṣaṇam

14.46

punaśca vajra-pātena, kṣatamasya śiro yadā
vavāha raktaṃ puruṣāstato, jātāḥ sahasraśaḥ

14.47

vaiṣṇavī samare cainaṃ, cakreṇābhi-jaghāna ha
gadayā tāḍayāmāsa, aindrī tamasureśvaram

14.48

vaiṣṇavī-cakra-bhinnasya, rudhira-srāva-sambhavaiḥ
sahasraśo jagad-vyāptaṃ, tat-pramāṇairmahāsuraiḥ

14.49

śaktyā jaghāna kaumārī, vārāhī ca tathā'sinā
māheśvarī triśūlena, rakta-bījaṃ mahā'suram

14.50

sa cāpi gadayā daityaḥ, sarvā evāhanat pṛthak
mātṛḥ kopa-samāviṣṭo, rakta-vījo mahā'suraḥ

14.51

tasyāhatasya bahudhā, śakti-śūlādibhirbhuvi
papāt yo vai raktaughastenāsañchataśo'surāḥ

14.52

taiścāsurāsṛk-sambhūtairasuraiḥ sakalaṃ jagat
vyāptamāsīt tato devā, bhayamājagmuruttamam

14.53

tān viṣaṇṇān surān dṛṣṭvā, caṇḍikā prāha satvarā
uvāca kālīṃ cāmuṇḍe! vistīrṇaṃ vadanaṃ kuru

14.54

macchastra-pāta-sambhūtān, rakta-bindūn mahā'surān
rakta-bindoḥ pratīccha tvaṃ, vaktreṇānena veginā

14.55

bhakṣayantī cara raṇe, tadutpannān mahā'surān
evameṣa kṣayaṃ daityaḥ, kṣīṇa-rakto gamiṣyati

14.56

bhakṣyamāṇāstvayā cogrā, na cotpatasyanti cāpare
ityuktvā tāṃ tato devī, śūlenābhi-jaghāna tam

14.57

mukhena kālī jagṛhe, rakta-bījasya śoṇitam

14.58

tato'sāvājaghānātha, gadayā tatra caṇḍikām
na cāsyā vedanā cakre, gadā-pāto'lpikāmapi

14.59

tasyāhatasya dehāt tu, bahu susrāva śoṇitam
yatastatastad-vaktreṇa, cāmuṇḍā sampratīcchati

14.60

mukhe samudgatā ye'syā, rakta-pātān mahā'surāḥ
tāṃśca khādātha cāmuṇḍā, papau tasya ca śoṇitam

14.61

devī śūlena vajreṇa, bāṇairasibhirṛṣṭibhiḥ
jaghāna rakta-bījaṃ taṃ, cāmuṇḍā-pīta-śoṇitam

14.62

sa papāta mahī-pṛṣṭhe, śastra-saṅgha-samāhataḥ
nīraktaśca mahī-pāla! rakta-bījo mahā'suraḥ

14.63

tataste harṣamatulamavāpustridaśā nṛpa!
teṣāṃ mātṛ-gaṇo jāto, nanartāsṛṅ-madoddhataḥ

Linked texts (14)