Pramāṇa · Search · About · API

Shricandi 22

Śrīcaṇḍī 22

Language
Sanskrit

22.1

oṃ rājovāca
bhagavannatārā me caṇḍikāyāstvayoditāḥ
eteṣāṃ prakṛtiṃ brahman! pradhānaṃ vaktumarhasi

22.2

ārādhyaṃ yanmayā devyāḥ, svarūpaṃ yena ca dvija!
vidhinā brūhi sakalaṃ, yathā-vat praṇatasya me

22.3

ṛṣiruvāca
idaṃ rahasyaṃ paramamanākhyeyaṃ pracakṣate
bhakto'sīti na me kiñcit, tavāvācyaṃ narādhipa!

22.4

sarvasyādyā mahā-lakṣmīstriguṇā parameśvarī
lakṣyālakṣya-svarūpā sā, vyāpya kṛtsnaṃ vyavasthitā

22.5

mātu-liṅgaṃ gadāṃ kheṭaṃ, pāna-pātraṃ ca bibhratī
nāgaṃ liṅgaṃ ca yoniṃ ca, bibhratī nṛpa! mūrddhani

22.6

tapta-kāñcana-varṇābhā, tapta-kāñcana-bhūṣaṇā
śūnyaṃ tadakhilaṃ svena, pūrayāmāsa tejasā

22.7

śūnyaṃ tadakhilaṃ lokaṃ, vilokya parameśvarī
babhāra paramaṃ rūpaṃ, tamasā kevalena hi

22.8

sā bhinnāñjana-saṅkāśā, daṃṣṭrāñcita-varānanā
viśāla-locanā nārī, babhūva tanu-madhyamā

22.9

khaḍga-pātra-śiraḥ-kheṭairalaṃkṛta-caturbhujā
kabandha-hāraṃ śirasā, bibhrāṇā hi śiraḥ-srajam

22.10

sā provāca mahā-lakṣmīṃ, tāmasī pramadottamā
nāma karma ca me mātardehi tubhyaṃ namo namaḥ

22.11

tāṃ provāca mahā-lakṣmīstāmasīṃ pramadottamām
dadāmi tava nāmāni, yāni karmāṇi tāni te

22.12

mahā-māyā mahā-kālī, mahā-mārī kṣudhā tṛṣā
nidrā tṛṣṇā caika-vīrā, kāla-rātrirduratyayā

22.13

imāni tava nāmāni, pratipādyāni karmabhiḥ
ebhiḥ karmāṇi te jñātvā, yo'dhīte so'śnute sukham

22.14

tāmityuktvā mahā-lakṣmīḥ, svarūpamaparaṃ nṛpa!
sattvākhyenāti-śuddhena, guṇenendu-prabhaṃ dadhau

22.15

akṣa-mālāṃkuśa-dharā, vīṇā-pustaka-dhāriṇī
sā babhūva varā nārī, nāmānyasyai ca sā dadau

22.16

mahā-vidyā mahā-vāṇī, bhāratī vāk sarasvatī
āryā brāhmī kāma-dhenurveda-garbhā sureśvarī

22.17

athovāca mahā-lakṣmīrmahā-kālīṃ sarasvatīm
yuvāṃ janayatāṃ devyau, mithune svānurūpataḥ

22.18

ityuktvā te mahā-lakṣmīḥ, sasarja mithunaṃ svayam
hiraṇya-garbhau rucirau, strī-puṃsau kamalāsanau

22.19

brahman vidhe viriñceti, dhātarityāha taṃ naram
śrīḥ padme kamale lakṣmītyāha mātā ca tāṃ striyam

22.20

mahā-kālī bhāratī ca, mithune sṛjataḥ saha
etayorapi rūpāṇi, nāmāni ca vadāmi te

22.21

nīla-kaṇṭhaṃ rakta-bāhuṃ, śvetāṅgaṃ candra-śekharam
janayāmāsa puruṣaṃ, mahā-kālī sitāṃ striyam

22.22

sa rudraḥ śaṅkaraḥ sthāṇuḥ, kapardī ca trilocanaḥ
trayī vidyā kāma-dhenuḥ, sā strī bhāṣā svarā'kṣarā

22.23

sarasvatī striyaṃ gaurīṃ, kṛṣṇaṃ ca puruṣaṃ nṛpa!
janayāmāsa nāmāni, tayorapi vadāmi te

22.24

viṣṇuḥ kṛṣṇo hṛṣīkeśo, vāsudevo janārdanaḥ
umā gaurī satī caṇḍī, sundarī subhagā śivā

22.25

evaṃ yuvatayaḥ sadyaḥ, puruṣatvaṃ prapedire
cakṣuṣmanto'nupaśyanti, netare'tadvido janāḥ

22.26

brahmaṇe pradadau patnīṃ, mahā-lakṣmīrnṛpa! trayīm
rudrāya gaurīṃ varadāṃ, vāsudevāya ca śriyam

22.27

svarayā saha sambhūya, viriñco'ṇḍamajījanat
vibheda bhagavān rudrastad gauryā saha vīryavān

22.28

aṇḍa-madhye pradhānādi, kārya-jātamabhūn nṛpa!
mahā-bhūtātmakaṃ sarvaṃ, jagat sthāvara-jaṅgamam

22.29

pupoṣa pālayāmāsa, tallakṣmyā saha keśavaḥ
sañjahāra jagat sarvaṃ, saha gauryā maheśvaraḥ

22.30

mahā-lakṣmīrmahā-rāja! sarva-sattva-mayīśvarī
nirākārā ca sākārā, saiva nānā'bhidhāna-bhṛt

22.31

nāmāntarairnirūpyaiṣā, nāmnā nānyena kenacit

Linked texts (10)