[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Shricandi](https://indike.org/pramana/in.purana.sricandi) › 8 # Shricandi 8 Śrīcaṇḍī 8 - **Language:** Sanskrit ### [8.1](https://indike.org/pramana/in.purana.sricandi.8.1) yoga-nidrā hareruktā, mahā-kālī tamoguṇā madhu-kaiṭabha-nāśārthaṃ, yāṃ tuṣṭāvāmbujāsanaḥ daśa-vaktrā daśa-bhujā, daśa-pādāñjana-prabhā viśālayā rājamānā, triṃśallocana-mālayā sphurad-daśana-daṃṣṭrā sā, bhīma-rūpā'pi bhūmipa! rūpa-saubhāgya-kāntīnāṃ, sā pratiṣṭhā mahā-śriyām khaḍga-vāṇa-gadā-śūla-śaṅkha-cakra-bhuśuṇḍi-bhṛt parighaṃ kārmukaṃ śīrṣaṃ, niścyotad-rudhiraṃ dadhau eṣā sā vaiṣṇāvī māyā, mahā-kālī duratyayā ārādhitā vaśī kuryāt, pūjā-kartuścarācaram oṃ ṛṣiruvāca ### [8.2](https://indike.org/pramana/in.purana.sricandi.8.2) devāsuramabhūd yuddhaṃ, pūrṇamabda-śataṃ purā mahiṣe'surāṇāmadhipe, devānāṃ ca purandare ### [8.3](https://indike.org/pramana/in.purana.sricandi.8.3) purandaro vipaścicca, su-śāntiḥ śikhireva ca pañcamaḥ śata-yajñaśca, ṣaṣṭho manojavaḥ smṛtaḥ ojasvī ca baliścaiva, sahasrākṣastathaiva ca śāntistathā vṛṣākṣaśca, ṛta-dhāmā divaspatiḥ śuciścaturdaśaite vai, jñeyā indrā yathā-kramam yadā kadā'pi daityendra!, nāryāste maraṇaṃ dhruvam na narebhyo mahā-bhāga!, mṛtiste mahiṣāsura! tatrāsurairmahā - vīryairdeva - sainyaṃ parājitam jitvā ca sakalān devānindro'bhūnmahiṣāsuraḥ ### [8.4](https://indike.org/pramana/in.purana.sricandi.8.4) tataḥ parājitā devāḥ, padma-yoniṃ prajā-patim puraskṛtya gatāstatra, yatreśa-garuḍa-dhvajau ### [8.5](https://indike.org/pramana/in.purana.sricandi.8.5) yathā-vṛttaṃ tayostad-vanmahiṣāsura-ceṣṭitam tridaśāḥ kathayāmāsurdevābhi-bhava-vistaram ### [8.6](https://indike.org/pramana/in.purana.sricandi.8.6) sūryendrāgnyanilendūnāṃ, yamasya varuṇasya ca anyeṣāṃ cādhikārān sa, svayamevādhi-tiṣṭhati ### [8.7](https://indike.org/pramana/in.purana.sricandi.8.7) svargānnirākṛtāḥ sarve, tena deva-gaṇā bhuvi vicaranti yathā martyā, mahiṣeṇa durātmanā ### [8.8](https://indike.org/pramana/in.purana.sricandi.8.8) etad vaḥ kathitaṃ sarvamamarāri-viceṣṭitam śaraṇaṃ ca prapannāḥ smo, vadhastasya vicintyatām ### [8.9](https://indike.org/pramana/in.purana.sricandi.8.9) itthaṃ niśamya devānāṃ, vacāṃsi madhu-sūdanaḥ cakāra kopaṃ śambhuśca, bhrakuṭī-kuṭilānanau ### [8.10](https://indike.org/pramana/in.purana.sricandi.8.10) tato'ti-kopa-pūrṇasya, cakriṇo vadanāt tataḥ niścakrāma mahat tejo, brahmaṇaḥ śaṅkarasya ca ### [8.11](https://indike.org/pramana/in.purana.sricandi.8.11) anyeṣāṃ caiva devānāṃ, śakrādīnāṃ śarīrataḥ nirgataṃ su-mahat tejastaccaikyaṃ samagacchata ### [8.12](https://indike.org/pramana/in.purana.sricandi.8.12) atīva-tejasaḥ kūṭaṃ, jvalantamiva parvatam dadṛśuste surāstatra, jvālā-vyāpta-digantaram ### [8.13](https://indike.org/pramana/in.purana.sricandi.8.13) atulaṃ tatra tat tejaḥ, sarva-deva-śarīrajam ekasthaṃ tadabhūnnārī, vyāpta-loka-trayaṃ tviṣā ### [8.14](https://indike.org/pramana/in.purana.sricandi.8.14) yadabhūcchāmbhavaṃ tejastenājāyata tanmukham yāmyena cābhavan keśā, bāhavo viṣṇu-tejasā ### [8.15](https://indike.org/pramana/in.purana.sricandi.8.15) saumyena stanayoryugmaṃ, madhyaṃ caindreṇa cābhavat vāruṇena ca jaṅghorū, nitambastejasā bhuvaḥ ### [8.16](https://indike.org/pramana/in.purana.sricandi.8.16) brahmaṇastejasā pādau, tadaṃgulayo'rka - tejasā vasūnāṃ ca karāṃgulyaḥ, kaubereṇa ca nāsikā ### [8.17](https://indike.org/pramana/in.purana.sricandi.8.17) āpo dhruvaśca somaśca, dhavaścaivānilo'nalaḥ pratyūṣaśca prabhāsaśca, vasavo'ṣṭau prakīrtitāḥ tasyāstu dantāḥ sambhūtāḥ, prājāpatyena tejasā nayana-tritayaṃ jajñe, tathā pāvaka-tejasā ### [8.18](https://indike.org/pramana/in.purana.sricandi.8.18) bhruvau ca sandhyayostejaḥ, śravaṇāvanilasya ca anyeṣāṃ caiva devānāṃ, sambhavastejasāṃ śivā ### [8.19](https://indike.org/pramana/in.purana.sricandi.8.19) tataḥ samasta-devānāṃ, tejo-rāśi-samudbhavām tāṃ vilokya mudaṃ prāpuramarā mahiṣārditāḥ ### [8.20](https://indike.org/pramana/in.purana.sricandi.8.20) śūlaṃ śūlād viniṣkṛṣya, dadau tasyai pināka-dhṛk cakraṃ ca dattavān kṛṣṇaḥ, samutpādya sva-cakrataḥ ### [8.21](https://indike.org/pramana/in.purana.sricandi.8.21) śaṅkhaṃ ca varuṇaḥ śaktiṃ, dadau tasyai hutāśanaḥ māruto datta-vāṃścāpaṃ, bāṇa-pūrṇe tatheṣudhī ### [8.22](https://indike.org/pramana/in.purana.sricandi.8.22) vajramindraḥ samutpādya, kuliśādamarādhipaḥ dadau tasyai sahasrākṣo, ghaṇṭāmairāvatād gajāt ### [8.23](https://indike.org/pramana/in.purana.sricandi.8.23) kāla-daṇḍād yamo daṇḍaṃ, pāśaṃ cāmbu-patirdadau prajāpatiścākṣa-mālāṃ, dadau brahmā kamaṇḍalum ### [8.24](https://indike.org/pramana/in.purana.sricandi.8.24) samasta-roma-kūpeṣu, nija - raśmīn divākaraḥ kālaśca datta-vān khaḍgaṃ, tasyāścarma ca nirmalam ### [8.25](https://indike.org/pramana/in.purana.sricandi.8.25) kṣīrodaścāmalaṃ hāramajare ca tathā'mbare cūḍā-maṇiṃ tathā divyaṃ, kuṇḍale kaṭakāni ca ### [8.26](https://indike.org/pramana/in.purana.sricandi.8.26) ardha - candraṃ tathā śubhraṃ, keyurān sarva-bāhuṣu nūpurau vimalau tad - vad, graiveyakamanuttamam ### [8.27](https://indike.org/pramana/in.purana.sricandi.8.27) aṃgulīyaka - ratnāni, samastāsvaṃgulīṣu ca ### [8.28](https://indike.org/pramana/in.purana.sricandi.8.28) viśva-karmā dadau tasyai, paraśuṃ cāti-nirmalam astrāṇyaneka-rūpāṇi, tathā'bhedyaṃ ca daṃśanam ### [8.21-2](https://indike.org/pramana/in.purana.sricandi.8.21-2) amlāna-paṅkajāṃ mālāṃ, śirasyurasi cāparām adadajjaladhistasyai, paṅkajaṃ cāti-śobhanam ### [8.30](https://indike.org/pramana/in.purana.sricandi.8.30) hima-vān vāhanaṃ siṃhaṃ, ratnāni vividhāni ca dadāvaśūnyaṃ surayā, pāna-pātraṃ dhanādhipaḥ ### [8.31](https://indike.org/pramana/in.purana.sricandi.8.31) śeṣaśca sarva-nāgeśo, mahā-maṇi-vibhūṣitam nāga-hāraṃ dadau tasyai, dhatte yaḥ pṛthivīmimām ### [8.32](https://indike.org/pramana/in.purana.sricandi.8.32) anyairapi surairdevī, bhūṣaṇairāyudhaistathā sammānitā nanādoccaiḥ, sāṭṭahāsaṃ muhurmuhuḥ ### [8.33](https://indike.org/pramana/in.purana.sricandi.8.33) tasyā nādena ghoreṇa, kṛtsnamāpūritaṃ nabhaḥ amāyatāti-mahatā, prati-śabdo mahānabhūt ### [8.34](https://indike.org/pramana/in.purana.sricandi.8.34) cukṣubhuḥ sakalā lokāḥ, samudrāśca cakampire cacāla vasudhā celuḥ, sakalāśca mahīdharāḥ ### [8.35](https://indike.org/pramana/in.purana.sricandi.8.35) jayeti devāśca mudā, tāmūcuḥ siṃha-vāhinīm tuṣṭuvurmunayaścaināṃ, bhakti - namrātma - mūrtayaḥ ### [8.36](https://indike.org/pramana/in.purana.sricandi.8.36) dṛṣṭvā samastaṃ saṃkṣubdhaṃ, trailokyamamarārayaḥ sannaddhākhila - sainyāste, samuttasthurudāyudhāḥ ### [8.37](https://indike.org/pramana/in.purana.sricandi.8.37) āḥ kimetaditi krodhādābhāṣya mahiṣāsuraḥ abhyadhāvata taṃ śabdamaśeṣairasurairvṛtaḥ ### [8.38](https://indike.org/pramana/in.purana.sricandi.8.38) sa dadarśa tato devīṃ, vyāpta-loka-trayāṃ tviṣā pādākrāntyā nata-bhuvaṃ, kirīṭollikhitāmbarām ### [8.39](https://indike.org/pramana/in.purana.sricandi.8.39) kṣobhitāśeṣa-pātālā, dhanurjyā-niḥsvanena tām diśo bhuja-sahasreṇa, samantād vyāpya saṃsthitām ### [8.40](https://indike.org/pramana/in.purana.sricandi.8.40) tataḥ pravavṛte yuddhaṃ, tayā devyā sura-dviṣām śastrāstrairbahudhā muktairādīpita - digantaram ### [8.41](https://indike.org/pramana/in.purana.sricandi.8.41) mahiṣāsura - senānīścikṣurākhyo mahā'suraḥ yuyudhe cāmaraścānyaiścaturaṅga - balānvitaḥ ### [8.42](https://indike.org/pramana/in.purana.sricandi.8.42) rathānāmayutaiḥ ṣaḍbhirudagrākhyo mahā'suraḥ ayudhyatāyutānāṃ ca, sahasreṇa mahā-hanuḥ ### [8.43](https://indike.org/pramana/in.purana.sricandi.8.43) pañcāśadbhiśca niyutairasilomā mahā'suraḥ ayutānāṃ śataiḥ ṣaḍbhirvāṣkalo yuyudhe raṇe ### [8.44](https://indike.org/pramana/in.purana.sricandi.8.44) gaja - vāji - sahasraughairanekaiḥ parivāritaḥ vṛto rathānāṃ koṭyā ca, yuddhe tasminnayudhyata ### [8.45](https://indike.org/pramana/in.purana.sricandi.8.45) viḍālākhyo'yutānāṃ ca, pañcāśadbhi rathāyutaiḥ yuyudhe saṃyuge tatra, rathānāṃ parivāritaḥ ### [8.46](https://indike.org/pramana/in.purana.sricandi.8.46) ekaṃ daśaṃ śataṃ caiva, sahasramayutaṃ tathā lakṣaṃ ca niyutaṃ caiva, koṭirburdameva ca vṛndaṃ kharvo nikharvaśca, śaṅkha-padmau ca sāgaraḥ antyaṃ madhyaṃ parārddhaṃ ca, daśa-vṛddhyā yathā-kramam anye ca tatrāyutaśo, ratha - nāga - hayairvṛtāḥ yuyudhuḥ saṃyuge devyā, saha tatra mahā'surāḥ ### [8.47](https://indike.org/pramana/in.purana.sricandi.8.47) koṭi-koṭi-sahasraistu, rathānāṃ dantināṃ tathā hayānāṃ ca vṛto yuddhe, tatrābhūnmahiṣāsuraḥ ### [8.48](https://indike.org/pramana/in.purana.sricandi.8.48) tomarairbhindipālaiśca, śaktibhirmusalaistathā yuyudhuḥ saṃyuge devyā, khaḍgaiḥ paraśu-paṭṭiśaiḥ ### [8.49](https://indike.org/pramana/in.purana.sricandi.8.49) kecicca cikṣipuḥ śaktīḥ, kecit pāśāṃstathā'pare devīṃ khaḍga-prahāraistu, te tāṃ hantuṃ pracakramuḥ ### [8.50](https://indike.org/pramana/in.purana.sricandi.8.50) sā'pi devī tatastāni, śastrāṇyastrāṇi caṇḍikā līlayaiva praciccheda, nija-śastrāstra-varṣiṇī ### [8.51](https://indike.org/pramana/in.purana.sricandi.8.51) anāyastānanā devī, stūyamānā surarṣibhiḥ mumocāsura-deheṣu, śastrāṇyastrāṇi ceśvarī ### [8.52](https://indike.org/pramana/in.purana.sricandi.8.52) so'pi kruddho dhuta-saṭo, devyā vāhana-kesarī cacārāsura - sainyeṣu, vaneṣviva hutāśanaḥ ### [8.53](https://indike.org/pramana/in.purana.sricandi.8.53) niḥśvāsān mumuce yāṃśca, yudhyamānā raṇe'mbikā ta eva sadyaḥ sambhūtā, gaṇāḥ śata-sahasraśaḥ ### [8.54](https://indike.org/pramana/in.purana.sricandi.8.54) yuyudhuste paraśubhirbhindipālāsi-paṭṭiśaiḥ nāśayanto'sura-gaṇān, devī-śaktyupabṛṃhitāḥ ### [8.55](https://indike.org/pramana/in.purana.sricandi.8.55) avādayanta paṭahān, gaṇāḥ śaṅkhāṃstathā'pare mṛdaṅgāṃśca tathaivānye, tasmin yuddha-mahotsave ### [8.56](https://indike.org/pramana/in.purana.sricandi.8.56) tato devī triśūlena, gadayā śakti-vṛṣṭibhiḥ khaḍgādibhiśca śataśo, nijaghāna mahā'surān ### [8.57](https://indike.org/pramana/in.purana.sricandi.8.57) pātayāmāsa caivānyān, ghaṇṭā-svana-vimohitān asurān bhuvi pāśena, baddhvā cānyānakarṣayat ### [8.58](https://indike.org/pramana/in.purana.sricandi.8.58) kecid dvidhā kṛtāstīkṣṇaiḥ, khaḍga-pātaistathā'pare vipothitā nipātena, gadayā bhuvi śerate ### [8.59](https://indike.org/pramana/in.purana.sricandi.8.59) vemuśca kecid rudhiraṃ, musalena bhṛśaṃ hatāḥ kecinnipatitā bhūmau, bhinnāḥ śūlena vakṣasi ### [8.60](https://indike.org/pramana/in.purana.sricandi.8.60) nirantarāḥ śaraugheṇa, kṛtāḥ kecid raṇājire śyenānukāriṇaḥ prāṇān, mumucustridaśārdanāḥ ### [8.61](https://indike.org/pramana/in.purana.sricandi.8.61) keṣāṃcid bāhavaśchinnāśchinna-grīvāstathā'pare śirāṃsi peturanyeṣāmanye madhye vidāritāḥ ### [8.62](https://indike.org/pramana/in.purana.sricandi.8.62) vicchinna-jaṅghāstvapare, petururvyāṃ mahā'surāḥ eka-bāhvakṣi-caraṇāḥ, keciddevyā dvidhā kṛtāḥ ### [8.63](https://indike.org/pramana/in.purana.sricandi.8.63) chinne'pi cānye śirasi, patitāḥ punarutthitāḥ kabandhā yuyudhurdevyā, gṛhīta - paramāyudhāḥ ### [8.64](https://indike.org/pramana/in.purana.sricandi.8.64) nanṛtuścāpare tatra, yuddhe tūrya - layāśritāḥ ### [8.65](https://indike.org/pramana/in.purana.sricandi.8.65) kabandhāśchinna-śirasaḥ, khaḍga-śaktyṛṣṭi-pāṇayaḥ tiṣṭha tiṣṭheti bhāṣanto, devīmanye mahā'surāḥ ### [8.66](https://indike.org/pramana/in.purana.sricandi.8.66) pātitai ratha - nāgāśvairasuraiśca vasundharā agamyā sā'bhavattatra, yatrā'bhūtsa mahā-raṇaḥ ### [8.67](https://indike.org/pramana/in.purana.sricandi.8.67) śoṇitaughā mahā-nadyaḥ, sadyastatra prasusruvuḥ madhye cāsura-sainyasya, vāraṇāsura-vājinām ### [8.68](https://indike.org/pramana/in.purana.sricandi.8.68) kṣaṇena tanmahā - sainyamasurāṇāṃ tathā'mbikā ninye kṣayaṃ yathā vahnistṛṇa-dāru-mahā-cayam ### [8.69](https://indike.org/pramana/in.purana.sricandi.8.69) sa ca siṃho mahā-nādamṛtsṛjan dhuta-keśaraḥ śarīrebhyo'marārīṇāmasūniva vicinvati ### [8.70](https://indike.org/pramana/in.purana.sricandi.8.70) devyā gaṇaiśca taistatra, kṛtaṃ yuddhaṃ mahā'suraiḥ yathaiṣāṃ tutuṣurdevāḥ, puṣpa-vṛṣṭi-muco divi ## Linked texts (13) - [Mārkaṇḍeyapurāṇa](https://indike.org/pramana/in.purana.markandeya.82.4) — Vyāsa, Sanskrit - [Devīmāhātmya](https://indike.org/pramana/in.purana.markandeya.devimahatmya.2.5) — Sanskrit - [Durgārcanasṛti](https://indike.org/pramana/in.niti.dharma.vrata.durgotsava.durgarcanasrti.6.686) — Sanskrit - [Devībhāgavatapurāṇa](https://indike.org/pramana/in.purana.upa.sakta.devibhagavata.5.2.14) — Sanskrit - [Caṇḍīmāhātmya Devīmāhātmya](https://indike.org/pramana/in.purana.candimahatmyadevimahatmya.8.3) — Sanskrit - [Saptaśatīmahāstotra](https://indike.org/pramana/in.sampradaya.general.devistotra.durga.saptasatimahastotra.2.4) — Sanskrit - [Caṇḍīsaptasatī](https://indike.org/pramana/in.purana.upa.sakta.candisaptasati.2.20) — Sanskrit - [Durgāsaptaśatī Devīmāhātmya](https://indike.org/pramana/in.purana.upa.sakta.durgasaptasatidevimahatmya.2.10) — Sanskrit - [Durgārahasya](https://indike.org/pramana/in.purana.upa.sakta.durgarahasya.21.5) — Sanskrit - [Durgāstotra or saptaśatī](https://indike.org/pramana/in.sampradaya.general.devistotra.durga.durgastotraorsaptasati.14.5) — Sanskrit - [Devīmāhātmya or Saptaśatīcaṇḍī](https://indike.org/pramana/in.purana.devimahatmyaorsaptasaticandi.14.5) — Sanskrit - [Devīmāhātoriginal](https://indike.org/pramana/in.purana.upa.sakta.devimahatoriginal.5.5) — Sanskrit - [Durgāpāṭha](https://indike.org/pramana/in.purana.durgapatha.1.p35) — Vyāsa, Sanskrit --- Source: [https://indike.org/pramana/in.purana.sricandi.8](https://indike.org/pramana/in.purana.sricandi.8) · Pramāṇa