Pramāṇa · Search · About · API

Shricandi 24

Śrīcaṇḍī 24

Language
Sanskrit

24.1

oṃ ṛṣiruvāca
nandā bhagavatī nāma, yā bhaviṣyati nandajā
stutā sā pūjitā bhaktyā, vaśī-kuryājjagat-trayam

24.2

kanakottama-kāntiḥ sā, su-kānti-kanakāmbarā
devī kanaka-varṇābhā, kanakottama-bhūṣaṇā

24.3

kamalāṃkuśa - pāśābjairalaṃkṛta - caturbhujā
indirā kamalā lakṣmīḥ, sā śrīrukmāmbujā''sanā

24.4

yā rakta-dantikā nāma, devī proktā mayā'nagha!
tasyāḥ svarūpaṃ vakṣyāmi, śṛṇu sarva-bhayāpaham

24.5

raktāmbarā rakta-varṇā, rakta-sarvāṅga-bhūṣaṇā
raktāyudhā rakta-netrā, rakta-keśāti-bhīṣaṇā

24.6

rakta-tīkṣṇa-nakhā rakta-daśanā rakta-dantikā
patiṃ nārīvānuraktā, devī-bhaktaṃ bhajejjanam

24.7

vasudhaiva viśālā sā, sumeru-yugala-stanī
dīrghau lambāvati-sthūlau, tāvatīva-manoharau

24.8

karkaśāvati-kāntau tau, sarvānanda-payonidhī
bhaktān sampāyayed devī, sarva-kāma-dughau stanau

24.9

khaḍgaṃ pātraṃ ca musalaṃ, lāṅgalaṃ ca bibharti sā
ākhyātā rakta-cāmuṇḍā, devī yogeśvarīti ca

24.10

anayā vyāptamakhilaṃ, jagat sthāvara-jaṅgamam
imāṃ yaḥ pūjayed bhaktyā, sa vyāpnoti carācaram

24.11

adhīte ya imaṃ nityaṃ, rakta-dantyā vapuḥ-stavam
taṃ sā paricared devī, patiṃ priyamivāṅganā

24.12

śākambharī nīla-varṇā, nīlotpala-trilocanā
gambhīra - nābhitrivalī - vibhūṣita - tanūdarī

24.13

su - karkaśa - samottuṅga - vṛtta - pīna - ghana-stanī
muṣṭiṃ śilīmukhāpūrṇaṃ, kamalaṃ kamalālayā

24.14

puṣpa-pallava-mūlādi-phalāḍhyaṃ śāka-sañcayam
kāmyānanta-rasairyuktaṃ, kṣut-tṛṇmṛtyu-bhayāpaham

24.15

kārmukaṃ ca sphurat-kāntiṃ, bibhratī parameśvarī
śākambharī śatākṣī sā, saiva durgā prakīrtitā

24.16

viśokā duṣṭa-damanī, śamanī duritāpadām
umā gaurī satī caṇḍī, kālikā sā'pi pārvatī

24.17

śākambharīṃ stuvan dhyāyañjapan sampūjayan naman
akṣayyamaśnute śīghramanna-pānāmṛtaṃ phalam

24.18

bhīmā'pi nīla-varṇā sā, daṃṣṭrā-daśana-bhāsurā
viśāla-locanā nārī, vṛtta-pīna-payodharā

24.19

candra-hāsaṃ ca ḍamaruṃ, śiraḥ pātraṃ ca bibhratī
eka-vīrā kāla-rātriḥ, saivoktā kāmadā stutā

24.20

tejo-maṇḍala-durdharṣā, bhrāmarī citra-kānti-bhṛt
citrānulepanā devī, citrābharaṇa-bhūṣitā

24.21

citra-bhramara-pāṇiḥ sā, mahā-mārīti gīyate
ityetā mūrtayo devyā, yā khyātā vasudhādhipa!

24.22

jaganmātuścaṇḍikāyāḥ, kīrtitāḥ kāma-dhenavaḥ
idaṃ rahasyaṃ paramaṃ, na vācyaṃ kasyacit tvayā

24.23

vyākhyānaṃ divya-mūrtīnāmabhīṣṭa-phala-dāyakam
tasmāt sarva-prayatnena, devīṃ japa nirantaram

24.24

sapta janmārjitairghorairbrahma - hatyā - samairapi
pāṭha-mātreṇa mantrāṇāṃ, mucyate sarva-kilviṣaiḥ

24.25

devyā dhyānaṃ mayā khyātaṃ, guhyād guhya-taraṃ mahat
tasmāt sarva-prayatnena, sarva-kāma-phala-pradam

Linked texts (11)