Pramāṇa · Search · About · API

Halasyakhanda 27

Hālāsyakhaṇḍa 27

Language
Sanskrit

27.1

pañcaviṃśo'dhyāyaḥ
19. madhurāyāḥ catuṣkūṭapuratvam
agastyaḥ -
ativṛṣṭibhayāttatra hālāsyeśaḥ kṛpālayaḥ
yayā tu līlayā sarvāñjanān rakṣati tāṃ parām

27.2

līlāṃ śṛṇudhvaṃ viprendrā adbhutāmaghanāśinīm
payodhiṃ pītasalilaṃ dṛṣṭvā cāmarṣasaṃyutaḥ

27.3

kopoparaktanetrānto bhrukuṭībhīṣaṇānanaḥ
vrīlāviṣādasammiśravitrastākulamānasaḥ

27.4

puṣkalāvartakādyāṃśca caturo meghanāyakān
āhūya varṣatetyāha varuṇo'tīva vismitaḥ

27.5

tadā jaladharāssadhvastadājñājātasādhvasāḥ
gaṇairaśeṣairmeghānāṃ digantarasamāgataiḥ

27.6

udajṛmbhanta sahasā madhurāyāssamīpataḥ
ghanīkṛtaghanacchannamandhīkṛtadigantaram

27.7

sahasā durdinamabhūtsarveṣāṃ taddinaṃ tadā
capalājātasaṃjātadhvāntābhāvātiveginī

27.8

ambudānyonyasaṃghaṭṭajātāgni kaṇasaṃkulā
nirantaritanirghoṣabadhirīkṛtadiggajā

27.9

sphāṭikastambhasaṅkāśaparisrutapayaḥprabhā
ghanāghanopalavyūhakalitāvaniṇḍalā

27.10

ativṛṣṭiśca sañjātā sarveṣāmatibhītidā
tāṃ dṛṣṭvā pūrvavaddhītā janāssarve sapārthivāḥ

27.11

aśeṣajagadādhāramahāliṅgasvarūpiṇaḥ
samastabhayasaṃhartuḥ sarvasampatpradāyinaḥ

27.12

śrīmaddhālāsyanāthasya sannidhiṃ prāpya satvaram
praṇipatya prārthayaṃśca devadevaṃ ghṛṇānidhim

27.13

sundareśa kṛpārāśe samastaduritāpaha
ativṛṣṭayā punarbhītānasmān pāhi kaṭākṣataḥ

27.14

bhaktānāmatibhītānāṃ vākyamākarṇya śaṅkaraḥ
śapharākṣīpatiśśambhuḥ śambarāriharo haraḥ

27.15

śaraṇyassarvabhūtānāṃ candrārdhakṛtaśekharaḥ
ativṛṣṭibhayaṃ hartuṃ vicintyopāyamadbhutam

27.16

purā''tmīyakapardāttu samudbhūtān balāhakān
pītāśeṣābdhisalilāṃścaturaḥ kāmarūpiṇaḥ

27.17

āhūyājñāpayāmāsa parito madhurāpurīm
kūṭākāreṇa yūyaṃ tu caturdikṣu susaṅgatāḥ

27.18

praveśo varṣadhārāṇāṃ yathā na syāttathā'tra tu
kurvantu suviśālāṅgā yojanadvayamātrataḥ

27.19

ityājñāṃ devadevasya labdhvā meghāḥ kapardajāḥ
puṣkalāvartakādīnāṃ varṣatāṃ varuṇājñayā

27.20

ambhodānāmadhobhāge maṇḍapākāratāṃ gatāḥ
vṛṣṭiṃ nirodhayāmāsurmahatīmatibhīṣaṇām

27.21

atha vītabhayāssarve madhurāpuravāsinaḥ
rājñā'bhiṣekapāṇḍyena saha prāpuḥ parāṃ mudam

27.22

meghairupari saṃchannaṃ paritastu parisrutaiḥ
jalapravāhaiḥ sphaṭikabhittyākārairvirājitam

27.23

abhraṃlihairgopuraiśca śikharaiḥ stambhasannibhaiḥ
sumahanmaṇḍapamiva hālāsyakṣetramābabhau

27.24

dṛṣṭvā vismayamāpannā amarāścāsurā narāḥ
gandharvāḥ kinnarā yakṣāssiddhavidyādharā api

27.25

bhogāpavargakāmā ye hālāsyakṣetravāsinaḥ
sukhena nivasanti sma sarve bhītivivarjitāḥ

27.26

varuṇo'pi tadā bhītacetāssatvaramambudān
nivārayāmāsa tato vṛṣṭirmāstviti māstviti

27.27

atha tannagarīvāsasarvabhūtabhayāvahā
ativṛṣṭirvinaṣṭā'bhūccapalājātabhīṣaṇā

27.28

tadā'tibhaktisaṃyuktā devādyāste stutiṃ vyadhuḥ
śrīhālāsyeśvara tvantu jagatpālanatatparaḥ

27.29

bhavatpādaśaraṇyānāmasmākaṃ sādhvasaṃ kutaḥ
iti bruvanto deveśaṃ namaskṛtya punaḥ punaḥ

27.30

sarve te nirbhayā jagmuḥ praśaṃsanto maheśvaram
pāśī bhaktiprītibhītivismayaiśca samanvitaḥ

27.31

jalodaramahāvyādhivināśaṃ kāmayan hṛdi
paripūrṇaṃ paraśivaṃ hālāsyeśaṃ hṛdi smaran

27.32

sadyassamprāpa hālāsyaṃ samudraissaritāṅgaṇaiḥ
sarasvatīsuranadīkālindīpramukhairapi

27.33

pāśahastairanekeśca parivāraiśca daivataiḥ
śuddhasphaṭikasaṅkāśairdhavalāmvarabhūṣaṇaiḥ

27.34

anyairnānāvidhairdevairvidvadbhirmunipuṅgavaiḥ
hemapadmākare srau saṅkalpya ca sacelakam

27.35

jalodaramahāvyādhistadaivāsya sma naśyati
laghukāyo'tihṛṣṭassan tīrthāduttīrya vāsasī

27.36

paridhāya samuddhūlya bhasmanā'tha kaḷebaram
rudrākṣāṇāṃ ca mālābhiralaṅkṛtya tripuṇḍrakaiḥ

27.37

sumīnākṣīṃ santoṣya samastairupacārakaiḥ
pradakṣiṇakrameṇātha gatvā divyavimānagam

27.38

śivaliṅgaṃ samālokya praṇipatyāvaśo'bhavat
utthāyātha mahābhaktyā kartumarcāṃ samudyataḥ

27.39

gaṅgādyāḥ puṇyasaritaḥ puṇyatīrthodakāni ca
prāyacchannabhiṣekāya hemakumbhoddhṛtāni ca

27.40

ambarāṇi tu divyāni susūkṣmāṇyamalāni ca
bhūṣaṇāni vicitrāṇi makuṭapramukhāni ca

27.41

candanāni sugandhīni puṣpāṇi surabhīṇi ca
bahūni bhinnavarṇāni kalpavṛkṣastadā dadau

27.42

sājyagugguludhūpañca sājyavartipradīpakam
pañcāmṛtaṃ pañcagavyaṃ phalāni vividhāni ca

27.43

paramānnādibhaktāni kāmadhenussma yacchati
evaṃ saparyāsāmagrīsampanno yādasāṃ patiḥ

27.44

vidhinā''rādhayāmāsa trividhaiḥ karaṇaiśśivam
atha muktāphalaissthūlaiḥ bhārgavākārasannibhaiḥ

27.45

sahasranāmabhiḥ pūjya stutiṃ kartuṃ pracakrame
hālāsyāṣṭakam
varuṇaḥkalyāṇaśailaparikalpitakārmukāya
maurvīkṛtākhilamahoraganāyakāya
pṛthvīrathāya kamalāpatisāyakāya
hālāsyamadhyanilayāya namaśśivāya

27.46

bhaktārtibhañjanaparāya parātparāya
kālābhrakāntigaralāṅkitakandharāya
bhūteśvarāya bhuvanatrayakāraṇāya
hālāsya madhyanilayāya namaḥ śivāya

27.47

bhūdāramūrtiharimṛgyapadāmbujāya
haṃsābjasambhavasudūrasumastakāya
jyotirmayasphuritadivyavapurdharāya
hālāsya madhyanilayāya namaḥśivāya

27.48

kādambakānananivāsakutūhalāya
kāntārdhabhāgakamanīyakalebarāya
kālāntakāya karuṇāmṛtasāgarāya
hālāsyamadhyanilayāya namaḥ śivāya

27.49

viśveśvarāya vibudheśvarapūjitāya
vidyāviśiṣṭaviditātmasuvaibhavāya
vidyāpradāya vimalendravimānagāya
hālāsya madhyanilayāya namaḥśivāya

27.50

sampatpradāya sakalāgamamastakeṣu
saṅghoṣitātmavibhavāya sadāśivāya
sarvātmane sakaladuḥkhasamūlahantre
hālāsyamadhyanilayāya namaḥ śivāya

27.51

gaṅgādharāya garuḍadhvajavanditāya
gaṇḍasphuradbhujagakuṇḍalamaṇḍitāya
gandharvakinnarasugītaguṇādhikāya
hālāsyamadhyanilayāya namaḥ śivāya

27.52

pāṇiṃ pragṛhya malayadhvajabhūpaputryāḥ
pāṇḍyeśvaraḥ svayamabhūtparameśvaro yaḥ
tasmai jagatprathitasundarapāṇḍyanāmne
hālāsyamadhyanilayāya namaśśivāya

27.53

gīrvāṇadeśikagirāmapi dūragaṃ yad
vaktuṃ mahattvamiha ko bhavataḥ pravīṇaḥ
śambho kṣamasva bhagavaccharaṇāravinda -
bhaktyā kṛtāṃ stutimimāṃ mama sundareśa

27.54

iti stutvā sundareśaṃ namaskṛtya punaḥ punaḥ

27.55

bhaktiṃ parāṃ gato bhūtvā tasthāvañjalimācaran
athāvirāsīdbhagavān kadambavananāyakaḥ

27.56

sāmbassarvajagannāthaḥ sarvābharaṇabhūṣitaḥ
svacchamauktikasaṅkāśabhūṣaṇāṃbaramūrtimān

27.57

bhāsayanpāṇibhirvahnivarābhayaparaśvathān
varuṇo'pi vilokyeśaṃ manovācāmagocaram

27.58

vismṛtya karma kartavyaṃ citranyasta iva sthitaḥ
maheśaḥ prāha vārīśaṃ varaṃ varaya vāñchitam

27.59

ityuktassa tu vārīśo vandanāni vidhāya ca
bhagavan pārvatīnātha mayā'jñānavaśena tu

27.60

samudrajalavarṣābhyāmaparādhadvayaṃ kṛtam
kṣamasva karuṇāsindho kālakūṭaviṣāpaha

27.61

tvalliṅgadarśanātpūrvaṃ mahāvyādhirjalodaraḥ
madīyaśśāntimagamattvattīrthasya suvaibhavāt

27.62

iti tasya vacaśśrutvā prāha hālāsyanāyakaḥ
tavāstu sarvasaubhāgyaṃ nityamṛddhivalānvitam

27.63

paṭhatāṃ tvatkṛtaṃ stotraṃ hālāsyāṣṭakamiṣṭadam
caturvidhārthasiddhyai ca japyaṃ pāpaśāntaye

27.64

ityuktvā'ntardadhe devaḥ paripūrṇaḥ paraḥ śivaḥ
varuṇo'tha mahāliṅgaṃ natvā tuṣṭāva vai punaḥ

27.65

namaśśivāya devāya kadambavanavāsine
mahādevāya śarvāya nīlakaṇṭhāya śūline

27.66

kapāline karālāya śamyākasragdharāya ca
yogāya yogagamyāya yogināṃ pataye namaḥ

27.67

kālāya kālahantre ca kālarūpadharāya ca
kalādharakalāśobhimaulaye kāmadāyine

27.68

śivāya śūṟāya śubhapradāya śubhrābhrayūthadyutaye namo'stu
nārāyaṇāmbhoruhasambhavādyairvandyāya devairnalinānanāya

27.69

aparādhaṃ kṣamasveti punaḥ punarudīrayan
atyantatuṣṭahṛdayassvālayaṃ varuṇo yayau

27.71

tadāprabhṛti hālāsyaṃ catuṣkūṭapuraṃ viduḥ
ekonaviṃśā līleyaṃ catuṣkūṭa pureśituḥ 70
caturvidha pumarthānāṃ dāyinī gaditā mayā
śṛṇoti ya imāṃ līlāṃ varṣarakṣaṇalakṣitām

27.72

jīvanvarṣasahasrāṇi bhuvi putrādisaṃyutaḥ
so'nubhūya mahatsaukhyamante sāyujyameṣyati

Linked texts (5)