Pramāṇa · Search · About · API

Shricandi 19

Śrīcaṇḍī 19

Language
Sanskrit

19.1

yadā yadā hi sādhūnāṃ, duḥkhaṃ bhavati dānava!
tadā teṣāṃ ca rakṣārthaṃ, dehaṃ sandhārayāmyaham
arūpāyāśca me rūpamajanmāyāśca janma ca
surāṇāṃ rakṣaṇārthāya, viddhi daitya! viniścitam
tvameva sūkṣmā sthūlā tvaṃ, vyaktāvyakta-svarūpiṇī
nirākārā'pi sākārā, kastvāṃ veditumarhati
upāsakānāṃ kāryārthaṃ, śreyase jagatāmapi
dānavānāṃ vināśāya, dhatse nānā-vidhā tanuḥ
caturbhujā tvaṃ dvi-bhujā, ṣaḍ-bhujā'ṣṭa-bhujā tathā
tvameva viśva-rakṣārthaṃ, bahu-śastrāstra-dhāriṇī
oṃ devyuvāca

19.2

ebhiḥ stavaiśca māṃ nityaṃ, stoṣyate yaḥ samāhitaḥ
tasyā'haṃ sakalāṃ bādhāṃ, nāśayiṣyāmyasaṃśayam

19.3

madhu-kaiṭabha-nāśaṃ ca, mahiṣāsura-ghātanam
kīrtayiṣyanti ye tad-vad, vadhaṃ śumbha-niśumbhayoḥ

19.4

aṣṭamyāṃ ca caturdaśyāṃ, navamyāṃ caika-cetasaḥ
śroṣyanti caiva ye bhaktyā, mama māhātmyamuttamam

19.5

na teṣāṃ duṣkṛtaṃ kiñcid, duṣkṛtotthā na cāpadaḥ
bhaviṣyati na dāridryaṃ, na caiveṣṭa-viyojanam

19.6

śatruto na bhayaṃ tasya, dasyuto vā na rājataḥ
na śastrānala-toyaughāt, kadācit sambhaviṣyati

19.7

tasmānmamaitanmāhātmyaṃ, paṭhitavyaṃ samāhitaiḥ
śrotavyaṃ ca sadā bhaktyā, paraṃ svastyayanaṃ hi tat

19.8

upasargānaśeṣāṃstu, mahā-mārī-samudbhavān
tathā trividhamutpātaṃ, māhātmyaṃ śamayenmama

19.9

yatraitat paṭhyate samyaṅ, nityamāyatane mama
sadā na tad vimokṣyāmi, sānnidhyaṃ tatra me sthitam

19.10

bali-pradāne pūjāyāmagni-kārye mahotsave
sarvaṃ mamaitaccaritamuccāryaṃ śrāvyameva ca

19.11

bahu-havyendhane śuddhe, su-samiddhe hutāśane
vidhūme lelihāne ca, hunate yaḥ sa siddhyati
jānatā'jānatā vāpi, bali-pūjāṃ tathā kṛtām
pratīcchiṣyāmyahaṃ prītyā, vahni-homaṃ tathā kṛtam

19.12

śarat-kāle mahā-pūjā, kriyate yā ca vārṣikī
tasyāṃ mamaitanmāhātmyaṃ, śrutvā bhakti-samanvitaḥ

19.13

sarvā-bādhā-vinirmukto, dhana-dhānya-sutānvitaḥ
manuṣyo mat-prasādena, bhaviṣyati na saṃśayaḥ

19.14

śrutvā mamaitanmāhātmyaṃ, tathā cotpattayaḥ śubhāḥ
parākramaṃ ca yuddheṣu, jāyate nirbhayaḥ pumān

19.15

ripavaḥ saṃkṣayaṃ yānti, kalyāṇaṃ copa-padyate
nandate ca kulaṃ puṃsāṃ, māhātmyaṃ mama śṛṇvatām

19.16

śānti-karmaṇi sarvatra, tathā duḥsvapna-darśane
graha-pīḍāsu cogrāsu, māhātmyaṃ śṛṇuyānmama

19.17

upa-sargāḥ śamaṃ yānti, graha-pīḍāśca dāruṇāḥ
duḥsvapnaṃ ca nṛbhirdṛṣṭaṃ, su-svapnamupa-jāyate

19.18

bāla-grahābhi-bhūtānāṃ, bālānāṃ śānti-kārakam
saṅgāta-bhede ca nṛṇāṃ, maitrī-karaṇamuttamam

19.19

durvṛttānāmaśeṣāṇāṃ, bala-hāni-karaṃ karam
rakṣo-bhūta-piśācānāṃ, paṭhanādeva nāśanam

19.20

sarvaṃ mamaitanmāhātmyaṃ, mama sannidhi-kārakam
paśu-puṣpārghya-dhūpaiśca, gandha-dīpaistathottamaiḥ

19.21

devī kī saṃvatsara-vyāpī pūjā va caṇḍī-pāṭha
viprāṇāṃ bhojanairhomaiḥ, prokṣaṇīyairaharniśam
anyaiśca vividhairbhogaiḥ, pradānairvatsareṇa yā

19.22

prītirme kriyate sā'smin, sukṛt sucarite śrute
śrutaṃ harati pāpāni, tathā''rogyaṃ prayacchati

19.23

rakṣāṃ karoti bhūtebhyo, janmanāṃ kīrtanaṃ mama
yuddheṣu caritaṃ yanme, duṣṭa-daitya-nibarhaṇam

19.24

tasmiñchute vairi-kṛtaṃ, bhayaṃ puṃsāṃ na jāyate
yuṣmābhiḥ stutayo yāśca, yāśca brahmarṣibhiḥ kṛtāḥ

19.25

brahmaṇā ca kṛtāstāstu, prayacchanti śubhāṃ matim
araṇye prāntare vāpi, dāvāgni-pari-vāritaḥ

19.26

dasyubhirvā vṛtaḥ śūnye, gṛhīto vāpi śatrubhiḥ
siṃha-vyāghrānu-yāto vā, vane vā vana-hastibhiḥ

19.27

rājā kruddhena cājñapto, vadhyo bandha-gato'pi vā
āghūrṇito vā vātena, sthitaḥ pote mahārṇave

19.28

patatsu cāpi śastreṣu, saṃgrāme bhṛśa-dāruṇe
sarvā-bādhāsu ghorāsu, vedanā'bhyardito'pi vā

19.29

smaran mamaitaccaritaṃ, naro mucyeta saṅkaṭāt

19.30

'saṅkaṭā' prathamaṃ nāma, dvitīyā 'vijayā' tathā
tṛtīyaṃ 'kāmadā' proktā, caturthaṃ 'duḥkha-hāriṇī'
'sarvāṇī' pañcamaṃ nāma, ṣaṣṭhaṃ 'kātyāyanī' tathā
saptamaṃ 'bhīma-nayanā', 'sarva-roga-harā''ṣṭakam
nāmāṣṭakamidaṃ puṇyaṃ, tri-sandhyaṃ śraddhayānvitaḥ
yaḥ paṭhet pāṭhayed vāpi, naro mucyate saṅkaṭāt
mama prabhāvāt siṃhādyā, dasyavo vairiṇastathā
dūrādeva palāyante, smarataścaritaṃ mama

19.31

śumbha-niśumbha-vadha kī pari-samāpti
ṛṣiruvāca

19.32

ityuktvā sā bhagavatī, caṇḍikā caṇḍa-vikramā
paśyatāmeva devānāṃ, tatraivāntaradhīyata

19.33

te'pi devā nirātaṅkāḥ, svādhikārān yathā purā
yajña-bhāga-bhujaḥ sarve, cakrurvinihatārayaḥ

19.34

daityāśca devyā nihate, śumbhe deva-ripau yudhi
jagad-vidhvaṃsini tasmin, mahogre'tula - vikrame

19.35

niśumbhe ca mahā-vīrye, śeṣāḥ pātālamāyayuḥ

19.36

evaṃ bhagavatī devī, sā nityā'pi punaḥ punaḥ
sambhūya kurute bhūpa! jagataḥ pari-pālanam

19.37

tayaitanmohyate viśvaṃ, saiva viśvaṃ prasūyate
sā yācitā ca vijñānaṃ, tuṣṭā ṛddhiṃ prayacchati

19.38

vyāptaṃ tayaitat sakalaṃ, brahmāṇḍaṃ manujeśvara!
mahā-kālyā mahā-kāle, mahā-mārī-svarūpayā

19.39

saiva kāle mahā-mārī, saiva sṛṣṭirbhavatyajā
sthitiṃ karoti bhūtānāṃ, saiva kāle sanātanī

19.40

bhava-kāle nṛṇāṃ saiva, lakṣmīvṛddhi-pradā gṛhe
saivā'bhāve tathā'lakṣmīrvināśāyopa - jāyate

19.41

alakṣmīṃ kṛṣṇa-varṇāṃ ca, krodhanāṃ kalaha-priyām
kṛṣṇa-vastra-parīdhānāṃ, lauhābharaṇa-bhūṣitām
bhagnāsanasthāṃ dvi-bhujāṃ, śarkarāghṛṣṭa-candanām
sammārjanī-savya-hastāṃ, dakṣiṇa-hasta-sūrpakām
tailābhyaṅgita-gātrāṃ ca, gardabhārohaṇāṃ bhaje
stutā sampūjitā puṣpairdhūpa - gandhādibhistathā
dadāti vittaṃ putrāṃśca, matiṃ dharme gatiṃ śubhām

Linked texts (13)