Pramāṇa · Search · About · API

Shricandi 23

Śrīcaṇḍī 23

Language
Sanskrit

23.1

vaikṛtika rahasya
oṃ ṛṣiruvāca
triguṇā tāmasī devī, sāttvikī yā tridhoditā
sā śarvā caṇḍikā durgā, bhadrā bhagavatīryate

23.2

yoga-nidrā hareruktā, mahā-kālī tamo-guṇā
madhu-kaiṭabha-nāśārthaṃ, yāṃ tuṣṭāvāmbujāsanaḥ

23.3

daśa-vaktrā daśa-bhujā, daśa-pādāñjana-prabhā
viśālayā rājamānā, triṃśallocana-mālayā

23.4

sphurad-daśana-daṃṣṭrā sā, bhīma-rūpā'pi bhūmipa!
rūpa-saubhāgya-kāntīnāṃ, sā pratiṣṭhā mahā-śriyaḥ

23.5

khaḍga-vāṇa-gadā-śūlaṃ, pāśa-cakra-bhuśuṇḍi-bhṛt
parighaṃ kārmukaṃ śīrṣaṃ, niścyotad-rudhiraṃ dadhau

23.6

eṣā sā vaiṣṇavī māyā, mahā-kālī duratyayā
ārādhitā vaśī-kuryāt, pūjā-kartuścarācaram

23.7

sarva-deva-śarīrebhyo, yā''virbhūtā'mita-prabhā
triguṇā sā mahā-lakṣmīḥ, sākṣānmahiṣa-mardinī

23.8

śvetānanā nīla-bhujā, suśveta-stana-maṇḍalā
rakta-madhyā rakta-pādā, nīla-jaṅghorunmadā

23.9

sucitra-jaghanā citra-mālyāmbara-vibhūṣaṇā
citrānulepanā kānti-rūpa-saubhāgya-śālinī

23.10

aṣṭādaśa-bhujā pūjyā, sā sahasra-bhujā satī
āyudhānyatra vakṣyante, dakṣiṇādhaḥ-kara-kramāt

23.11

akṣa-mālā ca kamalaṃ, vāṇo'siḥ kuliśaṃ gadā
cakraṃ triśūlaṃ paraśuḥ, śaṅkho ghaṇṭā ca pāśakaḥ

23.12

śaktirdaṇḍaścarma cāpaṃ, pāna-pātraṃ kamaṇḍaluḥ
alaṃkṛta-bhujāmebhirāyudhaiḥ kamalāsanām

23.13

sarva-deva-mayīmīśāṃ, mahā-lakṣmīmimāṃ nṛpa!
pūjayet sarva-devānāṃ, sa lokānāṃ prabhurbhavet

23.14

gaurī-dehāt samudbhūtā, yā sattvaika-guṇāśrayā
sākṣāt sarasvatī proktā, śumbhāsura-nibarhiṇī

23.15

dadhau cāṣṭa-bhujā bāṇa-musale śūla-cakra-bhṛt
śaṅkhaṃ ghaṇṭā lāṅgalaṃ ca, kārmukaṃ vasudhādhipa

23.16

eṣā sampūjitā bhaktyā, sarvajñatvaṃ prayacchati
niśumbha-mathinī devī, śumbhāsura-nibarhiṇī

23.17

ityuktāni svarūpāṇi, mūrtīnāṃ tava pārthiva!
upāsanaṃ jaganmātuḥ, pṛthagāsāṃ niśāmaya

23.18

mahā-lakṣmīryadā pūjyā, mahā-kālī sarasvatī
dakṣiṇottarayoḥ pūjye, pṛṣṭhato mithuna-trayam

23.19

viriñciḥ svarayā madhye, rudro gauryā ca dakṣiṇe
vāme lakṣmyā hṛṣīkeśaḥ, purato devatā-trayam

23.20

aṣṭādaśa-bhujā madhye, vāme cāsyā daśānanā
dakṣiṇe'ṣṭa-bhujā lakṣmīrmahatīti samarcayet

23.21

aṣṭādaśa-bhujā caiṣā, yadā pūjyā narādhipa!
daśānanā cāṣṭa-bhujā, dakṣiṇottarayostadā

23.22

kāla-mṛtyū ca sampūjyau, sarvāriṣṭa-praśāntaye
yadā cāṣṭa-bhujā pūjyā, śumbhāsura-nibarhiṇī

23.23

navāsyāḥ śaktayaḥ pūjyāstadā rudra-vināyakau
namo devyā iti stotrairmahā-lakṣmīṃ samarcayet

23.24

avatāra-trayārcāyāṃ, stotra-mantrāstadāśrayāḥ
aṣṭādaśa-bhujā caiṣā, pūjyā mahiṣa-mardinī

23.25

mahā-lakṣmīrmahā-kālī, saiva proktā sarasvatī
īśvarī puṇya-pāpānāṃ, sarva-loka-maheśvarī

23.26

mahiṣānta-karī yena, pūjitā sa jagat-prabhuḥ
pūjayejjagatāṃ dhātrīṃ, caṇḍikāṃ bhakta-vatsalām

23.27

arghyādibhiralaṅkārairgandha - puṣpaistathā'kṣataiḥ
dhūpairdīpaiśca naivedyairnānā-bhakṣya-samanvitaiḥ

23.28

rudhirāktena balinā, māṃsena surayā nṛpa!
praṇāmācamanīyena, candanena sugandhinā

23.29

sa-karpūraiśca tāmbūlairbhakti-bhāva-samanvitaiḥ
vāma-bhāge'grato devyāśchinna-śīrṣaṃ mahā'suram

23.30

pūjayenmahiṣaṃ yena, prāptaṃ sāyujyamīśayā
dakṣiṇe purataḥ siṃhaṃ, samagraṃ dharmamīśvaram

23.31

vāhanaṃ pūjayed devyā, dhṛtaṃ yena carācaram
kuryācca stavanaṃ dhīmāṃstasyā ekāgra-mānasaḥ

23.32

tataḥ kṛtāñjalirbhūtvā, stuvīta caritairimaiḥ
ekena vā madhyamena, naikenetarayoriha

23.33

caritārdhaṃ tu na japejjapaṃśchidramavāpnuyāt
pradakṣiṇā-namaskārān, kṛtvā mūrdhni kṛtāñjaliḥ

23.34

kṣamāpayejjagad-dhātrīṃ, muhurmuhuratandritaḥ
prati-ślokaṃ ca juhuyāt, pāyasaṃ tila-sarpiṣā

23.35

juhuyāt stotra-mantrairvā, caṇḍikāyai śubhaṃ haviḥ
namo nāma-padairdevīṃ, pūjayet su-samāhitaḥ

23.36

prayataḥ prāñjaliḥ prahvaḥ, prāṇānāropya cātmani
suciraṃ bhāvayed devīṃ, caṇḍikāṃ tanmayo bhavet

23.37

evaṃ yaḥ pūjayed bhaktyā, pratyahaṃ parameśvarīm
bhuktvā bhogān yathā-kāmaṃ, devī-sāyujyamāpnuyāt

23.38

yo na pūjayate nityaṃ, caṇḍikāṃ bhakta-vatsalām
bhasmī-kṛtyāsya puṇyāni, nirdahet parameśvarī

23.39

tasmāt pūjaya bhūpāla! sarva-loka-maheśvarīm
yathoktena vidhānena, caṇḍikāṃ sukhamāpsyasi

Linked texts (9)