Halasyakhanda 15
Hālāsyakhaṇḍa 15
- Language
- Sanskrit
15.1
yassaptasindhūn svapurastaṭāke devyāssa māhūya mudaṃ cakāra
taṭātakāyā madhurāpurīśaḥ pāyātsa vastrasundarapāṇḍya īśaḥ
iti śrīskānde mahāpurāṇe agastyasaṃhitāyāṃ
hālāsyamāhātmye saptasāgarānayanaṃ nāma
trayodaśo'dhyāyaḥ
caturdaśo'dhyāyaḥ
10. malayadhvajakāñcanamālyoḥ saptasamudrasnapanam
ṛṣayaḥ -
evamabdhiṣvāgateṣu devadevena śambhunā
tataḥ kṛtaṃ kiṃ bhagavanbho brūhi munipuṅgava
15.2
agastyaḥmalayadhvajabhūpālaṃ mahendrārdhāsanasthitam
āhūya darśayāmāsa śaṅkaro līlayā yayā
15.3
tāṃ līlāmatha vakṣyāmi devadevasya dhūrjaṭeḥ
kalyāṇaśailadhanuṣaḥ kadambavanavāsinaḥ
15.4
samudreṣvāgateṣvasmin pure pāṇḍyeśvaraḥ śivaḥ
ghoṣaṃ teṣāṃ ca saptānāṃ devaḥ śrutvā dayānidhiḥ
15.5
antaḥpurādvinirgatya tayā devyā samanvitaḥ
nandyādigaṇanāthaiśca rājaveṣadharo haraḥ
15.6
taṭākatīraṃ samprāpya pūgapunnāgamaṇḍitam
vilokya sindhūn sahasā svaśaktyā samupāgatān
15.7
taṭātakāṃ tadā kāntaḥ prītipūrvamavocata
āgatānabdhisaṅghātān paśya kānte manohare
15.8
tava priyaṃ karomīti manīṣā'sti sadā mama
snāhīti sāgareṣvāśu jananīṃ te taṭātake
15.9
uktvā snātāṃ samālokya tata āgaccha me'ntikam
itīśo'bhīṣṭadastasyāḥ preṣayitvā ca tāṃ tataḥ
15.10
samudrāṇāṃ mahāvegaṃ stambhayitvā svaśaktitaḥ
tattīrapuṣpavāṭīṣu puṣpāṇi surabhīṇi ca
15.11
samāhṛtya samāghrāya vandibhiḥ parivanditaḥ
punnāgapūgamandāralāṅgalīcūtasaṃvṛte
15.12
succhāye susame deśe mandamārutasevite
kālakṣepaṃ ca kurvāṇaścacāra parayā mudā
15.13
taṭātakā ca lokānāṃ jananī sarvamaṅgalā
śivājñāṃ śirasā dhṛtvā mahāprītisamanvitā
15.14
tathā kariṣya ityuktvā sadyassamprāpya mātaram
evaṃ provāca tanvaṅgī jitakokilakūjitā
15.15
mātastvaṃ sāgare snātumekasminnanu vāñchasi
devaprasādātsarve'tra sāgarā āgatāḥ kṣaṇāt
15.16
yathecchamāśu snāhīti tadvākyamamṛtopamam
śravaṇāñjalinā pītvā putrīṃ devīṃ taṭātakām
15.17
samāliṅgya samāghrāya mañjulaṃ mukhamaṇḍalam
prītā kāñcanamālā''sīt kṛtārthā'smīti vai dhiyā
15.18
punaḥ paurāṇikān sarvān samāhūya sma pṛcchati
samudrasnānaniyamaṃ kathayantu vicakṣaṇāḥ
15.19
iti te tadvacaśśrutvā śāstrārthaṃ ca vicārya ca
evaṃ sarve'vadan prājñāssarvaśāstraviśāradāḥ
15.20
vitanturasahāyā no sāgare snātumarhati
sahātmajena bhartrā vā snātumarhati nānyathā
15.21
sarvābhāve tu govatsaṃ snāyādādāya sāgare
iti teṣāṃ vacaśśrutvā punaratyanta duḥkhitā
15.22
taṭātakāmukhaṃ vīkṣya kiṃ kartavyaṃ mayeti ca
uktvā kāñcanamālā sā'tiṣṭhattūṣṇīṃ śucārditā
15.23
śrutvā taṭātakā devī śokayuktaṃ ca tadvacaḥ
jananīśokanāśāya deveśaṃ prāpya satvaram
15.24
vācā madhurayā prāha svanāthaṃ somabhūṣaṇam
putreṇa bhartrā'pyathavā sāgarasnānamīritam
15.25
paurāṇikairvitantūnāmiti proktaṃ purātanaiḥ
putro jananyā naivāsti bhartā svargaṃ gataḥ purā
15.26
kiṃ kartavyaṃ tayedānīṃ vadopāyajña śaṅkara
taṭātakāyāstadvākyaṃ sarvaśāstrārthatatvavit
15.27
sarvajño devadeveśaḥ śrutvā yuktamiti bruvan
kṣaṇamātraṃ vicintyātha bhaktacittārtibhañjanaḥ
15.28
nijakarmānurūpāttasvarūpādbhutatejasam
diviṣṭhamapi taṃtātamindrasyārdhāsane sthitam
15.29
malayadhvajabhūpālaṃ sasmāra sahasā śivaḥ
tadānīmavaśo bhūtvā malayadhvajabhūpatiḥ
15.30
vimānamadhiruhyāśu svakīyamatinirmalam
vyomni sandṛśyamānassan janaissarvaissuvismitaiḥ
15.31
adho'dhaḥ kṣaṇataḥ prāpya kramāddevāntikaṃ gataḥ
devo'pyabhimukhaṃ gatvā praṇāmaṃ tena vai kṛtam
15.32
vācā nirudhya cotthāpya hyāliṅgacātipriyeṇa ca
taṭātakāyāḥ putryāśca darśayitvā mahaujasam
15.33
janakañca tayā tasmai kārayitvā namaskriyām
śvaśrūṃ kāñcanamālāñca malayadhvajabhūbhujā
15.34
śvaśureṇa ca saṃyojya vidhinā saptasāgare
snānañca kārayāmāsa tatkṣaṇāttau ca dampatī
15.35
divyāmbaradharau divyagandhasragbhūṣaṇojjvalau
sārūpyaṃ śivayorlabdhvā śivalokātsamāgatam
15.36
vimānañca samāruhya hālāsyeśaśivājñayā
prāsādaṃ mūlaliṅgasya hemasthūpivirājitam
15.37
darśanāt bhuktidaṃ puṃsāṃ muktidaṃ sarvasiddhidam
punaḥ punaśca saṃvīkṣya namaskṛtyā''dareṇa ca
15.38
brahmāṇḍordhvagataṃ nityaṃ śivalokañca jagmatuḥ
tadā taṭātakā dṛṣṭvā tuṣṭāvātmeṣṭadaṃ śivam
15.39
mannātha jagatāṃ nātha satyajñānasukhātmaka
pāhi māṃ parameśāna parātpara namostu te
15.40
matprasādakriyādakṣa dakṣādhvaravināśana
madanāntaka madbhartaḥ madājñāvaśavartaka
15.41
nigamāgamasantānanilayāṅghrisaroruha
bhuvana traya saṃbhūtitrāṇa saṃhāra kāraṇa
15.42
haṃsarūpāmbujāvāsadarśanāgamyamastaka
sūkarākāramurajiddṛṣṭāṃghrisaroruha
15.43
namo bhagavate tubhyaṃ sarvātmāntaravartine
puratrayavināśāya purandaranutāṃghraye
15.44
namaḥparābarajñāya parātparatarāya ca
paramātmasvarūpāya namaḥ kaivalyadāyine
15.45
namastrailokyanāthāya namaścandrārdhadhāriṇe
namo bhasitabhūṣāya namaścarmāmbarāya ca
15.46
namaḥśyāmārdhadehāya namo nāgendrahāriṇe
namo mahyambuvāyvagnipuṣpavatvātmamūrtaye
15.47
namo vedāntavedyāya namo nādāntarūpiṇe
namo nārāyaṇārcyāya namo narakahāriṇe
15.48
jīvanmuktipurīśāya śrīkaṇṭhāya namo'stu te
namo hālāsyanāthāya śaṅkarāya namo namaḥ
15.49
ityātmanāyakaṃ stutvā śivaṃ devī taṭātakā
viśeṣataśca tasyāpi labdhvā'nugrahamīśituḥ
15.50
pūrṇasarveṣṭakāmā sā tvantarvatnī babhūva ca
śrīmān sundarapāṇḍyeśo devo hālāsyanāyakaḥ
15.51
pālayāmāsa ṣaṭṣaṣṭisahasraṃ śaradāṃ mahīm
etadadbhutakṛtyaṃ tadālokyāścaryasaṃyutāḥ
15.52
tuṣṭuvurhṛṣṭamanaso madhurāpuravāsinaḥ
ākarṇya daśamīṃ līlāṃ yaḥ prīṇāti narottamaḥ
15.53
manorathāniha prāpya dehānte ca divaṃ labhet
sureśvarārdhāsinavāsinaṃ nṛpaṃ
saṃyojya yaḥ kāñcanamālayā tayā
sārūpyamuktiṃ pradadau ca tābhyāṃ
tasmai namo nīpavaneśvarāya
Linked texts (3)
- Hālāsyairmāhātmya — Sanskrit
- Hālāsyamāhātmya — Sanskrit
- Hālālasyamāhātmya — Sanskrit